Kumbagude Ati Ni Rame

MO BINGO! Ginipai du namanga ane? Ya mo gu kumbagude pi sande re gbegberẽpai amanganga ko te? Mo bi! Kumba sa dagba agu aboro nakura dimoyo re nga Pauro! Ya mo mo nabi Timoteo yo a? Ya mo gu gude re ati ati ti bangiri bambu?

Ii, si nga gupai namangi. Pauro aamanga gumbapai fu abawiriki ane Turoa yo. Ko aini gupai nga si nika dia bagbanga regbo adia ko kini ka biyo berewe bambiko ko aamera rogo gu uru nangbe fuo gure. Sidu, ko afura na yo da ku bebere yuru.

Gu gude pi sande re rimoko angia Eutuko. Ko asungu ti bangiri bambu rame kini zi ko kuho. Ko ati ti bangiri bambu ku sende yo, nga gu bangiri bambu naadu ti biata vurubambu ku ariyo! Si du mo abi agu aboro re ti ni na bakere bakabangirise. Ho i andu ni ki tumba gu gude re kuari, i abi gupai nga ko ima kpi!

Ho Pauro abi gupai ni nga gu gude re ima kpi, ko api riko ki dungo ko. Ko ki ru ki ya: ‘Ka oni bakingo bangironi ya. Ko wenengai!’ Na kina rengo du nga ko adu wenengai. Iiriwopai du namangi. Pauro aima zingisako be kpio ko ki du ni ungako berewe! Aboro adu dunduko na bakere ngbarago.

I ki dakpa berewe ku rogo gu vurubambu naadu ariyo tipa ka ri riahe. Pauro ki ndu ku mbatayo na fugo daho rago agiri ni. Ono Eutuko aatinga ni rame berewe te! Fuoho, Pauro na Timoteo gbiati agu aboro naandu na yo ki tona gayo nduge. Mo ini wari i aandu kuhoni?

Gure nga Pauro anyasi gako biata nduge na sunge tungusapai, na gure nga ko aaga ku kporo yo. Rogo gi nduge re, Pauro amangisunge tipa agarã biata Efesa yo nitihe. Sidu, gere nga gu nduge nagizo ki susi gu uehe.

Fuo guari yo Turoa yo, kurungba andu ki ru Mireto tipa wiri bete arame. Wa Efesa aaturõngo aturõ gbe na Mireto ya, Pauro akedi sunge fuo agu abaakumba naadu rogo gu dungurati naadu yo tipa i ye ku Mireto yo ko fura na yo ni yangaraha. Ho si ada ni nga kurungba naguari, agu abaakumba re adu na bakere rungo tipa Pauro, bambiko i abingo ko berewe te.

Kurungba ki ndu ki da Kaisaria yo berewe. Wa Pauro asungu kua gu bawiriki yo nangia Firipo, nebi nangia Agabo apepa gu kerepai fuko naapido ko mbatayo. Ko aya fu Pauro i nika bako ku bambukiso yo ho ko nika da ni Yerusarema yo. Na gure nga gupai namangi a. Fuo gure, fuo du Pauro bambukiso yo tipa agarã ue Kaisaria yo, i akedi ko ku Roma yo gu bazogo nangia Kaisara wisigi gako ngbanga. Ani bingo gupai namangi ho ko aandu ni ku Roma yo.