Ho Badiarogatise Amanga Bäri Ni

“Mi aaida ka kpi kusayo ho kumbami aya ni ko nambu re tipa ka dia paranga degude. Gupai re aarunga te, gu susi nga ho mi anaatingidapa agu apai ni mi amangihe tipa ko.”—Maria, du Spain yo.

“Ho diare ambu re ni gbakirigbakiri, si adu wa kura papara re ima kpi kusayo. Gaani asásá, gaani amaabangirise, gbiati gaani ambakadapai tipa kumbatayo aima gberã. Kura aregbo anidu kinaho mi anaaberã gupai nga gimi bakabangirise ima go, ono mi kini bi tire kina rogo bakere gberãrago berewe.”—Bill, du Spain yo.

HO BADIAROGATISE amanga bäri ni, si naimisa boro ni kerehe. Rengo ngaha nga, kura abadiarogatise nabihe nga i ima rengba ka mbupai fu gu gayo badiarogatise saberã ni na i ki mbakadi gayo pagume berewe.a Ono singia agu arogotise re nanye ku rogo gayo rogatise watadu i nambutiyo, agu arogotise natingida gupai nga gayo badiarogatise amangi bäri nadu rogo bakere imisiri ni kerehe. Wai gu rengbe ngbatunga agu aboro re ka mangapai kuti gayo imisiri?

AGU AVERESI NGA GA ZIAZIA KEKEAPAI RENGBE KA UNDORO

Dungu agu abadiarogatise nanye ni ruruyo ima gbia wasa rogo Ziazia Kekeapai zanga bipa gu bakere gberãrago du yo rogoho. I ima wirika gupai nga Mbori nabi gayo aume abi na ko na nunga koyo du yo ni.—Maraki 2:13-16.

“Wa du sakapai ku kpotore yo ni badungu he, gamo wasawasa apai nangarãsa mbisimore.”—Atambuahe 94:19.

Bill aya: “Ho mi ageda gu veresi re ni, mi nabihe wa Yekova nazeresa gimi imisiri, wakina wai bagude narengbe ka mangapai na wiri ni ni nunga.”

“Mo nayugo tiro ni ruru ro fu ruru boro.”—Atambuahe 18:25.

Carmen kumbari aamanga bäri tipa dungu adiwi aya: “Kumbami aadunga ni ruruko te. Ono mi anidu na gu kido nga Yekova nika du adu fere ni ruruko. Ko abanga gberãrago tire te.”

“Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise . . . Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.”—AFiripoio 4:6, 7.

Sasha aya: “Mi agedi gi veresi re bara dunguhe. Wa mi anaamanga kparakpee ti aregbo dũ, Mbori afu zereda fere rogo gimi raka yo.”

Agu aboro dunduko ani nafura tipa yo kuari re abihe nga omeyo ima bata be raka. Ono i awisigi Baibiri nga gu nangarasi yo. Bill aya: “Gimi idapase asa gi raka si du na rogo yo ti ni. Wa mi avura ta ti kura aregbo ‘rogo ngbungumo kirima kpio,’ Mbori adu na kina re.”—Atambuahe 23:4.

a Tipa ka ino kura apai tipa singia mo naida ka mbupai fu gamo badiarogatise watadu mo aidanga ka mbupai te, mo bi gu kekeapai du rogo gu Awake! nangia ga Zerekpe 22, 1999, “When a Mate Is Unfaithful” rogo pa-Ingirisi.

Gupai Rengbe ka Undoro Mo Hipai

Mo berẽkurii agu averesi nafu wasa.

Bill aya, “Mi agedi gu buku nga Eyobo na Atambuahe, na ki gbaki ahe tii agu paparaha dunduko naandu sa na agu apai mi adu rogoho. Mi aye ka bi gupai nga, agu aboro mi aageda pai tipa yo re, agbiatiyo na kina gu ngbatunga imisiri gbiati bakabangirise mi adu rogoho.”

Mo gbia wasa ti degaturo kuti manzigo.

Carmen aya, “Ho mi aadunga ni na rengba ka ra yuru ya, mi anaadegature kuti manzigo. Si angia mburu bakere wasa fere.” Daniel aya: “Mi awiriki ta kundi na mi aye ka bi gupai nga pa wai si aida boro moiberã ni kuti manzigo ho ni ataha ni aundo re mi gbia zereda berãseyo.”

Mo fura tipa agu apai nafuda ro.

Daniel aya, “Mi angia gu boro naana idanga kaa fura tipa agu apai nafuda re ya. Ono wene abakureami adu kina ti ni, na mi atona kaa fura na yo tipa gimi apai na aˈuru dunduko. Mi ambu gene fuyo i inipa gimi fudifudiapai ni keka mi awaraga fuyo na kini pehe fuyo ni ngbare a. Gipai re aima undore ni bakerehe.” Sasha aya: “Gu undo nga ga gimi aborokporo aima du na nyanyakipaha. Nina anidu na mi ti aregbo dũ. Ka si ngia pai anidu ho mi anaaida ka gumbaha, ri anaadia regbo ka degaturi fere. Buba anaasa re a mi naabi tire nga i nakpinyemure akpi, na ko aundo re mi hu kina ngba gu gene mi aaidaha.”

Mo kpatagara kuti kparakpee.

Carmen aya, “Mi aamanga kparakpee amanga kindi. Mi abihe nga Mbori ambunga re te, na ko aadegatuko fere na kini undore. Vurube gi kpakarapai re, mi ambedi na Mbori.”