Akumbagude Biama Babera Yo

BAKINDO Nebukadenesara arogodi agu aYisaraere naima wirikapai wenengai ki ga na yo ku Babera yo. Tifuo gure ko asiaka agu akumbagude naadu ni weneyo gbe na kingia aboro tatamana. Aguyo biama dagbayo mo abiyo re. Rimo guko nga Daniere, na aguyo biata aboro Babera ayambu rimoyo nga Sadaraka, Mesaka na Abedenego.

Nebukadenesara aaida ka raba agi aparanga re tipa i nimangi sunge fuko kpuko yo. Si adu nga ko nika raba yo tipa agarã biata ko kini ka sia gu ní kadu na tatamana gbe tipa ní niundo ko ho kpakarapai akura ni. Ko aaida agi aparanga re du nyanyaki na kpotoyo ki du wenengai wa i nika raba yo. Si du ko arugu gako ­amoyambu ti ni i naafu kina gu bangisa wene riahe na imekakue fuyo ko gbiati gako aboro aarihe.

Mo bingo Daniere. Ya mo mo ini gupai ko apehe fu ga Nebukadenesara moyambu nga Asepeneza? Ko naya fuko wẽ ko aidanga ka ri gu wene ariahe du rii ga bakindo mbisa te. Ono Asepeneza nagunde agunde. Ko naya: ‘Bakindo du naringbisipa guhe si aida oni rihe na gu si aida oni mbirihe. Ka ko bi kpotoroni ka si angbanga wa ga agu aparanga du garãyo wa kina gaoni ya, ko naimo re kindi.’

Daniere andu fuo gu kumba Asepeneza amoiko ko ningere kurii Daniere na abakureako biata. Daniere aya fuko: ‘Mo asadi rani tipa rame 10. Mo nifu kina bakinde na akpepasio furani ani nirihe na ime tipa mbiraha. Mo ki kparia rani na agu akumba nari ga bakindo riahe, ka bingo ada kpotoyo nika du wenengai.’

Gi kumba re aidi gipai re. Ho rame asusi ni 10, kpoto Daniere na abakureako biata angba kisusi ga agu akumba re dunduko. Gi kumba re ambuyo i naari kina kpepasio kuba ri ga bakindo riahe.

Tifuo digo agarã biata, i andu na gi paranga akumba re dunduko koyo du Nebukadenesara ni. Tifuo bakindo fura na yo dunduko, ko abi gupai nga Daniere na abakureako biata angia airatatamana kisusi. Ko asiayo i naaundoko. Ho bakindo anifu nyanyaki asanahe ni fu Daniere, Sadaraka, Mesaka, na Abedenego watadu ka fu kpakarakpakara sunge fuyo, i aniinihe ki susi gako abinza na airatatamana bara 10.