Gu Maabangirise Nga Ga Zingabekpio Nga Parengo!
‘Mi namaa bangire koyo du Mbori ni ya aboro azinga azinga bekpio.’—AMOKEDI 24:15.
1. Tipagine rengbe ani tini ka duna maabangirise tipa zingabekpio?
YEKOVA ima fu wene nduapai fu rani tipa ani duna maabangirise tipa zingabekpio. Fugo ko nagumba gupai fu rani nga akpikpiyo azinga azinga bekpio, kini ru kuari berewe ni ungayo. Na gako ringbisapai tipa aguyo nara rogo kpioyo adigo adigo nirengo. (Yesaya 55:11; Ruka 18:27) Nirengo, Mbori aima yugo gu tandu du beko tipa ka zingisa akpikpiyo bekpio.
2. Waigu rengbe gu maabangirise nga ga zingabekpio ka undo rani?
2 Duna ida kuti ga Mbori mbakadapai ka zingisa akpikpiyo rogo Wiriko, nga Yesu Kristo, rengbe ka songoda rani ti aregbo nga ga rungosi. Padu gu maabangirise nga ga zingabekpio ni parengo rengbe ka undo rani a ani banda pa duna idapase kuti gu Barani nga ga ngbangbaturũ ko, zavura da ti kpio vurũ. Si nawiraha gbe nga, gaani maabangirise tipa zingabekpio nika duni nyakasinyakasihe wa ani kaa wisigo pa agu aboro i akaragayo berewe kurogo unga nga aguyo du payo ni kekehe Baibiri yo. Gi iiriwoapai re dunduko amangi mbiko gu ome nga gu naye be Bakere Gbia nga Yekova.
I Arogo Gayo Akangba Mbiko Zingabekpio
3. Mbori afu ome fu Eriya ko mangi ginipai ho wiri dekurugbo akpi ni Sarefata yo?
3 Rogo wene fugöpai tipa gu idapase gu ga Yekova adezire nadu mbata fu aKristano ayuguhe, gu mokedi nangia Pauro akepai ki ya: “Ade arogo gayo akangba mbiko zingabekpio.” (AEbere 11:35; 12:1) Guni sa dagba ngbatunga agu adee re angia gu rungorungo dekurugbo naaraka rogo gu gbata nangia Sarefata, Fonisia [Sidona] yo. Bambiko ri adi ga Mbori nebi nangia Eriya kugume, gari ngungo na nzeme abanga kindi rogo iiriwo gene ti regbo gu ngbongi nga gu ka nyasi riipa gari raka na gu nga ga wiiri. Kusa ho gu gude re akpi ni, Eriya apigi ko rii barame, ki kparikpee, ki tãi tiko auru gu kumbagude re bara biata, na ki zungadihe niyaa: “Ako Yekova gi Mbori, mi nazungadi ro, mbisimo gi gude re karaga tiko ku rogo ko yo berewe.” Mbori asa gupai nga mbisimo, watadu unga gu kumbagude re karagatihe berewe kurogo ko yo. (1 Abakindo 17:8-24) Oni berẽnga pa gu ngbarago nangia ga gu dekurugbo re wa i afu mosoro tipa gari idapase na gu bambata zingabekpio du paha nikekehe—nga kina boro ga wiiri nga guko ri akpinyemu ko gbe!
4. Gini iiriwopai Erisa amangihe Sunema yo?
4 Gu kura dee nga guri nadi gari kangba mbiko zingabekpio anaraka rogo gu gbata nangia Sunema. Ri angia dia gbinza kura kumba sa, ki duna weneringise fu gu nebi nangia Erisa na gako moyambu. I afu mosoro furi nga gude ni kumbagude. Ono tie, fuo dungu agarã kusa, ri ayambu gu nebi re, ko ki bi gu kumbagude re kporoyo ko naima kpi. Fuo Erisa kparikpee na ki mangi gu kura apai, ‘kpoto kangba gu gude re atona kaa faa tooni tooni.’ Gude “ki zika bara saba, ki za bangiriko.” Zanga kapa, gi zingabekpio re aye na bakere ngbarago fu nagude na fu gude a. (2 Abakindo 4:8-37; 8:1-6) Ono nga gu ngbarago i ka du nani susi gu i adu nani mbata ho i ka zingisa yo ni kurogo unga auru kpotosende kurogo “wene zingabekpio”—nga gu namaa gupai barabangiriyo nga ga rengba ka raka zanga kpi berewe! Nga gu wene ndupai tipa fu tambuahe fu gu Mbori nga ga zingabekpio nga guko duna nyemuse tiko, nga Yekova!—AEbere 11:35.
5. Waigu Erisa adu nirimisirimisi ko kurogo manga iirowopai, zavura fuo kpio ko vurũ?
5 Zavura fuo kpio Erisa na fuo kpisido yo ko, Mbori asa amemeko si duna ome tini mbiko ziazia toro. Ani nagedaha ya: “Wa . . . [gu kura aYisaraere] akpisida kumba, oni ngére, i abi [ga aMoabo] rikavura; i ki ba kangba gu kumba re ku rogo murã Erisa yo. Kina mbembedi ho wa kangba ati ku ri meme Erisa, ko ki zingi, ki guari ki ru ku ngba nduko.” (2 Abakindo 13:20, 21) Nga gu iiriwopai nangiaha fu gu kumba re, na nga gu ngbarago ko adu nani! Oni berẽnga pa gu ngbarago nika du ho agu aboro ani akpinyemuyo nika zinga ni bekpio kurogo unga rogo ngbanya na gu ringbisapai nga ga Yekova Mbori, nga gu kaa tinga ku ime yo ya!
Wiri Mbori Azingisi Kangba Aboro
6. Gini iiriwopai Yesu amangihe mbembedii na gu gbata nangia Naina, na waigu rengbe gipai re ka duna ome kurirani?
6 Wiri Mbori, nga Yesu Kristo, ima fu wene nduapai fu rani tipa ida gupai nga i rengbe arengba ka zingisa kangba aboro bekpio, i ki duna gu maabangirise nga ga nyenye unga. Gupai namangi mbembedii na gu gbata nangia Naina rengbe ka undo rani ani rugutirani na gupai nga ngbatunga gu iiriwopai re rengbe arengba ka manga mbiko gu ome Mbori afuhe. Ti kura regbo sa, Yesu agbia aboro nga aguyo nadu na rungo i nitindi kangba paranga kumba kini kuru nani kusayo gbata yo ka ndu ka kpisidoho. Ko angia bangisa wiri dekurugbo. Yesu agumba gupai furi nga: “Ka mo kpári nga ya.” Fuoho ko ki zadi raga ki ya: “Paranga, ya mi foro, mo gúari.” Fuo gure, ko ki sungu kuari na kini fura. (Ruka 7:11-15) Nirengo, gi iiriwopai re nanyakasa gaani ida ya gu maabangirise nga ga zingabekpio nga parengo.
7. Ginipai namangi tipa wiri Yairo?
7 Oni makianga pa gupai a nadu tipa Yairo, nangia baira abamangisunge rogo bambu tiria Kaparanauma yo. Ko asana Yesu tipa ko ye ka undo wiriko ni degude garãri adu 12, nga guri napi sande kini samba. Fuoho aturonga te, i ki tingidiyo na gupai nga gu degude re ima kpi. Ni ngarasa ko Yairo nga guko naarungo gbe tipa ko duna idapase, Yesu agasi ko ku kpuko yo, yo rimbasa aboro aakpara ni. I amamu ho Yesu agumba gupai ni fuyo nga: “Degude akpi nga te, ri nara ara.” Ri aima kpi nirengo, ono Yesu aida ka yugo gupai nga i rengbe arengba ka zingisa aboro bekpio kurogo unga a wa kina gu rengbe yo ka zingisa boro rogo dodoroma rame. Ni zio ko gu degude re ti beri, ko ayaa: “Degude, mo gúari.” Ri aguari nibasa, na ‘avunguri ki duna bakere ngbarago.’ (Marako 5:35-43; Ruka 8:49-56) Zanga tikö, aborokporo aduna ‘bakere ngbarago’ a ho i ka zingisa kangba abadiangbayo ni kurogo unga rogo paradiso auru kpotosende.
8. Ginipai Yesu amangihe pati mura Razaro yo?
8 Razaro akpi arame ki du biama ho Yesu andu ni ku pati mura ko yo na ki sanahe i di mbia kusayo ti ngbadimo mura. Fuo fu ko kpee kubangiri agu aboro dunduko naabiko tipa i ini gupai nga ko akido kuti gu ome Mbori afuhe, Yesu agumba gupai kuari nga: “Razaro, mo kúru.” Sidu ko ki kuru! Abeko na anduko adu kindi nikaĩkaĩhe na aũkpisido aboro, na kpakpuko ki duni dadidadihe na rokoo. Yesu ki ya: “Oni záki ko, ko ndú.” Ni bi yo gi iiriwopai re, dungu agu aboro nadu yo tipa ka fu wasa fu adawiri Razaro, nangia Maria na Marata, aduna idapase kuti Yesu. (Yoane 11:1-45) Anga gi tangarapai re nahiiso ngbaduroniyo na gu maabangirise nga abadiangbaroni rengbe arengba ka zinga kurogo unga rogo ga Mbori vovo zegino tee?
9. Tipagine rengbe ani tini ka ino gupai nga Yesu rengbe arengba awere ka zingisa akpikpiyo?
9 Ho Yoane Bapatiza aduni kindi bambukiso yo, Yesu akedi gi tingidapai fuko naangarasi ko re: “Airavurari nangera, . . . kangba aboro ki nizingi be kpio.” (Matayo 11:4-6) Wa duhe nga ho Yesu aduni kindi auru kpotosende ko anazingisa kangba aboro, ko rengbe arengba nirengo ka mangaha wo ni gu kusikusi toro duna bakere ome, nga gu ome fu Mbori he. Yesu “nga zingabekpio, nga unga,” nga gu wasa si afuhe fu rani ka ino gupai nga mbembedii kumbatayo, ‘aguyo du rogo amurã tingidapase yo dunduko nika gia fugo ko ki kuru’!—Yoane 5:28, 29; 11:25.
Gu Kura Azingabekpio Nanyakasa Gaani Maabangirise
10. Waigu rengbe oni ka ringbisapa gu bambata zingabekpio nga gu mokedi amangihe?
10 Ho Yesu akedi gako amokedi ni ni abatungusipa Kindo, ko ayaa: “Oni . . . nizingisi kangba aboro.” (Matayo 10:5-8) Rengo ngaha, tipa ka manga gere, si aidi i kido kuti ome Mbori. Yopa yo rogo 36 ti Gaani Regbo, gu boro sinombori nangia Doruka (Tabita) ati ni rame rogo kpio yo. Gari wene asunge akodi rungo abaukadi fu rungorungo adekurugbo, nga aguyo pa kpio ri asa gupai nga i kpari gbe. Abawiriki ambakadi kangba ri tipa kpisidoho na i ki kedi sunge fuo gu mokedi nangia Petero tipa ko ye, isoke ka ngarasa yo. (Amokedi 9:32-38) Ko akusi aboro kusayo dunduko rogo gu vurubambu nadu kuari, ki kparikpee, na ki ya: “Tabita, mo gúari.” Ri aza bangiiri, ki sungu, na ki zadi be Petero, na ko ki tumba ri kuari. Gi bambata zingabekpio nga gu mokedi amangihe re asa dungu aboro i dani aidipase. (Amokedi 9:39-42) Gere nafu kura ndupai a fu rani tipa maabangirise kuti zingabekpio.
11. Gini yangara zingabekpio du paha nikekehe Baibiri yo?
11 Gu yangara zingabekpio nga gu du paha nikekehe Baibiri yo amangi Turoa yo. Ho Pauro aru ni rogo gu ringara re ti regbo gako biata nunguro nga ga amokedi, ko agizosi gako gumbapai da ku bebere yuru. Fuo omeko bati isoke be gu faarago nga gu naaye be gu dungu aramba nga ga nzeme na be gu ndurumo aboro nadu ba dunguratise yo, paranga kumba rimoko angia Eutuko ati ni rame na ki koto ti gu bangiri bambu nadu rogo biata vurubambu kuariyo ki ti kusendeyo. Anga he gbua namako te, ono i ‘atumba kina kangbako.’ Pauro ati ku auru Eutuko, ki dungo ko, na ki ya fu agu aboro naabi gipai re: “Ka oni kpári nga ya, ungako ti kina ko.” Pauro aaberã gupai nga unga gu paranga re ima karaga tihe. Agu aboro nadu ho “ki ngarã ni rengo.” (Amokedi 20:7-12) Areme, ga Mbori amoyambu nagbia bakere wasa be ino gupai nga agu akurayo i anamanga ga Mbori sunge mbata na yo, i abi gu maabangirise abi nga ga zingabekpio si nadigi.
Zingabekpio—Ningia Kuru Maabangirise
12. Gini ida kutipai Pauro ayuguhe ho ko aduni barabangiri gu ga aRomo Bazogo nangia Ferika?
12 Ho i agia gako ngbanga ni barabangiri gu ga aRomo Bazogo nangia Ferika, Pauro amangi dezirepai ki ya: “Mi idi . . . agu apai du ti rugute [ndika, NW ], na gu anebi ake dunduko; ni maa bangire koyo du Mbori ni ya ruru aboro azinga be kpio na iraira yo a.” (Amokedi 24:14, 15) Waigu apapara Fugo Mbori, ngbatunga gu du wa “Ndika,” ayugopa zingisa kangba aboro bekpio?
13. Tipagine rengbe ani tini ka gumba gupai nga Mbori aafura ngba kura gene tipa zingabekpio ho ko agumba bambata sangbanebi ni?
13 Mbori nitiko afura tipa zingabekpio ngba kura gene ho ko agumba bambata sangbanebi ni ati Edene yo. Ho ko aasarangbanga “bakuru wo” ni, nga Satana Bakitingbanga, Mbori ayaa: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.” (Yugoti 12:9; Bambata Pai 3:14, 15) Mbura gido tita dee aayugopa imo Yesu Kristo. Ka i aida gupai nga gu Tunga re mburu rii woo fuo gure, ka si aidi i zingisi Kristo bekpio.
14. Waigu duhe nga Yekova ni ‘ga kangba aboro Mbori te, ono ga unga aboro Mbori’?
14 Yesu ayaa: “Gu nga i azingisa aboro be kpio kina Mose ayugu he, rogo gu pai nga ga zigidiri ngua, ho ko aya ni ti Gbia ko nga ga Abarayama Mbori, nga ga Yisaka Mbori, nga ga Yakoba Mbori. ‘Were ga kangba aboro Mbori nga ko te, ga unga aboro Mbori nga ko; bambiko bangiri ko aboro dunduko du ni unga yo.’ ” (Ruka 20:27, 37, 38; Gate 3:6) Abarayama, Yisaka, na Yakoba aima kpiko, ono ga Mbori ringbisapai tipa ka zingisa yo bekpio adu nirengo ni gupai nika digo adigo si ki du bangiriko wa i ni kina ungayo.
15. Tipagine Abarayama adu tini na ndupai beko tipa duna ida kuti zingabekpio?
15 Abarayama aduna ndupai beko ka duna gu maabangirise nga ga zingabekpio, mbiko ho diako nangia Sara gbiati ko agbinza ni gbe, na i ki du wa i ima kpiko rogo gayo ome tipa ka batika agude, Mbori akaraga gayo ome vungu berewe kubaha rogo iiriwo gene. Gere adu wa kina zingabekpio. (Bambata Pai 18:9-11; 21:1-3; AEbere 11:11, 12) Ho garã wiriyo, nangia Yisaka, aduni wa 25, Mbori aya fu Abarayama ko fu ko ni motumo. Ono tie, ho Abarayama aambeda ni ka imo Yisaka, ga Yekova maraika aka na beko ti mangaha wo. Abarayama aima ‘idaha ya Mbori rengbe arengba ka zingisa [Yisaka], zavura bekpio vurũ; kina yo ko adi ko ni berewe ni sanza.’—AEbere 11:17-19; Bambata Pai 22:1-18.
16. Abarayama nara awere rogo kpio yo, kini sungudi gine?
16 Abarayama amaabangiriko tipa zingabekpio tii gu zogarago nga ga Masiya, nangia gu Tunga i akidohe tipaha. Rogo gako bipai mbata fu du ko ni boro, Wiri Mbori aima bi ga Abarayama idapase. Ni gu kumba nangia Yesu Kristo, ko aya fu aYuda wee: “Rago angba angba ti baroni nga Abarayama ko bi ragore.” (Yoane 8:56-58; Asanza 8:30, 31) Abarayama nara ara awere rogo kpio yo, kini sungudi zingabekpio kurogo unga auru kpotosende tii ga Mbori Kindo nga ga Masiya.—AEbere 11:8-10, 13.
Dezirepai Rogo Ndika na Rogo Atambuahe
17. Waigu ‘agu apai du rogo Ndika’ ayugupa gu zingabekpio nga ga Yesu Kristo?
17 Ga Pauro maabangirise tipa zingabekpio adu rogo ngbanya na ‘agu apai du rogo Ndika.’ Mbori aya fu aYisaraere wee: “Oni aniye na vodivodi makawa gaoni kekeahe fu boromotumo; ko aniwo ti vodivodi ahe [rogo Nisana ti rameru 16] ku bara bangiri Yekova, ya ko idi pa roni.” (Pa Amotumo 23:9-14) Isoke na gi ndika re berã ko yo, Pauro akepai ki ya: “I azingisi Kristo dagba kangba aboro, ni makawa agu yo nara ara [rogo kpio yo].” Ni “makawa,” i azingisi Yesu rogo Nisana ti rameru 16, rogo 33 ti Gaani Regbo. Kusa fuo du ko ho na ome Kindo beko, si adu nga gu zingabekpio nga ga ‘adufuo makawa’ amanga—nga agu apefuo ko duni mbedimbediyo.—1 AKorindo 15:20-23; 2 AKorindo 1:21; 1 Yoane 2:20, 27.
18. Waigu Petero ayugu gupai nga i aima gumbapa ga Yesu zingabekpio rogo Atambuahe?
18 Atambuahe nasongoda gu berã nga ga zingabekpio a. Ni gu uru nangia ga Pendekote rogo 33 ti Gaani Regbo, gu mokedi nangia Petero adi fugo rogo Atambuahe 16:8-11, niyaa: “Ya [Davide] tipa . . . [Kristo], ‘Mi anabi Gbia barangba re dedede, bambiko ko du ku kumbabere, ya ka mi wo nga ya; si du kpotore yo angí ti ni, mirãre ki du pusiapusia; borore aráka na maabangirise. Bambiko mo ambu nga mbisimore Adisi yo te, mo afu nga Ziazia Ko ko bi zirã a te.’ ” Petero agbia gupai kuti ni nga: “[Davide] aima bi gere ki gumba pa gu zingabekpio nga ga Kristo, ya i ambú nga ko ku Adisi yo te, boroko abí nga zirã a te. Gi Yesu re Mbori azingisi ko.”—Amokedi 2:25-32.
19, 20. Ti gini regbo Petero adi fugo rogo Atambuahe 118:22, na waigu gere aduna pai dagbaha na pa kpio Yesu na gako zingabekpio?
19 Fuo bete auru kusa, Petero aru barabangiri ga aYuda Abororondo na ki di afugo rogo Atambuahe. Fu sana yo ko tipa wai ko aru ka husa gu gbarigbari kumba nga guko nanaho ahe, gu mokedi re ayaa: “Ka oni ini dunduko na aboro aYisaraere dunduko, ya, ru gi kumba re ẽre barangba roni zezeredi mbiko rimo Yesu Kristo nga boro Nazareta, gu ko oni awagi ko, Mbori ki zingisi ko dagba akangba, mbiko ko du. . . . [Yesu] nga gu mbia oni ambu, oni nga abadua ha, gu i amangi ni gu wene kikii mbia nidu pangbaha [“ti tukpuhe,” NW ]. I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.”—Amokedi 4:10-12.
20 Herẽ, Petero adi afugo rogo Atambuahe 118:22, kini mangisunge na agi afugo re tipa kpio Yesu na gako zingabekpio. Mbiko gu sosodahe nga ga gayo abarumbatayo rogo pambori yo, aYuda aka Yesu. (Yoane 19:14-18; Amokedi 3:14, 15) Sangbana pa ka ‘abadua bambu gu mbia re’ angia kpio Kristo, ono pa da ‘gu mbia re ni gu wene kikii mbia nidu ti tukpuhe’ ayugupa gako zingabekpio kurogo gu taarimo nga ga toro ngbangbaturũ yo. A wa bake Atambuahe agumbaha kumbatayo, ‘gi mbia re Yekova namangi he.’ (Atambuahe 118:23) Manga “gu mbia” re ni Bangua mbia tukpu bambu akodipa taasarimo ko ni Siasia Bakindo.—AEfeso 1:19, 20.
Gu Maabangirise nga ga Zingabekpio Nasongoda Rani
21, 22. Gini maabangirise Eyobo adu nani, a wa duhe nikekehe rogo Eyobo 14:13-15, na waigu rengbe gere ka fu wasa fu agu aboro narungo tipa kpio gayo boro areme?
21 Wa vura duhe nga boro ho ani abi ni nitirani i nazingisi ni bekpio te, ani ima bi bete tangaraapai nga ga Kekeapai nga gu nasa pa zingabekpio si du ni parengo. Sidu tie, ani rengbe ka duna gu maabangirise nga gu gu ruru kumba nangia Eyobo adu nani. Ho ko aarungo ni, ko azungadi Yekova ki ya: “Ako, ka mo [Yekova] oko re ku Baatoro kpikpi aboro yo [“ku Sheol yo,” NW ], . . . ki ringbisi ringbisiringbisi rago fere, ki tingidi pa re! Ka boro kpi, ni adú ni ungani berewe? . . . Ka mo ayamba he, mi akaraga pai foro; mo akpi nyemu gu he bero amangi.” (Eyobo 14:13-15) Mbori ‘akpinyemu guhe beko amangihe,’ ki duna nyemu gupai kakaka nga ka zingisa Eyobo. Nga gu maabangirise gure afuhe fu rani!
22 Boro sa dagba agu aborokporo nagunde ti Mbori rengbe ka ti na nyanyaki kaza, a wa Eyobo adu nani, na ni rengbe ka zera a fu gu vurarani nga kpio. Aume nga ga nunga rengbe ka ga bangiri agu aboro yo narungo tipa kpio gayo boro, a wa Yesu akpari tipa kpio Razaro. (Yoane 11:35) Ono nga gu wasa si afuhe fu rani ka ino gupai nga Mbori ayambahe na agu aboro du rogo gako berã nga ga tingidapase ki karagapai! Si adu wa yego yo gene nunguro yo—angianga na kaza na ki du kpokorokpokoro ya, ono na wene kpotose.
23. Waigu bete awirina ayugupa gayo kido kuti gu maabangirise nga ga zingabekpio?
23 Pa kpio ruru sosono Kristano sa afõngbadu akurari aidipase i kepai ki ya: “Ani nakeda gaani bakere nunga foro tipa pa kpio namu. Fuo guru regbo, ani adia ri berewe kugume—ni bawene ri na ri ki duna ome tiri!” Agu avunguagude wiriyo akpi ayaa: “Na iriwo wai ani amaabangirani tipa gu uru Jason ka zinga rogo! Ko angera pati ko ki bi gu Paradiso nga gu ko anakpinyemuhe gbe. . . . Nga gu ngarasahe fu agu rani nanakpinyemu ko tipa ani du yo a.” Ii, nga gu tambuahe rengbe ani ka du nani tipa gupai nga gu maabangirise nga ga zingabekpio nga parengo!
Gaoni Karagapai nga Gine?
• Waigu rengbe idapase kuti ga Mbori mbakadapai ka zingisa kangba aboro bekpio ka fu undo fu rani?
• Gini apai du paha nikekehe rogo Kekeapai nga gu nafu ndupai fu rani tipa ani duna maabangirise kuti zingabekpio?
• Tipagine rengbe ani ka gumba gupai tini nga zingabekpio ningia kuru maabangirise?
• Gini maabangirise nga gu nasongoda rani rengbe ani ka du nani tipa akpikpiyo?
[Gu kpiahe du ti kpewaraga 10]
Mbiko gu ome naye be Yekova, Eriya akaraga paranga wiri dekurugbo kurogo unga
[Gu kpiahe du ti kpewaraga 12]
Ho Yesu azingisi wiri Yairo ni nga degudee, avunguri aduna bakere ngbarago
[Gu kpiahe du ti kpewaraga 15]
Rago Pendekote rogo 33 ti Gaani Regbo, gu mokedi nangia Petero amangi dezirepai zanga gunde tipa gupai nga Mbori aima zingisa Yesu bekpio