Kido Kuti Ga Mbori Undo

BADUNGU akutu aboro nakuru Babera yo ka ga ku Yerusarema yo. Ono ho i ada ni Yerusarema yo, i abi gu bakporo re ni kina bate. Boro ho naaraka yo te. AYisaraere ki tona ka dudua ahe berewe ni vovoho.

He sa dagba agu ahe i aduduaha angia bamotumo. Gure nga gu ba i anaazo anya rogoho ni gamahe fu Yekova. Fuo wiri bete adiwi, aYisaraere atona dua yekaru. Ono agu avurayo naaraka barambeda ho aaidanga aYisaraere dua yekaru te. I aˈasadi ka gundesi yo tipa i mbu sunge. Ni yangaraha, agi avurayo re ki sa vovo bakindo Parasa ko rũ ndiko tipa i mbu sunge dua yekaru.

Agarã asusi. Fuo manga agarã 17 fuo kura aYisaraere Babera yo, Yekova akedi gako anebi nangia Agai na Zekaraya i ya fu aboro i tona dua yekaru berewe. AYisaraere akido kuti ga Mbori undo, na i agisangba agu anebi re. I atona ka dua yekaru berewe, si ki vura du vurũ nga ndiko aaidangaha te.

Tatenai nangia baira abazogo nga ga aParaso yo aye fuo aYisaraere ki ya: ‘Da naidihe furoni oni dua gi bambu re?’ AYisaraere ki pe gupai fuko nga, ho i adu ni Babera yo, Bakindo Kurese aya fuyo: ‘Oni ndu awere ku Yerusarema yo ka dua gu yekaru nga ga Yekova, nga gaoni Mbori.’

Tatenai ki ke waraga ki kedihe ku Babera yo tipa ka ino singia ­Kurese apepai wa gure. Ti gu regbo re, Kurese aima kpi. Ka si aimanga ya, waraga ki ye be vovo bakindo Parasa. Ko ake gupai rogoho nga Kurese du nirengo nafu asiahe fu aYisaraere i ndu ka dua yekaru. Gu bakindo re ake gupai a rogo gako waraga nga: ‘Oni mbu aYisaraere i dua gu yekaru nga ga gayo Mbori. Na mi naida gupai nga oni undo yo.’ Sunge ­yekaru ­­anyasi vuru agarã wa biama, na aYisaraere adu na bakere ngbarago gbe.

Badungu agarã asusi. Agarã ki susi 48 fuo nyasa sunge yekaru. Agu aboro naadu Yerusarema yo ki du na rungo, na ka gu bakporo re gbiati ga Mbori yekaru angeranga berewe wenengai ya. Ti gu regbo re, boro Yisaraere kinaho nangia Ezara naadu Babera yo. Ko aini gupai nga si naida i mbakadi ga Mbori yekaru. Mo ini gupai ko amangihe fuo inoko gipai re?

Ezara andu fuo Arutasasata, nangia bakindo Parasa. Gi wene bakindo re afu badungu ahe fu Ezara ko ndu na ni ku Yerusarema yo. Ezara asana agu aYisaraere naadu Babera yo i undo ko ti tinda agu ahe re ku Yerusarema yo. Aboro wa 6,000 naidi ka ndu na Ezara. I atindi bakere feda na dahabu gbiati kura kikiipa ahe ku Yerusarema yo.

Ezara adu na bakabangirise, bambiko gbegberẽ akumba adu kinaho gene nga aguyo narengbe ka dia gayo feda na dahabu beyo na ki imiyo a. Si du Ezara ayambu aboro dunduko ti ni ku rogo ba sa, a wa mo abihe rogo sura re. I ki kpari fu Yekova ko banda yo ngba gu gbanga gene du ku Yerusarema yo.

Yekova aima banda yo. I ada wenengai Yerusarema yo fuo adiwi biama. Ati gipai re nayugo gupai nga Yekova rengbe arengba ka banda agu aboro nakido kutiko tipa undo?