Mi Anaandunga Ku Rogo Ai Ba Zanga gi Bundu Te

AGU APAI MI AMANGIHE: I avungure na ki sonosi re rogo gu rungorungo dagbarago nadu Roma yo. Raka aima kpakara. Mi ainongo da nzunzu nangia ndikidi nina te, na mi aadunga na wene pagume a dagba re na buba te. Ho mi aasona ni, tipa mi gbia guhe ka undo re, mi anaabata kina bangiri agene.

Ho garã re adu ni bawe, mi aima tona dĩ ti gu regbo re. Ho garãre adu ni 12, mi azubo kusayo kporo ti bambata regbo. Buba anaandu kaa dia re porisi yo na kini yego na mi ku kporo bara dungu he. Mi aatikango na aboro dedede—mi angia boro zuu na kidu na zinga na zegino naabaha. Ho garãre adu ni 14, mi aguari kusayo kporo zanga karagatire berewe. Mi atona kaa dia kere angua kutii kpotore yo na kini raki bangiri agene. Wa ba anaadunga ho nga gu ka mi ra rogoho ya, mi a nikuo ngbadimo ga boro tarambiri kini ra yo daho rago nika mbeda ni ka giro. Fuoho, mi a ningere tipa wari ka mi bi wiri di ni ka ndu ka mbida ime yo.

Mi ada nzunzu ni kere iradĩ—mi anaatuka amangu be aboro na kini kuo ga aboro kikindigi aboro kaa dĩ he yo yuru. Rimore atona ka wo mbiko gi gbegberẽ mangapai na i ayambu re mi ye ka rimo gu riigbu nangia ga kere agangi, nga aguyo nafu “momu” fere ka gbiso re mi tona kaa dĩ marã benge yo. Mbiko gu kere gbegberẽ sino nadu tire, si aaimanga te, mi ki da ni gu gangi kura agangi anaairisa re airisa. Mi anaandunga ku rogo ai ba zanga gi bundu te; nirengo, mi anaamaa ha kina ba rire ho mi anaapi ni. Zuu, dia kere angua kutii kpotoseyo, dĩ, wasiwasi kodaba ada ni gimi gene raka. Aporisi anaagbata re ti aregbo dũ. I azi re bara dunguhe, na mi adi dungu agarã kuti ndu ku bambukiso yo kini kuru.

GU GENE BAIBIRI A′ARIA GIMI RAKA NGBAHA: Ti kura regbo sa tingbafuo i kusi re bambukiso yo, mi adiberã ka ndu ka bi tame nina. Zanga mi inihe, gu tame nina re gbiati awiiri ue aima da ni aDezire Yekova. I ayambu re mi ndu ka du pati gu dunguratise nga ga aDezire Yekova. Mi adiberã ka ndu na yo mbiko mi aida ka ino ginipai ninaamanga yo. Ho ani ada ni Bambu Kindo yo, mi aima ká nga mi aidanga ka sungo rogo ai ba te mi nasungo kina pangbadimo tipa kaa maa berãre tipa agu aboro na rimo na aguyo nakura. Rengo ngaha nga, gimi bundu adu kina bere.

Gu dunguratise re aima aria gimi raka. Mi natingida gupai nga mi aaberã gupai nga mi awere rogo gu kura papara haurago kia. Agu aboro naye kafu sene fere adu na mongo kpakpuyo yo na kidu zaaza. Kpia wai kindi berãre yo agu aDezire Yekova re aangana re kidu wenengai na mongo kpakpuyo yo. Gipai re aima du ni kparakparaha kia tigu zegino mi ainidi tire na ni!

Mi atona wirika Baibiri na aDezire Yekova. Wa mi aandu kumbatayo kindi kaa wirika Baibiri, si aye kada fere gbaiga nga si naida aida nzunzu mi mangi ndikidi ariapai rogo gimi raka yo. Mi adi gu fugo ku ngbadure yo du ni kekehe rogo Asanza 13:20 nga gu naya: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.” Mi aini gupai nga si naida mi mbu koda tire na agangi. Ono taatapai nangiaha ka mangaha te, ono mbiko ga Yekova undo, mi aima du na diabese.

Mi aima giriso tire a ti kpoto re. Mi amangi bakere ome ki mbu vugundö na dia kere angua kutii kpotore yo. Mi akpe rire nga gu nadu ni funofunoho, mi ki rogo agu afongo tue nadu ture yo kusayo, na mi ambu mangasunge na gbegberẽ afugo. Gure nangia bambata regbo rogo raka re yo mi du na pagbia kurii gimi mangaapai.

Mi anaagbia nga ngbarago ti gedapai gbiati wisigopai te, si aima du ni kpakarapai fere mi moi berãre na ki fu tire sa gimi wisigo Baibiri. Ono tie, wa mi aamanga ome, mi aye ka tona kpinyemu Yekova na ariapai ki tona ka manga kpotore yo—sangbakpoto re yo atona kaa fuda re. Dedede, mi anidu na iraira bipai tipa tire na kini kapa nga singia Yekova ambupai fere ti gu gbegberẽ apai dunduko mi namangihe. Ti agu aregbo re, mi agbia bakere wasa ti geda gupai du tipa wai Yekova ambupai fu Bakindo Davide tingbafuo ko mangi kere aingapai.—2 Samuere 11:1–12:13.

Gu kura kpakarapai adu nga, fura tipa gimi idapase fu kura aboro gene tungusapai yo. (Matayo 28:19, 20) Mi anaagunde nga mi nika gbia gu boro gene tungusapai yo mi aima hogani mbata kusayo watadu mi aima manga fu ni gbegberẽ! Ono yeeye, mi adu na rengba ka dia be gimi gunde. Mi atona ka gbia ndikidi rengbabepai ni undo mi gu kura aboro i wirikipai tipa gu wene Barani du ngbangbaturũ yo nga gu ko nambupai fu aboro kpaima.

GU GENE MI NAGBIA UNDO NGBAHA: Dungu agu aboro mi anaakodatire na yo aima kpiko watadu i bambukiso yo! Ono mi na ndikidi rengbabepai rogo raka yo na mi nangera kumbatayo tipa wene raka. Mi ima wirika wai kadu na umbasitise, giasangba na ka banda tire ti zinga. Ni sangbana gipai re, mi nagbia ngbarago ti du na wene pabakure dagbare na agu aboro du mi na yo. Ani amangi rogatise na bawene diare nga Carmen na ani naraka na ngbarago. Ani nagbia bakere ngbarago kina sa ti undo kura aboro i wirikipai tipa Baibiri.

Awere, mi namanga wene sunge—ti gu kura aregbo, si naakoda mangasunge benge yo, ono kuba gupai nga kaa dĩ marã yo, mi naagiriso rago yo!