Ani Bi Asino Yekova Na Kikiipaha

1. (a) Gini asino Yekova rengbe Kristano ka makiapai tipaha? (b) Waigu ani ka gbia undo ti wisigo asino Mbori?

HO ONI aberã ni tipa asino Yekova, gini asinoko naye ku berãroni yo? Badungu rani rengbe ka berãpa agu asinoko nga nyemuse, rurupai, tatamana, na ome. Ono wa vura duhe wo, gupai ini ani he nga Yekova na dungu wene asinoko ti ni. Nirengo, ka i tangara asino Yekova, si ima susa 40, na si nibasasa i aima sakapai tipaha rogo gaani awaraga yo. Ka oni wirikipai tipa agi asinoko re nibasasa watadu oni na gaoni aborokporo, oni inipai tipa Yekova nibakerehe. Rogo gini agene rengbe ani ngbaha ka gbia undo tigi wisigopai re? Si rengbe ka kiiso gaani tambuahe tipa gu Barani du ngbangbaturũ yo. Wa gaani tambuahe tipa Yekova nikaa kio, kinawo a ani kadu na nyemu ka mbeda naako na kini wiriki ko.—Yos. 23:8; Tam. 73:28.

2. (a) Oni funga kpiapai tipa wai rengbe ani ka kiiso gaani tambuahe tipa asino Yekova? (b) Ginipai ani nika makiapai tipaha?

² Ono tie, ginihe padu na ‘tambuahe’ watadu bi he na kikiipaha ayugoho? A wa ani nika mangasunge nani ane, si nayugopa bihe na kikiipaha. Bi he na kikiipaha rengbe kaa sona yeye. Ani yugungo ho na kpiapai: Ho ani agia fuõ riahe ni, gu nyemu he du tirani nakio, fuo gure ani ki asadihe, na niyangaraha ani ki mangihe nitirani. Teketeke a, ani nabi sino Yekova na kikiipaha ni inido tirani nani, kini berẽkuriihe, na kini wirikihe rogo gaani raka yo. (Ef. 5:1) Gi kekeapai re na agu ngbefuoho ue nika kiiso gaani tambuahe tipa agu asino Mbori nga gu ani naaberãnga paha dedede ya ti bangua asinoko. Ani makianga pai tipaha nibasasa nga: Ginipai si ayugoho? Wai Yekova ayugoho? Na wai rengbe ani ka wirika Yekova niyugo ani agi asinoko re?

YEKOVA ZAAZA NA ABORO

3, 4. (a) Wai rengbe ani ka ringbisapa gu boro du zaaza? (b) Waigu Yekova akido rani nga ko zaaza na aboro?

³ Ani furanga tipa gu sinoko nga du zaaza. Wai rengbe ani ka ringbisapa gu boro du zaaza na aboro? Ani rengbe ka ya ‘Ní nga gu boro duna weneringise, duna regbo beni tipa aboro, na du taata tipa aboro nifura na ní.’ Ani rengbe ka ino singia boro zaaza na aboro watadu ní wo te, ho ani adegaturani ni kuti agu apai ní apekaha na ki kparia gani mangapai, wai du kpakpuni yo, na wai ní aringbisapai nibeni watadu kura apai.

⁴ Waigu Yekova ayugo gupai nga ko zaaza na aboro? Wa vura duhe nga Yekova nga gu Bakusiahe duna tanduapai dũ, ko nakido rani nga ko na kakaka nyemu ka degatuko kuti gaani akpee na ka karagapai kutini. (Oni gedi Atambuahe 145:18; Yesaya 30:18, 19.) Ani rengbe ka kpara fuko nigbangaha ti ai regbo watadu rogo ai ba. Ani rengbe ka fura naako zanga gunde na ki ini gupai nga rago agberãnga tiko te. (Tam. 65:2; Yak. 1:5) Fugo Mbori nasakapai tipa ko rogo gu gene aboro agiatiyo agia nani tipa ka yugo gupai nga ko zaaza na aboro. Nikpiapai, gu bake papara Atambuahe nangia Davide akepai nga, “bangiri Yekova du ti” rani na ‘kumbabeko nasongoda’ rani. (Tam. 34:15; 63:8) Gu nebi nangia Yesaya aringbisipa Yekova kuti babanda akandoro ki yaa: “Ko adúngura wiri akandoro ku beko, ki nitindi ra ti ngbaduko.” (Yes. 40:11) Ani berẽnga gipai re! Yekova naida ani mbedi naako wakina wiri kandoro ti ngbadu babanda ru. Nangba wai du Yekova nizaaza Barani! Wai rengbe ani ka wirika Yekova rogo gi bangiriba re?

GU SINO NYAKIPAHA GBE

5. Tipagine duhe ti ni ninyanyakipa pai abaakumba du zaaza na aboro?

⁵ Barambeda kusayo, i asana aDezire Yekova rogo dungu apapara zegino nga, “Gini sino bakumba ngba gbe tironi?” Badunguyo akaragapai nga, “Du zaaza na aboro.” Nirengo, aKristano dunduko si aida i sonosi gi sino re, ono gbe, abaakumba du si aida i du zaaza na aboro. (Yes. 32:1, 2) Kura wirina ape ndu gupai ri abi gi sino re na nyanyakipaha ti ni ki yaa: “Ka bakumba du zaaza na aboro, si rengbe ka sarani ani gbia undo ti kura wene asino kadu tiní.” Agi afugo re nga kina boro rengo. Ono ginipai nasa boro ní du zaaza na aboro?

6. Gu banguapai rengbe ka sa boro ní du zaaza na aboro nga gine?

⁶ Gu banguapai nasa boro ní du zaaza na aboro nga ní du na nyemu kura aboro. Ka si du nga bakumba nangera angerafuo aboro na kidu na nyemu kafu tiní tipa awirinani, i nakparia gipai re akparia kutini. (Mk. 10:13-16) Carlos du garãko 12 ayaa: “Mi nidu na ngbarago kaa bi abaakumba ba dunguratise yo i nimomu ti ngbayo na kidu na weneringise.” Rengo ngaha nga, si aidanga bakumba ya gbua ní zaaza na aboro te, ono si naida ní yuguhe rogo gani mangapai yo. (1 Yo. 3:18) Waigu rengbe ní ka mangaha?

7. Waigu pa vo karete nga ga bakere dunguratise asa gupai nga ani tona fugo na aboro, na ginipai rengbe ani ka wirikaha ti gipai re?

⁷ Oni berẽnga kurii gipai re. Barambeda kusayo, wirina avo gako karete nga ga bakere dunguratise ho ko aga ni na tiyara kurogo gako ringara. Ho gu boro nangerafuo aboro tiyara yo abi gi karete re ni na agu afugo ti ni nga ‘Ga Kindo Ye!’ ko aya fu gu wirina re wee, “Ii, si ye aye, na ani nika fura tipaha kusa.” Kusa, ko afura na gi kumba re ko kidu na ngbarago ka dia gaani amagazini. Badungu rani kinaho pai wagu re aima manga furani. Tipagine duhe ti ni fu aboro taata i tona fugo na ani ho ani avo gu karete ni nga ga bakere dunguratise? Bambiko si wa ka i ya si naya fu aboro wee: “Ka mo gundenga ti fura nami ya. Mo sana re tipa wari mi andu kuhoni.” Karete nga guhe nasa aboro i ini gupai nga ani na nyemu ka fura naayo riipa gaani idapase. Wakina gure a, si naida agu aKristano nga abaakumba yugu kpia gupai nika ya fu akurayo aidipase wee: “Ka mo gundenga ka fura nami ya.” Gine nga bete agi apai re?

8. Waigu abaakumba ayugo gupai nga i na nyemu aboro tiyo, na wai du gipai re na ome kurii dungurati?

⁸ Si rengbe kadu nga asino aringara nibakiakia, ono dedede, ho ani amoma ni ti ngbarani fu awirinarani, kini fu sene fuyo zaaza, ani nayugo gupai fuyo nga ani nakpinyemuyo akpi. Da rengbe ka tona gipai re? Ani bingo gu kpiapai Yesu amoihe. Matayo afura tipa gu dunguratise Yesu amangihe na gako abawiriki ki yaa, Yesu “ki ye koyo du yo ni ki gumba pai fu yo.” (Mt. 28:18) Teketeke a, abaakumba areme nandu fuo awirinayo aidipase na ki nifura naayo. Wai rengbe gipai re kadu na ome kurii dungurati? Wirina ninazakigene du garãri 88 ayaa: “Gupai ninaangba tire fu abaakumba nga ho mi arimo ni ku Bambu Kindo yo, i namoma ti ngbayo na kini gumba wene afugo ngarasaro fere.” Gu kurari ayaa: “Boro rengbe ka bihe wa toonipai, ono ho bakumba adia re ni kugume ba dunguratise yo na mongo ti ngbani, si nadu nibakerepai fere.”

YEKOVA ZAAZA NA KIDU NA REGBO BEKO TIPA ABORO

9, 10. (a) Gini wene kpiapai Yekova namoihe furani? (b) Wai rengbe abaakumba kafu gayo regbo fu aboro?

⁹ Si tie ziazia nga, ani arengbanga kadu zaaza na aboro ka ani adunga na regbo tipa yó ya te. Yekova nga wene kpiapai rogo gipai re. “Ko aturã nga na ani wa sa te.” (Amo. 17:27) Gu bangisa gene rengbe abaakumba kafu gayo regbo ngbaha fu awirina gu sosonoyo na gu parangayo nga kaa fura naayo mbata fu adunguratise na tifuoho. Wirina nibazakigene ayaa: “Ho bakumba asana re ni nga mi wai na ki ru ka degatuko tipa gi karagapai, mi nabihe nga pare gu nyaki anyaka.” Wirinarani irisi Yekova tipa agarã wa 50 ayaa: “Agu abaakumba nadia regbo kaa fura nami tifuo adunguratise nasa re mi bihe nga pare kuari.”

¹⁰ Si nirengo nga, agu aKristano nga ababanda akandoro na kina kura asunge beyo si aida i mangihe. Ono tie, si naida i moihe nigayo bambata sásá ba dunguratise yo nga kaa ngera fuo akandoro.

YEKOVA AKPARANGA ABORO TE

11, 12. (a) Pa zanga kparakapai dagba aboro nakoda gine? (b) Waigu du Yekova nga kpiapai rogo zanga kparaka aboro yo?

¹¹ Zanga kparaka aboro nga gu kura bawene sino Yekova dagba agu akuraha. Pa zanga kparaka aboro nayugo ginipai? Si nakodapa mangapai fu aboro kina sa watadu zanga ngbe na kina kura aboro. Zanga duna kparakaro nakoda apai ue nga: berãpase na mangapai. Tipagine si aida agi apai re ti ni dunduko? Ka boro adunga na kparakapai rogo gani berãyo ya, si rengbe ka sa ní ní mangipai fu aboro kina sa. Rogo Vovo Ndika, gu fugo nga “akpara nga aboro te,” rogoyo nzunzu nga gu boro angbenga na kina kura aboro ya. (Amo. 10:34) Sidu, gu boro akparanga aboro ya namangapai fu aboro kina sa, angianga kuti tama yó watadu agu apai du tipa yó ya, ono kina wai du yó.

¹² Yekova nga wene kpiapai mbiko ko akparanga aboro te. Fugoko naya ko “akpara nga aboro te,” na ko “akparakanga pai dagba aboro” a te, “NW.” (Oni gedi Amokedi 10:34, 35; Pa Fu Rugute ni Ue he 10:17.) Gupai namangi ti rago Moize nayugo gipai re.

13, 14. (a) Agu awiri Serofada bisue nangia adee agbiatiyo na gini kpakarapai? (b) Waigu Yekova ayugu gupai nga ko akparanga aboro te?

¹³ Mbata fu aYisaraere rimi kurogo Ringara Mokido, adevurukporo bisue adu rogo kpakarapai. Gayo kpakarapai angia gine? I aini gupai nga si aidi i fu gu dagbangua fuyo nangia ga bayo wakina kura aYisaraere a. (Geda 26:52-55) Ono tie, bayo nangia Serofada ningbatunga Manase aima kpi. Ringbisihe kuti sinoyo, si aidi i fu gako dagbangua fu agu awiriko kangia akumbagude, ono kina adegude naadu beko. (Geda 26:33) Wa ko aadunga na akumbagude beko ka di gako dagbangua ya, ya mo si aidi i fuhe fu agumeko zanga agu awiriko nangia adegude di kumbo bayo?

¹⁴ Agi adegude bisue re andu fuo Moize na ki sanako ki yaa: “Tipagine ka i di rimo barani ti ni dagba rikayo yo, bambiko akumbagude adu nga be ko te?” I azungodi he ki yaa: “Mo fu ũkumbo fú rani dagba awirina barani yo.” Ya mo Moize aya, ‘Wiripai ho mi nika ariaha te mbiko andiko du duwo’? Oó, ko ‘andu na gayo pai kubara bangiri Yekova.’ (Geda 27:2-5) Waigu Yekova amangipai sa gipai re? Ko aya fu Moize wee: “Agu awiri Serofada nga ade gumba rengo; mo afú ringara fu yo a dagba awirina bayo yo agu ahe ka ngia ga bayo mo fú he fu yo.” Yekova amangipai bakere ti gure. Ko asa gipai re ni ndiko, ki rugu Moize nga: “Ka boro kpi, ka awirini adu nga ho nga akumbagude ya, oni ki fu gani ringara fu kina gu wirini nga de.” (Geda 27:6-8; Yos. 17:1-6) Natona tigu regbo, agu adee nangia aYisaraere naagbiatiyo na ngbatungapai wagu re, i anaafu ũkumbo afu fuyo.

15. (a) Waigu Yekova amangapai fu gako aboro, gbe aguyo adunga gene beyo ya? (b) Gini kura akpiapai nga ga Ziazia Kekeapai nayugo gupai nga Yekova akparanga aboro te?

¹⁵ Nangba wai Yekova amangipai rogo weneringise yo zanga kparakaro! Yekova amangipai fu agi adee gene adunga beyo re ya na irisa, a wa ko amangihe fu kura Yisaraere apai adu fuyo wenengai. (Tam. 68:5) Gere gbua nga pai sa dagba gu badungu apai du rogo Ziazia Kekeapai nayugo gu rengopai nga: Yekova namangapai fu gako amoyambu dunduko zanga kparakaro.—1 Sam. 16:1-13; Amo. 10:30-35, 44-48.

ANI RENGBE ARENGBA KA WIRIKA YEKOVA

16. Wai rengbe ani ka sonosa gu sino nga kaa bi aboro kina sa?

¹⁶ Wai rengbe ani ka wirika gu sino Yekova nga zanga kparaka aboro? Oni tingidi gupai nga, zanga kparaka aboro nakoda apai ue. Kina gu ka ani adunga na kparakaro ya, si ka sa gupai nga ani mangi fu aboro kina sa. Rengo ngaha nga, ani dunduko ninaaberã gupai nga ani akparanga aboro te. Ono tie, si nawira wa oni ima rengba ka ida kuti gupai nga, taatapai ngaha ani ini gu bipai du ani nani tipa aboro te. Ono ginipai rengbe ani ka mangaha ka ino singia ani akparanga aboro te? Sidu, ho Yesu aida ka ino gupai ni aboro aagumbaha tipa ko, ko asana mbembedi abakureako ki yaa: “Aboro niya da nga Wiri boro?” (Mt. 16:13, 14) Si angba gbe ka ani wiriki Yesu rogo gi gene re. Oni rengbe ka sana bete abakurearoni nga aguyo rengbe ka ino singia rimoroni niwenehe mbiko oni akparanga aboro te. Ka singia ní ya furoni wee, si nawira wa oni nangba na kura ngbatunga kisusi, watadu oni nangba na kina airakumuko, ginipai ka oni mangihe? Oni kpari kakaka fu Yekova tipa gi gaoni bipai re, ki zungodi ko tipa ko undo roni oni aria gaoni sino tipa wa ka oni du na gu sinoko tironi nga ka zanga kparaka aboro.—Mt. 7:7; Koro. 3:10, 11.

17. Rogo gini agene rengbe ani ka manga fu aboro kina sa?

¹⁷ Rogo gu dungurati nga ga aKristano, ani nayugo gupai nga ani na nyemu ka wirika gu sino Yekova nga kaa bi aboro kina sa nimanga ani fu awirinarani dunduko rogo irisa gbiati gu weneringise nga ga nyemuse. Nikpiapai, ho si adani ti dia aboro kugume, si naida ani di awirinarani aidipase dunduko kugume, kodihe na aguyo du apai tipa yó kia ti gaani, airarungo, awirinyaure, watadu adekurugbo. (Oni gedi AGaratio 2:10; Yakoba 1:27.) Kurigure, rogo gu gaani sunge nga ga tungusapa Kindo, ani natungusa wene pangbanga fu ngbatunga aboro dunduko kodihe na ayeaye a. Nairiwo gu ngbarago du ani nani nga ani na agu awaraga du mburuhe rii Ziazia Kekeapai rogo bete afugo wa 600! Ani nirengo na momu berani ka yugo gupai nga ani akpara aboro te!

18. Wai rengbe oni nitironi ka yugo gaoni tambuahe tipa agu asino Yekova nga du zaaza na aboro na zanga kparakaro?

¹⁸ Nirengo, a wa ani ka dia regbo kaa berãkurii wai du Yekova zaaza na aboro na kini mangiyo kina sa, si nika kiiso gaani tambuahe akiiso tipa ko. Sangbana gipai re nga si nika sarani ani wiriki asinoko wenengai, kini yuguhe rogo gaani mangapai na akuarani aidipase na fu agu aboro ani atungusapai fuyo.