Pa Si Yaradene

MO BINGO! AYisaraere nasi gu di nga Yaradene! Gure nga gu regbo bakere mai naana adi kini iki ni kerehe. Ono awere, ime ho te! AYisaraere nasi rii ugu sende a wa i asi Zamba Baime! Ime ndu ku wari? Ani bingo gupai namangi.

Ho regbo adani fu aYisaraere i si gu baime nga Yaradene, gere nga gupai Yekova aya fu Yosua ko pehe fu aboro: ‘Si naida aboromotumo di sanduki mokido ki ngbembatayo furoni. Ho i nika zoga nduyo ni ku Yaradene yo, gu ime re nika mbu fu nibasa.’

Aboromotumo ki tindi sanduki mokido ki ngbembatayo fu aboro. Ho i adani Yaradene yo, i azogo nduyo ku ime yo. Gu ime re aima dunguro gbe na si aafu ni ipo. Ono ho i azogo nduyo ni ku ime yo, ime ambu fu nibasa! Iiriwopai du nangiaha! Yekova aima kata ime ku ngbii yo. Fuo regbo tooni, ime ki ugudi!

Agu aboromotumo naatinda sanduki mokido ki ndu ku bebere Yaradene yo ki ru rogo ugu rago. Ya mo mo rengbe ka biyo rogo gu sura re? Wa i aru rogo gu bayo, aYisaraere dunduko asi ku mbiti yo rii ugu sende!

Fuo si aboro dunduko ku mbiti yo, Yekova aya fu ­Yosua ko ya fu nyanyaki ­akumba 12 wẽ: ‘Oni ndu koyo aboromotumo naru ni na sanduki mokido. Oni rogodi ambia yo 12, na oni ki duduaha rogo gu ba oni ka ra rogoho areme. Ku mbatayo gizo, ho awironi nikaani sana roni ni ki ya ginipai agi ambia re ayugoho, oni ki ya fuyo ime akparaka ho ga Yekova sanduki mokido asi Yaradene ni. Agi ambia re nikaa tingida roni na pa gi iiriwopai re!’ Yosua adudua ambia a 12 rogo gu ba aboromotumo aru rogoho bebere Yaradene yo.

Ni yangaraha, Yosua ki ya fu agu aboromotumo naatinda sanduki mokido wẽ: ‘Oni kuru Yaradene yo.’ Nibasa fuo kura yo, ime atona ka fu berewe ­kubaha.