Ka Oni ‘Zinginga Kuti Yekova Ya’

1, 2. Tipagine si aidanga ani bira Yekova ti ni tipa agu akpakara apai nagbia aboro areme ya? Oni funga kpiapai.

ANI ya mo nga gu boro ni ima dia gbanga regbo kurogo rogatise na mo na ngbarago. Ono rogo kura uru sa, mo yego ku kporo ki bi gupai nga aũkporo dunduko nigbandaka gbandakaha. Ambisa, akiti na asaani dunduko du ni kuadi kuadihe, na aira ni sipisipihe. Ya mo mo rengbe ka su napaya ki ya, “Tipagine diare namangi gipai re ti ni?” Watadu mo sanahe ki ya, “Da nimangi gipai re?” Zanga kapa, gu ue sanahe re ka ye ku berãro yo. Tipagine? Bambiko mo ima ino gupai nga ka diaro mangingo pai wagu re te.

² Areme, zegino ima hi be agu ahe nabirikosi he nga zuũ na wasiwasi mangapai. Wadu ani ni abawiriki Ziazia Kekeapai, ani ima ino gupai nga Yekova nasa agi apai re si mangi te. Ko ambakadi gi zegino re si duni bawene paradizo. (Bam. P. 2:8, 15) Yekova nga Mbori nyemuse. (1 Yo. 4:8) Pa wisigo ani Ziazia Kekeapai ima undo rani ani ini gu ndikidi ndupai naye na kpakaraapai kurogo zegino. Gu kura boro ho fuo Satana Bakitingbanga, nga “mbori gi zegino” re te.​—Yo.14:30; 2 Kor. 4:4.

3. Wai rengbe ani ka tona du na iraira bipai tipa agu apai namanga rani?

³ Ono tie, ani arengbanga ka bira Satana tipa gu gbegberẽ apai namanga rani dunduko te. Tipagine pe ani gipai re ti ni wo? Bambiko gu kura apai kinaho naye ni sangbana gaani aingahe. (Oni gedi Pa Fu Rugute ni Ue he 32:4-6.) Wa vura duhe nga ani ima rengba ka ida kuti gipai re, gaani zangarengba rengbe ka aria berãrani na ki sarani ani ndu ngba gu gene rengbe ka ndu na ani sa kerepai. (Snz. 14:12) Rogo gini gene? Ani ima rengba ka tona bira Yekova kuba gupai nga ani bira tirani watadu Satana tipa agu apai ani agbiatirani na ni. Na si ima rengba ka sarani ani ‘zingi kuti Yekova.’​—Snz. 19:3.

4, 5. Wai rengbe Kristano ka ‘zinga kuti Yekova’?

⁴ Ya mo rengo du nga ani ima rengba ka ‘zinga kuti Yekova’? Wenepai kangiaha furani ka ani mangihe wo te. (Yes. 41:11) Ani arengbanga ka diabe Yekova te. Bakeapai sa aya: “Bero ni wiri guruhe tipa ka takpata na Mbori.” Rengo ngaha nga, ani arengbanga ka ya ani zingi kuti Yekova te. Ono Asanza 19:3 naya ga boro pa mungo naye “na ni sa gbarasapai, ngbaduni yo nizingi kuti Yekova.” Rengo ngaha nga, boro ima rengba ka zinga kuti Yekova ngbaduniyo. Gipai re rengbe ka yugo tihe rogo gu gene ani amanga rukutu apai ngbaha. Gure wa ka i ya ani na kpipai kuti Yekova. Ni sangbana gipai re, gu boro re rengbe ka mbu dungurati watadu ka zanga undo agu ambakadapai du tipa iriso Yekova.

⁵ Ginipai rengbe ka sarani ani ‘zingi kuti Yekova’? Wai rengbe ani ka zanga zio ti gi gbina re? Si ni nyanyakipa pai tipa ani ini karagapai kuti agi asanahe re. Nirengo, gipai re nabipa gaani pagume na Mbori!

GINIPAI RENGBE KA SARANI ANI ‘ZINGI KUTI YEKOVA’?

6, 7. Tipagine aYisaraere atona ka kpakana Yekova ti ni ti rago Moize?

⁶ Ginipai rengbe ka sa ga Yekova moyambu ni tona ka kpakana ko ngbaduniyo? Ani bingo apai bisue na ki wisigingo agu akpiapai nga ga Ziazia Kekeapai nayugo wai kura aboro ati kurogo gi gbina re mbata kusayo.​—1 Kor. 10:11, 12.

⁷ Gu gbegberẽ afugo nga ga kura aboro. (Oni gedi Pa Fu Rugute ni Ue he 1:26-28.) Ho Yekova akusi aYisaraere ni be sunge kanga Ezipeta yo, ko aye na agberãngbi bawe kurii aEzipeto na ki gbarasi Faro na gako abasovura ku Zamba Baime yo. (Gate 12:29-32, 51; 14:29-31; Tam. 136:15) Ga Mbori aboro ambakaditiyo tipa ka rimo kurogo Ringara Mokido. Ono wa si avura du wo, aYisaraere atona kaa kpakana ko ti gi kere regbo re. Ginipai naaye na gi zanga idapase re? Si adu wo mbiko gu gbegberẽpai gu gbegberẽ abamoirago apehe i akedi yó i ndu ka bi gu ringara re. (Geda. 14:1-4) Sangbanaha angia gine? Mbori aidanga ha fuyo i rimi kurogo “gu wene ringara re te.” (Pa Rug. 1:34, 35) Ya mo ani rengbe ka mbu gu gbegberẽ afugo nga ga kura aboro tipa si rungburasi gaani idapase watadu ka sarani ani tona ka kpakana Yekova tipa wai ko amangapai na ani?

8. Ginipai naasa ga Mbori aboro ti rago Yesaya i tona ka kpakana ko tipa gu kpakarapai i adu rogoho?

⁸ Rungo gbiati fudifudiapai rengbe ka ba gberãrago tirani. (Oni gedi Yesaya 8:21, 22.) Ti rago Yesaya, agu aboro naadu Yuda yo agbiatiyo na kpakaraapai. Avurayo ake yó kirikiri. Dunguyo adu na gomoro mbiko zingo riahe. Ono gupai nanyaki gbe nga gayo idapase adu rogo kpakarapai. (Amosa 8:11) Kuba gupai nga i sana Yekova tipa ko undo yó, i atona ka ‘gberã ngbayo yo’ fu gayo bakindo na fu gayo Mbori. Nirengo, i abira Yekova tipa gayo kpakaraapai. Ka si du nga kpakarapai gbia rani, ya mo ani rengbe ka tona ka ya ku kpotoraniyo we, ‘Yekova adu wari ho kpakarapai agbia re ni?’

9. Tipagine aYisaraere asonosi gbegberẽ bipai ti ni ti rago Yezekere?

⁹ Ani ainongo gu rengo du tipa apai dunduko te. Wa agu aYisaraere naadu ti rago Yezekere ainongo gu rengo naadu tipa apai dunduko ya, i bihe nga “ru nga” ga Yekova agene te. (Yeze. 18:29) Gure adu wa ka i sarangbanga Mbori, na i abihe nga gayo apai ru kisusi gako na i asaringbanga ko kuti gu wiri tooni inohe i adu na ni. Kangia kura aregbo kinaho ani aruganga tirani na agu apangbanga du rogo Ziazia Kekeapai yo ya watadu agu apai namanga rogo gaani raka yo, ya mo ani rengbe ka berã ku kpotorani yo nga ga Yekova agene ‘arunga’ te?​—Eyo. 35:2.

10. Wai rengbe boro ka pekafuo ga Adamu gbegberẽ kpiapai?

¹⁰ Ani nabira kura aboro tipa gaani aingahe. Natona ti gu regbo aboro aenge, Adamu abira Mbori tipa gako ingahe. (Bam. P. 3:12) Wa Adamu avura ino gupai nga kuo ga Mbori aNdiko naye na ambusa, ko abira Mbori abira tipa gako ingahe. Gupai nzunzu ko aaida ka gumbaha nga Mbori afu gbegberẽ dee fuko. Natona ti gu regbo re kada ku areme, dungu aboro aima pekafuo ga Adamu kpiapai kaa bira Mbori tipa gayo aingahe. Si naida ani sana tirani nga, ‘Ya mo gu gberarago du mi na ni tipa gimi aingahe rengbe ka sa re mi bihe nga ru nga ga Yekova arugute te?’

11. Ginipai rengbe ani ka wirikaha be Yona?

¹¹ Ani naberã kina pa tirani. Gu nebi nangia Yona aadunga na wene bipai tipa ga Yekova diaberã ka inapai fu aboro Nineve te. (Yona 4:1-3) Tipagine? Ko aabaka bangiriko nga aboro nika biko ni ziree nebi ka si du nga gupai ko aatungusaha si amanganga te. Yona aaberã kina pa gberã rimo ko kisusi pa agu aboro naadu Nineve yo. Ya mo pai wa gure rengbe ka manga rani ani ‘zingi kuti Yekova’ nga tipagine ko anyasanga riipa gi zegino re ti ni ya? Ka si du nga ani aima digo nitungusipai tipa dungu agarã nga ga Yekova uru ima mbeda, ya mo ani rengbe ka zinga kuti Yekova ka aboro asawia rani ni tipa tungusa ani gupai Ziazia Kekeapai agumbaha?​—2 Pet. 3:3, 4, 9.

WAI RENGBE ANI KA ZANGA ‘ZINGA KUTI YEKOVA’

12, 13. Ka si du nga ani tona ka bi gupai nga gu kura ga Yekova amangapai arunga te, ginipai si aida ani mangihe?

¹² Ginipai rengbe ani ka mangaha ka si du nga ani tona ka bi gupai nga kura ga Yekova mangapai arunga te? Si aidanga ani mangipai wo te. Na gipai re berãrani yo, ani bingo apai bisue nga gu rengbe ka undo rani ka ani mbunga gberãrago si sarani ani tona ka bira Yekova ya.

¹³ Oni nyakasi gaoni pagume na Yekova. Ani ima rengba ka ne gu sino nga ga zinga kuti Mbori ni nyakasa ani gaani pagume na ko. (Oni gedi Asanza 3:5, 6.) Si naida ani kido kuti ko. Si aidanga ani bi tirani nga ani ru gaani apai kisusi te. (Snz. 3:7; Batu. 7:16) Gipai re nika undo rani ka ani bira nga ko ti gu regbo kerepai namangi rani ya.

14, 15. Ginipai nika undo rani ka gu gbegberẽ afugo nga ga kura aboro du nga na ome kurirani ya?

¹⁴ Ka ani mbunga gu gbegberẽ afugo nga ga kura aboro si gbarasi rani ya. Agu aYisaraere naadu ti rago Moize adu na dungu ndupai apai beyo tipa ka ida kuti gupai nga Yekova nika undoyo aundo i rimi kurogo Ringara Mokido. (Tam. 78:43-53) Ono ho i agi gu gbegberẽ pangbanga ni gu gbegberẽ abamoirago naadu bawe aye na ni, i atingidanga pa “gako tandu te.” (Tam. 78:42) Ka ani aaberãkurii ga Yekova mangapai na kini tingidipa gu wene apai ko amangihe furani, ani nyakasi gaani pagume anyakasa na ko. Ni sangbana gipai re, ani mbunga gu gbegberẽ afugo nga ga kura aboro si turũsi rani ti ko te.​—Tam. 77:11, 12.

¹⁵ Ginipai rengbe ka manga ka ani du na gbegberẽ bipai tipa akuarani aidipase? Ngbatungapai wagu re rengbe ka gbarasa gaani pagume na Yekova. (1 Yo. 4:20) Ho aYisaraere atona ka kpakana Arona ni tipa gu sunge Yekova afuhe fuko, Yekova abihe nga ko du i akpakana ko angianga Arona ya. Wakina gure a, ka ani tona ka kpakana agu aboro Yekova amangasunge nayo tipa ka nungusa gako riigbu areme, gure du wa ani na kpakana kina boro Yekova.​—Eb. 13:7, 17.

16, 17. Ginipai si aida ani tingidihe ho du ani ni na kpakaraapai?

¹⁶ Oni tingidi gupai nga, Yekova naye na kpakaraapai kutirani te. Wa vura duhe nga agu aYisaraere naadu ti rago Yesaya aima sa tiyo kusayo ti Yekova, Yekova aida ida ka undo yo. (Yes. 1:16-19) Ka ani vura gbiatirani na gini riko ngbatunga apai vurũ, ani ima rengba ka gbia wasa tipa ino ani gupai nga Yekova naberã parani aberã na ko naida ida ka undo rani. (1 Pet. 5:7) Nirengo, ko nakido rani nga ko nika fu ome afu rani tipa ani hipai.​—1 Kor. 10:13.

¹⁷ Kangia aboro namanga rani na irairapai, ani tingidi gupai nga, anga Yekova du namanga rani na ni te. Kinawo si adu tipa gu ruru kumba nangia Eyobo. Yekova aidanga na irairapai te; ko nakpinyemu rurupai. (Tam. 33:5) Ani du wa gu bakurea Eyobo nangia Eriu naya: “Ka manga gbegberepai, si turũ ti Mbori, na ti gu Ko du na tandu apai dũ, ka manga irairapai.” (Eyo. 34:10) Kuba gupai nga Yekova naye na gbegberẽ apai sa rani, ko nafu “wene gamahe dunduko” furani.​—Yak. 1:13, 17.

18, 19. Tipagine si aidanga ti ni ani tikö kuti Yekova ya? Oni funga kpiapai.

¹⁸ Ka ani tikönga kuti Yekova ya. Mbori nga rengberengbe boro, na gako aberãpai du kuari ti gaani. (Yes. 55:8, 9) Si naida umbasitise undo rani ani idi gupai nga gaani giarogopaiyo kusende ti gako. (Rom. 9:20) Dedede, ani naainongo gu rengo du tipa apai dunduko te. Nirengo, oni ima rengba ka ida kuti gu sanza naya: “Gu boro nagumba pa gani pai mbata, ni wiri kina ruru boro, daho gu kurani ka ye ni ka wisiga ni.”​—Snz. 18:17.

¹⁹ Ka si du nga bawene bakurearani ho namanga gupai ani agianga tirani na ni ya watadu gupai ani nabihe nga si aidanga ní mangihe wo te, ya mo ani kitingbaanga ní nga ní mangi irairapai? Anga ani asadi ka ino gupai sa ní ní mangipai wagu re te, gbe ka si du nga ani ima ino ní tipa dungu agarã? Ka ani amangapai na agu awirinarani nga kpakpa aboro rogo nyemuse, kinawo a si aida ani du na bakere kido kuti gu Barani du ngbangbaturũ yo, du gako agene na aberãpai kuari gbe ti gaani.

20, 21. Tipagine duhe ti ni furani ni nyanyakipa pai tipa ani bira kina gu boro si aida ani bira ní?

²⁰ Ani ini gu boro si aida ani bira ní. Tipagine duhe ti ni wo? Si ima rengba kadu nga agu apai nagbia rani si naye kina berani. Ka si du nga gupai re ye kina berani si naida ani idi gaani ingahe aida. (Gara. 6:7) Si aidanga ani asadi ka bira Yekova tipa akpakarapai te. Tipagine? Ani bingo gi kpiapai re: Torombiri ima rengba ka zubo nyanyaki ato. Kangia ba kamaha zubo na ni kisusi arugute wai si aida i zubo na ni ti nugonugo gene na ki dugbagaha, ya mo si naida i bira bambakadihe tipa gu béno re? Oó, wagusa te! Wakina gure a, Yekova ambakadi rani na gu ranirii nga ga siapai. Ono ko ima undo rani ki fu agu arugute rengbe ka undo rani tipa ani mangi wene diaberã. Si aidanga ani bira Bakusirani tipa gu irairaapai ani amangaha te.

²¹ Rengo ngaha nga, anga agu apai dunduko nagbia rani si naye be kina gaani aingahe te. Gu kura apai kinaho namanga ni sangbana “rago gbiakuti mamu.” (Batu. 9:11) Ni yangarapai tie, ka bangirani go nga ti gupai nga Satana Bakitingbanga nga gu bambata boro naye na gbegberẽ apai ya. (1 Yo. 5:19; Yugo. 12:9) Ko nga vurarani angianga Yekova ya.​—1 Pet. 5:8.

ONI BANDA PA GAONI PAGUME NA YEKOVA

22, 23. Ginipai si aida ani tingidihe ka ani du na bakere gberarago bambiko gaani akpakarapai?

²² Ho ani agbiatirani ni na akpakarapai, ani tingidipa gu kpiapai nga ga Yosua na Kareba. Tipa yó tigayo, i aadunga wa gu kura abamoirago naadu bawe te, i aye na wene pangbanga fu aboro. (Geda 14:6-9) I adu na idapase kuti Yekova. Wa si avura duwo, i angbuo vuru ngbakungba tipa agarã 40 na kura aYisaraere wa sa. Ya mo aYosua na Kareba akpakanahe watadu ki zingi nga tipagine Yekova nambu yó ti ni i ngbuo na awiri aYisaraere wa sa? Oó. I akido kuti Yekova. Ya mo i agbia maku? Ii. Dungu agu aYisaraere i guari nayo Ezipeta yo akpiki ngbakungba yo, ono kina yó ue nangia gu gbinza aboro narimi kurogo Ringara Mokido. (Geda 14:30) Sidu, ani rengbe ka gbia ga Yekova amaku ka “he amáka nga rani” ti manga gupai ko akpinyemuhe ya, kina wai si adu tipa yó.​—Gara. 6:9; Eb. 6:10.

²³ Ka si du nga mo na bakere gberãrago mbiko kpakaraapai, gu zangarengba nga kura aboro, watadu gu nga gamo nitiro, ginipai si aida mo mangihe? Mo berẽkurii gu wene asino nga ga Yekova. Mo ni berẽkuriipa gu maabangirise Yekova nafuhe foro. Mo sana tiro nga, ‘Ka i nayanga mbiko Yekova ya, wari ka mi nidu ni awere?’ Mo nye kina patiko, na ka mo zinginga kutiko ya!