Ya mo si Naida Pambori Nimangi Rurupai?

Sylvia namangasunge ngerafuo aborokaza ayaa: “Mi atona nduge ku sukuru yo na agu aboro naaya i nga aboro pambori. Wa si avura duwo, i anaadĩ asada na kini vu kere agundö. Pambori aadunga na ome kurii gayo raka te.”

Kumba du rimoko nga Lionel ayaa: “Gimi abadiasunge naape ziree na kaa ya i nawoka awoka baraho i awokanga ni ya. Pambori nga gupai du kina rimoho riyo ono i amanganga gupai si apehe te.”

Pambori na ome kurii gu raka nga ga dungu aboro tipa ruru mangapai te. Dungu aboro areme na kina “kpia sinombori” ono i nati “kangu tandu he.” (2 Timoteo 3:5) Abarumbatayo rogo pambori amaanga wene kpiapai te, na i afunga gu undo nga ga toro fu gayo akandoro tipa ruru mangapai te. Si du nga ndu gupai kura aboro aberãha ti ni nga sunge ti Mbori na gu ngbatunga raka i araka te.

GINIPAI ZIAZIA KEKEAPAI AYUGOHO?

Ziazia Kekeapai nape gupai nga rago naagberã agbera ti Mbori na kini ngbatiko, sidu, gaani mangapai na nyanyakipaha fuko. Ho agu aYisaraere nadumbata anisamungu ni kuti Mbori, i ‘anaarungosi ko’ watadu ka imisa ngbaduko. (Atambuahe 78:40) Ono tie, bakere ‘ngbarago du ngbangbaturũ yo’ ho boro asa tiní ni ti gani gbegberẽ mangapai. (Ruka 15:7) Ho boro abi asino gu Barani du ngbangbaturũ yo ni na kikiipaha, gani nyemuse tipa ko nasona, si ki sani ní ní nikpinyemu agu apai ko akpinyemuhe na kini sogo agu apai ko asogaha.​—Amosa 5:15.

GINIPAI DU TIPA ADEZIRE YEKOVA TIGAYO?

Waraga pangbanga sa Amerika yo ayaa: “ADezire Yekova naundo aborokporo i duna wene pagume dagbayo, na kini undo kura aboro, na kini sa aboro niwene aboro ringara.” Si ape kurapai nga: “I nga agu aboro nabi agu arugute du tipa ruru mangapai na nyanyakipaha. I idi kuti gupai nga vugundö, kpibuda, baake, sunge banambara, na kodaba kumba na kurani nagbarasa boro rogo toro yo.”​—Deseret News.

Wai wirikapai tipa asinombori naundo aDezire Yekova? Silvia ani nifura tipa ri mbata ayaa: “Biriki ima nge rogo gu basunge nga ga ngerafuo aborokaza. Si ima rengba kadu taata boro tona ka mangaha. Ono pa ino mi gu bipai du Yekovaa nani naundo re tipa mi nimangi rurupai. Mi na ngbarago mbiko mi nazereda berãre yo.” Silvia ima ida kuti gupai nga raka ringbisihe kuti gari pambori aima aria gari raka.