Gupai Ga Mbori Kindo Nika Mangaha
“Ga ngbi [kindo, “NW” ] yé, Ani mángi rogo kpotosende wa mo akpi nyemu he, wa du he ngbangbaturũ yo.”—MATAYO 6:10.
HO YESU ayugupai ni fu apefuo ko i nikparikpee tipa ga Mbori Kindo, ko aima ino gupai nga ye gu Kindo re nika digiso ga aboro zogarago nga gu naima digo nimangisunge tipa dungu kutu agarã zanga ga Mbori rugapai. Vuru agu aregbo re dunduko, aboro aamanganga gupai Mbori akpinyemuhe auru kpotosende na rogo arago dunduko te. (Atambuahe 147:19, 20) Ono fuo i sigira gu Kindo re ngbangbaturũ yo, si naida i nimangi gupai Mbori akpinyemuhe rogo arago dunduko. Regbo gu iiriwo ariapai nga ga dia zogarago kusayo be aboro ki moi ga Mbori Kindo nga ga ngbangbaturũ kubaha nambeda ni kina boro ipo.
2 Gupai nika yugopa gi regbo ariapai re nga gu regbo Yesu ayambuhe nga regbo “bakere gberãngbi . . . , wa zegino aenge da awere si adu nga wo te, oó, si adú nga wo berewe a te.” (Matayo 24:21) Baibiri aringbisanga wai bagizo gu regbo re nika du te, ono gu kereapai nika manga ti regboho agbera kisusi agu apai dunduko namangi rogo zegino. Ti tonatona bakere gberangbii, pai nika manga nga gu dungu aboro auru kpotosende nika kiga behe bakere gbe: nga gbarasa zire pambori. ADezire Yekova akiganga behe tigayo te, mbiko i aima digo nimoibangiriyo tipaha. (Yugoti 17:1, 15-17; 18:1-24) Gu bakere gberangbii re adigo ti regbo Aramegido, ho ga Mbori Kindo nika gburuwa ga Satana sinoraka ni dunduko.—Daniere 2:44; Yugoti 16:14, 16.
3 Ginipai gere ka mangaha fu “agu yo aina nga Mbori ya, na agu yo agia nga sangba wene pangbanga” tipa gako Kindo nga ga ngbangbaturũ vurube Kristo ya? (2 ATesaroniko 1:6-9) Gu sangbanebi nga ga Baibiri nape gupai fu rani nga: “Oni ngére, gbigbitapai nakura ti gu rika aboro sa gu rikaaboro, bagugugu mamu yuge nawo ti gu tuturũ papara arago nga ga kpotosende! Agu yo Yekova ka imo yo ti gu uru re kangbayo adu tona ti digida kpotosende ku bani ki da ku bani. I akpara nga yo nita ngbaduse te, watadu kpisida yo a te; i adu wa regbo anya auru sende.”—Yeremaya 25:32, 33.
Digido Gbigbitaapai
4 Tipa dungu kutu agarã, Yekova Mbori aima digo nihi gbigbitaapai, tipa gbanga regbo gbe ki da ti gupai nga ruru ngbadu aboro yo nibasasa bi gupai nga ga aboro zogarago naye na gberango. Ni kpiapai, kuti sangba kura boro sa, kina rogo gu 20 kama agarã nisaha, i aimi aboro susi amirioni 150 rogo avura, ti regbo a’aria zogarago ngbaome, na gu kura avura nga ga dagbarago. I abi ga aboro kere mangaapai gbe ti regbo Ue Vura nga ga Zegino, ho i aimi aboro ni amirioni 50, dungu yo kini kpiki kere akpio rogo bataya zizi aboro ti ngba vura nga ga Nazi [Germani yo]. A wa Baibiri aima gumbaha kumbatayo, ti gi gaani regbo re ‘gbegbere aboro na airanangahe ima gbera kisusi.’ (2 Timoteo 3:1-5, 13) Areme, wasiwasi kodaba, kuondika, zuu, irairaapai, na bisirapa ga Mbori andika ima maapai. Sidu si ni baruruhe fu Yekova ko digisi gi gbigbita sinoraka re.
5 Gupai re teketeke wa kinagu nadu Kanana yo agarã nasusi fuoho awere 3,500. Baibiri nayaa: “Kere gbegberẽ asino dunduko bangiri Yekova nga gu ko nasoga ha, si i amanga fu gayo ambori. Awiriyo a nga akumba na ade i nazokoda yo ku we yo fu gayo ambori.” (Pa Fu Rugute ni Ue he 12:31) Yekova atingidi gu rikaaboro nangia aYisaraere na gupai nga: “Tipa gu gbegberẽapai nga ga agi arikaaboro re Yekova gaoni Mbori ado yo . . . barangba roni.” (Pa Fu Rugute ni Ue he 9:5) Bake gu kuruapai nga ga Baibiri nga Henry H. Halley ayaa: “Iriso Bara, Asetorete, na gu kura ambori nga ga aboro Kanana aduna banaru avugaahe rogo; gayo abambu iriso angia bangua aba nga ga kereapai.”
6 Halley ayugu bakio wai gayo gbigbitaapai adu, mbiko rogo kura ba sa dagba dungu ngbatunga agu aba re, agu aboro nageteka kuru abate sendeyo “abi bakere bange akambu na kangba agude rogo nga aguyo i atumo na yo fu Bara.” Ko ayaa: “Gu rago re nabaha angia ba muro fogo agude vunguyo yo bambeda. . . . Aboro Kanana anairisombori ni rimiso tiyo kurogo wasiwasi apai, ni gu mangapai nga ga pambori barabangiri gayo ambori; na fuo gure kini imi awiriyo nga gayo bambata vungu, ni motumo fu agi ambori re. Si nawiraha nga, bakere gbe, ringara Kanana adu wa Sodomo na Amora rogo arago dunduko. . . . Ya mo gu kere bibiriko sino na mangapai wa anyaa re aduna wiri rengo behe ka nye kindi? . . . Agu aboro nageteke gu kuru abate nga ga ga Kanana abakporo abakibangiriyo tipa ndu gupai Mbori aimanga gbarasayo tini mbata fu gu regbo ko amangihe ti ni re ya.”
Dia Kpotosende
7 A wa Mbori agirisi Kanana, ko nika giriso kpotosende dunduko bambeda na ki fuhe fu agu aboro namanga gupai ko akpinyemuhe. “Bambiko ruru aboro aráka zegino, airarengo ki nye rogo ho; ono i aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.” (Asanza 2:21, 22) Na bake Atambuahe nayaa: “Bambiko fuo rago ngbutuko, gbegberẽ boro adú nga ho berewe te; . . . Ono bayee aboro adía kumbo ringara, ki du na ngbarago tipa gu wenepia du kpaima.” (Atambuahe 37:10, 11) I adia Satana kusayo a, tipa “ka ko ananga nga arikaaboro berewe wa sa ya, daho agarã ka nyasa ni 1000.” (Yugoti 20:1-3) Ii, “zegino napaya apaya [“nago ago kusayo, NW ], na gaha nyemuhe: ono gu ni ka amanga gu pai Mbori akpi nyemu he ni [a]nye anye kindi.”—1 Yoane 2:17.
8 Ni guruso ko pa gu maabangirise du tipa aguyo naida ka raka nyeanye kindi auru kpotosende, Yesu ayaa: “Aboro maku nga bayee aboro, bambiko i adú ni adikumbo zegino.” (Matayo 5:5) Si nawiraha nga ko aafura tipa Atambuahe 37:29, nga gu nafura kumbatayo niyaa: “Ruru aboro adía kumbo ringara, ki nye anye kindi.” Yesu aima ino gupai nga si angia ga Yekova ringbisapai nga ruru ngbadu aboro raki rogo paradiso auru kpotosende nyeanye kindi. Yekova ayaa: “Mi du na gi bakere tandu nataĩ bere ki mangi kpotosende, na aboro na agu anya du auru kpotosende, mi nafu he fu kina gu ni ru he bangire ka fu he fu ni.”—Yeremaya 27:5.
Bawene Vovo Zegino
9 Fuo Aramegido, ga Mbori Kindo nika kusa aboro kurogo bawene “vovo kpotosende,” yo “ruru apai nikanye” ni. (2 Petero 3:13) Nga gu bakere ongoda nikangiaha fu abati be Aramegido i nadi gu gbegbere sinoraka kusayo narungosi aboro re! Nga gu ngbarago i ka du nani ka rimo kurogo ruru vovo zegino tii gu zogarago nga ga gu Kindo nga ga ngbangbaturũ, ni berẽpa bawene amaku na pa nyenye unga!—Yugoti 7:9-17.
10 Vura, kuondika, gomoro, zavura anyarinde agundesinga aboro berewe te. ‘Mi amánga mokido nga ga zereda na gimi aboro, ki do anyanvuo rogo ringara kusayo. Angua ati azúka zuzuhe, kpotosende ki zugasi gaha zuzuhe, anyaa ki raki zezeredii rogo gaami ringara.’ “I atáka gayo abasape ni marã sopabino, na gayo abaso ni marã kuya ngua; rikaaboro amó nga basape kuti gu rikaaboro te, i awírika nga pa sovura berewe a te; ono aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te.”—Yezekere 34:25-28; Mika 4:3, 4.
11 Kaza, gberarago, zavura kpio, i adiaha adia kusayo. “A nga boro kporo sa ayá, ‘Mi nawoka’ te; agu aboro naraka rogo ho i avú yo avu ti gayo irairapai.” (Yesaya 33:24) “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa. . . . ‘Oni ngére, mi nambakada ahe dunduko ni vovo ho.’ ” (Yugoti 21:4, 5) Ho Yesu aduni auru kpotosende, ko ayugu gu tandu nadu beko nimanga ko agu apai re na gu ome Mbori afuhe fuko. Mbiko gu songodahe nga ga ziazia toro, Yesu anata ringara yo dunduko kini husi gbarigbari aboro na kini husi aboro kaza.—Matayo 15:30, 31.
12 Yesu amangi apai susi gure. Ko azingisi kangba aboro. Waigu bayee aboro akaragapai sani? Ho ko azingisi degude ni garãri adu 12, si “airiwo ti yo bakere gbe.” (Marako 5:42) Gere angia kpia gu kurapai Yesu nika mangaha rogo zegino dunduko tii gu zogarago nga ga Kindo, mbiko ti gu regbo re, “ruru aboro azinga be kpio na iraira yo a.” (Amokedi 24:15) Oni berẽnga pa gu bakere ngbarago nika du ho rimbasa kpikpi aboro nika karaga tiyo ni kurogo unga, aguyo tingbafuo akurayo na ki kpamia tiyo na abadiangbayo! Kapa tini te, bakere sunge yugopai aduho tii gu ngerakuriisunge nga ga Kindo tipa wa ka ‘kpotosende hí be ina pa Yekova wa aime nahisa gango baime.’—Yesaya 11:9.
Dia Ngbarasarimo Kusayo ti ga Yekova Bakere Pagbia
13 Bara ti digido agarã kutu nga ga zogarago nga ga Kindo, i aima karaga ngbatunga aboro i duni rengberengbe yo rogo gayo aberã na ti kpotoyo. Kpotosende angia ati Edene nabaha, ni paradiso. Aboro aima gbia zereda ti gu regbo re, ngbarago, ngbabase, ki duni gu riko nga ga agu aboro duna nyemuse. Anga regbo ho rogo gu pangbanga nga ga aboro mbata fu gu zogarago nga ga Kindo i abingo pai wa ngbatunga gure te. Nga gu bakere kparakparapai nika ima duni yuguyuguhe dagba gu kere zogarago nga ga aboro tipa gu dungu kutu agarã susi na gu bawene zogarago nga ga gu Kindo nga ga Mbori tipa agarã sa kutu! Ga Mbori zogarago rogo gu gene nga ga Kindo aima du ti gu regbo re niyuguyuguhe nibawenehe kisusi rogo apai dunduko. Ti gu regbo re, i aima rugusapa ga Mbori rengo ka zogarago, na ki ima dia gbarasarimo kusayo ti gako bakere pagbia.
14 Ti digido agu agarã sa kutu re, Yekova ambu rengberengbe aboro i mangisunge na gayo tandu nga ga ranirii tipa ka sia gu boro i aida ka ndusunge ni. Baibiri nayugo gupai nga “i akúsa Satana rogo gako bambukisa yo.” Ko a’asada tiko berewe ka ingisa aboro, nga aguyo beteyo dagbayo nika sia padu na ranirii ti ga Mbori rugapai. Tipa ka sa gupai nga ka ‘fudifudipai kurunga berewe ya,’ Yekova anyasa riipa Satana, riipa gako adaimona, na agu aboro dunduko nika samungu kuti ga Yekova bakere pagbia. Boro ho nika tikango ki ya agu aboro dunduko i ka gbarasa yo nyeanye kindi ti gu regbo re aadunga na mamu beyo ka mbakada apai te te, watadu ka ya gayo iraira mangaapai adu mbiko i adu ni kpakpayo te. Oó, i adu wa kina gu rengberengbe kumba nangia Adamu na Eva, nga aguyo nataino aino kini sia gupai nga ka samungu kuti ga Yekova ruru zogarago.—Yugoti 20:7-10; Nauma 1:9.
15 Ngba kura gene, si nawiraha nga bakere bange aboro asia ka songoda ga Yekova bakere pagbia. Fuo i gbarasi asamungu dunduko kusayo, ruru aboro aru barabangiri Yekova, i nasusi rogo gu yangara asada nga ga padu niruruse. Fuo gure, Yekova adia gi ruru aboro re ni awiriko. Sidu i kini karaga tiyo kurogo gu pagume Adamu na Eva adu nani dagbayo na Mbori mbata fu i samungu. Sidu, ARomo 8:21 adu ti gu regbo re nidigisidigisihe: “I batasi ũzegino [ngbatunga aboro] tigaha a be du ni ga zirã kanga sa kura gu taarimo nga ga awiri Mbori.” Gu nebi nga Yesaya nagumba gupai kumbatayo nga: “[Mbori] adígisa pa kpio nye anye kindi, Gbia Mbori awéga aume ti bangirise ku sa yo dunduko.”—Yesaya 25:8.
Gu Maabangirise nga ga Nyenye Unga
16 Nga gu iiriwo maabangirise nasungudo ruru aboro, ka ino gupai nga Mbori nikaa fu agu aundo nga ga toro na ga borose fuyo kpaima nyeanye kindi! Ni ruruhe, bake Atambuahe ayaa: “Mo naza bero, ki nimbisi gu nyemuhe [ruaru] nga ga unga ahe dunduko.” (Atambuahe 145:16) Yekova nangarasa agu aboro du rogo gu riko nga ga kpotosende i duna gi maabangirise nga ga raka rogo Paradiso re ni papara gayo idapase kuti ko. Wa vura du gu ngbanga nga ga ga Yekova pagbia na nyanyakipaha gbe, ko aidanga gupai be aboro nga i ndusunge ko zanga gu maabangirise nga ga dia mosoro te. Vuru Baibiri yo nabaha, padu niruruse fu Mbori na gu maabangirise nga ga nyenye unga nga papara gu idapase nga ga aKristano kuti Mbori nga gu duni vovoho sa ka ba kparakaha adunga tini ya. “Gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.”—AEbere 11:6.
17 Yesu ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Herẽ, ko akodipa ino Mbori na pa ino gako aringbisapai kuti gu mosoro si aye nani. Ni kpiapai, ho boro ingapai asana Yesu ni tipa ko tingidi pako ho Ko ka ye ni rogo gako Kindo, Yesu ayaa: ‘Ani adú adu na mo Paradiso yo.’ (Ruka 23:43) Ko ayanga fu gu kumba re wee ko duna kina idapase ka mosoro avuranga du beko tipaha vurũ ya te. Ko aima ino gupai nga Yekova naida gako amoyambu duna gu maabangirise nga ga nyenye unga rogo paradiso nga ga kpotosende tipa si undo ka songoda yo wa i agbia tiyo na a’asada nibasasa rogo gi zegino re. Sidu, maabangirise tipa mosoro kumbatayo na nyanyakipaha tipa undo boro ni hipai ni Kristano.
Gu Sunge nga ga Kindo Kumbatayo
18 Wa duhe nga gu Kindo re angia be gu zogarago Yekova amangisunge nani tipa ka sa kpotosende na agu aboro naraka auru he i duni rengberengbe yo na ki sa yo i mbakadipai dagba tiyo na ko, fuo susa Kutu Agarã, gini kura sunge nika duho fu gu Bakindo nga Yesu Kristo na fu gu 144,000 abakindo nga aboromotumo? “Fuo gure digida pai ki du, ho ko ka fu ngbi ni fu Mbori nga kina Ba; ko nadigisa ga abazogo apai dunduko na asia pai dunduko na tandu. Bambiko ko ka kindo, daho ko ka maa avurako ni dunduko ku tii nduko yo.”—1 AKorindo 15:24, 25.
19 Ho Kristo nika fu Kindo ni fu Mbori, waigu ani ka giarogo gu kekeapai nafura tipaha ya si anyeanye kindi? Gupai gu Kindo re ka mangaha anyeanye kindi. I airisa Kristo nyeanye kindi mbiko gu gako sunge nga ga dia gbarasarimo kusayo ti ga Mbori bakere pagbia. Ono mbiko i aima dia ingapai na kpio kusayo dunduko ti ngbatunga aboro ti gu regbo re, na i ki ima ngbeyo, gu zingo du tipa ko ni Bangbe aboro adigo. Gu Zogarago nga ga Kindo Tipa Kutu Agarã aima nyasa gaha sunge wenengai a; sidu zingo adunga ho tipa be zogarago nye dagba Yekova na aboro giasangbaa te. Sidu, “Mbori [a]du adu mbata yo fu ahe dunduko.”—1 AKorindo 15:28.
20 Fuo digo gu sunge Zogarago nga ga Agarã Kutu, gini sunge nika duho fu Kristo na gako abadia zogarago? Baibiri apengaha fu rani te. Si ki vura du wo, ani rengbe ka rugatirani na gupai nga Yekova afu gu kura dungu amamu sunge afu fuyo dagba gako kusikusiahe. Ani songodinga ga Yekova bakere pagbia tie wa du ani dunduko areme na ko ki idipa nyenye unga fu rani, wa ka ani du ni ungarani kumbatayo ka bi gupai Yekova naringbisihe tipa Bakindo na agu akurako abakindo nga aboromotumo, na tipa agu aboro dunduko du rogo gako iiriwo haurago!
Bangiriapai Tipa Fugöho
• Gini ariapai rogo pa zogarago ani ambeda sani?
• Waigu Mbori nika sapangbanga gbigbita aboro na ruruyo?
• Gini apai nika du rogo vovo zegino?
• Waigu i ka dia gbarasarimo dunduko kusayo ti ga Yekova bakere pagbia?
[Asanahe nga ga wisigopai]
1. Pa ye ga Mbori Kindo ayugo ginipai?
2. Gine nika yugopa gu regbo i ka aria gu zogarago nga ga aboro tini sa gu nga ga Kindo?
3. Waigu Yeremaya aringbisapa gupai nika manga abasasangbaa?
4. Tipagine ruhe aru tini fu Yekova ka digiso gi gbigbita sinoraka re?
5, 6. Oni ringbisinga pa gu gbigbitaapai nadu rogo gu ringara Kanana nadu mbata.
7, 8. Waigu Mbori nika giriso gi kpotosende re?
9. Gini ngbatunga zegino ga Mbori Kindo nika kusa aboro kurogo?
10. Gini gbegbereapai nika dunga berewe tii gu zogarago nga ga Kindo ya?
11. Tipagine rengbe ani ka du na kido tini nga akaza ago ago kusayo?
12. Gini maabangirise duho tipa gu kpikpiyo?
13. Waigu i ka yugo gupai nga ru ga Mbori Kindo aru?
14. Ginipai nika manga fu abasamungu ho agarã sa kutu nika nyasa ni?
15. Gini pagume nika du dagba gu ruruyo na Yekova?
16. Tipagine ruhe aru tini ani moibangirani tipa gu mosoro nga nyenye unga?
17. Waigu Yesu ayugu gupai nga si aru aru ani songodi tirani na gaani maabangirise?
18, 19. Ginipai nika manga fu Bakindo na tipa Kindo ti digido Zogarago nga ga Agarã Kutu?
20. Waigu rengbe ani ka inopa gu raka kumbatayo nga ga Kristo na ga 144,000?
[Gu kpiahe du ti kpewaraga 15]
‘Zingabekpio nika du tipa ruru aboro na irairayo’
[Gu kpiahe du ti kpewaraga 16]
Gu ruruyo akaraga tiyo kurogo wene pagume na Yekova