Ya mo Pambori ho si Aida Mo Kido Kutini?

Ka si du nga pambori amangi ro gbegberẽ, si rengbe kadu foro nikpakarapai mo kido kuti ai pambori. Ono si naida mo duna kido nga pambori kinaho si aida ani kido kutini. Ho Yesu aduni auru kpotosende, ko adungura apefuoko na ki yugupai fuyo i raki ringbisihe kuti ga Mbori arugute. Ndikidi apefuo Kristo kina ti ni namanga asadatise tipa kaa raka ringbisihe kuti gu bangua arugute nga ga aKristano. Wari rengbe mo ka gbiayo ni?

Estelle, ani nifura tipa ri rogo gu kekeapai ye mbata fu gere ayaa: “Mi atona wirika Ziazia Kekeapai ti gu regbo mi atona wisigopai na aDezire Yekova. Si adu fere taata mi girogo gu veresi du rogo Yoane 8:32, nayaa: ‘Oni aína rengo aina, ki ra ni rironi be rengo.’”

Ray, ani nifura tipa ko mbata ayaa: “Pa wisigo mi Ziazia Kekeapai na aDezire Yekova naasa re mi ini gupai nga anga Mbori naye na arungo si nimangi aboro te. Mi aduna ngbarago ka ino gupai nga, wa vura duhe nga Mbori na kina wene ndupai beko tipa ka mbugene fu gbegberẽ apai awere, ko kidohe tipa ka diaha barambeda kusayo.”

Si tie ziazia nga, si nikpakarapai boro mangi rurupai baraho duhe ni nga dungu aboro amanganga rurupai te. Ono si nga gupai rengbe arengba ka manga. Badungu aboro nakpinyemu i undoyo tipa i girogo Ziazia Kekeapai yo na kini mangi gupai si agumbaha. Si nga ndu gupai aDezire Yekova awisigo Ziazia Kekeapai na amirioni aboro rogo zegino dunduko zanga i tumo tipaha. Rogo aposo dunduko, badungu aboro nawirika gupai nzunzu Ziazia Kekeapai ayugoho. Nisangbana gipai re, si nambedisa yó na Bakusiyo, na kini sayo i raki wene raka.a

Ka mo gbia aDezire Yekova berewe, si angba gbe ka mo sanayo ka ino ndu gupai i akido ti ni kuti gayo pambori. Mo wisigi gayo yugopai na agu apai du tipa yó. Tifuo gure, mo ki diberã nitiro singia pambori ho rengbe mo ka kido kutini.