I Apidi Ziazia Toro Yerusarema Yo

AGI aboro du re nga ga Yesu abawiriki. I gisangbako ki sungu kina Yerusarema ane. Na wa i asungudo ziazia toro, bakere woro he poi vuru bambu yo dunduko. Si wa woro bawege. Na mirã we tona ka zorã kurii abawiriki ni basasa dunduko. Ya mo mo nabi gu mirã we re riyo yo? Ginipai du namanga nzunzu?

Iiriwopai du nangiaha! Yesu aima ga ku ngbangbaturũ yo fuo Bako, na gure nga ko nauka ga Mbori ziazia toro kurii abawiriki. Ya mo mo ini gupai gu toro re asayo i mangihe? Si asayo i tona fura rogo dungu ngbatunga afugo.

Badungu aboro atona ka gia woro he wa woro bawege Yerusarema yo, i kini ye ka bi gupai naamanga. Agu akurayo kinaho naye tipa gu pumbo aYisaraere anaamangaha nga Pendekote. Kina ngba agi aboro naye re nazere ka bi gupai naamanga! Agi aboro re aagia ga Yesu abawiriki i nifura kina boro rogo fugoyo yo tipa gu wene apai Mbori namangihe.

Agi aboro re aya: ‘Aboro Gariraya du nafura re. Wiri padu he tie wai nga i nafura rogo kura ngbatunga afugo nga ga agu aringara ani aye rogoho?’

Petero aru kuari tipa ka sakarogoyo fuyo. Ko apoi kuari ki gumbapa wai fu aboro i aimi Yesu na pa wai Yekova azingisiko dagba akangba yo. Ko aya: ‘Yesu awere kumbabee Mbori ngbangbaturũ yo. Na ko ima uka gu ziazia toro kurii gako abawiriki ko akidopaha. Si nga ndu gupai gi iiriwoapai re amanga ti ni.’

Ho Petero agumba agi apai re ni, badungu aboro rago agberẽ tiyo tipa wai i amangi Yesu. I aya: ‘Ginipai si aida ani mangihe awere?’ Petero ki ya fuyo: ‘Oni sa sinoroni na ki zi bapatiza.’ Ni gu uru re, aboro 3,000 nazi bapatiza na ki da ni apefuo Yesu.