I Akusiyo Bambukiso Yo

MO BINGO gu maraika nazaka ngbadimo bambukiso re. Agu akumba ko akusayo bambukiso yo re nga ga Yesu amokedi. Ani bingo gupai nasa gupai nga i bayo ku bambukiso yo.

Gipai re amangi fuo wiri bete regbo gbua ziazia toro nauka kurii ga Yesu abawiriki. Na gere nga gupai namangi: APetero na Yoane aguari kini ndu ku yekaru yo Yerusarema yo uru. Ho i adani ngbadimo, i abi kumba i avunguko ni ngbaramaningbaramani ko. Aboro anaaye na ko ku ngbadimo ho na aˈuru dũ tipa ko niho marã be agu aboro narimo ku ­yekaru yo. Ho ko abi aPetero na Yoane ni, ko aho marã beyo. Ginipai i amangihe?

I aru ki ngana gu rungorungo kumba re. Petero ki ya: ‘Marã bere te. Ono mi nika fu guhe foro du bere. Ni rimo Yesu, mo guari ki tona nduge!’ Petero ki zi gu kumba re ti kumbabeko, gu kumba re ki gu kuari ki tona nduge. Ho aboro abi gipai ni re, iriwoho ati tiyo ni bakerehe, i kidu na bakere ngbarago.

Petero ki ya: ‘Ani mangi gi iiriwopai re ni gu ome nga ga Mbori, nga guko nazingisi Yesu be kpio.’ Ho aPetero na Yoane aafura ni kindi, abarumbatayo rogo pambori ki da. I adu na bakere zinga mbiko gupai nga aPetero na Yoane aayugopai fu aboro tipa pa zinga Yesu be kpio. I ki ziyo ki ba yo ku bambukiso yo.

Rogo gu uru nangbefuo gure, agu abarumbatayo re amangi bakere dunguratise. I ki ye na aPetero na Yoane gbiati gu kumba i ahusi ko ku dagbayo. Agu abarumbatayo re ki ya: ‘Oni amangi gi iiriwopai re ni gini tandu?’

Petero ki ya fuyo i amangihe ni gu tandu nga ga Mbori, nga gu ko nazingisi Yesu dagba kpikpi aboro. Ho aboromotumo agi gipai ni re, i aainongo gupai ka i mangihe te, bambiko ba tikango gupai re aadunga te. Gupai i amangihe sa nga ga ka za aPetero na Yoane ka i furanga tipa Yesu berewe ya, fuoho, i ki mbuyo i ndu.

Wa aˈuru aasusa, amokedi aatungusapai kindi tipa Yesu na kini husi aborokaza. Pangbanga gi husa akaza re agbandaka rogo arago dunduko. Rimbasa aboro kini ye rogo agu agbata naadu pati Yerusarema na gayo kazakaza aboro i husi yo. Gipai re asa abarumbatayo nga ga pambori yo i du na bakere kpihe, sidu, i ki zi amokedi ki bayo ku bambukiso yo. Ono i aaimanga ku bambukiso yo te.

Ga Mbori maraika aye yuru ki zaki ngbadimo bambukiso, a wa mo abihe re. Gu maraika re aya fuyo: ‘Oni ndu ki ru yekaru yo, kini tungusipai kindi fu aboro.’ Ho rago agiri ni, agu akumba nabayo ku bambukiso yo akedi aboro koyo i ndu ka ye na yo, ono i ki ngere angera vurũ. Kusa, agu akumba re andu ki bi agu amokedi re i nitungusipai yekaru yo, i ki ziyo ki ndu na yo ku bambu ngbanga yo.

Abarumbatayo ki ta ngbayo kuriyo ki ya: ‘Ani arugu roni nyanyaki ki ya ka oni yugungo pai berewe tipa Yesu ya. Ono oni ima hiiso Yerusarema awere na gaoni yugopai.’ Agu amokedi re ki karagapai ki ya: ‘Ani duwa ka ani gi sangba Mbori susi ga aboro.’ Sidu, i kini ndu ku mbatayo kindi na tungusa “wene pangbanga.” Ati bawene kpiapai du furani ani pekefuoho?