Oni Tungusipai fu ‘Ngbatunga Aboro Dunduko’

1. Wai du wene abatungusipai wakina wene abambakadiahe?

¹ Wene bambakadiahe nidu na dungu aũsunge beni, na ní ima ino gu regbo si aida ní mangisunge na agu aũsunge re nibasasa na wai ka mangasunge nani. Wakina gure a, ani na dungu angbatunga aũsunge berani nga gu du tipa undo rani ani mangi gaani sunge tungusapai wenengai. Nikpiapai, badungu aburosua nafura tipa dungu apai kusiyo ho tipa si undo rani ani tungusipai fu ‘ngbatunga aboro dunduko.’ (1 Kor. 9:22) Gu rimisirimisi kpewaraga du rogo gi Gaani Sunge Nga ga Kindo re tangara rimo bete agi aburosua re, ki gumbapa agu aboro i akehe tipa yó gbe, na ki fu berãpai tipa wai rengbe ani ka fuhe fu boro.

2. Gini aregbo rengbe ani ka mangasunge na aburosua ba tungusapai yo?

² Gu Regbo Si Aida Ani Mangisunge na Aburosua: Bambakadiahe namangasunge na kura ũsunge ho ko abihe ni nga si rengbe ka undo. Wakina gure a, ani rengbe ka fu burosua fu boro ho ani abihe ni nga si nika undo ní aundo, angianga mbiko gupai gbua nga si nga gu waraga si aida i fukuhe fu aboro rogo gu diwi re ya. Nikpiapai, ka si du nga i yawee i fuku gu buku nga Bible Teach rogo gu diwi re, na ani kini tungusipai fu gu boro nga Masarami watadu boro kura pambori nga guni adunga na nyemu Ziazia Kekeapai ya, si angba angba ka ani fu gu burosua funi daada na ki gumbapa gu buku funi nga Bible Teach fuo rimiso ani nyemu Ziazia Kekeapai ku rogoniyo.

3. Tipagine si aida ti ni ani ini mangasunge na gaani aũsunge?

³ Ziazia Kekeapai nafura wenengai tipa agu aboro namanga gayo sunge na birĩ. (Snz. 22:29) Nirengo, sunge ho nyakipaha areme susi gu ziazia sunge nga ga “ga Mbori Wene Pangbanga” te. (Rom. 15:16) Tipa kadu ‘nigu mangisunge adunga na zee ya,’ si naida ani asaditirani ka ino mangasunge na gaani aũsunge.—2 Tim. 2:15.