Digido Gbegberẽ Apai Dunduko

GINE mo abihe rogo gi sura re? Ii, abasovura du rii pisi afarasi. Ono mo bingo gu ba i aye rogoho. Agu afarasi re nayaara ngbangbaturũ yo ku sende yo rogo rungbutorungbuto mai! Ya mo ndikidi afarasi du naye ngbangbaturũ yo re?

Oó, ndikidi afarasi nga ami te. Ani nainoho wo mbiko gupai nga ka ndikidi afarasi ndunga ngba wege te, ya mo ziree? Ono Ziazia Kekeapai napepa afarasi ape ku ngbangbaturũ yo. Mo ini gupai si apepa afarasi ti ni koyo?

Si nape pa afarasi mbiko gupai nga aboro anaaso kerekere avura mbata na ami. Sidu, Baibiri napepa aboro i nizorõ na afarasi ngbangbaturũ yo ka yugo gupai nga Mbori nika sovura na agu aboro du auru kpotosende no. Ya mo mo ini i nayamba gu vura re nga gine? I nayambaha nga Aramegido. Gu vura re nika nyasariipa gbegberẽ aboro na gbegberẽ apai dunduko auru kpotosende.

Yesu du nika ngbembatayo ka so gi vura re. Mo tingidi gupai nga, Yesu du nga gu boro Yekova asia ní ní du ni bakindo gako zogarago. Si du Yesu navo kpakpari bakindo ti ni. Na gu basape du beko re nayugo gupai nga ko nika imo avura Mbori dunduko. Ya mo mo nabaka bangiro abaka nga Mbori nika ru wai ka imo gbegberẽ aboro dunduko?

Mo bingo gu pangbanga nga namba 10. Gine mo abihe yo? Gu bakere ime naimi gbegberẽ aboro. Da naye na ni? Yekova Mbori. Mo bingo namba 15. Ginipai namanga yo? Sodomo na Amora nagbi be gu we Yekova akedihe.

Mo bingo namba 33. Mo bingo gupai namanga agu afarasi na angbagidavura nga ga aEzipeto ra. Da nasa gu baime re si fu ku rira na kurii aEzipeto? Yekova. Ko amangihe wo tipa ka banda gako aboro. Mo bingo namba 76. Mo nabi gupai yo nga Yekova ambu gako aboro ambu a nangia aYisaraere avurayo imiyo mbiko gayo gbegberẽ apai.

Sidu tie, Yekova nika manga pai berewe wakina ngbatunga gure, nga ka keda gako abasovura ngbangbaturũ yo i ye ka nyasariipa gbegberẽ apai kusayo auru kpotosende. Ginipai nika manga fuo gure? Mo banga kpewaraga ka bihe.