Yakobo Aga na Gako Aborokporo ku Ezipeta Yo

GENE aadunga berewe be Yosefa wa ka ko he kusa tiko fu awiribako te. Ko aya fu gako amoyambu dunduko wẽ i kuru ku zegiyo. Ho kina Yosefa anye ni na awiribako dimoyo, ko ati ni kpee. Gupai re aima iriwo ti awiribako nirengo, bambiko i aainongo gupai ko aakpara ti ni te. Ni yangaraha, ko ki ya fuyo: ‘Mi nga Yosefa. Buba kindi ni ungako?’

Gipai re airiwo ti awiribako ka gene adunga wa ka i fura ya. I atona ka gunde gbegberẽ. Ono Yosefa aya fuyo: ‘Oni mbedinga kono.’ Ho i ambedi ni koyo du ko ni, ko aya fuyo: ‘Mi nga gu wiribaroni nga Yosefa, oni abagiko ku Ezipeta no.’

Yosefa afura kindi fuyo ngba wene gene niya: ‘Ka oni zinginga kuti tironi mbiko gupai nga oni abagire ku Ezipeta no ya. Mbori du nzunzu nakedi re ku Ezipeta no tipa mi batasi aboro. Faro aima maa re ni bazogo ringara naabaha dunduko. Awere tie, oni oro koyo du buba ni ki gumba gipai re fuko. Oni ya fuko ko ye ani niraki kina no dunduko.’

Yosefa ki ba beko ti awiribako, ki dungo yo na ki nyoro pangbayo dunduko. Ho Faro agi gupai ni nga awiriba Yosefa ima ye, ko aya fu Yosefa: ‘Awiribamo di angbagida Ezipeta no ki ndu ki ye na bamo gbiati gayo aborokporo dunduko kono. Mi nika fu bawene rago fuyo Ezipeta no i niraki rogoho.’

Gure nga gupai i amangihe. Mo bingo Yosefa wa ko nandu ka dungo bako ho ko nada ni na gako aborokporo dunduko Ezipeta yo.

Ga Yakobo aborokporo aima nge gbe. I adu dunduko 70 naga ku Ezipeta yo, gure nga Yakobo na awiriko gbiati atitako. Ono adiayo adu kinaho a, na isoke dungu amoyambu aduadu a. Agi aboro re dunduko amoi kporo Ezipeta yo. I aayamba yo nga aYisaraere, bambiko Mbori aima aria rimo Yakobo si du nga Yisaraere. AYisaraere ada ni agu aboro naadu na kparakpara pagume dagbayo na Mbori, a wa ani ka bihe kusa.