Tua Tipa ka Takapande Tingida Pakpio Yesu Nika Tona Rogo Marungu ti Rameru 17
1. Gini tua nika tona rogo Marungu ti rameru 17?
1 Tingida Pakpio Yesu rogo agarã dunduko nidu tipa ka takapande pakpio Yesu. (1 Kor. 11:26) Sidu tie, ani naida kura aboro ye kadu na ani patini tipa ka gia pa gu ga Yekova gamunihe nga motumo tumorii. (Yo. 3:16) Rogo gi garã re, gaani tua tipa ka yamba aboro tipa Tingida Pakpio Yesu nika tona rogo Marungu ti rameru 17 Rago Nzengu. Ya mo oni namaa bangironi tipa ka mangaha na omeroni dunduko?
2. Ginipai rengbe ani ka gumbaha tipa ka fu gu waraga yambahe re?
2 Gupai Rengbe Ani ka Pehe: Si adu niwenepai ka ani fura niwiri guruhe. Ani rengbe ka yaa: “Seneoo. Ani herẽ tipa ka fu waraga yambahe foro na gamo aborokporo, gi waraga yambaha re tipa gupai ninaamanga rogo agarã dunduko nga gu nika manga rogo zegino dunduko rogo Zerekpe ti rameru 5. I nika manga gumbapai du mburuhe rii Ziazia Kekeapai nga gu nika sakapai tipa gupai kpio Yesu amangihe furani, na gupai ko amangaha awere. Gi waraga yambahe re nayugo pa gu ba gbiati regbo gu gumbapai re nika manga ti ni rogo gaani dagbarago ane.” Ho ani kaa kparakaha ni ti digido poso, si naida ani fu amagazini nani wa sa ka gene du.
3. Ginipai rengbe ani ka mangaha tipa ka yamba aboro nidunguyo?
3 Oni Yambu Aboro Nidunguyo: Gaani sásá nga ka yamba aboro nidunguyo. Oni yambu agu aboro oni naawirika Ziazia Kekeapai naayo, agu aboro oni naakaraga tironi kaa biyo, agumeroni, abadiasunge, akuaroni sukuru yo, gaoni amurakporo gbiati kura aboro. Agu abaakumba du rogo gaoni dungurati nikafu arugute afu furoni tipa wai rengbe oni ka kparakaha rogo gaoni dagbarago naabaha. Agu atua ani naamangaha na agarã dunduko tipa kaa yamba aboro ninaaye aye na wene sangbanaha. Rogo gu garã nasusi, ho dee sa ayeni tipa Tingida Pakpio Yesu, agu aboro ninaafu basungo fu aboro aʹasadi ka gbata gu boro nayambu ri. Ono tie, ri ape gupai nga ri ainongo boro dagba agu aboro re te ono ri agbia waraga yambahe be boro naatungusapai kini tanga nani ti akporo wiso rogo gu uru re.
4. Tipagine si aida oni mangi tua ti ni zaaza?
4 Isoke, boro aduadu ho sa dagba agu aboro nikaye mbiko gupai nga oni nayambu ní. Singia aboro aye watadu i ayengo te, gaoni nyanyaki asadatise nika manga wene dezirepai. Gu waraga yambahe oni nika fuhe re nika takapande gupai nga Yesu awere nga bakere Bakindo. Padu oni zaaza nika yugo gupai fu agu aboro du rogo gaoni dagbarago, kura abatungusipai, gbiati Yekova nga oni na bakere tambuahe tipa gu gamunihe nga ga motumo tumorii.—Koro. 3:15.