Abamoirago 12

MO BINGO gu zuzuahe agu akumba re natindihe. Bakere kpuro zuzu bakakue du. Kina akumba ue rengbe ka tindaha, a wa mo abihe re. Mo bingo gu zuzu vurumo re gbiati gu zuzuhe duwa ndavu. Wari agi akumba re naye na gi wene zuzungua re ni? I ye na ni Kanana yo. Mo tingidi gupai nga, Kanana yo du aAbarayama na Yisaka na Yakobo araki ni. Ono mbiko gu ngbongi namangi yo, Yakobo aguari na gako aborokporo ki ga ku Ezipeta yo. Gere awere nga agarã mangi wa 216 fuo gu regbo re. Moize naga na aYisaraere ku Kanana yo berewe. I ye ki da rogo gu bangbakungba yo nga Kadesa.

Gbegberẽ aboro naaraka Kanana yo. Moize kini kedi akumba 12 i ndu ka maarago Kanana yo. Ko aya fuyo: ‘Oni ndu ka ino bange agu aboro naraka yo wai, na banyaka yo wai. Oni bi gu ringara re singia si ngbaangba tipa rũko ahe. Na oni ki ye na bete gu zuzuahe du yo.’

Ho agu abamoirago re akaragatiyo ni ku Kadesa yo, i aya fu Moize: ‘Bawene ringara du nzunzu.’ I ayugu gu zuzuahe i aye na ni fu Moize tipa ko ini nga rengo du i agumbaha. Ono abamoirago 10 dagba aguyo naadu 12 re ki ya: ‘Agu aboro du yo ni bagbangagbanga yo na i na bakere ome tiyo. Ka ani asadi ka ndu ka dia gu ringara re, i imi rani aimo.’

Ho aYisaraere agi gipai ni re, i atona ka gunde gbegberẽ. I ki tona ka kpara niya: ‘Akoo, ka Mbori aidihe ani kpiki kina Ezipeta yo watadu ani kpiki kina ane. I nika imo rani aimo ba vura yo na i ki zi adiarani na awirani. Ani sia kura barumbatayo furani kuba Moize nga guni nika karaga rani ku Ezipeta yo!’

Ono abamoirago ue adu na kido kuti Yekova, na i aˈasadi ka zeresa aboro. I nangia aYosua na Kareba. I aya fu aboro: ‘Ka oni gundenga ya. Yekova na kina rani. Si nika du furani taata ani zi gu ringara re.’ Ono aboro aagianga sangbayo te. I aidi ka imo aYosua na Kareba kusayo.

Gipai re aima sa Yekova ko zingi ni kerehe. Ko ki ya fu Moize: ‘Boro ho dagba agi aboro re nga guni tona garãni ti 20 ka ndu ku mbatayo nika rimo ku rogo ringara Kanana te. I aima bi gu iiriwoapai mi amangihe Ezipeta yo na ngbakungba no, ono i aidanga kuti re te. Sidu, i nika ta kuari rogo ngbakungba daho gu yangada boro dagbayo nika kpi ni. Kina aYosua na Kareba sa nika rimo ku ringara Kanana yo.’