Oni Du Ni “Akanga” Fu Yekova

1. Oni ringbisinga gu bipai du aboro na ni tipa sunge kanga na gu du rogo ARomo 6:22.

GU SUNGE kanga nga ga aKristano kia ti gu bipai du aboro na ni tipa akanga. Ho aboro afura ni tipa kanga, gupai nayara ku berãyo yo nga gu boro du kurani kurii ní, i arungosi ní, na i amanganga ni wenengai ya. Ono Fugo Mbori nafura tipa gu sunge kanga kina boro aida nitini tipa ka mangasunge fu Bairani. Nirengo, ho gu mokedi nangia Pauro afura ni fu agu aKristano naadu rogo bambata sa kama agarã tipa du ni “akanga fu Mbori,” ko aangarasa yó i mangisunge fu Mbori mbikopa du nyemuko tiyo. (Rom. 6:22) Gi sunge kanga re nakoda gine? Wai rengbe ani ka zanga du ni akanga fu Satana gbiati gi gako zegino re? Na gini amaku du fu agu akanga du ni ruru yo fu Yekova?

“MI NAKPI NYEMU BAIRARE”

2. (a) Ginihe na ni rengbe ka sa gupai nga gu kanga nga Yisaraere mbupa gani ranirii? (b) Tipagine i anaakora kina tuni ti ni?

² Agu aNdiko Mbori afuhe fu aYisaraere naundo rani tipa ani ini gini ngbatunga sunge kanga Mbori aida ani mangihe. Gu kanga na ningia Ebere, ndiko ani idihe funi ní gbia ranirii fuo manga ní sunge tipa agarã saba. (Gate 21:2) Ono tie, tipa gu kanga na nikpinyemu bairani na kini idi ka nye na ni kaa mangasunge, Yekova aima fu arugute tipaha. Bairani ani ye na ni ku ngbadimo watadu kupati ngua ngbadimo na ki koro tuni na kofodi. (Gate 21:5, 6) Si nawira wa ndupai ani du kinaho i ana kora kina tuni ti ní. Rogo pa-Ebere, gupai nabipa giasangba, si nandu sa na gupai du tipa tue. Gi kanga re anaayugo gupai nga ní nikaa mangasunge fu bairani na kini gisangba ní. Gipai re naundo rani ani bi gupai nakodapa kpara ani gaani raka fu Yekova na nyanyakipa ha nga nyemuko nafõngbaduraniyo tipa ani gisangbako.

3. Ginihe nasarani ani kpara gaani raka fu Yekova?

³ Ho ani afu tirani ni tipa ka zio bapatiza, gure nga ani ima diaberã ka mangasunge fu Yekova na kadu ni gako akanga. Pa fu ani tirani fuko nayugo gupai nga ani naida ka giasangbako na ka manga gupai ko akpinyemuhe. Boro ho namangi rani ngbaome tipa ani mangi gipai re te. Nirengo, zavura gu rukutu agude nazio bapatiza, i namanga gipai fuo i kpara gayo raka fu Yekova angianga mbiko i naida ka sa ngbarago ti avunguyo ya. Gu mburupai nasa aKristano i kpara gayo raka fu Yekova nga nyemuse. Gu mokedi nangia Yoane aya: “Gi nga du na nyemu Mbori re, nga ka ani kuti gako rugute. Gako rugute asusa nga omerani te.”​—1 Yo. 5:3.

ANI NA RANIRII ONO KIDU KINDI NI AKANGA

4. Ginipai si aidaha tipa kada ni “akanga rurupai”?

⁴ Nairiwo gu ngbarago du ani na ni tipa wai Yekova nasa apai furani taata tipa ani du ni gako akanga! Gu idapase du ani na ni kuti ga Yesu motumo naza gene furani tipa ani kuru tii gu sunge kanga nga ga ingapai. Wa vura duhe nga ani kindi na ingapai tirani, ani ima ida nitirani tipa kadu tii gu pagbia nga ga Yekova na Yesu. Pauro asakipai tipa gipai re wenengai rogo gako waraga ko akehe ki ya: “Oni akpi fu ingapai, ki du ni ungaroni fu Mbori rogo Kristo Yesu yo.” Fuani, ko azahe ki ya: “Oni ainanga ha te? ya gu ni oni afu tironi funi ni kanga sa gia sangbani, oni nga ga gu ni kanga oni agia sangbani; watadu fu ingapai sa kpio, na fu giasangba sa du oni ni ruru roni bangiri Mbori. Ono tambuahe du fu Mbori, ya, wa oni avura du ni akanga ingapai, oni agi sangba gu yugopai i amoi ri roni, kpotoroniyo; wa i nakusi roni be ingapai, oni ki ye kadu ni akanga rurupai.” (Rom. 6:11, 16-18) Oni kparia gupai nga gu mokedi re apepa gu ‘giasangba naye kpotoseyo.’ Nirengo, pa kpara ani tirani fu Yekova nasarani ani du ni “akanga rurupai.”

5. Ginipai ani asovura kutini dunduko, na tipagine?

⁵ Wa vura duhe wo, akpakarapai kinaho si aida ani dibehe ka ani aida ka raka ringbisihe kuti gaani kparatise fu Yekova. Apai gudu ho ue ani asovura na ni. Sa, kpakarapai kinaho Pauro agbiatiko na ni. Ko aya: “Bambiko rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.” (Rom. 7:22, 23) Gu ingapai i abatika rani na ni si kina tirani. Ni sangbana gipai re, ani nasovura na gu nyemu mangapai du kpotoraniyo. Pauro azungodi rani ki ya: “Wa du aboro raniri nga oni ka oni sánga gaoni raniri ni ũdada gbegberẽpai ya, ono oni dú ni ga Mbori azogo.”​—1 Pet. 2:16.

6, 7. Wai Satana aasada ka sa gi zegino re si du ni wenehe bangirani?

⁶ Gu kura ue vura kinaho ani asoho, si nga gu vura ani asoho kuti gi zegino du tiibe adaimona re. Satana nga bazogo gi zegino re nazumuda gako asiida kuti rani tipa ka ani dunga ni ruru rani fu Yekova na Yesu ya. Ko namangasunge na gbegberẽ apai wa ka ani ruho ka da ni gako akanga. (Oni gedi AEfeso 6:11, 12.) Gene sa ko amanga gipai re rogoho nga ka sa gi gako zegino si ngere wa si ni wenehe. Yoane azahe ki ya: “Ka nyemu zegino du ti boro, ga Mbori nga Ba nyemuse dunga ti ni te. Agu ahe dunduko du zegino, gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga, adunga ni ga Mbori nga Ba ya, du ni kina ga zegino.”​—1 Yo. 2:15, 16.

⁷ Dungu aboro naida kadu ni aira kumuko rogo zegino. Satana nananga aboro nga marã naye na ngbarago. Kikindigi ba bagaahe ima nge. Agu aboro natakapande pa ahe nayugo gupai fu aboro nga wene raka nga boro du na aũkumuko na kini raki wa ní aidaha. Agu abasunge du tipa anunguro nayugo bara gu wene aba rengbe aboro ka ndu kaa bihe. Nirengo, gupai aboro aidaha nga kadu na wene raka ono ringbisihe kuti gu mangapai nga ga zegino.

8, 9. Gini kerepai rengbe ka gbia rani, na tipagine?

⁸ Petero aza agu aboro naadu rogo gu dungurati naadu rogo bambata sa kama agarã naadu na gu bipai nga ga zegino ki ya: “I nga agu aboro rago nangba angba tiyo tipa manga gbarakagbaraka pumbo uru, abiriko na asirõ nga yo, i ki nimangi pai ni nzanga rogo gayo pumbo nyemuse ni gu rago i nari riahe na oni. Bambiko i nagumba gbanga apai du ni kungba ha, ki ninangi aguyo nikabata be aguyo nanye rogo irairaapai yo, ni gu nyemuhe nga ga borose, na ni wasiro a. I ki kidohe tipa raniri fuyo, na wa du yo tigayo ni akanga fu zirã; mbiko guhe nadia be boro, kinaha du ni ni zizi ni fuhe.”​—2 Pet. 2:13, 18, 19.

⁹ Ka boro aida ka mbisa gu gani “nyemuhe nga ga borose,” si arengba ka fu ranirii funi te. Kuba gure, ní nada ni kanga fu baira gi zegino re nga Satana Bakitingbanga. (1 Yo. 5:19) Kerepai kinaho ti da ni kanga fu aũkumuko, na ka ani ta da kindi ni akanga fuhe, si mbu ambu furani ani kuru behe.

GU SUNGE ANI ABERÃ PA MANGAHA

10, 11. Ada Satana agbata yó areme, na wai gu wirikapai nga ga zegino asa apai fuyo ni kpakarakpakaraha?

¹⁰ A wa Satana amangihe Edene yo, ko nagbata kina azanga inohe areme a. Paranga aboro nga agu aboro ko agbata yó. Ko na ngbarago ka bi paranga boro watadu kura aboro i ni mangisunge fu Yekova te. Gi vura Mbori re naida agu aboro kpara gayo raka fuko i ti kusayo ti gayo kakuti ruru mangapai na sinombori.

¹¹ Ani karaganga tirani awere berewe kuti gu kpiapai nidu tipa gu kanga na niidi bairani koro tuni. Ní ani igirã aigirã tooni tipa guru regbo, ono serõ aninye tiní tipa gbanga regbo tipa ka yugopa gani sunge. Si ima rengba ka kpakara fu paranga aboro a i mangi gu siapai du kia ti ga kura aboro. Satana nasa aboro areme rogo gi zegino re i bi gupai nga sunge rengbe ka sa boro ní gbia ngbarago, ono si naida Kristano mbiisi gani azingo nga ga toro mbata. Yesu aya: “Aboro ngbarago nga agu aboro inipa gu gayo azingo nga ga toro.” (Mt. 5:3, NW.) Agu aKristano kpara gayo raka fu Yekova i tipa ka manga gupai ko akpinyemuhe angianga ga Satana ya. Gayo ngbarago rogo agu arugute nga ga Yekova, na i naberãkuriihe uru na yuru. (Oni gedi Atambuahe 1:1-3.) Ono tie, agu awirikapai du areme afunga regbo fu ga Yekova amoyambu tipa i berẽkurii Fugo Mbori na kini mangisunge fuko te.

12. Gini siapai paranga aboro agbiatiyo na ni areme?

¹² Satana rengbe ka sa raka fu Kristano ni mbumbuhe. Pauro asanahe rogo gako bambata waraga fu aKorindo ki ya: “I ayambu ro mo du ni kanga?” Ko aruguyo ki ya: “Ka si du nga ni pai bangiro ya. Ono kangia mo rengbe nakusa goro, manga mo wo ngba.” (1 Kor. 7:21) Si aida i gbia ranirii agbia be sunge kanga. Areme rogo dungu aringara, agarã kinaho ndiko aida boro wirikipai ki da ti ni. Fuoni, i ki mbu agude sukuru tipa i mangi gayo siapai. Ka boro sia ka wirikapai ni bakerehe rogo gi zegino re, si arengbanga ka mbugene funi ní mangisunge tungusapai ti aregbo dunduko te.​—Oni gedi 1 AKorindo 7:23.

BAKERE WIRIKAPAI

13. Gini ngbatunga wirikapai rengbe ka fu undo fu ga Yekova amoyambu ni bakerehe?

¹³ Pauro afu zahe fu agu aKristano naadu Korosai yo ki ya: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tatapai nga ga zegino, wa pa Kristo te.” (Koro. 2:8) “Kungba nangahe, wa du pa aboro, na gu tatapai nga ga zegino” ima hi areme rogo zegino be gu bipai naye be dungu wene abawirikipai. Gu bakere nyakasapai du tipa bakere wirikipai, si ayugongo mangapai ni bee fu agude te, na si ambakadanga yó tipa gu ndikidi apai namanga rogo raka yo te. Ono tipa ga Yekova amoyambu, i nasia gu wirikapai rengbe ka undoyo i du na inohe tipa ka undo tiyo wa ka i ruho ka raka taata raka tipa ka manga sunge fu Mbori. Si naida i mangipai kuti gu rugute Pauro afuhe fu Timoteo ki ya: “Ono sinombori gbia kuti zereda nga bakere mosoro. Ono wa du ani na riahe na roko si rengbe fu rani.” (1 Tim. 6:6, 8) Kuba gupai nga ka gbia gu worimo naye be bakere wirikapai, ndikidi aKristano namaa berãyo fuo agu ‘awaraga du tipa mbakada rimoyo’ ni tungusa yó pai kakaka ringbisihe kuti omeyo.​—Oni gedi 2 AKorindo 3:1-3.

14. Ringbisihe kuti AFiripoio 3:8, gini bipai Pauro adu na ni tipa du ko ni ga Mbori kanga na Kristo?

¹⁴ Ani bingo gupai naadu tipa Pauro. Gu ga aYudo bayugo aNdiko nangia Gamariere nayugupai fuko. Gu sukuru Pauro amangihe, ani rengbe ka ya si adu wakina yunivasiti. Ono gini bipai Pauro adu na ni ho ko aringbisihe ni na du ni ga Mbori kanga gbiati Kristo? Ko aya: “Ahe dunduko si adunga bangire nihe te mbiko gu wene pai nga inida Kristo Yesu gi Gbia.” Ko agbia kurapai kutini nga: “Mbiko ko ahe aingi be re dunduko si ki du bangire wa kina mirĩ ahe, ya mi bi Kristo.” (Frp. 3:8) Gipai re naundo paranga aKristano gbiati avunguyo tipa i mangi wene siapai ho si adani tipa wirikapai. (Oni bi sura.)

ONI GBIA UNDO TI GU BAKERE WIRIKAPAI DU NI WENEHE

15, 16. Gini ngbatunga wirikapai gu riigbu nga ga Yekova afuhe, na sungehe nga gine?

¹⁵ Gini apai namanga rogo agu aba du bakere wirikapai rogoho? Anga si nakusa agu akpakarapai nga ga birĩ zogarago gbiati vunduvunduapai te? (Ef. 2:2) Ono tie, gu riigbu nga ga Yekova naundo aboro i mangi bakere wirikapai rogo pazereda rogo dungurati. Ani dunduko du na momu berãni tipa ka susa rogo Gu Sukuru Nga ga Siokrasia rogo aposo ni basasa. Sidu, wene akorosi kinaho ni naamanga fu gu paranga aboro nga abazakigene nga akumba (Gu Sukuru Du Tipa Raba Abakuparanga na Ziazia Kekeapai) na gudu tipa agu abazakigene nga arogotise (Gu Sukuru Du Tipa Raba Arogotise na Ziazia Kekeapai). Gi ngbatunga awirikapai re naundo rani tipa ani gisangba Yekova nga Bairarani.

¹⁶ Ani ima rengba ka gbia dungu apai rogo agu awaraga riigbu akusaha. Gu banguapai du tipa gi wirikapai re nga ka sarani ani mangisunge fu Yekova. Si nayugo wai rengbe ani ka undo kura aboro i mbakadipai dagbatiyo na Mbori. (2 Kor. 5:20) Fuani, i ki rengbe a tigayo tipa ka yugoho fu kura aboro.​—2 Tim. 2:2.

GU MOSORO KANGA AGBIAHA

17. Gini mosoro du ti sia gu bakere wirikapai ngba kisusi?

¹⁷ Rogo ga Yesu sanza naadu tipa taranda, baira akanga atambua aguyo ue naadu ni ruruyo na ki ya i ye ku rogo gako ngbarago na ko ki fu bakere sunge fuyo. (Oni gedi Matayo 25:21, 23.) Ka boro sia gu bakere wirikapai ngba kisusi areme, ní rengbe ka gbia ngbarago gbiati mosoro. Ani bingo gupai naadu tipa Michael. Ko amangi wenengai sukuru yo gako abayugupai ki yambu ko tipa i sakipai na ko tipa wai ko nika ndu tipa yunivasiti. Kina ngbayo nazere ka bi gupai nga Michael aya ko naida ka ndu tipa gu wirikapai nika dianga ko na bakere regbo ya tipa wa ka ko mangisunge abazakigene. Ya mo ko nabi tiko nga pai ima kpa rogo gako raka yo? Sangbako nga: “Gu wirikapai mi agbiaha ni bazakigene na gu mi nagbiaha awere ni bakumba rogo dungurati, si na kikiipaha fere. Agu amaku na amomu mi nagbiaha paha ima kio kisusi gu marã ka bakere wirikapai aye na ni fere. Mi na ngbarago nga mi asianga ka ndu tipa bakere wirikapai te.”

18. Ginihe nasa ro tipa mo idi na gu bakere wirikapai ngba kisusi?

¹⁸ Gu bakere wirikapai ngba kisusi nayugopai furani tipa Mbori na kini undo rani tipa ani mangisunge fuko. Si ‘nabatasa rani be du ni ga zirã kanga’ na ni yangaraha ani ki gbia “gu taarimo nga ga awiri Mbori.” (Rom. 8:21) Kurigure, ani nawirika wai rengbe ani ka yugo na ni nzunzu nga nyemu Bairarani nga Yekova kina tirani.​—Gate 21:5.