Yekova Amoi Yosua Kuba Moize

MOIZE aidi ka ndu ku Kanana yo na aYisaraere. Ko asana Yekova ki ya: ‘Mo idihe fere mi si ku mbiti Yaradene yo, ka bi gu wene ringara re.’ Ono Yekova aya fuko: ‘Si rengbe kuho! Ka mo gumbanga gupai re berewe ya!’ Mo ini gupai Yekova ape gupai re ti ni?

Ko ape gupai re mbiko gupai namangi ho Moize anarĩ mbia ni na ngbondo. Ko na Arona aafunga irisa fu Yekova te. I aayanga fu aboro Yekova du nakusi ime fuyo ti mbia te. Mbiko gipai re, Yekova aya wẽ i arimongo ku Kanana yo te.

Fuo adiwi wa saba fuo kpi Arona, Yekova aya fu Moize: ‘Mo di Yosua ki rugusiko barabangiri Eriezere nga boromotumo na barabangiri aboro. Mo ki pe gupai fu aboro dunduko nga Yosua nga gayo vovo bangbembatayo.’ Moize amangihe a wa Yekova agumbaha, a wa mo abihe rogo sura re.

Yekova ki ru ki ya fu Yosua: ‘Mo du ngangara. Ka mo gundenga ya. Mo nika ndu na agi aboro re ku rogo ringara Kanana nga gu mi akido pa fuhe fuyo, na mi aduadu na mo.’

Kusa, Yekova aya fu Moize ko dakpa kurii Bagangara Nebo yo rogo ringara Moaba. Moize aru rii gu bagangara yo re kini ngere ku mbiti Yaradene yo kini bi gu bawene ringara nga Kanana. Yekova ki ya fuko: ‘Gere nga gu ringara mi akido pa fuhe fu awiri Abarayama, awiri Yisaka na awiri Yakobo. Mi sa ro mo bihe, ono mo arimongo koyo te.’

Moize ki kpi rii Bagangara Nebo yo. Garãko adu 120 ho ko akpi ni. Ko adu kindi ni ngangarã ko, na bangiriko adu kindi ni wenehe. Rago aima gberã ti aYisaraere ni kerehe, na i ki kpari Moize tipa arame 30. Ono rago angba tiyo mbiko gayo vovo bangbembatayo nangia Yosua.