Vovo Arogotise, Oni Moi Iriso Yekova Ni Nyanyakipa Pai Kisusi Rogo Gaoni Raka Yo

1-2. (a) Tipagine si aida vovo arogotise kido ti ni kuti Yekova? (Atambuahe 37:3, 4) (b) Gini apai ani nika sakapai tipaha rogo gi kekeapai re?

YO MO mo ima mbeda ka manga rogatise watadu mo mangi rogatise barambeda? Ka singia wo duhe, zanga kapa, mo nangera kumbatayo tipa ka gbia ngbarago rogo raka yo na gu boro mo nakpinyemu ni ni bakerehe gbe. Rengo ngaha nga, rogatise na kina akpakarapai rogoyo. Na nyanyakipa adiaberã kinaho si aida agu aboro mangi rogatise ni vovoho mangihe. Agu apai oni amangaha ho oni agbiatironi ni na akpakarapai na agu adiaberã oni amangaha nika yugopa wai oni nika du na ngbarago vuru agu agarã yo nika ye kumbatayo. Ka oni kido kuti Yekova, oni nika manga agu adiaberã nga ga tatamana, gaoni rogatise nika nyaka gbe, na oni nika du na bakere ngbarago. Ka oni akidongo kuti Yekova ya, si nawira gupai nga oni nika gbiatironi agbia na fudifudiapai nga gu nika ye na akpakarapai ku rogo gaoni rogatise si ki sa gupai nga ka oni dunga na ngbarago ya.—Oni gedi Atambuahe 37:3, 4.

² Wa vura duhe nga gi kekeapai re nafura gbe fu vovo arogotise, si nika sakapai asaka a tipa agu akpakarapai rengbe arogotise dunduko ka gbiatiyo na ni. Si nika sakapai tipa agu akpiapai gu ruru akumba na adee du payo rogo Ziazia Kekeapai yo amoihe. Agi akpiapai du rogo Ziazia Kekeapai re nika yugopai furani tipa agu apai rengbe ani ka mangaha rogo gaani raka yo na rogo gaani rogatise. Ani nika bi agu apai abi a rengbe ani ka wirikaha ti agu akpiapai nga ga gu kura arogotise du ti gi gaani regbo re.

GINI AKPAKARAPAI RENGBE VOVO AROGOTISE KA GBIATIYO NA NI?

3-4. Gini akpakarapai rengbe vovo arogotise ka gbiatiyo na ni?

³ Kura aboro ima rengba ka ngarasa vovo arogotise i raki kina wai kura aboro araka areme. Ni kpiapai, avungu vovo arogotise gbiati kura agumeyo ima rengba ka sosoda yo i tona vunga agude nibasa fuo manga yo rogatise. Watadu abakureayo na kura gayo aborokporo ima rengba ka ngarasa yo nga i ngbe kporo gbiati dungu ahe tipa ka sa kpuyo ni bawenehe.

⁴ Ka agu arogotise re aadunga na rubangirise ya, i ima rengba ka manga agu adiaberã nga gu rengbe ka sa yo i rimisi tiyo ku rogo bakere bape. Na si nawiraha nga si ima rengba ka ida i mangisunge tipa dungu asaa tipa ka tumo agu abape re. I ima rengba ka mangasunge ni bakerehe si ki sa gupai nga ka regbo dunga beyo rengbe arengba i dihe kuti wisigo Ziazia Kekeapai nisase, gu irisombori nga ga aborokporo, gbiati tungusapai ya. Agu arogotise re ima rengba ka kpa adunguratise tipa ka mangasunge kugii regbo yo tipa wa ka i gbia bakere marã watadu wa ka i banda gayo asunge. Ka i mangihe wo, badungu weneapai kinaho tingba ga Yekova sunge ka i aadunga na rengba ka mangaha ya.

5. Ginipai mo nawirikihe ti gu kpiapai nga ga Klaus na Marisa?

⁵ Badungu akpiapai ima yugo gupai nga, ka si du nga gu nyanyakipa pai du rogo gaani raka yo nga ka gbia aũborose, ani adunga na ngbarago te. Oni berẽnga kurii gupai agu arogotise nga Klaus na Marisa awirikihe nibipa gipai re.b Ho i amangi rogatise ni, i dunduko ue atona mangasunge marã ti aregbo dunduko tipa ka gbia bakere marã gbiati aũkumuko. Ono i aadunga nzunzu na ngbarago te. Klaus aya: “Ani aima du na aũborose berani ni bakerehe gbe, ono ani aadunga na asasa nga toro berani te. Ka gumba guhe nga rengo, raka aima du ni kpakarakpakaraha na kidu na gberãrago.” Isoke oni nitironi ima bi gupai nga, maaberãse kina kuti agu ahe nga ga borose ayengo na ngbarago te. Ka singia wo duhe, ka oni dunga na gberãrago ya. Wirika oni agu akpiapai nga ga kura aboro ima rengba ka undo roni oni mangi aˈariapai. Ni bambataha, ani bingo gupai rengbe kumbakuadee ka wirikaha ti gu kpiapai Bakindo Yosafata amoihe.

WAKINA BAKINDO YOSAFATA, ONI KIDO KUTI YEKOVA

6. Waigu Yosafata amangipai kuti gu rugute du rogo Asanza 3:5, 6, ho bakere rimbasa abanzengere aye ni ka sovura kuti gako aboro?

⁶ Kumbakuadee, ya mo omeroni ni naabata abata ti kura aregbo be agu asunge du kurironi? Ka singia wo duhe, oni ima rengba ka gbia undo ti gu kpiapai nga ga Bakindo Yosafata. Wa Yosafata angia bakindo, ko du naadu na gu sunge nga ga ngerafuo gu padu wenengai nga ga aboro ringara dunduko! Waigu ko amangi gu bakere sunge re? Yosafata amangi gupai ko arengbe ka mangaha tipa ka banda agu aboro naadu kutii beko. Ko anyakasi agu agbata nangia ga Yuda, na ki dungura agu abanzengere naadu na ome tiyo bangeyo aima susa mirioni sa, sa kama na sita bawe akutu. (2 Peka 17:12-19) Kusa, Yosafata agbiatiko na bakere kpakarapai. Bakere rimbasa abasovura nga ga aAmono, aMoaba, gbiati agu akumba naaraka rogo gu ringara du na agangara rogoho nga ga Seira aserekpo ko, gako aborokporo, gbiati gako aboro. (2 Peka 20:1, 2) Ginipai Yosafata amangihe? Ko asana Yekova tipa undo na ome. Gipai re adu na ngbanya dagbaha na gu rugute nga ga tatamana du rogo Asanza 3:5, 6. (Oni gedihe.) Gu ga Yosafata kparakpee nga ga umbasitise du ni kekehe rogo 2 Pekapai 20:5-12, nayugo gupai nga ko aima du na bakere kido kuti Yekova. Waigu Yekova akaragapai kuti ga Yosafata kparakpee?

7. Waigu Yekova akaragapai kuti ga Yosafata kparakpee?

⁷ Yekova afura na Yosafata vurube gu boro Revi rimoko angia Yaziere. Yekova aya: “Oni ríngbisi ti roni, oni ki ru aru zaa, ka bi gu diabese nga ga Yekova du tipa roni.” (2 Peka 20:13-17) Nirengo, anga gure nga gu gene i naasovura ngbaha te! Ono tie, agu arugapai re aayengo be boro te; si aye be Yekova. Yosafata akido kuti gako Mbori, na ki mangi gupai i agumbaha fuko. Ho ko na gako aboro andu ni ka gbia avurayo, ko aamaanga agu abasovura naadu na biri sovura tiyo kumbatayo te, ono ko amoi kina ababi bia naadunga na aũvura beyo ya. Yekova aima banda gako kidohe fu Yosafata; Ko aima diabe agu abanzengere nangia avurayo re.—2 Peka 20:18-23.

8. Ginipai rengbe kumbakuadee ka wirikaha ti ga Yosafata kpiapai?

⁸ Kumbakuadee, oni ima rengba ka wirikapai ti ga Yosafata kpiapai. Oni na gu sunge rironi nga ga ngerafuo gaoni aborokporo, sidu, oni mangi sunge nyanyaki ka banda yo na ka songoda yo. Ho oni agbiatironi ni na akpakarapai, oni ima rengba ka berã gupai nga oni ima rengba ka mangapai kuti agu akpakarapai re nitironi. Ono tie, ka oni kidongo kuti gaoni ome ya. Kuba gure, oni kpari fu Yekova tipa undo ho du oni ni nisaroni. Kurigure, oni naamanga kparakpee kina boro kpotoroni yo na adiaroni. Oni gbata arugapai be Yekova niwisigo oni Ziazia Kekeapai gbiati agu awaraga ga Mbori riigbu akusaha na kini mangipai kuti agu arugute oni agbiaha rogoho. Kura aboro ima rengba ka zanga ida kuti agu adiaberã oni amangaha nga gu du mburuhe rii Ziazia Kekeapai, na zavura i ima rengba ka gumba gupai furoni nga oni nga airamungo. I ima rengba ka pe gupai nga, marã gbiati agu ahe marã narengbe ka ngbehe ima rengba ka fu bandahe fu gaoni aborokporo. Ono tie, oni tingidipa gu kpiapai nga ga Yosafata. Ko aima kido kuti Yekova na ko ki yuguhe rogo gako mangaapai yo. Yekova aambunga gu ruru kumba re te, na ko ambunga roni a te. (Tam. 37:28; Eb. 13:5) Gini kurapai rengbe arogotise ka mangaha kina sa tipa kadu na ngbarago rogo raka yo?

WAKINA GU NEBI NANGIA YESAYA NA DIAKO, ONI MOI IRISO YEKOVA NI NYANYAKIPA PAI KISUSI ROGO GAONI RAKA YO

9. Ginipai rengbe ani ka gumbaha tipa gu nebi nangia Yesaya gbiati diako?

⁹ Gupai naadu na nyanyakipaha kisusi fu Yesaya na diako angia iriso Yekova. Yesaya angia nebi, na si ima rengba kadu nga diako aamanga kina agu sunge nga ga nebi i afuhe furi, bambiko i nayamba ri nga “de nebi.” (Yes. 8:1-4) Yesaya na diako amoi pa iriso Yekova ni bambatapai rogo gayo raka yo wa i adu kina sa. Nairiwo gu bawene kpiapai i amoihe fu agu arogotise du areme!

10. Waigu rengbe pa wisigo gu sangbaanebi nga ga Baibiri ka undo arogotise i diberã tipa ka mangapai wa rengbe omeyo na ni fu Yekova?

¹⁰ Arogotise areme ima rengba ka wirika Yesaya na diako nimanga yo agu apai dunduko rengbe yo ka mangaha ti ngba ga Yekova sunge. I ima rengba ka nyakasa gayo kido kuti Yekova ni wisigo yo gu sangbaanebi nga ga Ziazia Kekeapai kina sa na ki bi wai si naada ti rengo ti aregbo dũ.c (Tito 1:2) I ima rengba ka berãkuriipa wai rengbe yo ka undo na digiso kura sangbaanebi nga ga Ziazia Kekeapai. Ni kpiapai, i ima rengba ka undo na digiso gu ga Yesu sangbanebi du tipa tungusa wene pangbanga rogo zegino dunduko mbata fu ragoho digi. (Mt. 24:14) Kina wai arogotise nikaa bi kura sangbaanebi nga ga Ziazia Kekeapai si nida ti rengo, kinawo a i nika diaberã tipa ka mangapai ni bakerehe wa rengbe omeyo na ni fu Yekova.

WAKINA APURISEKA NA AKUIRA, ONI MOI AGU APAI NGA GA KINDO NI BAMBATAPAI

11. Gini apai aPuriseka na Akuira adu na rengba ka mangaha, na tipagine?

¹¹ Paranga arogotise ima rengba ka wirikapai be aPuriseka na Akuira, i angia arogotise ni aYudo naaraka rogo gu gbata nga Roma. I aima gia gu wene pangbanga naadu tipa Yesu na i ki ima da ni aKristano. Zanga kapa, i aima du na ngbarago na gayo raka. Ono tie, gayo raka aˈariatihe niipo ho gu bakindo nangia Kuradio afu zinahe ni nga aYudo dunduko guari vuru Roma. Oni berẽnga pa gupai gipai re ayuguhe fu Akuira na aPuriseka. Si aaidi i mbu gu rago i aima inoho wenengai, ki gbia vovo kporo, na ki tona gayo sunge marã nangia ga mbakada bamburoko berewe rogo vovo ba. Ya mo gu vovo kpakarakpakaraapai re arugusi yo ti manga yo gupai omeyo arengbe na ni fu Yekova? Si nawiraha wa oni ima ino karagapai kuti gu sanahe re. Rogo gu vovo kporo nangia ga Akuira na aPuriseka naadu Korinda yo, i atona ka undo gu dungurati naadu rogo gu rago re na kini mangisunge wa sa na gu mokedi nangia Pauro tipa ka undo awirina yo. Kusa, i andu ku rogo agu agbata naadu na bakere zingo abatungusipai rogoho. (Amo. 18:18-21; Rom. 16:3-5) I aima du na badungu apai i aamangaha rogo gayo raka yo na i kidu na ngbarago!

12. Tipagine si aida arogotise moi agu asasa ti ni nga ga toro?

¹² Agu arogotise du ti gi gaani regbo re ima rengba ka wirika aPuriseka na Akuira ni maa yo agu apai nga ga Kindo ni bambatapai rogo gayo raka yo. Gu wene regbo ngba kisusi fu arogotise tipa i fura tipa agu apai i nika mangaha rogo raka yo nga ho i ambakada pa rogatise ni. Ho arogotise amaa agu asasa ni nga ga toro na kini mangi bakere asadatise kina sa tipa kada ti ni, i na bakere amomu ka bi Yekova ko niundo yo rogo gayo raka yo. (Batu. 4:9, 12) Oni bingo gu kpiapai nga ga Russell na Elizabeth. Russell aya, “Mbata fu ani mangi rogatise, ani aima sakapai gbe tipa gu gaani asasa nga ga toro.” Elizabeth aya, “Ani asaki gipai re mbiko ho ani nika ida ni ka manga adiaberã kusa, ani nika maaberã rani tipa gupai nga ka gaani asiapai kanga na ani ti da ani ti agu asasa re ya.” Agu apai naadu tipa Russell na Elizabeth ambu gene fuyo i ga ku Maikronisia yo ka mangasunge rogo gu ba naadu na bakere zingo abatungusipai rogoho.

13. Ringbisihe kuti Atambuahe 28:7, ginipai nika manga ka ani aakido kuti Yekova?

¹³ Wakina aRussell na Elizabeth, badungu arogotise ima manga diaberã tipa ka mbu gayo raka si du taata tipa gupai nga wa ka i di bakere regbo wa rengbe omeyo na ni kuti tungusapai na yugo wene pangbanga. Ho arogotise amaa asasa ni tipa ka manga agu apai dunduko rengbe yo ka mangaha fu Yekova na kini mangi asadatise wa sa tipa kada ti agu asasa re, weneapai namanga amanga fuyo. I nika bi wai Yekova angerafuo yo, gayo kido kutiko nika nyaka gbe, na i nika du nzunzu na ngbarago.—Oni gedi Atambuahe 28:7.

WAKINA GU MOKEDI NANGIA PETERO NA DIAKO, ONI DU NA KIDO KUTI GA YEKOVA AKIDOHE

14. Waigu gu mokedi nangia Petero gbiati diako ayugu gupai nga i aima du na kido kuti gu kidohe du rogo Matayo 6:25, 31-34?

¹⁴ Arogotise ima rengba a ka wirikapai ti gu kpiapai gu mokedi nangia Petero na diako amoihe. Adiwi wa sita kuti garã sa fuo gu mokedi nangia Petero gbia Yesu, si aidi ko mangi nyanyakipa diaberã. Petero anaamanga sunge nyanyaki ni baziatĩo tipa kaa ngerafuo gako aborokporo. Sidu, ho Yesu ayambu Petero ni ko ye kaa pekafuo ko ti aregbo dunduko, si aaida Petero berẽpa diako ho ko aamanga gako diaberã ni. (Rk. 5:1-11) Petero adiberã ka ndu na Yesu na kaa tungusapai na ko. Ko amangi siapai na tatamana! Na ani na wene ndupai berani ka ida kuti gupai nga, dia Petero aima songoda gako diaberã. Ziazia Kekeapai nayugo gupai nga fuo zinga Yesu be kpio, ri anaagasa Petero agasa tipa gako asunge ti kura aregbo. (1 Kor. 9:5) Zanga kapa, mbiko gupai nga ri angia gu wene diakumba nangia Kristano, Petero adu na rengba ka fura na ranirii ho ko afu rugute ni fu gu kumbakuadee na dereakumba nga aKristano. (1 Pet. 3:1-7) Si tie ziazia nga, aPetero na diako aima du na kido kuti gu ga Yekova kidohe nga, Ko nika fu agu ahe afu fuyo i aidaha ka i moi Kindo ni bambatapai rogo gayo raka yo.—Oni gedi Matayo 6:25, 31-34.

15. Ginipai oni awirikaha ti gu kpiapai nga ga Tiago na Esther?

¹⁵ Ka singia oni ima manga bete agarã ku rogo rogatise yo awere, waigu rengbe oni kaa ndu kindi kumbatayo kaa manga bakere apai fu Yekova? Gene sa dagba agu akuraha yo rengbe oni ka manga gipai re ngbaha nga niwirika oni pai ti agu akpiapai nga ga kura arogotise. Ni kpiapai, oni ima rengba ka geda gu kekeapai ninaakura nga, “I Afu Tiyo Na Kpotoyo Yo Dunduko.” Ngbatunga gu kekeapai re aundo Tiago na Esther nga arogotise du Braziri yo, tipa i idi ka ndu ka mangasunge rogo gu ba du na bakere zingo abatungusipai rogoho. Tiago aya: “Ho ani aagedapai ni tipa wai Yekova aundo gako amoyambu ti gi gaani regbo re, ani aidi a ka pekafuo ga Yekova rugute na ki gbia gako undo.” Niyangaraha, i aga ku Paraguay yo, yo i naamangasunge ni rogo gu ba nape pa aboro Portugal naatona rogo 2014. Esther aya: “Veresi sa ani dunduko ue nakpinyemuhe ni bakerehe gbe nga AEfeso 3:20. Dedede, ani ima bi agu afugo re si nida ti rengo ti ngba gaani sunge fu Yekova.” Rogo gu waraga yo Pauro akehe fu AEfeso, ko akidohe nga Yekova nika fu ahe afu furani ni bakerehe susi gu ani asanahe tipaha. Gu kidohe re aima da ti rengo ti dungu aregbo!

16. Ga ada rugute rengbe paranga arogotise ka gbataha ho i aberã ni kuriipa gayo asasa rogo raka yo?

¹⁶ Paranga arogotise areme ima rengba ka gbia undo ti agu akpiapai nga ga agu aboro naima wirika wai ka kido kuti Yekova. Si ima rengba kadu nga kura arogotise ima dia dungu agarã kuti mangasunge Kindo ti aregbo dũ. Oni ima rengba ka sana yo tipa arugute ka oni aaberãpa gaoni asasa. Gere nga gu kura gene oni ayugo gupai ngbaha nga oni nakido kuti Yekova. (Snz. 22:17, 19) Abaakumba a ima rengba ka undo paranga arogotise i moi agu asasa nga ga toro na ki da ti ni.

17. Ginipai namangi aKlaus na Marisa, na ginipai ani awirikaha ti gayo kpiapai?

¹⁷ Ti kura aregbo, ani ima rengba ka ida ka manga dungu apai fu Yekova ngba kura gene, ono ko ima rengba ka sarani ani irisiko ngba kura gene. Gere nga gupai namangi aKlaus na Marisa, nga aguyo i nifura tipa yo ti tonatona gi kekeapai re. Fuo i mangi agarã biata ku rogo rogatise, i aguari kpuyo na ki fu tiyo ka mangasunge meka arago rogo gu be-basunge du Finland yo. Ono tie, i aye ka ino gupai nga i aidanga ha fuyo i di regbo koyo susi adiwi sita te. Ti tonatonaha, i aima du na gberãrago. Ono ngbutuko fuo gure, i ayambu yo i ndu ka wirika pa-Arabi, i namangasunge awere na ngbarago rogo gu ba nape pa-Arabi rogo kura ringara. Ho Marisa aberã ni kurii gupai namangi, ri agumba gupai nga: “Mi aduadu na gunde ka manga gupai mi aamanganga ha mbata ya, na si aaida mi kido kuti Yekova na ngbadureyo dunduko. Ono mi ima bi wai Yekova aundo rani ti aregbo dunduko ngba agu agene ani aaberãnga paha ya. Ti ngbafuo agi apai re mangi, gimi kido kuti Yekova ima da ni nyanyakihe gbe.” A wa gi kpiapai re ayugoho, oni ima rengba kadu na gu kido nga Yekova nikaa fu mosoro furoni ti aregbo dunduko ka oni kido kutiko na kpotoroniyo dunduko.

18. Gini apai rengbe arogotise ka mangaha tipa kaa kido kindi kuti Yekova?

¹⁸ Rogatise nga gamahe be Yekova. (Mt. 19:5, 6) Ko naida arogotise gbia ngbarago tigu gamahe re. (Snz. 5:18) Paranga arogotise, oni wisigi gupai oni amangaha na gaoni raka. Ya mo oni namanga agu apai dunduko rengbe oni ka mangaha ka yugo na ni nga oni na tambuahe tipa agu agamahe ko nafuhe fu roni? Oni fura fu Yekova rogo kparakpee yo. Oni gbata arugute rogo Fugoko yo nga gu nabipa agu apai du tipa roni. Na oni ki pekefuo agu arugute Yekova afuhe furoni. Ka oni moi iriso Yekova ni nyanyakipa pai rogo gaoni raka yo, oni ima rengba kadu na gu kido nga, oni nika gbia ngbarago agbia gbiati mosoro rogo gaoni raka yo!