Bakurungba Akuadi

MO BINGO gupai namanga re! Bakurungba nakuadi! Ya mo mo nabi agu aboro gito ku ime yo re? Aguyo ima tona ka ndu ku pangba ime yo. Ya mo Pauro du du yore re? Ani bingo gupai naamanga ko ane.

Mo tingidi gupai nga, Pauro adu bambukiso yo Kaisaria yo tipa agarã ue. Fuoho, i ki di ko gbiati kura zizi aboro ka ndu na yo rogo bakurungba ku Roma yo. Ho i aasusa ni pati gu kisanga nga Kurete, bakere bavugumo atona ka manga. Wege aaya ni kerehe ka aboro arengbanga ka ndu na kurungba ku mbatayo ya. I aarengbanga ka bi uru uru te, na akerekuru yuru te. Fuo ­dungu arame, agu aboro naadu kurungba yo abi gupai nga i abatanga ­berewe te.

Fuoho, Pauro ki ru kuari ki ya: ‘Boro ho dagbaroni nika kpi te; kina bakurungba sa. Bambiko ga Mbori maraika niye fuore yuru ki ya, “Ka mo gundenga ya, Pauro! Mo nika ndu andu ki ru barangba ga aRomo bazogo nga Kaisara. Na Mbori nika batasa agu aboro abatasa dunduko nandu na mo.” ’

Bara bebere yuru rogo bawe-na-biama uru fuo tona bavugumo, agu aboro naandu na bakurungba re abi gupai nga i nambeda kuti ugusende! I azogo agu amarã nazada bakurungba bambiko i agunde nga i rengbe arengba ka ndu ka fõ tiyo ti ambia. Ho rago agiri ni, i abi durugaduruga ime na ugusende patihe. I aasadi ka ndu na bakurungba kina boro kurii gu ­ugusende yo re.

Ono ho i ambedi ni ku pangba ime, bakurungba afõ tihe ti gangara ngume ki kongo. Angiri baime ki tona ka nakaha si ki tona ka kuadi. Gu kikiipa boro naangera kurii aboro ki ya: ‘Aguroni dunduko rengbe ka wagia, oni gito ku ime yo mbata tipa ka wagia ku pangba ime yo. Aguroni ainongo wagia ya, oni ki ru ki gito fuoyo ki kakuti kuadikuadi apapara kurungba tipa ka nyaka kutini.’ Na gure nga gupai i amangihe. Aboro dunduko wa i adu 276 nabati ki kuru ku pangba ime yo, a wa maraika agumbaha.

Gu kisanga i akuru ku rogoho re rimoho nga Merita. Aboro Merita adu na wene sino gbe, na i angerefuo agu aboro naye rogo bakurungba re dunduko. Ho rago azeredi ni, i amoi Pauro ku rogo kura kurungba ki ndu na ko ku Roma yo.