Ho Gberãngo Amanga Ni

“Ti tonatonaha ani aadunga na maabangirise te. Agu ahe naadu berani dunduko agberẽ be hihi ime na dogoro.”—Andrew, du Sierra Leone yo.

“Ani aga ku kporo yo tingbafuo bavugumo. Ahe dunduko paha agberẽ. Kina ngbarani nazere. Gu wire nga degude akuku ki tona ka kpara.”—David, du Virgin Islands yo.

KA SI du nga mo aima bata mbata be gberãngo, mo ima rengba ka rugatiro na gupai agu aboro bati be gberãngo nidu rogoho: bakabangirise, gbegberẽ amusumo, zanga ida kuti gupai mangi, na zera ngba. Badungu agu aboro nabata be gberãngo du na gberãrago na mbugo berãse yo na ti kpotose, i na nyemu ka ndu kumbatayo na raka te.

Ka si du nga pa gamo ahe ima gberã dunduko be gberãngo, mo ima rengba ka bihe nga ka mo hi nga gu gberãrago gbiati bakabangirise du mo na ni berewe te. Mo ima rengba ka tona ka berãpa gupai nga ndupai ho tipa mo naaraka te. Ono tie, Ziazia Kekeapai nasaka gupai nga ndupai kinaho mo araka ti ni na mo ima rengba ka du na nyanyaki maabangirise tipa wene raka kumbatayo.

GU RENGO NGA GA BAIBIRI NAFU MAABANGIRISE FURANI

Batungusipai 7:8 naya: “Digidapai ngba ti tonatona ha.” Ho mo atona atona ni kaa zereda be agu apai mangi ro ti regbo gberãngo, raka ima rengba kaa ngera wa guhe adunga na maabangirise ya. Ono ho mo atona ni ka mbakada gamo raka ni berewe na zerangbaduse, apai rengbe kadu wenengai.

Ziazia Kekeapai napepa gu regbo i nikaa ‘gía nga woro kparakpee . . . berewe ya, na kperungo berewe a ya.’ (Yesaya 65:19) Gipai re nika da ti rengo ho i nika sa kpotosende ni ni paradizo tiibe ga Mbori Kindo. (Atambuahe 37:11, 29) Gberãngo amanganga berewe te. I nika dia gu igirã gberãngo aye na ni kusayo nyeanye kindi, mbiko gu Mbori Du na Tanduapai Dũ kidohe nga: “I atíngida nga pa gu bambata apai te si ayé nga ku berãyo yo a te.”—Yesaya 65:17.

Mo berẽnga kurii gipai re: Bakusiahe ima manga mbakadapai tipa ka fu ‘maabangirise foro tipa gamo apai ku mbata yo’—nga wene raka tiibe ga Mbori Kindo. (Yeremaya 29:11) Ya mo pa ino mo gu rengo re rengbe ka saro mo naabi gamo raka na nyanyakipaha? Sally, du afugo ri rogo gu bambata kekeapai du rogo gi waraga re, aya, “Pa tingida mo tiro na gu wene apai ga Mbori kindo nika manga ha furani kumbatayo rengbe ka undo ro ka mo berẽnga pa gu gbegberẽ apai namangi ya ono mo hi kina agu apai namanga awere.”

Mo ima rengba ka wirikapai awere tipa gupai ga Mbori kindo nika mangaha barambeda fu aboro. Manga mo ho wo nika sa gupai nga mo du na gu kido nga ka si vura du vurũ nga mo ima mbu be gberãngo, gamo raka kindi na nyanyakipaha wa mo asungudo gu raka du kumbatayo nga gu nikaa dunga na gberãngo ya. Ono awere, Ziazia Kekeapai nafu arugapai nga gu rengbe ka undo ro mo du na diabese tingbafuo gberãngo. Mo bingo bete akpiapai

Agu Averesi Nga ga Ziazia Kekeapai Rengbe ka Undoro

Mo di regbo tipa ka ongoda.

“Hi be boro sa na zereda, ngba ti hi be boro ue be sunge na pa peka kina fuo yuge.”—Batungusipai 4:6.

Abawetekepai nape gupai nga ho pai amanga aboro ni nga gu naye na bakere gberãrago, gayo gberãrago rengbe kaa ndu kina kumbatayo kaa i adianga regbo ka ra wenengai ya. Sidu tie, si ni wenepai ka dia regbo ka ongoda wenengai.

Mo fura tipa agu apai nambusa ro.

“Rungo boro ku kpotoni yo nazoga ni ku sande, ono wene fugo nafu ngbarago fu ni.”—Asanza 12:25.

Mo fura na gamo aborokporo watadu gu bakureamo mo akido kuti ni. Boro dagba gamo aborokporo watadu mbembedi abakureamo ima rengba ka degatuni foro na ki pe afugo ngarasaro foro na ki fu gu undo foro mo aidaha.a

Mo berẽpa wai apai nika du ni wenehe kumbatayo.

“Ono mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.”—2 Petero 3:13.

a Gu boro du na gberãrago tipa gbanga regbo watadu du na kere bakabangirise rengbe ka gbata undo be amunganga.