Si Naida I Tudi Tunga Atuda Tipa Si Sono
1. Gine si aida ani tudihe atuda tipa si sono?
1 Tipa gu tunga rũyo ho ati yo sono, si naida i tudihe atuda. Kina gu bangisapai re du tipa gu tunga nga ga rengo nga gu ani arũhe ngbadu aboro yo rogo gaani dagbarago. (1 Kor. 3:6) Si naida ani karaga tirani akaraga berewe kini tudi gi tunga re nimanga ani sunge na Sangba Mbori tipa tarãha nyaki, si ki sono, na kidu wenengai.
2. Wai rengbe ani ka sa boro ní du na nyemu ani karaga tirani berewe fuoni?
2 Oni Mbu NÍ na Sanahe: Ho oni ambakada wai ni oni nika tona fugo na boro, si ngbaangba gbe ka oni mbakadi gu sanahe oni nika mbu ní nani si ki sani ní du na nyemu oni karaga tironi berewe tipa ka sakapai tipaha. Oni fu gi sanahe re ti digido gaoni sakapai, na ki mangi wene mbakadapai tipa ka ye berewe tipa ka karagapai sani. Dungu aboro bihe niwenehe ka siapai rogo gu buku nga Bible Teach nga gu rengbe ka undoyo i yugu wai ani naawisigo Ziazia Kekeapai na aboro.
3. Gini apai si aida oni kehe ho oni ake agu apai ni mangi oni he?
3 Oni Ke agu Apai Mangi Oni He: Tingbafuo nyasa oni fugo na boro, oni di regbo ka ke agu apai fura oni riihe. Oni ke rimo gu boro re na gu ba ní asungo rogoho. Si ngbaangba a ka kepa gu ramediwi na gu saa oni nagbia ní ti ni, gupai fura oni riihe, na gu waraga fu oni he kangia oni fu waraga. Ya mo ní nigumbapa gu pambori du ní rogoho? Aborokporo beni? Ya mo ní nigumbapa agu apai ngba tiní na agu apai ní aida ka ino pai tipaha? Ino agi apai re rengbe ka undo roni oni fura kina tipa agu apai ngba tiní ho ka oni karaga tironi ni berewe. Si naida aida a oni kepa gu regbo oni nika karaga tironi berewe na gu sanahe oni ka karagapai sani.
4. Tipagine si aidanga ti ni ani he karaga tirani fuo agu aboro duna nyemupai tiyo ya?
4 Oni Duna Hipai: Satana ambunga asada tiko ka ‘dia gupai’ ani arũhe ngbadu aboro yo te. (Mk. 4:14, 15) Sidu, ka oni henga karaga tironi fuo agu aboro duna nyemupai mbiko gupai nga si nimbumbuhe ka gbiayo kporo ya. Ya mo oni rengbe ka keda waraga watadu ka ke wiripai ki mbuhe ti ngbadimo? Nazakigene sa atona wisigopai na dee ngbadimo kpuri ono ka ri arengbanga ka gbia ri berewe tiikporo ya. Gupai ri amangihe nga ka ke waraga ki kedihe furi. Ho ri agbia gu dee re ni niyangara, gu dee re agumbapa wai ri adu na ngbarago mbiko gu nyemuse ri ayuguhe furi. Wa ani kaa tuda gu tunga nga ga rengo, ani rengbe arengba ka gbia ngbarago mbiko bi ani tunga si nikuru, kini sono, na ki zu “ki nge ange bara 30, na bara 60 na bara 100.”—Mk. 4:20.