“Oni Bánda Tironi” Boro ka Zio Roni ni Akanga!

1. Ringbisihe kuti AKorosaio 2:4, 8, waigu Satana aida ka sarani ani naaberã wa gu ko aidaha?

SATANA naida ka sarani ka ani kpingo nyemu Yekova ya. Tipa kada ti gi gako sasa re, ko naʹasada ka aria gu gene ani aberã ngbaha, kini sarani ani naaberã wagu ko aidaha. Ko naʹasada ka nanga rani ani pekefuoko ni mangako sunge na agu ahe du ani na nyemuhe.​—Oni gedi AKorosaio 2:4, 8.

2-3. (a) Tipagine si aida ani degeturani ti ni kuti gu zahe du rogo AKorosaio 2:8? (b) Ginipai ani nika sakapai tipaha rogo gi kekeapai re?

² Ya mo Satana ima rengba ka nanga rani nzunzu? Ii, ko ima rengba! Oni tingidi gupai nga, Pauro aakenga gupai du rogo AKorosaio 2:8 fu agu aboro angianga ndikidi aidipase ya te. Ko akehe fu agu aKristano i aima mbeda yo na ziazia toro. (Koro. 1:2, 5) Agu aKristano naadu tigu regbo re adu rogo kerepai, na ani areme a kina rogo kerepai nga ko ima rengba ka nanga rani. (1 Kor. 10:12) Tipagine? I aima ba Satana ku auru kpotosende no, na ko namanga nyanyaki asadatise tipa ka nanga ga Mbori ruru amoyambu. (Yugo. 12:9, 12, 17) Kurigure, ani naraka ti gu regbo gbegberẽ aboro gbiati airanangahe “agbérã ki susi.”​—2 Tim. 3:1, 13.

³ Rogo gi kekeapai re, ani nika sakapai tipa wai Satana amangasunge na “kungba nangahe” tipa ka asada ka aria wai ani aberã. Ani nika bi gako ‘abirĩ’ biata. (Ef. 6:11) Fuoho, rogo gu kekeapai nika ngbefuo gere, ani nika wisigo wai rengbe ani ka diabe gu gbegberẽ maapai gu gako abirĩ re narengbe kadu na ni kurii gaani aberã. Ni bambataha, ani wisigingo pai tipa gupai rengbe ani ka wirikaha nibipa wai Satana aʹasadi ka nanga aYisaraere tingbafuo i rimi ku Ringara Mokido yo.

SATANA AʹASADI AYISARAERE I IRISI KPIAHE

4-6. Ringbisihe kuti Pa Fu Rugute ni Ue he 11:10-15, gini ngbatunga vovo birĩ sopabino si aaida aYisaraere wirikihe tigu regbo i aga ku rogo Ringara Mokido?

⁴ Satana aʹasadi aYisaraere rogo birĩ yo tipa i irisi kpiahe. Waigu ko amangi gipai re? Ko aima ino gupai nga i aaida riahe, sidu, ko amangisunge na gipai re tipa ka sayo i mangi gupai ngbatiko. Ho aYisaraere arimi ni ku Ringara Mokido yo, si aaida i wiriki vovo gene wai ka sopabino. Ho aYisaraere adu ni Ezipeta yo, i anaatuda gayo ati na gu ime i anaatuhe Nire yo. Ono tie, rogo Ringara Mokido, bakere baime aadunga yo te, sidu, tipa ka rũko ahe, i aida na mai gbiati ndomo. (Oni gedi Pa Fu Rugute ni Ue he 11:10-15; Yes. 18:4, 5) Sidu, si aaida aYisaraere wiriki vovo birĩ sopabino. Gipai re aadunga taata te mbiko badungu agu aboro naadu na birĩ sopabino aima kpiko ngbakungba yo.

⁵ Yekova ape gupai fu gako aboro nga agu apai du tipa yo ima ariatihe. Sidu, ko agbia gu kura zahe kuti ni nga gu naima rengba ka ngera mbata wa ngbanya dagbaha na pa sopabino te, ko aya: “Oni bánda tironi gu pai ka nanga kpotoroni yo, oni ki sa tironi ku bani, ka manga pa kura ambori, ka irisa ha.” (Pa Rug. 11:16, 17) Tipagine Yekova azahe ti ni tipa iriso kungbo ambori baraho ko aafura ni tipa wirika vovo birĩ sopabino?

⁶ Yekova aima ino gupai nga aYisaraere nika duadu ni asadiasadi yo ka wirika kura bete abirĩ sopabino be agu apagano naadu pati yo. Rengo ngaha nga, gayo amurakporo aima du na birĩ ino sopabino kisusi yo, na ga Mbori aboro aima rengba ka wirika wene abirĩ sopabino beyo, ono i aima rengba a ka nanga ga Mbori aboro. Agu abasopobino nangia aKanano re anaairiso Bara na gu irisombori re adu na maapai kurii yo. I anaabi Bara nga ko nga baira ngbangbaturũ na ni gu boro nasa mai si na. Yekova aaidanga i nangi gako aboro na gu ziree ida re te. Ono tie, dedede, aYisaraere anaasia ka iriso Bara. (Geda 25:3, 5; Abasa. 2:13; 1 Aba. 18:18) Oni bingo wai tie awere Satana adu na rengba ka zio aYisaraere i du ni gako akanga.

ABIRĨ BIATA SATANA AMANGISUNGE NA NI KA ZIO AYISARAERE I DU NI GAKO AKANGA

7. Gini asada nga ga idapase aYisaraere agbia tiyo na ni ho i arimi ni ku Ringara Mokido yo?

⁷ Gu bambata birĩ Satana amangisunge na ni angia ko amangisunge na gu nyemupai agberãnga ya, nga mai nina kurii gayo rukuruku ahe. Kina wiri bete mai gbua nanaana ku Ringara Mokido yo tona rogo digido biama diwi ki da ku rogo ribua diwi na agarã dunduko. Tipa gupai nga aYisaraere gbia ime watadu gayo rukuruku ahe zuku wenengai, si anaaru riipa gu mai nanaatona na bara rogo Tanvuo. Satana anangi aYisaraere i idi kuti gupai nga, tipa kadu na aũkumuko si naida i wiriki gu sino nga ga gu gayo amurakporo nangia apagano. Gu gayo amurakporo re aidi kuti gupai nga si naida i vugahe avuga tipa ka sa gayo ambori i mangipai watadu i sa mai si na. Agu aboro naadunga na idapase kuti Yekova ya aidi kuti gupai nga, gure nangia gu yangara gene rengbe yo ka ne bakere ugure ngbaha, sidu, i amangi gu sino apagano nga ga vugahe nga gu naafu iriso fu gu ziree mbori nangia Bara.

8. Gini ue birĩ Satana amangisunge na ni? Oni sakingo rogoyo.

⁸ Satana amangisunge na gako ue birĩ ka nanga aYisaraere. Ko amangisunge na wasiwasi nyemupai. Apagano anaairiso gayo ambori ni rimiso yo tiyo ku rogo kere gbegberẽ wasiwasi mangaapai. Gi kere wasiwasi sino irisombori re aakoda gupai nga adee na akumba ni mangi sunge banambara yekaru yo. I aambunga kina gupai gbua nga ga kodaba kumba na kurako watadu dee na kurari si nimangi te, ono i aabihe a nga si ni gupai agberãnga ya! (Pa Rug. 23:17, 18; 1 Aba. 14:24) Agu apagano re aidi kuti gupai nga gi sino vugahe re anaangarasa gayo ambori tipa i sa kpotosende si kusi dungu ariahe. Badungu aYisaraere adu na nyemu gu ga apagano avugahe nangia ga wasiwasi kodaba na mbiko gipai re, i adiberã ka iriso ziree ambori. Ka pe guhe nga rengo, Satana aima zio yo ni gako akanga.

9. Ringbisihe kuti Osea 2:16, 17, waigu Satana asa aboro bangiriyo go ti da nzunzu nga Yekova?

⁹ Satana amangisunge na gu kura biata birĩ. Satana asa aYisaraere bangiriyo go ti da nzunzu nga Yekova. Ti rago gu nebi nangia Yeremaya, Yekova agumba gupai nga ziree anebi asa gako aboro bangiriyo go ti Rimoko “mbiko Bara.” (Yere. 23:27) Ga Mbori aboro ambu mangasunge na rimo Yekova kini mangisunge na gu rimo nga Bara du rogoyo nga “Baira.” Gipai re asaha fu aboro ni mbumbuhe i ini gu kparakpara pai du dagba Yekova na Bara, si kini saha fuyo taata i naakoda sino iriso Bara na iriso Yekova.​—Oni gedi Osea 2:16, 17.

AGU ABIRĨ SATANA AMANGASUNGE NA NI AREME

10. Gini abirĩ Satana amangasunge na ni areme?

¹⁰ Satana namangasunge na kina bangisa agu abirĩ re areme. Ko nazio aboro ni mangako sunge na gu nyemupai agberãnga ya, taasapa wasiwasi kodaba na sa aboro bangiriyo go ti da nzunzu nga Yekova. Ni bambataha, ani nika wisigo wai Satana asa aboro bangiriyo go ti ga Yekova bipai.

11. Waigu Satana nasa aboro bangiriyo go ti da nzunzu nga Yekova?

¹¹ Satana nasa aboro bangiriyo go ti da nzunzu nga Yekova. Tingbafuo kpio ga Yesu amokedi, bete agu aboro naaya i nga aKristano atona ka gbandaka ziree ayugopai. (Amo. 20:29, 30; 2 Tesa. 2:3) Agi abasamungu re atona ka sa aboro ka i iningo ndikidi Mbori ya. Ni kpiapai, i ambu mangasunge na ndikidi rimo Mbori rogo aBaibiri kini mangisunge na kina agu afugo nga “Gbia” kubaha. Pa dia yo ndikidi rimo Mbori kusayo ki moi gupai kubaha nga “Gbia” asaha ni mbumbuhe fu agedi Ziazia Kekeapai i ini gu kparakparapai du dagba Yekova na gu kura “agbia” i nape payo rogo Ziazia Kekeapai. (1 Kor. 8:5) I amangisunge na kina gu bangisa fugo nga, “Gbia,” tipa Yekova gbiati Yesu, si kini saha ni mbumbuhe aboro rugutiyo na gupai nga Yekova gbiati Yesu nga aboro ni bakiakia na gayo abangiriba ni bakiakia a. (Yo. 17:3) Gi vunduvundupai re naafu be sa gu ida nga ga Tirinita​—nga gu yugopai adunga rogo Fugo Mbori yo ya. Ni sangbana gipai re, dungu aboro idi kuti gupai nga si ima mbu ka mbeda na Mbori. Gipai re nga kere ziree nzunzu!​—Amo. 17:27.

12. Ginipai ziree pambori nataasi paha na sangbanaha nga gine a wa i nasakipai tipaha rogo ARomo 1:28-31?

¹² Satana namangasunge na wasiwasi nyemupai. Ti regbo agu aYisaraere naadu mbata, Satana amangisunge na ziree pambori tipa ka sonosa pa wasiwasi mangaapai. Areme, ko namanga kina bangisa gupai re a. Ziree pambori nambu wasiwasi mangaapai si naamanga na zavura kini taasi paha. Ni sangbana gipai re, dungu agu aboro naya i nairisombori ima mbu pekafuo gu gako ziazia arugute du tipa ruru mangaapai. Gu mokedi nangia Pauro asakipai tipa sangbana gipai re rogo gu waraga yo ko akehe fu aRomo. (Oni gedi ARomo 1:28-31.) Agu apai du dagba “agu apai aru nga ya” nga ngbatunga wasiwasi akodaba dunduko kodihe na kodaba kumba na kurako watadu dee na kurari. (Rom. 1:24-27, 32; Yugo. 2:20) Si ni nyanyakipa pai furani ani kakuti gu ziazia ayugopai nga ga Baibiri!

13. Gini kura birĩ Satana amangasunge na ni?

¹³ Satana namangasunge na gu nyemupai agberãnga ya. Ani dunduko du na nyemu kadu na agu ahe berani ani araka mbikoho gbiati gaani aborokporo na ani naida ka wirika kura bete abirĩ nga gu rengbe ka undo rani. (1 Tim. 5:8) Dedede, ani nagbia bete abirĩ wa gu nga ka ino wai ka kepai, na ka gedapai ho ani andu ni ku sukuru yo. Ono si naida ani du na rubangirise. Rogo kura aringara i nayugo wene abirĩ sukuru yo fu agude nga gu rengbe ka undo yo na kini yugu gu tatamana ayugo a fuyo nga ga wiri aboro. I nangarasa agude sukuru i niikapa kuti padu Mbori ti ni na ka i naabingo Baibiri na nyanyakipaha ya. I nagumba gupai fu agude nga aboro birĩ inohe dunduko idi kuti gupai nga raka aenge ni saha. (Rom. 1:21-23) Ngbatunga agu ayugopai re kia ti “ga Mbori tatamana.”​—1 Kor. 1:19-21; 3:18-20.

14. Ginipai gu tatamana nga ga wiri aboro asongodaha?

¹⁴ Gu tatamana nga ga wiri aboro kia ti agu arugute nga ga Mbori. Si asongodanga pa ga Mbori zuzu toro te, kuba gure si nasongodapa “agu apai borose amanga” ha. (Gara. 5:19-23) Si nasa aboro i du ni airarukö, ni sangbana gipai re, aboro kini tona kaa ‘kpi kina nyemu tiyo.’ (2 Tim. 3:2-4) Agi asino re na ngbanya dagbaha na gu sino du bayee aboro na ni nga ga umbasitise te, nga gu sino Yekova angarasa gako amoyambu i du na ni. (2 Sam. 22:28) Bete agu aKristano ndu ku yunivasiti yo ima tona kaa berã kina wai zegino aberã angianga wai Mbori aberã ya. Ani wisigingo pai tipa kpiapai sa nga gu rengbe ka manga.

15-16. Ginipai ani awirikaha tigu kpiapai nga ga kura wirina sa?

¹⁵ Wirina ni dee naima mangasunge Kindo ti aregbo dũ tipa agarã naima susa 15 aya: “Nidu mi ni gu Dezire Yekova naima zio bapatiza, mi aima geda apai na ki gi dungu apai tipa gu kerepai duti bakere wirikapai, ono mi aamaanga berãre sa gu zahe re te. Mi aberẽ gupai nga gu rugute re abingo pare te.” Gini akpakarapai ri agbia tiri na ni ni sangbana gipai re? Ri aya: “Mi adi bakere regbo ka maaberã re tipa gupai mi aawirikaha si ki sa gupai nga ka regbo dunga berewe bere ka manga kparakpee wagu mi anaamangaha mbata ya, ka regbo dunga bere kaa tungusapai ya, na si kini sa re ka mi naambakadanga adunguratise wenengai ya. Bara sa kindi fuo ino mi gupai nga pa dunguro mi ku rogo bakere wirikapai nagbarasa gimi pagume na Yekova, mi aini gupai nga si naida mi mbuhe, na mi aima mbuhe.”

¹⁶ Gini maapai bakere wirikapai adu na ni kurii gu gene gi wirina re aaberã ngbaha? Ri akaragapai ki ya: “Si ni pazee nga gu wirikapai mi apekefuo ho asa re mi naamaa berãre kina kuti agu aingahe nga ga kura aboro, gbe gu nga ga agu awirinami nga aKristano, mi aabihe nga si naida i naamanga apai kisusi gu rengbe ome yo na ni, na si asa re mi kpara tire tiyo kusayo. Si adi re na dungu regbo tipa mi mbu berã wagu re. Gu regbo re rogo gimi raka yo ayugu wai fere duhe ni kerepai ka zanga mangapai kuti agu azahe gu Barani du ngbangbaturũ yo afuhe furani vurube gako riigbu. Yekova naini re kisusi wai mi aini tire. Gupai si aaidaha bere gbua nga mi degeture fuko!”

17. (a) Ginipai si aida ani diberã tipaha? (b) Ginipai ani nika sakapai tipaha rogo gu kekeapai ngbefuo gere?

¹⁷ Si naida ani diberã tipa ka zanga mbu tirani kadu ni zizi rani be gu “tatamana na kungba nangahe” nga ga gi ga Satana zegino re. Ka ani ya mbunga Satana ko nangi rani ya. (1 Kor. 3:18; 2 Kor. 2:11) Ka ani ya mbunga Satana ko sarani bangirani go ti da nzunzu nga Yekova ya. Ani raki ringbisihe kuti gu ga Yekova arugute du tipa ruru mangaapai. Na ka ani mbunga tirani Satana nangi rani ani ká gu ga Yekova arugute du tipa ruru mangaapai ya. Ono na ka mo bi gupai nga gu berãpai nga ga gi zegino re na maapai kuriro? Gu kekeapai ngbefuo gere nika sarani ani bi wai Fugo Mbori narengbe ka undo rani ani ‘bafu’ nyanyaki aberã gbiati mangaapai.​—2 Kor. 10:4, 5.