Wai ka Nye ni Kparakpara Rani ti Zegino

1. Ginipai Yesu anyakasipaha rogo gako yangara yuru ni boro auru kpotosende ane?

ROGO gu yangara yuru Yesu adu auru kpotosende, ko abakibangiriko tipa wai raka nika du kumbatayo fu gako Abawiriki. Ko amangi kparakpee tipa yo ki ya: “Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. Aboro zegino nga yo te, wa kina re adu nga ni boro zegino ya.” (Yoane 17:15, 16) Rogo gu ga Yesu kparakpee yo re, ko ayugu gu dudunguro nyemuse ko adu na ni tipa apefuoko gbiati pa nyaka agu afugo ko agumbaha rogo gu yuru re ki ya: “Wa adu nga oni ni aboro zegino ya.” (Yoane 15:19) Si tie ziazia nga, pa kpara apefuo Yesu tiyo ti zegino adu na nyanyakipaha bangiri ko!

2. Ginihe nga gu “zegino” Yesu afura tipaha re?

² Gu “zegino” Yesu aafura tipaha re, si naru kuba asamungu kuti Mbori, du tii gu zogarago nga ga Satana na ki du ni akanga fu gu sino nga ga gbangbati gbiati rukö nga agu asino naenga ti Satana. (Yoane 14:30; AEfeso 2:2; 1 Yoane 5:19) Nirengo, ‘ngbanya na gu zegino re, si nga sogote fu Mbori.’ (Yakoba 4:4) Ono tie, wai rengbe agu aboro naida ka nye rogo ga Mbori nyemuse ka du rogo gi zegino re ono ki nye ni kparakparayo ti ni? Ani nika fura tipa agene bisue: nye ani ni rururani fu ga Mbori Kindo zanga rimiso tirani ku rogo birĩ-zogarago, ká ani gu toro nga ga zegino, votise ngba iriiri gene gbiati wene mbakadarii, raka gu raka du taata, gbiati ukadi ani tirani na agu aũvura nga ga Mbori.

NYE NIRURUSE ZANGA RIMO KU ROGO BIRĨ-ZOGARAGO

3. (a) Tipagine Yesu arimisongo tiko ti ni ku rogo gu birĩ-zogarago naadu ti gako regbo ya? (b) Tipagine rengbe ani ti ni ka ya ga Yesu mbembedi aKristano namangasunge wa amokedi? (Mo kodi gu kekeapai du bandu waraga yo.)

³ Kuba gupai nga Yesu rimisi tiko ku rogo gu birĩ-zogarago naadu ti gako regbo, ko afu omeko dunduko sa tungusapai tipa ga Mbori Kindo, gu zogarago nga ga ngbangbaturũ nga gu ko aandu ka du ni gaha Bakindo. (Daniere 7:13, 14; Ruka 4:43; 17:20, 21) Ho Yesu adu ni barabangiri gu ga aRomo banyaki rimoko angia Pondio Pirato, ko agumba gupai nga: “Gi ngbi aenga nga rogo gi zegino te re.” (Yoane 18:36) Ruru apefuo Kristo nawirika ko ninye yo niruru yo fu ga Mbori Kindo na ni tungusa yo pai tipa ga Mbori Kindo fu kura aboro. (Matayo 24:14) Gu mokedi nangia Pauro aya, “ani nga amokedi tie ku ba Kristo. Ani nazungadi roni ku ba Kristo, oni zéresi tironi fu Mbori.”a​—2 AKorindo 5:20.

4. Wai du ndikidi aKristano ayugo gupai nga i ni ruruyo fu ga Mbori Kindo? (Mo bi gu sanduki du ti kpewaraga 52.)

⁴ Wa duhe nga gu boro i akeda ni ku rogo kura ringara ni mokedi nandu koyo ka mangasunge fu gani ringara, ni arimisongo tini ku rogo agu apai yo nga ga gu ringara re te. Ono tie, ni nafura afura yo tipa gani ringara. Kina gu bangisapai re a du tipa mbedimbedi aKristano, du gayo “ngbi” ngbangbaturũ yo. (AFiripoio 3:20) Nirengo, ani na tambuahe mbiko gayo zaaza sunge tungusapai, i ima undo dungu amirioni ga Kristo “kura akandoro” tipa ‘i zéresi tiyo fu Mbori.’ (Yoane 10:16; Matayo 25:31-40) Agi akandoro re naundo awirina Kristo. Wa du yo ni kodikodi yo ka songoda ga Masiya Kindo, singia mbedimbedi aKristano watadu kura akandoro, i dunduko arimisongo tiyo ku rogo birĩ-zogarago yo ya​—Mo gedi Yesaya 2:2-4.

5. Wai du gu dungurati nga ga aKristano kia ti gu nangia ga aYisaraere?

⁵ Anga pa nye ni ruruse fu Kristo nga gu yangara ndupai aKristano azanga rimiso tiyo ti ni ku rogo birĩ-zogarago yo ya te. Ani wa aYisaraere nga agu aboro Mbori aima fu kparakpara ringara fuyo i niraki rogoho te, ani nga papara agu awirina du rogo zegino dunduko. (Matayo 28:19; 1 Petero 2:9) Sidu, ka ani ngbe na riigbu nga ga birĩ-zogarago, ani dunga na wene sangbakpotoseyo ka gumba gupai nga kina ga Mbori Kindo sa nga gu yangara maabangirise du tipa aboro te. (1 AKorindo 1:10) Kurigure, ti regbo vura, ani tona ka sovura kina kuti agu awirinarani si aida gupai nga ani kpinyemuyo. (Yoane 13:34, 35; 1 Yoane 3:10-​12) Yesu aduadu tie na wene ndupai beko ka ya fu gako abawiriki we i moi gayo basape ku sirikpa ha yo. Na ko aya fuyo i nikpinyemu avurayo.​—Matayo 5:44; 26:52; mo bi gu sanduki nga “Ya mo Mi Nanye ni Kparakpara re ti Birĩ-Zogarago?” ti kpewaraga 55.

6. Wai gamo kparatise fu Mbori amanga ariapai rogo ga pagume na Kaisara?

⁶ Wangia ani ndikidi aKristano, ani akpara gaani raka fu Mbori, angianga fu boro, ringara, watadu fu riigbu ya. 1 AKorindo 6:19, 20: naya: “Oni adu nga ni gaoni yo te; bambiko i angbe roni ni mosoro.” Wa duhe tie wo, ho Kristano afu agu ahe ni nga ga “Kaisara,” wa irisa, marã-ngbeti, gbiati gu giasangba du ku gene, i nafu ‘agu ahe nga ga Mbori fu kina Mbori.’ (Marako 12:17; ARomo 13:1-7) Agi apai re nakoda irisombori, yugo gu nyemuse naye kina boro ngbaduseyo, gbiati ruru giasangba. Na ka si du nga i naida ka imoyo tipa rimo Mbori, i agundenga ti fu ungayo te.​—Ruka 4:8; 10:27; mo gedi Amokedi 5:29; ARomo 14:8.

KÁ GU ‘TORO NGA GA ZEGINO’

7, 8. Ginihe “nga gu toro nga ga zegino,” na wai gu toro re ‘amangapai’ awere rogo agu aboro yo nakeretu?

⁷ Gu kura gene aKristano akparatiyo ngbaha ti gi zegino re nga ká yo gu gbegberẽ toro nga ga gi zegino re. Gu mokedi nangia Pauro ake gupai nga, “ono ani adi gu Toro nga ga Mbori, gu nga ga zegino te.” (1 AKorindo 2:12) Ko agumba gupai fu aEfeso nga: “Gu oni anata rogo mbata ku sangba sino gi zegino yo re, ku sangba gu bakindo yo du na tandu yuge, nga gu toro namangapai awere rogo agu awiri yo nakeretu.”​—AEfeso 2:2, 3.

⁸ Gu “yuge,” watadu toro nga ga zegino nga gbugbu ome, nga gu nakusa gu toro rogo boro yo nga ga basasangba, na kini zingisi “gu nyemuhe nga ga borose, na gu nyemuhe nga ga bangirise.” (1 Yoane 2:16; 1 Timoteo 6:9, 10) Gu ‘pagbia’ du gu toro re na ni na bakere ome kurii aboro, si nanyakasa gu nyemuapai nga ga borose, si ima kpakara tipa aboro inihe, si namangasunge nyanyaki, na wakina yuge, si rogo aba dunduko. Kurigure, si ‘namangasunge’ rogo aboro basasangba yo yee ka rimiso gu gbegberẽ asino ku rogoyo yo du wa, gbangbati, rukö, ngbaduse, gbiati gu toro nga ga samungu rogo boro yo.b Ka pehe ngba taata gene, gu toro nga ga zegino narimiso agu asino ku rogo aboro yo nga ga Bakitingbanga.​—Yoane 8:44; Amokedi 13:10; 1 Yoane 3:8, 10.

9. Rogo gini agene rengbe gu toro nga ga zegino ka rimo ku ngbadu boroyo na ku berãni yo?

⁹ Ya mo gu toro nga ga zegino rengbe ka sona ngbadu ro yo na berãro yo? Ii, si ima rengba ka manga wo ka mo mbugene fuhe ni zanga du mo ngangara na agu arugute nga ga Ziazia Kekeapai. (Mo gedi Asanza 4:23.) Gaha maapai natona yee ka boro ainongo ho ya, boro ima rengba ka tona koda tini na agu aboro ni abiyo wa wene aboro, ono nga agu aboro adunga na wiri nyemuse tipa Yekova ya. (Asanza 13:20; 1 AKorindo 15:33) Mo ima rengba a ka tona bi gu gbegberẽ sino mangaapai re rogo awaraga, agu abangiri aba nga ga internet nayugo kundiri aboro watadu asamungu kuti ndikidi pambori, agu aũngbarago angbanga ya, ngi agu ambaro naida nyanyaki asadatise tipa ka du na diabese. Ani rengbe ka bi gu gbegberẽ toro re rogo agu apai yo dunduko nayugo gu berãpai nga ga Satana watadu gako riigbu.

10. Wai rengbe ani ka sovura kuti gu toro nga ga gi zegino re?

¹⁰ Wai rengbe ani ka sovura kuti gu toro nga ga zegino re ki nye rogo ga Mbori nyemuse yo? Ani rengbe ka sovura sa kutini ka ani di agu agamunihe nga ga toro kugume na kini kpari fu Yekova dedede tipa ko undo rani na ziazia toro. Yekova nga bahe ti Bakitingbanga gbiati gi zegino du tii beko re. (1 Yoane 4:4) Sidu tie, si ni nyanyakipa pai ani nye mbembedi na Yekova rogo kparakpee yo!

IRIIRI VO ROKO NA MBAKADARII

11. Wai gu toro nga ga zegino namoipai kurii wai aboro avo roko?

¹¹ Gupai rengbe ka yugo gu toro nga ga zegino kuti boro nga wai ni avo roko, kini mbakadi rini, na wai ni agiriso tini. Rogo dungu aringara, gu vo roko nga ga aboro ima gberã ni kerehe ki da ti gu bangiriba nga kina ngba aboro naazera. Kura kumba sa namangasunge ba terevizioni yo agumba gupai nga, si nye koyo tooni adee ki ba roko. Waraga apangbanga sa agumba gupai nga zavura agu adegude du kindi ni rukutu yo, i ima merafuo gi sino vo roko re, “i navo agu aroko nayugo agu abarapa yo si aidanga aboro bihe ya.” Gu kurapai berewe nga vo agu aroko du depedepe. Kina agu aboro nga asamungu watadu azanga irisa ni naavoho.

12, 13. Gini arugute duho rengbe ka undo rani nibipa vo roko gbiati mbakadarii?

¹² Wangia ani ga Yekova amoyambu, ani naida ka vo roko avo wenengai, gipai re naida vo gu roko du ni gigirihe, bibihe nangba angba bangiri aboro, na si ki rẽarẽ tipa gu ba du ani rogoho. Ti aregbo dunduko, si naida ani vo gu roko nayugo ‘zogatise na zera’ kodihe na “wene mangapai” nga gu du tipa aboro dunduko singia adee watadu akumba, nga ‘agu aboro idi pa sinombori.’ Anga gupai ani aidaha nga ka gbe berã aboro kuti rani te, ono gupai ani aidaha nga ka ‘bánda tirani rogo ga Mbori nyemuse yo.’ (1 Timoteo 2:9, 10; Yuda 21) Ii, ani naida gaani vo roko du na “gu fongo nga bayee toro du zezeredi, si bangiri Mbori ni bakere genoho.”​—1 Petero 3:3, 4.

¹³ Si naida ani moi gupai ku berãraniyo nga gaani vo roko gbiati mbakadarii ima rengba kadu na maapai kuri wai aboro abi ndikidi irisombori. Ka gaani mbakadarii yugungo rani ni aboro rukö ya, ono tie, si naida si yugu bakere irisa tipa Mbori gbiati irisa tipa gu bipai nga ga kura aboro. Sidu tie, si naida ani berẽpa sangbakpoto kura aboro yo ki moi gupai ku berãrani yo nga si nyakipaha susi gu rengo du ani na ni ka sia gu roko ani aida ka voho. Gupai nyakipaha gbe nga, ani naida ka ye na irisa kuti rimo Yekova gbiati gako aboro na ki tambua tirani nga ani nga ga Mbori abamangisunge, ‘nimangi apai dunduko sa taasa rimo Mbori.’​—1 AKorindo 4:9; 10:31; 2 AKorindo 6:3, 4; 7:1.

14. Gini asanahe si aida ani sana tirani na ni nibipa mbakadatise gbiati du gigiri?

¹⁴ Gaani vo roko, mbakadarii, gbiati girisotise na nyanyaki paha gbe ho ani andu ni gene tungusapai yo watadu ho du ani ni pati agu adunguratise nga ga aKristano. Mo sananga tiro na agi asanahe re: ‘Ya mo wai mi avo roko na kini girisi tire nagbe berã aboro ku tire ngba gbegberẽ gene? Yo mo zee nazio aboro be agu aroko mi avoho? Ya mo mi nabipa gu rengo du mi na ni ka sia wai mi aida ka mbakada ti re na nyanyakipaha kisusi gupai nga ka rẽ tipa amamu rogo dungurati?’​—AFiripoio 4:5; 1 Petero 5:6.

15. Tipagine Ziazia Kekeapai atangaranga arugute ti ni tipa vo roko, mbakadarii, gbiati girisotise ya?

¹⁵ Ziazia Kekeapai atangaranga andiko fu aKristano tipa vo roko, mbakadarii, gbiati girisotise te. Yekova akanga na ani ti manga ani sunge na gaani ranirii nga ga siapai te, ko akanga na ani a ti manga ani sunge na gaani berãpa apai te. Kuba gure, ko naida ani du ni agu aboro naima nyaka rogo toro yo ki niberẽ kurii agu arugute nga ga Ziazia Kekeapai, na “rengbe gayo berã na wisiga pa wenepai na gbegberẽpai, mbiko manga yo pai na ni.” (AEbere 5:14) Kuri gure, gupai ko aidaha nga nyemuse tipa ko gbiati kura aboro nungusi rani rogo agu apai yo nga ga votise gbiati mbakadarii. (Mo gedi Marako 12:30, 31.) Badungu aroko rengbe ani ka voho areme na ki mbakadi rirani si ki yugu gupai ayugo nga nyemuse tipa Mbori gbiati kura aboro nanungusa gaani diaberã. Si du ani abi gupai ti ni nga ga Yekova aboro rogo zegino dunduko navo dungu ngbatunga aroko kini mbakadi riyo ngba dungu agene ono si ki du kindi ni iriirihe.

RAKA GU RAKA DU TAATA

16. Wai gu toro nga ga zegino amangapai kia ti ga Yesu ayugupai, na gini asanahe si aida ani sana tirani na ni?

¹⁶ Gu toro nga ga zegino nananga badungu amirioni aboro i berẽ gupai nga marã gbiati ahe rengbe ka sa boro nidu na ngbarago. Ono tie, Yesu aya: “I aringbisa nga ungaboro na gani ahe te.” (Ruka 12:15) Anga Yesu aya aboro raki kina boro gu raka nga ga kere rungo te, ono ko ayugu gupai nga ndikidi raka gbiati ngbarago naye fu agu aboro “inipa gu gayo azingo nga ga toro.” I nga agu aboro naraka gu raka du taata, na i naamaaberãyo tipa agu apai nga ga toro. (Matayo 5:3; 6:22, New World Translation) Mo sananga tiro nga: ‘Ya mo mi idi kuti gupai Yesu ayugu he nga rengo du, watadu Satana ima biriko re bambiko “irazire nga ko, nga baha”? (Yoane 8:44) Ginipai gimi afugo, asásá, agu apai mi aperesa paha mbatayo, gbiati gi gene raka ayugoho tipa re?’​—Ruka 6:45; 21:34-36; 2 Yoane 6.

17. Mo gumbanga bete agu aundo agu aboro agbiaha nga aguyo naraka taata raka.

¹⁷ Yesu agumba gupai nga “i asapa ngbanga fu tatamana mbiko sabehe.” (Matayo 11:19) Ani wisigingo pai tipa bete agu aundo agu aboro agbiaha nga aguyo naraka taata raka. I nagbia ndikidi ngbarago ti gu sunge nga ga Kindo. (Matayo 11:29, 30) Si nafu wasa fuyo na ki sa gupai nga ka i naabakanga bangiriyo tipa apai ya. (Mo gedi 1 Timoteo 6:9, 10.) Wa duhe nga i rengbe be kina agu ahe du beyo, i na bakere regbo beyo tipa gayo aborokporo gbiati kura aKristano. Ni sangbana gipai re, i nara wenengai zanga bakabangirise. (Batungusipai 5:12) I nagbia bakere ngbarago ho i afu he ni fu boro ringbisihe kuti omeyo. (Amokedi 20:35) Gayo “maabangirise moi pai” gbe, i na zereda berãyo yo na ki rengbe be kina agu ahe du beyo. (ARomo 15:13; Matayo 6:31, 32) Gere nga gu nyanyakipa amaku ka marã angbenga ha ya!

DIA “GA MBORI ŨVURA”

18. Wai Ziazia Kekeapai aringbisa pa gu vura rani nga Satana, gako agbina, na gu gene ani ‘akenapai’ ngbaha?

¹⁸ Agu aboro nabanda tiyo rogo ga Mbori nyemuse yo nagbia bandahe rogo toro yo, bambiko Satana naida ka gbarasapa gayo ngbarago gbiati gayo maabangirise tipa nyenye unga. (1 Petero 5:8) Pauro aya “gaani kenahe sa borose na kure te kina sa angbi, sa atandu, sa azogo zegino nga ga gi bitimo re sa rimbasa agu atoro nga ga gbegberẽpai yo rogo agu arago du ngbangbaturũ yo.” (AEfeso 6:12) Gu fugo nga “kenahe,” i mangisunge na ni herẽ ka yugo pa wai rengbe boro ka takpata ni bee. Kurigure, agu afugo nga “angbi,” “pagbia,” gbiati “azogo zegino” nayugo gupai nga Satana na gako adaimona ima mbakadatiyo wenengai tipa ka zubohe.

19. Mo sakinga pai tipa gu ũvura nga ga aKristano.

¹⁹ Wa vura du ani na arungbura gbiati zangarengba, ani ima rengba ka du na diabese. Wai rengbe ani ka manga gipai re? Ani rengbe kadu na diabese ni dia ani ‘ga Mbori ũvura dunduko.’ (AEfeso 6:13) AEfeso 6:14-18 nasakapai tipa gu ũvura re kini ya: “Si du ka oni rú ti ni, oni navo rengo dimoroni, ki ukadi marã ngbaduse nga rurupai, oni navodi nduroni ni gu ũnyaka nga ga wene pangbanga zereda. Oni rógo vurakube nga idapase ku ri he a oni ki rengbe ka bisa gu siida we nga ga gbegberẽ ko na ni. Oni ki rogo kpakpari bata, na gu basape nga ga Toro, nga sangba Mbori. Oni ki nikpari akpara kindi ni akpe na sarawati dũ rogo Toro yo.”

20. Wai du gupai du tipa rani nga aKristano kia ti gu nga ga asekere?

²⁰ Wadu he nga agu aũvura re nga wene gamahe be Mbori, si ima rengba ka undo rani ka ani avoho ti aregbo dunduko. AKristano kia ti asekere, nga aguyo nisovura na ki di gbanga ongoda zanga soho, aKristano naso gu vura nga ga toro aso a kindi, na i nika so gi vura re daho Mbori nika gbarasa gi ga Satana zegino re ni na ki ba Satana gbiati gako adaimona ku rogo gu due adunga mburuhe ti ni ya. (Yugoti 12:17; 20:1-3) Sidu, ka si du nga mo nasota na gu rungbura du mo na ni gbiati gu gbegberẽ nyemupai du ti ro, ka mo mbunga ga idapase si zere ya, na ani dunduko “namanga” ome tipa ka nye ni rururani fu Yekova. (1 AKorindo 9:27) Ho ani asotanga ni ya, gu regbo re du si aida ani du na bakabangirise!

21. Wai rengbe ani kadu na diabese rogo gu vura yo ani asoho nga ga toro?

²¹ Ani arengbanga ka du na diabese rogo gi vura re nisarani te. Gu mokedi nangia Pauro atingidi rani na gupai nga si naida ani naakparakpee fu Yekova ‘kindi rogo toro yo.’ Ti kina gu bangisa regbo re, si naida ani degeturani fu Yekova ni wisigo ani Fugoko na kini koditirani na agu awirinarani nga ‘abanzengere’ wakina rani a ti aregbo dunduko, bambiko ani asonga gi vura re ni sarani te! (Firemona 2; AEbere 10:24, 25) Agu aboro dunduko du ni ruruyo rogo agi abangiriba re adunga na kina diabese sa te, ono i nika ruaru nyanyaki tipa gayo idapase ho duhe ni rogo kpakarapai.

MO RU NYANYAKI TIPA GA IDAPASE

22, 23. (a) Tipagine si aida ani ru ti ni nyanyaki ti aregbo dunduko tipa gaani idapase, na gini ngbatunga asanahe si aida ani sana tirani na ni? (b) Ginipai ani nika wisigopai tipaha rogo gu kapita naye fuo gere?

²² Yesu agumba gupai nga ‘bambiko wa adu nga oni ni aboro zegino ya, si aboro zegino asoga roni ti ni.’ (Yoane 15:19) Si du si aida gupai ti ni nga aKristano ru nyanyaki tipa gayo idapase, ono kini mangihe wo rogo irisa yo na ngba wene gene. (Mo gedi 1 Petero 3:15.) Mo sananga tiro nga: ‘Ya mo mi rugutire na ndu gupai aDezire Yekova naaka ti ni ti kura aregbo ka manga gupai badungu aboro abihe nga si ruaru? Ho duhe ni nga mi ká ka manga ngbatunga gupai ngaha re, ya mo mi idi kuti gupai nzunzu nga gupai Ziazia Kekeapai gbiati kangara moyambu agumbaha ruaru? (Matayo 24:45; Yoane 17:17) Na ho daha ni nga mi mangi gupai du ni ruruhe bangiri Yekova, ya mo mi namangaha gbua mbiko gupai nga si naida mi du kia ti kura aboro watadu mi na bakere ngbarago ka mangaha wo?’​—Atambuahe 34:2; Matayo 10:32, 33.

²³ Ono dedede, gu nyemupai du ani na ni ka nye ni kparakpara rani ti zegino nagbia tihe na dungu wiri rukutu aasada. Ni kpiapai, awa i nafura tipaha kusayo, Bakitingbanga naasada ka gbe ga Yekova amoyambu ku zegiyo nimanga ko sunge na aũmbaro nga ga zegino. Wai rengbe ani ka sia agu aũngbarago rengbe ka fu wasa furani na ki mbu rani na gigiri sangbakpotoseyo? Gure nga gupai ani nika sakapai tipaha rogo gu kapita naye fuo gere.