Mbakada Gaani Gene Tungusapai​—Kepai Tipa gu Boro Yugu Nyemupai

“Mo bérẽ pa tiro, na ga yugopa.” (1 Tim 4:16) Gi rugute ga Mbori toro adu kugii Pauro ko kehe fu Timoteo re nayugo gupai nga si naida ani mangi asadatise nyanyaki ka mbakada gu gene ani atungusapai ngbaha wangia ani abatungusipai, ka si vura du vurũ nga ani nga vovo abatungusipai watadu ani ma ima kuti sunge tungusapai. Gupai nika undo rani ani mangihe nga, vovo kekeapai nika kura rogo Gaani Sunge Nga ga Kindo du riihe nga “Mbakada Gaani Gene Tungusapai.” Gu kekeapai re dunduko nibasasa nikaa sakapai tipa biri wai ka tungusapai na ki fu aberãpai tipa wai ka mangaha. I nangarasa aboro dunduko tipa i berẽ kurii wai ka manga agi apai re rogo agu adiwi dunduko si nikaa kura. Tifuo digo diwi, Gu Dunguratise Nga ga Sunge nika fu mamu furani ani gumba wai ani agbia undo na ki gumba agu apai namangi furani. Rogo gi diwi re, i nangarasa rani dunduko nga ani kenga pa gu boro ake yugu nyemupai.

Ndu Gupai Duhe Ti Ni na Nyanyakipa Ha: Tipa ka manga gu sunge Yesu afuhe furani, si naida ani mangi kura apai berewe susi gu nga ga tungusapai. Si naida ani karaga tirani fuo agu aboro yugu nyemupai na ka yugopai fuyo, tipa ka tuda gu tunga nga ga rengo ani arũhe. (Mt 28:19, 20; 1 Kor 3:6-9) Gipai re naida gupai nga ka gbia gu boro berewe ani afura na ní, ki fura na ní riipa agu apai ní abakabangirini tipaha, na ani ki tona fugo na ní riipa gupai ani afura mbata tipaha. Sidu tie, ho ani agbia gu boro ni yugu nyemupai, si rẽarẽ ani kepai tipa ní.

Wai Ka Mangaha:

• Si naida oni mbakaditironi ki rogodi agu ahe nga ga kekapai na oni, tipa ka kekapa agu aboro ka yugu nyemupai. Oni banda gaoni kekeapai nigigirihe na ni mbakadimbakadihe na kini fuguhe afugo kindi. Ka oni nyasi fugo na boro, oni kepai tipa ní nibasa.

• Oni keke agu apai du tipa irakporo. Oni ke rimo ní, agu apai du tipa ní, wa ngbatunga agu nga gu ba ní araka rogoho, gani namba terefuni, gani adresi nga ga e-mail. Gupai oni nakpariaha tipa ní na gani aborokporo nga gu rengbe kadu na nyanyakipa ha. Na ka si dunga agude beni, watadu boro ho nawoka rogo gu kporo re oni rengbe arengba a ka kehe.

• Oni keke gu futufutu apai dunduko oni nafura tipaha. Wa agu nga gu veresi oni nagedihe, gani aida, gu waraga oni nafuhe funi, gu regbo oni nadihe na ní, gu uru oni nandu fuo ní rogoho, na gu rame diwi nga ga gu uru re.

• Oni kekepa agu apai oni aida ka mangaha na ní fuo gure. Gupai oni akido ní tipa ka fura na ní riipaha, na gu regbo oni aya oni nika karaga tironi fuo ní ti ni.

• Ai gu regbo oni andu fuo ní, oni ke gupai kadu. Anga gbegberẽpai ngaha ka oni keke badungu apai kusande tipa ní te.

Oni Asadi Gipai Re Rogo gi Diwi Re:

• Ho oni akeka agi apai re ni, oni gumbapa agu apai agumba oni akekaha fu gu boro oni nakuru na ní.