8 Kpiapai

GUPAI SI AYUGOHO

Agu avunguagude namaa wene kpiapai i naraka ringbisihe kuti gupai i ayugoho. Ni kpiapai, mo arengbanga ka berã gupai nga wiro nikaa pe rengo baraho u naima ino gupai ni nga mo naaya furu wẽ, “U ya fu boro we mo kporo ho te” mbiko gupai gbua nga mo aidanga ka fura na gu boro du zagiyo te te.

“Gupai aboro naapehe gbe nga ‘Mo mangi gupai mi apehe, angianga gu mi amangaha ya.’ Ono ka gu pai re undo nga agude te. I wakina katoo nazio agu apai dunduko ani apehe na kini mangihe, na ho gaani kpiapai andunga ni sa na agu apai ani ayugoho ya, i nainoho aino.”—David.

BANGUA RENGO NGA GA BAIBIRI: “Wa mo nitungusi pai fu boro ya ka ni dĩ nga he ya, mo nadĩ he?”—ARomo 2:21.

NDU GUPAI DUHE TINI NA NYANYAKIPAHA

Gu maapai kurii du avunguagude na ni kurii rukutu awiri yo gbiati sosono yo, si ima susa ga ai boro—kodihe kuti gu sosodahe rengbe ka ye be akurayo. Naida ka ya, avunguagude du du rogo bambata bangiriba tipa ka ruga awiri yo i ndu ngba ruru gene—na si naida i ini gupai nga si naida i naamanga kina gupai i ayugoho fu awiri yo.

“Ani ima rengba ka dogoda bangisapai sa bara sa kama, na kini bakibangirani singia wirani nadega turu, ono bara sa kini ani nakpa ti manga gupai ani apehe, gude naima inoho ni kina ipo. Agude namaaberã yo sa agu apai dunduko ani amangaha, zavura ho ani aberã gupai ni nga i amaanga berã yo te.”—Nicole.

BANGUA RENGO NGA GA BAIBIRI: “Gu tatamana naye ari yo si . . . na biriki a ya.”—Yakoba 3:17.

GUPAI RENGBE MO KA MANGAHA

Mo wisigi gu gamo gene mangaapai mo araka kutini. Gini ngbatunga aũ ngbarago mo naabihe? Waigu mo naamangapai na ga badiarogatise gbiati agude? Gini ngbatunga abakure du bero? Ya mo mo naberã pa kura aboro? Ka pepai ni wiri guruhe, ya mo mo nga gu ngbatunga boro mo aida awiro du nga ni?

“Mi gbiati kumbami, ani aruganga awirani i naamanga agu apai ani nitirani amanganga ha ya te.”—Christine.

Mo ho mbupai tipa gamo aingahe. Awiro ima ino gupai nga mo nga rengberengbe boro te. Ni ya mo “mo mbupai fere” ho daha ada ni—fu ga badiarogatise na fu awiro—mo nika yugo gu nyanyaki kpiapai nga ga pe rengo na umbasitise.

“Awirani naida ada ka gia rani ani idi pa gaani ingahe ho ani namangihe ni, na i naida aida ka gia rani ani niho mbupai tipa gaani aingahe ho ani namangihe ni. Ka ani amanganga ha wo ya, gu yangarapai i nika wirikaha nga kaa oka pa gayo aingahe.”—Robin.