Agu Abi Naawiranga Tiyo Ya

SI WA agi akumbagude du ue re awiranga tiyo te, ya mo ziree? Ya mo mo ini arimoyo? Guko nga bamangi anya nga Esau, na guko nangerafuo akandoro nga Yakobo.

Esau na Yakobo nga agu abi aYisaka na Rebeka avunguyo. Yisaka akpinyemu Esau gbe, bambiko ko angia bamangi anya nanaaye na pasio ku kporo yo fu aborokporo dunduko. Ono Rebeka akpinyemu Yakobo gbe, bambiko ko angia zezeredi kumbagude.

Titayo nga Abarayama adu kindi ni kina ungako, na mo berẽnga pa wai Yakobo adu na nyemu ka gia agu apangbanga titako anaapekaha tipa Yekova. Ni yangaraha, Abarayama ki kpi ho garãko adu ni nga 175, garã agu abi re kidu nga 15.

Ho garã Esau adu ni nga 40 ko arogo adee ue nga aboro Kanana. Gipai re aima ba gberãrago ti aYisaka na Rebeka, bambiko agu adee re aangianga airisi Yekova te.

Rogo kura uru sa, pai amangi nga gu nasa Esau ko zingi ni kerehe kuti tameko nga Yakobo. Regbo ada tipa Yisaka fu maku fu gu wiriko nga unvuru. Wa duhe nga Esau nangia unvuru fu Yakobo, ko du si aaida ko gbia gu maku re. Ono Esau aima baga pa gako du ni unvuru fu Yakobo. Berewe a, ho i avunguyo ni, Mbori ape gupai nga Yakobo du nika gbia maku. Gere a nga gupai namangi. Yisaka afu maku fu gu wiriko nga Yakobo.

Kusa, ho Esau aini gupai ni nga tameko ima dia gako maku, ko azingi ni kerehe. Ko ape gupai nga ko nika imo Yakobo. Ho Rebeka agi gupai re ni, ri aabaka kina bangiiri nga Esau nika imo Yakobo. Ri aabaka bangiiri berewe a nga Yakobo nika dia dee dagba aboro Kanana. Si du ri aya ti ni fu Yisaka: ‘Apai agberã wakina gure ka Yakobo di dee dagba aboro Kanana.’

Ni yangaraha, Yisaka ayambu wiriko nga Yakobo ki ya fuko: ‘Ka mo dinga dee dagba aboro Kanana ya. Mo ndu kua titaro yo nga Betuere du Arana yo. Mo ki di wiri Rabana nga andomo ni diaro.’

Yakobo agi gupai bako agumbaha, nibasa ko ki guari ka ndu gako gbanga nduge koyo du agumeko ni Arana yo.