Kparaka Awaraga Yambahe Tipa Tingida Pakpio Kristo Nika Tona Rogo Zerekpe Ti Rameru 2
1. Ti gini regbo ani ka tona kparaka waraga yamba aboro tipa Tingida Pakpio Kristo rogo gi garã re, na ginipai nyaki pa gi tua re anyaka ti ni?
1 Tona rogo Zerekpe ti rameru 2 kuti rameru 17, ani nika kparaka waraga yamba aboro tipa gu nyanyakipa dunguratise nika manga rogo gu garã re. Gu nyanyakipa dunguratise re nga Tingida Pakpio Kristo. Rogo agu agarã susi, dungu agu aboro du na nyemupai aima ye tipa gu dunguratise re fuo gbia yó waraga yambahe. Nikpiapai, rogo kura garã sa, rogo uru Tingida Pakpio Yesu, dee ayambu be-basunge ki gumba gupai nga: “Mi gi daada awere kporo re, wa mi nida, mi nigbia waraga yambahe tii gi ngbadimo. Mi naida aida ka ndu, ono mi ainongo regboho te.” Gu wirina natumba terefuni asakipai furi tipa wai rengbe ri ka bi regboho kina rii gu waraga yambahe re. Ti digidoho, gu dee re akidohe nga, “Mi nandu andu areme tipa gu gaoni dunguratise re!”
2. Ginipai rengbe ani ka gumbaha tipa ka fu gu waraga yambahe re fu boro?
2 Wai Ani Kaa Mangaha: Wa duhe nga regbo nikadu gbua berani tooni tipa ani kparakaha rogo gaani dagbarago naabaha, si angba angba ka ani fura gbua niguruhe. Ani rengbe nayaa: “Sene fu aboro. Ani naida ka fu gi waraga yambahe re furoni na gaoni aborokporo tipa gu nyanyakipa dunguratise ninaamanga rogo garãyo gbua bara sa nga gu nika manga rogo gi garã re Rago Poso, Zerekpe 17. [Oni fu gu waraga yambahe re fu irakporo.] Gu ramediwi re nga gu uru ani nika tingida pakpio Yesu ti ni. I nika manga gumbapai yo du mburuhe rii Ziazia Kekeapai nga gu aboro nika tumongo tipaha ya, si nika fura tipa wai rengbe ani ka gbia undo ti ga Kristo motumo tumorii. Gi waraga yambahe re nayugo gu ba gbiati gu regbo i nika manga gu dunguratise re ti ni rogo gi gaani dagbarago re.”
3. Wai gu rengbe ani ka yamba aboro nidungu yó?
3 Ka si du nga gaoni dungurati na bakere dagbarago nga ga tungusapai behe, abaakumba rengbe ka gumba gupai furoni nga oni mbu gu waraga yambahe re ambu rogo agu akporo adunga airaha tiikporo ya, ono rogo gu ba kura boro kia nikaa bingoho rogo ya. Ka bangironi gonga a ti yamba agumeroni, abadiasunge, akuaroni sukuru yo, agu aboro oni naakaraga tironi kaa biyo fuo tungusa oni pai fuyó, na gu kura aboro oni nainidi tironi naayó ya. Ho oni akparakaha ni ti digido poso, oni rengbe arengba ka fu amagazini a fu aboro ka si du nga si rẽarẽ. Ya mo oni rengbe ka mangasunge ni moundo abazakigene rogo Zerekpe tipa ka kiiso gaoni ngbarago ti regbo gu tua re?
4. Gini nduapai ani aida agu aboro duna nyemupai duadu ti ni pati gu Tingida Pakpio Yesu nika manga?
4 Nairiwo gu wene dezirepai agu aboro nika ye re nika gbiaha! I nika gia pa gu bakere nyemuse Yekova ayuguhe nifuko motumo tumorii. (Yo. 3:16) I nika wirikapai tipa wai ga Mbori Kindo nike ye na amaku fu ngbatunga aboro dunduko. (Rk. 22:29) I nika du a na momu beyo tipa ka sana boro sa dagba agu aboro nikaa mbakada ba aboro tipa ka wirika dungu apai rogo Ziazia Kekeapai. Ani nakpara na kidu na gu maabangirise nga dungu aboro nga aguyo nakpinyemu rurupai yengo aye kadu na ani pati Tingida Pakpio Yesu!