Gu Wene Pangbanga I Aida Oni Gihe

HO YESU aduni auru kpotosende, gako abawiriki aye koyo du ko ni ki sanako niyaa: “Gine i ka inopa du mo ho tini [na ome kindo bero] na pa digido [gi] sinoraka [re]?” Ko akaragapai ki ya avura aduho dagba dungu aringara, na angbongi, na riri akaza, na abazigizo, na kuondika amaapai, zire abayugupai nga ga pambori yo aingisa dungu aboro, aboro asoga ndikidi apefuo ko kini rungosi yo, na nyemu manga rurupai azera ngbadu dungu aboro yo. Ho ka agi apai atona kaa manga ni re, ka si ayugu gupai nga Kristo aima duho na ome kindo beko zanga aboro biko na kini yugu gupai a nga gu Kindo nga ga ngbangbaturũ ima mbeda. Si adu nga gere nikangia pangbanga—nga wene pangbanga! Sidu Yesu agbia agi afugo re kuti ni ni papara gupai i ka inopa gako duho tini na ome kindo beko: “Gi wene pangbanga nga ga kindo re i atungusaha atungusaha rogo agu arago aboro araka rogo auru kpotosende dunduko ni dezirepai fu rikaaboro dunduko; fuo gure, digido rago ki da.”—Mt. 24:3-14, NW.

Gu vovo apai namanga rogo zegino, si nitihe ni gbegberehe, ono gupai si ayugopaha nga wenepai, nga ga Kristo padu ho na ome kindo beko. Agu apai gumba yo paha kuari re atona ka yugotihe gbayaga rogo gu garã taki yo pandehe gbe, nga 1914! Si angia tonatona digido Aregbo nga ga aGendiria na pa tona regbo ariaapai ti gu zogarago nga ga aboro kuti ga Kristo Zogarago Tipa Agarã Kutu.

Gupai nga ka regbo ariaapai adu aduho, si niyuguyuguhe rogo Atambuahe kapita 110 veresi 1 na 2, na Yugoti 12:7-12. Yo ngaha re, i yugu gupai nga si adu nga Kristo sungu ku kumbabe Mbori yo ngbangbaturũ yo da ti gu regbo ko ka da ni Bakindo. Fuo gure, si adu nga vura adu ngbangbaturũ yo sangbanaha kingia ba Satana ku auru kpotosende, si kini ye na rungo fu kpotosende, na Kristo kini zogorago dagba avurako. Si adu nga yangara digido gbigbitaapai aye rogo gu gene nga ga “bakere gberãngbi,” kini digi rogo gu vura nga Aramegido na ga Kristo Zogarago Tipa Agarã Kutu nga ga zereda kini mo ka ye tingbafuo gure.—Matayo 24:21, 33, 34; Yugoti 16:14-16.

Baibiri nayaa: “Mo ini gere aya rogo kusa rago gbegberẽ rago ayé. Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, i akpí nyemu sangba borose susi nyemu Mbori; ki nika kuti kpia sinombori, ono i ati kango tandu he. Oni kpára tironi ti agi yo re a.”—2 Timoteo 3:1-5.

Gu kura aboro rengbe ka tikango ya agi apai re aima digo nimangi rogo gu kuru apangbanga ga ga aboro, ono rengo nga agi apai re aamanganga mbata kuti gu bakioho du awere re te. A wa abake kuruapai na abafura tipa apai agumbaha, regbo adunga ho mbata auru kpotosende wa gu aboro abihe natona rogo 1914 ka ndu kumbatayo te. (Oni bi kpewaraga 7.) Arungo ima kio susi gu nidu mbata. Kurii gure, nibipa gu kurapai nga gu Kristo agumbaha ya i ainopa yangara auru tini, si naida ani makiapa agi apai re: Takapande ga Kristo padu ho gbiati takapande Kindo ima kio susi gu nadu mbata kusayo. Rungosi aboro tipa tungusapai adunga ho mbata wa gu mangi yo aDezire Yekova nani te. Dungu akama yo i aimi yo rogo gu bataya zizi aboro nangia ga Nazi [Germani yo]. Daa kurogo gi uru re, zahe ho kindi ti ga aDezire Yekova sunge rogo gu kura arago, na rogo gu kura aba, i nazio yo, kini kikisi yo ku bambukiso yo, kini rungosi yo, na kini imi yo. Agi apai dunduko re nga papara gupai Yesu agumbaha nga gu i aino pai tini.

A wa i agumbaha kumbatayo rogo Yugoti 11:18, ‘rikaaboro ima zinga’ kuti ga Yekova ruru aDezire, na gere nayugo gupai nga Yekova nika ba gako “zinga” kurii gu rikaaboro re. Kina gi bangisa veresi re nayaa Mbori “[a]gbarasa agu yo nagbarasa kpotosende.” Regbo adunga ho mbata rogo gu pangbanga nga ga aboro nga gu i agbarasipa gu ome du kpotosende nani ka songoda unga wa gu duhe areme te. Ono tie, si awere kia! Dungu aboro birĩ inohe nazahe ki ya ka aboro andu kumbatayo kindi na birikosi kpotosende, si rengbe ka da ni gu rago ka aboro arakanga berewe rogo ya. Ono Yekova “ambakadi he aboro niraki rogo ho,” na ko adia agu abirikosi kpotosende re adia kusayo mbata fu nyasa yo gayo sunge gbarasa kpotosende.—Yesaya 45:18.

AGU AMAKU NGA GA KPOTOSENDE NGA GU NIKA DU TII GU ZOGARAGO NGA GA KINDO

Gu berã nga aboro araka auru kpotosende ni avuru ga Mbori Kindo rengbe ka wira gupai du giaha kia tu dungu agu aboro yo idi kuti Baibiri, nga agu aboro naberãha ya aguyo nika gbia bata adu ngbangbaturũ yo. Baibiri nayugo gupai nga kina bete bange aboro gbua nandu ku ngbangbaturũ yo na agu aboro nika raka auru kpotosende nyeanye kindi adu nga gu bakere rimbasa aboro adunga bangeyo niringbisiringbisihe ya. (Atambuahe 37:11, 29; Yugoti 7:9; 14:1-5) Gupai nga ga Mbori Kindo tiibe Kristo ahiiso kpotosende na kini zogorago auruhe, si niyuguyuguhe rogo gu sangbanebi du rogo gu buku nga ga Baibiri nga Daniere.

Yo ngaha re, i yugu ga Kristo Kindo wa gu mbia de yo ho kusayo ti ga Yekova bakere pagbia du wa bagangara. Si nanarã gu kpiahe narukuba gu nyanyaki aringara nga ga kpotosende na ki gbarasihe, na “gu mbia nga gu nanari gu kpiahe re . . . ki sa tihe ni bagangara ki hisi kpotosende dunduko.” Gu sangbanebi re nandu kumbatayo niyaa: “Rago agu abakindo re Mbori ngbangbaturũ amáa gu ngbi [kindo, NW ] nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi [akindo, NW ] re rukutu ki digisi he dunduko, si ki nye anye kindi.”—Daniere 2:34, 35, 44.

Gi Kindo re du gbiati gu maabangirise Kekeapai asongodapaha nga ga nyenye unga auru girisigirisi kpotosende i nambakadihe nibawenehe aDezire Yekova aida ka gumbapaha fu roni. Badungu amirioni aboro nga aguyo naraka awere, na gu dungu amirioni aboro du awere rogo gayo amuro aduna mamu beyo ka raka yo nyeanye kindi. Fuo gure, tii ga Kristo Yesu Zogarago Tipa Agarã Kutu, ga Yekova bambata ringbisapai tipa mbakada kpotosende na tipa maa bambata aboro ue riihe amanga. Ome aboro abatanga be raka rogo gi Paradiso nga ga kpotosende re te. A wa i afu gu sunge fu Adamu nga ga ngerafuo ati Edene, kinawo a ngbatunga aboro nika duna gu sunge beyo nga ga ngerafuo kpotosende na gu kurukuruahe gbiati unga anyaa du auruhe. I “agbia ngbarago be sabeyo tipa gbanga regbo.”—Yesaya 65:22, Revised Standard Version; Bambata Pai 2:15.

Dungu averesi gu duho rengbe yo ka fuhe ka yugo agu apai nani nika manga ho i ka karagapai ni sa gu kparakpee Yesu ayuguhe fu rani niyaa: “Ga ngbi [kindo, NW ] yé, Ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Ono tie, kina gere rengbenga tipa awere: “Mi ki gi bakere fugo yo du mbatabakindo ni, naya, ‘Oni ngére, ga Mbori banye du na aboro, ko anyé na yo tigako, ki du ni gayo Mbori.’ Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa. Gu ko nasungu auru mbatabakindo, ko ki ya, ‘Oni ngére, mi nambakada ahe dunduko ni vovo ho.’ Ko ki ya, ‘Mo ké agi apai re, bambiko si nga ruru he nga rengo a.’ ”—Yugoti 21:3-5.

[Caption on page 15]

‘Gbegbere aregbo nikpakarakpakaraha ka mangapai sani,’

ONO ‘fuo gure, ragoho ki digi adiga’

[Caption on page 18]

Netherlands

[Caption on page 18]

Nigeria