3 | Mo Gbia Undo ti Agu Akpiapai Nga ga Baibiri

BAIBIRI NASAKAPAI . . . Tipa gu ruru akumba na adee “nga aguyo apai adu tipayo wakina gaani.”—YAKOBA 5:17.

Gupai si Ayugoho

Baibiri ima hibe gu ndikidi apangbanga nga ga agu akumba na adee apai adu tipa yo ni bakiakia. Wa ani nikaa geda gayo apangbanga, ani ima rengba ka bi gu boro rogo Baibiri yo apai adu tipa ni wakina gaani.

Wai Gipai re Narengbe ka Undo

Ani dunduko naida aboro rugutiyo na wai du ani. Ono gipai re na nyanyakipaha gbe ho ani asota ni na kaza berãse. Ho ani ageda Baibiri ni, ani naye ka inopai tipa agu aboro apai adu tipa yo kina wai duhe tipa rani. Ni sangbanaha, ani naye ka bi gupai nga kura aboro kinaho naadu rogo gberãrago wakina rani na gipai re naundo rani ka ani kparanga tirani ho ani amangapai ni kuti bakabangirise gbiati agu apai nafuda berãrani ya.

Baibiri na dungu afugo rogoyo nga ga agu aboro naabitiyo nga gene beyo te na kidu rogo kere kpakarapai. Ya mo mo apenga gupai fu tiro nga, ‘Ka mi ndunga kumbatayo kaa raka wa gere te’? Kina gi bangisapai re naadu tipa Moize, Eriya na Davide.—Pa Geda Aboro 11:14; 1 Abakindo 19:4; Atambuahe 55:4.
Baibiri fura tipa gu dee nangia Ana nga guri naadu rogo bakere “imisiri ngbaduse” mbiko ri arengbanga ka vunga te na gu kura ri kini rungosi ri mbiko gipai re.—1 Samuere 1:6, 10.
Baibiri fura tipa gu kumba nangia Eyobo apai narengbe kadu tipa rani wakina gako. Wa ko avura du ni gu kumba naadu na idapase, ko aima mbu be kere akpakarapai na ko ki ya: “Mi mbu pa ungare, mi akpi nga nyemu ka du ni ungare kindi te.”—Eyobo 7:16.

Ni wirika ani pai tipa wai agi aboro du payo rogo Baibiri yo re amangipai kuti gayo afuda nga ga berãseyo, ani ima rengba a ka gbia gu ome nga gu ani aidaha tipa ka mangapai kuti gaani afuda nga ga berãseyo.

Wai Baibiri Aundo Kevin

Wai Gu Kaza Nga Bipolar Amangi Re

“Gu kaza nga Bipolar amangi re ho garã re aambeda ni kuti bisue bawe. Aregbo kinaho mi anaabihe nga mi ima rengba ka mangapai kuti ai gu kpakarapai nga gu rengbe ka gbia re. Ono ti kura aregbo mi kini bi tire nga ndupai ho mi naraka te.”

Wai Baibiri Aundo Re

“Boro sa rogo Baibiri yo apai adu tipa ni wakina gimi nga gu mokedi nangia Petero. Ko amangi agu aingahe nga gu nasako ko bi tiko nga sunge tiko te. Ono kuba gupai nga Petero nye kaa berã wa gere, ko agbata agu abakure nga aguyo naaberã pako. Ho du mi ni na gbegberẽ uru mbiko gi kaza berã, gimi aingahe nafu rii re na mi kini bitire nga sunge tire te. Wakina Petero mi ima wirika ka du mbembedi na abakureami nga aguyo naida ka undo re mi naandu kindi kumbatayo na gimi raka.

“Kura boro berewe du pani rogo Baibiri yo du nipa wasa fere nga Bakindo Davide. Ko anidu dedede na gberãrago tipa agu apai ko anaamangaha na ko kini bira tiko tipa agu aingahe ko amangihe kusayo. Mi naabi tire wakina ko ti gu kura aregbo mbiko kura aregbo kinaho mi amangapai watadu ka pe gupai mi abira tire ti ni. Mi nabi agu afugo Davide du rogo Atambuahe 51 nipa wasa. Rogo veresi 3, Davide aya: ‘Mi idi pa gi samungu, gi ingapai bangire kindi.’ Gere nzunzu nasakapa wai mi nidu ti gu regbo du mi rogo bakere gberãrago, mbiko si nidu ni kpakarakpakaraha tipa mi du na wene bipai tipa tire. Ono mi nagumba kina agu afugo a Davide agumbaha rogo veresi 10: ‘Ako Mbori, mo fú gigiri kpoto yo ku rogo re yo.’ Mi nazungodi Mbori wakina gure tipa ko undo re mi du na ruru bipai tipa tire. Ni yangaraha veresi 17 nafu wasa fere. Si na ya: ‘Gu kpoto yo naima be rungo ingapai, Ako Mbori, mo apáyasi nga ha te.’ Gi veresi re nafu gu kido fere nga Mbori ima kpinyemu re.

“Ni berã mi kurii agu akpiapai nga ga Baibiri gbiati agu apai Mbori namangihe fere awere, nanyakasa gimi maabangirise tipa kumbatayo. Agu akidohe nga ga Baibiri nada ni ndikidi pai fere na gi pai re naundo re nzunzu mi naandu kumbatayo na raka.”