Moize Anari̇̃ Mbia

AGARÃ asusi 10, 20, 30, 39! AYisaraere kidu kindi ngbakungba yo. Ono rogo agu agarã re dũ, Yekova angerefuo gako aboro wenengai. Ko arigiyo na manu. Ko anaangbe fuyo mbatayo uru na bakamikami dubo, yuru na bakamikami we. Vuru gu dungu agarã re dũ, gayo aroko aasipongo te na anduyo aaikongo be nduge te.

Rogo gu bambata diwi nangia ga 40 garã fuo kura aYisaraere Ezipeta yo, aYisaraere azi bataya berewe Kadesa yo. Gere nga gu ba Moize akedi abamoirago 12 rogoho i ndu ka maarago Kanana yo agarã wa 40 kusayo. Dawiri Moize nangia Miriama akpi ­Kadesa yo. Gu kura kpakarapai adu berewe wagu naadu mbata kusayo.

Aboro aarengbanga ka gbia ime te. I ki tona ka kpakana Moize ki ya: ‘Ka ani akpiki ho awirinarani akpiki ni ka si adu ni wenepai. Tipagine mo akusi rani ti ni Ezipeta yo ka ye na ani ku rogo gi kere ngbii re nga gu ka boro arũngo he rogoho ya? Tunga ahe te, vurumo te, bakakue te, na gu zuzungua duwa ndavu te. Kandara ime ho ka boro mbirihe a te.’

Ho aMoize na Arona andu ni ku banye yo ka kpara, Yekova aya fu Moize: ‘Oni dungura aboro dunduko ku rogo ba sa. Mo ki ru barabangiriyo ki fura fu gu mbia du yore. Ime nika kura ti gu mbia re fu aboro dunduko na gayo anya.’

Moize ki dungura aboro dunduko, ki ya: ‘Oni gihe awere, oni airasamungu kuti Mbori! Oni naida mi na Arona kusi ime furoni ti gi mbia re?’ Moize ki narĩ gu mbia re na gako ngbondo bara ue, bakere ime ki tona ka kusuko ti ni si ki rengbe tipa aboro na gayo anya dunduko.

Ono rago aima gberã ti Yekova mbiko aMoize na Arona. Mo ini nduhe? Nduhe nga aMoize na Arona asa aYisaraere i berẽhe nga i du nakusi ime ti mbia. Ono Yekova du nzunzu nakusi gu ime re. Wa aMoize na Arona aagumbanga rengo tipa gipai re ya, Yekova aya wẽ ko nika fu mbusa fuyo. Ko aya fuyo: ‘Oni andunga na gimi aboro ku Kanana yo te.’

Fuo regbo tooni, aYisaraere aguari Kadesa yo. Fuo nduyo tooni, i ada ti Bagangara Oro. Arona akpi rii gu bagangara yo re. Garãko adu 123 ho ko akpi ni. Gipai re aima fu rungo fu aYisaraere gbe, i ki kpariko tipa arame 30. Wiriko nangia Erazara ada ni gbiamotumo kubako fu aYisaraere.