Tua Tipa ka Yamba Aboro Tipa Tingida Pakpio Yesu Nika Tona Rogo Marungu 1

1. Ti gini regbo ani ka tona tua tipa ka yamba aboro tipa Tingida Pakpio Yesu, na tipagine gu tua re nikadu ti ni niwiri gbangaha rogo gi garã re?

¹ Rago Bisue, Marungu 1, ani nika tona gu tua ani naamangaha rogo agarã dunduko tipa ka yamba aboro i ye kadu na ani pati Tingida Pakpio Yesu. Wa duhe nga Tingida Pakpio Yesu nika manga rogo Marungu 26, gure nga gu tua re nikadu niwiri gbangaha susi agu nidumbata. Gipai re nika ka sa gupai nga badungu aboro gbia yambahe, gbe rogo gu dagbarago nga ga dungurati du nibakerehe.

2. Gini mbakadapai nikadu tipa gbia waraga yambahe na tipa kparakaha rogo dagbarago dunduko?

² Mbakadatise: Abaakumba nika fu rugapai afu tipa wai oni nika kparaka waraga yambahe rogo gaoni dagbarago dunduko, na singia oni nika mbu waraga yambahe ambu ho adunga aboro ni tiikporo ya. Ka si du nga oni ima nyasa kparaka awaraga yambahe kporo na kporo ono yangaraha ki nye kindi, oni rengbe ka kparakaha ti regbo manga dezirepai gbaiga. Gu babiapai nga ga sunge tungusapai ko nika manga mbakadapai tipa i naamaa agu awaraga yambahe du na keke regbo ti ni gbiati gu ba i nika manga Tingida Pakpio Yesu rogoho ba abuku yo watadu ba amagazini yo tipa abatungusipai naadiaha yo, ono i akusanga ha dunduko ti kina bangisa regbo te. Si naida ani rogo kina gu bangehe ani nika kparakaha rogo poso sa ti agu aregbo dunduko i akusaha tipa ani rogoho.

3. Ginipai si aida ani bandaha berãrani yo ho ani kaa kparaka waraga yambahe ni?

³ Ginipai Ani Nika Gumbaha? Si adu wenengai ka ani fura niwiri guruhe, bambiko si nika sa gupai nga ani yambu badungu aboro. Kpia wai ka fu gu waraga yambahe re gu du ti kpewaraga 4 nga gu rengbe oni arengba ka ariaha ringbisihe kuti gaoni dagbarago. Anga si nga ani mangi amanga gbakirigbakiri ki guari pati boro si ki vura du vurũ nga ní na nyemupai watadu na sanahe ngbani te. Ho ani kaa kparakaha ni ti digido aposo, ani rengbe a ka fu amagazini ho du rengba adu ni. Rogo Marungu 2, ani nikaa kparaka kina awaraga yambahe kuba tona wisigo Ziazia Kekeapai na aboro.

4. Tipagine si aida ani mangi gu tua re ti ni na omerani dunduko?

⁴ Ani na gu maabangirise nga dungu aboro nikaye kadu na ani pati Tingida Pakpio Yesu. Gu gumbapai i nika mangaha nika sakapai tipa gu boro nzunzu nga Yesu. (1 Kor. 11:26) Si nika fura tipa wai kpioko aundo rani. (Rom. 6:23) Na si nika yugo ndu gupai duhe ti ni ninyanyakipa pai ani tingidi pako. (Yo. 17:3) Ani mangingo gu tua re amanga na omerani dunduko!