Kpikpi Aboro Araka Araka Berewe!

Mo ima rengba ka tingida gupai nga Gail, ani nifura tipa ri ti tonatona gi kekeapai re adu na kapa nga ri ambunga berãpa kumbari nangia Rob te. Ono tie, ri namaabangirise nga ri nika bi kumbari abi berewe rogo ga Mbori vovo zegino ko nakido paha. Ri aya: “Gu veresi ngba tire gbe nga Yugoti 21:3, 4.” Si nape gupai nga: “Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”

Gail aya: “Gi kidohe re ima pe apai dũ. Nunga agu aboro gayo aboro akpi nazio re azio nga aguyo ainongo pai tipa gu maabangirise nga ga bi gayo aboro berewe re ya.” Gail namangapai na ngbanya kuti gu gari ida re ni tungusa ri pai ti aregbo dũ na kini peke pa ga Mbori kidohe fu gari amurakporo tipa gu regbo kumbatayo nga “kpio adú nga berewe te.”

Mo rengbe ka bihe nga ‘ziree du.’ Ono mo bingo gupai naadu tipa gu kumba nangia Eyobo. Ko awoki ni kerehe. (Eyobo 2:7) Wa vura duhe nga Eyobo aida ka kpi, ko adu kindi na idapase kuti ga Mbori ome ka zingisako ko raki auru kpotosende. Ko aya: “Ako, ka mo oko re ku Baatoro kpikpi aboro yo . . . Ka mo ayamba he, mi akaraga pai foro; mo akpi nyemu gu he bero amangi.” (Eyobo 14:13, 15) Eyobo adu nakido nga gako Mbori nika zingo azingo tipa ko na ki idi ka zingisako berewe ko raki.

Barambeda, Mbori nika zingisa Eyobo gbiati dungu aboro, na ki sa gi kpotosende re ku rogo paradizo. (Ruka 23:42, 43) Ziazia Kekeapai naya rogo Amokedi 24:15, nga: “Aboro azinga bekpio.” Yesu akido rani nga: “Ka gi iriwo nga ti roni re ya, bambiko ragoho nada, ho agu yo ka gia fugoko ni dunduko du rogo amurã yo, ki kuru.” (Yoane 5:28, 29) Eyobo nika bi gu kidohe re abi si ni digisitihe. Ko nika du na momu kada ni ‘paranga’ na kpotoko ki ‘zámbua berewe wa ga parangako’ nyeanye kindi. (Eyobo 33:24, 25) Kina gu bangisa pai re nika manga fu agu aboro dunduko nika gbia undo be ga Mbori inapai nga ga zingabekpio ka raka auru kpotosende.

Kangia boro aima kpi toro, agu apai ani nafura tipaha re arengba nga ka dia gamo rungo kusayo te. Ono berãkurii ga Mbori akidohe du rogo Ziazia Kekeapai yo ima rengba ka undo ro mo du na ome tipa kaa ndu kumbatayo.—1 ATesaroniko 4:13.

Ya mo mo naida ka wirikapai tipa wai ka sovura kuti rungo tipa kpio gamo boro? Watadu asanahe kinaho riro yo wa gu nga “Tipagine Mbori ambu gbegberẽpai na arungo ti ni si nimangi?” Mo bi gaani bangiriba nga ga Internet nga, jw.org/zne, ka bi wai Ziazia Kekeapai afu wasa na agu akaragapai rẽarẽ.