3 Undo Tipa ka Hi Kpakaraapai

Akpakarapai kina awere ani arengbanga ka ariaha watadu ka nehe ya. Ni kpiapai, ka si du nga mo ima zanga gu boro mo akpinyemu ni rogo kpio yo watadu mo nambu be bangabanga kaza, pai ho rengbe mo ka mangaha te, ono ka gbata kina gene tipa ka hi gu imisiri re. Ya mo Ziazia Kekeapai rengbe ka undo rogo ngbatunga kere bangiriba wa gure?

BANGABANGA KAZA

Rose aya: “Mi nambu be dungu aigirã du tii kpotore yo. Mi arakanga berewe wagu naadu mbata te.” Gupai naadu ni mbumbuhe furi gbe angia, ri aarengbanga ka maaberã ri wenengai ti regbo gari wisigo Ziazia Kekeapai gbiati agu apai nga ga toro te. Ono agu afugo Yesu du rogo Matayo 19:26 nga gu naya: “Ka Mbori mangi apai amanga dunduko” aima undo ri gbe. Rose aye ka ino gupai nga, agene ima du ni dungu he tipa ka wisigopai. Mbiko wa gari aigirã asa gedapai furi ni kpakarakpakaraha ti kura aregbo, ri atona ka degaturi kuti dede afugo Ziazia Kekeapai gbiati agu awaraga du mburuhe rii Ziazia Kekeapai.a Ri aya, “wa ka agi agene re aadunga ya, mi ainongo wai ka mi abanda gimi padu rogo toro yo wenengai te.”

Ho rago anaagberã ni ti Rose mbiko agu apai ri aarengbanga ka mangaha ya, ri anaagbia wasa rogo agu afugo du ni kekehe rogo 2 AKorindo 8:12: “Bambiko si ngia gu ni du zaza rogo pa fu gamahe, Mbori aida pa gamahe be boro wa du pa agu ahe du be ni, kuti agu ahe adu nga be ni ya te.” Agu afugo re atingidi Rose na gupai nga, Mbori na bakere ngbarago na kina gupai ri amangaha, mbiko ri aasada tiri na ome ri dunduko ka manga gupai rengbe ri ka mangaha.

RUNGO

Delphine, ani nifura tipa ri mbata natingida gupai nga: “Tifuo wire garã ri adu nga 18 kpi, gupai re aima rungosi re mi ki berẽ gupai nga mi arakanga berewe te. Apai adunga berewe ku baha te.” Ono tie, ri agbia bakere wasa rogo agu afugo du rogo Atambuahe 94:19, nga gu bake papara Atambuahe aya rogoho fu Mbori: “Wa du sakapai ku kpotore yo ni badungu he, gamo wasawasa apai nangarãsa mbisimore.” Ri aya, “Mi akpari fu Yekova ko undo re tipa mi gbata agu apai rengbe mi ka mangaha tipa si zeresi gimi imisiri.”

Ri afu tiri tipa kaa mangasunge ni baundosunge. Tifuo bete aregbo, ri aringbisi tiri kuti kitiri wiringua kepai—zavura gu naima kita, i ima rengba ka mangasunge na ni tipa ka kepai. Teketeke a, wa ri avura bi tiri nga ri aima kuo, ri abi gupai nga ri kindi na rengba ka undo kura aboro. Ri agumba gupai nga: “Mi aye ka bi gupai nga, ho mi aamangasunge ni na gu bangua arengo nga ga Ziazia Kekeapai gbiati agu apai Ziazia Kekeapai agumbaha tipa ka fu wasa fu gimi abawiriki Ziazia Kekeapai, gere angia gu gene Yekova aafu wasa fere ngbaha.” Ri akeke rimo agu aboro du payo rogo Ziazia Kekeapai yo nga agu yo nasusi rogo kere arungo. Ri abi gupai nga, “kparakpee nga gupai naaundo yo, na kina gupai re si aidaha tipa ri a.” Ri aye ka rugatiri na kura pai berewe nga, “ani rengbe ka susa rogo gi kpakarapai re kina gu ka ani ageda Ziazia Kekeapai.”

Wisigo Ziazia Kekeapai ima yugo kurapai fu Delphine berewe nga—ka maaberã ri tipa kumbatayo angianga agu apai naima susa ya. Gu maabangirise i nagumba paha rogo Amokedi 24:15 afu wasa fu ri: “Ruru aboro azinga be kpio na iraira yo a.” Ya mo ri adu na gu kido nzunzu nga Yekova nika zingisa wiri ri? Ga Delphine karagapai nga: “Mi nika bi wire abi berewe ti gu regbo Yekova na siaha. Mi nabi ri abi awere berã re yo ni unga ri.”

a Dungu gi dede afugo re kina rogo gaani bangiriba nga ga Internet nga jw.org.

Ziazia Kekeapai ima rengba ka undo ro mo gbia wasa zavura ti kere aregbo

WAI GU RENGBE MBORI KA UNDO RANI?

Gu karagapai Ziazia Kekeapai afuhe nga ziazia. Si naya: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo. Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo.” (Atambuahe 145:18, 19) Ya mo gipai re ni pangbarago te? Wai gu tie Mbori afu karagapai kuti agu akparakpee nga ga agu aboro nakido kutiko tipa ko yugu gene fuyo?

NI FU KO OME FU RANI:

Kpakaraapai ima rengba ka ba gberãrago tirani na ki batasi omerani rogo—borose yo, kpotorani yo, na rogo toroyo. (Asanza 24:10) Ono Yekova “nafu tandu fu gu ni he amaka ni, na gu ni adu nga ome ti ni ya ko nakiisa omeni.” (Yesaya 40:29) Gu mokedi nangia Pauro, nga gu ko naahi dungu aasada, aya: “Mi rengbe na manga apai dunduko rogo gu ko nanyakasa re.” (AFiripoio 4:13) Ga Mbori ziazia toro naafu ome fu Pauro. Mo ima rengba a ka sana Mbori tipa ko fu ziazia toro foro.—Ruka 11:13.

NI FU KO TATAMANA FU RANI:

Na ka si du nga mo naida undo tipa ka giarogo agu arugute yo nga ga Ziazia Kekeapai na ki mangipai kuti ni? Gu bawiriki nangia Yakoba akepai nga: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yakoba 1:5) Mo rengbe ka mangapai kuti gamo akparakpee ni geda mo Ziazia Kekeapai na kini mangi gupai si ayugoho. (Yakoba 1:23-25) Wa mo nikaa mangaha wo, mo nika ino gupai nga gaha arugute nga pa tatamana.

NIFU ZEREDA FU RANI:

Zavura ho du mo ni rogo bakere bakabangirise, Yekova ima rengba ka undo ro mo gbia zereda. Fugoko naya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Tipagine ka mo asananga Yekova ti ni tipa ko fu zereda foro ya?

Na ka si du tie nga gu kpakaraapai re agonga ni ipo te? Ka mo danga kuti gupai nga Mbori ima mbu ro ya. Ka si vura du nga gupai re kpatagara akpatagara kuti ro, Mbori ima rengba ka fu ngarã na ome foro tipa mo hi he. (1 AKorindo 10:13) Ziazia Kekeapai a nakidohe tipa gu regbo gaani akpakarapai nika nyasa ti ni nyeanye kindi!