Gu Kparatise Nga Ga Akristano Ti Agu Apai Nga Ga Biri̇̃ Zogarago Rogo Yangara Arame
“Aboro zegino nga yo te, wa kina re adu nga ni boro zegino ya.”—YOANE 17:16.
1, 2. Ginipai Yesu agumbaha ya si nika du tipa ga apefuo ko pagume dagbayo na zegino, na afugoko nakusa gini asanahe?
ROGO gu yangara yuru nangia ga ga Yesu raka nirengberengbe boro, ko akparikpee nigbangaha gako abawiriki kini degetuyo kuti ni. Rogo gu gako kpee re, ko agumba kurapai nga gu naringbisapa gu sino raka nga ga ndikidi aKristano dunduko. Nifura ko tipa apefuo ko, ko ayaa: “Mi fu ga pai fu yo; aboro zegino asogo yo asoga, bambiko aboro zegino nga yo te, wa kina re adu nga ni boro zegino ya. Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. Aboro zegino nga yo te, wa kina re adu nga ni boro zegino ya.”—Yoane 17:14-16.
2 Yesu agumba gupai bara ue tipa apefuo ko ya i nipapara zegino te. Ono tie, si adu nga ngbatunga gu kpara tiyo kusayo ti zegino re, aye aye na sogote kuriyo be zegino. Wa si avura du wo, si aidanga si gundesi kpoto aKristano yo te; mbiko si adu nga Yekova abanda yo abanda. (Asanza 18:10; Matayo 24:9, 13) Nibi gi ga Yesu afugo re, si daada ani sanahe ki ya: ‘Tipagine adunga ndikidi aKristano ti ni nipapara zegino ya? Rogo zanga du boro yo nipapara zegino nga gine? Ka si du nga zegino nasoga aKristano, waigu i abi zegino? Ka fura zukazuka, waigu i abi agu azogarago nga ga zegino?’ Agu akaragapai nga ga Ziazia Kekeapai kuti agi asanahe re na nyanyakipaha mbiko si nabi rani dunduko.
‘Ani Aenge Yo Du Mbori Ni’
3. (a) Gine nasa rani nikparakpara rani kusayo ti zegino? (b) Gini gopai duho nayugo gupai nga, zegino nirengo ‘tiibe gu ome nga ga gbegbere sino boro’?
3 Gu dawedawe pagume du dagbarani na Yekova nga ndupai sa dagba agu akuraha nasa rani ka ani dunga nipapara zegino ya. Gu mokedi nangia Yoane akepai ki ya: ‘Ani ini ya ani aenge yo du Mbori ni, ono zegino dunduko tigaha duni zogozogoho be gbegberẽ ko.’ (1 Yoane 5:19) Agu afugo Yoane apehe tipa zegino re nga kina ziazia rengo. Agu avura, akuondiko, kere mangimangiapai, rungosi aboro, biriko aboro, na gu wasiwasi kodaba moipai areme rogo zegino, nga gopai ya ome Satana du kugii agu apai re dunduko angianga ome Mbori ya. (Yoane 12:31; 2 AKorindo 4:4; AEfeso 6:12) Ho boro asa tini ni ni guni sa dagba aDezire Yekova, ni akpasakanga manga ngbatunga gu irairaapai re te watadu ka idaha fu kura aboro i mangihe a te, gipai re kini sa ni ka ni dunga nipapara zegino ya.—ARomo 12:2; 13:12-14; 1 AKorindo 6:9-11; 1 Yoane 3:10-12.
4. Rogo gini agene ani ayugo gupai nga, ani nga ga Yekova aboro?
4 Yoane agumba gupai tipa aKristano nga, wa du yo kia ti zegino, i ‘aenge yo du Mbori ni.’ Agu aboro dunduko nakpara gayo raka fu Yekova nasa tiyo ni gako aboro. Gu mokedi nangia Pauro ayaa: “Wa du ani ni ungarani, ani ni ungarani fu Gbia wa ani nikpi, ani nikpi fu kina Gbia; watadu ani ni ungarani tie na ni kurugborani ani ni ga Gbia rani.” (ARomo 14:8; Atambuahe 116:15) Mbiko wa du ani nga ga Yekova aboro, ani nairiso kina ko sa. (Gate 20:4-6) Sidu, ndikidi Kristano afunga tini tipa agu apai nga ga zegino te. Wa vura duhe nga, ni nafu irisa afu fu gu kpiaahe narukuba gu zogarago nga ga gu ringara ni araka rogoho nga gu kpiaahe du wa beere, ono ni airisonga ha wa Mbori te, singia rogo mangaapai yo watadu ku ngbaduniyo. Nirengo ni airisonga abangbasia angimbaro watadu gu vovo kpiaahe du areme te. Rengo ngaha, ni nairisa gu rengo nga ga kura aboro ka mangapai a wa i aidaha, ono ni nairiso kina Bakusiahe sa. (Matayo 4:10; Yugoti 19:10) Gipai re a nasa ni ka ni dunga nipapara zegino ya.
‘Gi Kindo Aenganga Rogo gi Zegino re Te’
5, 6. Wai pa ra ani fu ga Mbori Kindo akpara rani kusayo ti zegino?
5 AKristano nga apefuo Kristo Yesu na ni avuru ga Mbori Kindo, nga gupai a nasa yo i zanga du nipapara zegino. Ho i aape ngbanga Yesu ni barabangiri Pondio Pirato, ko ayaa: ‘Gi kindo aenganga rogo gi zegino re te; ka gi kindo aenge rogo gi zegino re; ka gimi amoyambu nasovura tie, i ka fu re fu aYuda; were, gi kindo aenganga herẽ te.’ (Yoane 18:36) Ga Yekova Kindo nga guhe ko ka mangasunge nani ka ziasi rimoko, ka dia gbarasarimo kusayo nani ti gako bakere pagbia, na si nika sa gupai ko akpinyemuhe aboro mangihe auru kpotosende a wa aguyo amangaha ngbangbaturũ yo. (Matayo 6:9, 10) Ti regbo ga Yesu sunge tungusapai nabaha dunduko, ko anatungusa wene pangbanga nga ga Kindo na ki ya wee apefuo ko atakapandehe ataka a da kuti digido gi zegino re. (Matayo 4:23; 24:14) Rogo gu garã nangia 1914, gu sangbanebi du rogo Yugoti 11:15 adu nidigisidigisihe nga gu nayaa: “Gu [kindo] nga ga kpotosende . . . [i ima ariaha ni] gu [kindo] nga ga gaani Gbia, na ga gako Kristo, ko azóga ha nye anye kindi.” Bambeda kumbatayo, gi Kindo nga ga ngbangbaturũ re nikangia gu bangisa zogarago nikaa zoga ngbatunga aboro. (Daniere 2:44) Ti kura regbo gizo, zavura agu abazogo nga ga kpotosende yo, i nika sa yo ngbaome i idi gupai nga, gu kindo re na pagbia behe nirengo.—Atambuahe 2:6-12.
6 Na agi apai re dunduko berã ndikidi aKristano yo, i nga avuru ga Mbori Kindo, na i nairisa ga Yesu arugute ‘ka nye kuti gbata kina ga Mbori kindo mbata na gako rurupai.’ (Matayo 6:33) Anga gupai re nasa yo ni gbegbere sino aboro kuti gu ringara i araka rogoho te, ono si nasa yo i kpara tiyo kusayo rogo toroyo ti agu apai nga ga zegino. Gu bangua sunge nga ga aKristano areme a wa si adu rogo bambata sa kama agarã, nga ka ‘manga dezirepai sirisiri tipa ga Mbori kindo.’ (Amokedi 28:23) Anga zogarago ho nga ga aboro duna rengo behe tipa ka kandasi gu sunge Mbori a’asiapaha re te.
7. Tipagine ndikidi aKristano arimisanga tiyo ti ni kurogo agu apai nga ga birĩ zogarago ya, na wai i nayuguhe?
7 Nimanga yo pai ringbisihe kuti gupai nga, i nga ga Yekova aboro na ni apefuo Yesu na kingia avuru ga Mbori Kindo, aDezire Yekova naarimisanga tiyo kurogo agu avura nga ga ringara watadu ga dungu aringara nga gu namangi rogo gu 20 na gu 21 kama agarã te. I angbenga na aboro rogo vura te, i arogodanga aũvura kubeyo ka sovura nani kuti aboro te, na anga poropoganda ho i amera kaa takapandehe tipa agu apai nga ga zegino te. Rogo gu gene nga ga iiriwo yugopa gayo idapase, i ki vura du rogo gu zegino hi be sogote, i nairisa agu arugute adunga ngburungburu ya nga gu awirinayo agumbaha fu agu abazogo nangia ga Nazi yo nga aguyo naazoga Germani rogo 1934, nga: “Ani na nyemu agu apai tirani nga ga birĩ zogarago te, ono ani aima fu tirani sa tipa kina ga Mbori kindo du tiibe Kristo ni Bakindo. Ani aõganga boro watadu ka imisa ni te. Wa ka i niyaa siapai kube rani, gupai ka ani nimangihe tigaani nga ka sungo rogo pazereda na aboro dunduko na kini mangi kina wene apai fuyo dunduko wa mamu nika nidu berani.
Amokedi Gbiati Moundo Amokedi Kuba Kristo
8, 9. Rogo gini gene du aDezire Yekova ti ni areme ni amokedi na ni amoundo amokedi, na sangbana gipai re nga gine nibipa gayo pagume na rikaaboro?
8 Pauro aringbisipa tiko gbiati pa akurako mbedimbedi aKristano ya i angia “amokedi . . . ku ba Kristo, wa ka Mbori azungadi he ku ngbarani.” (2 AKorindo 5:20; AEfeso 6:20) Natona rogo gu garã nangia 1914, daha ada i ya tipa agu aKristano du nimbedimbediyo nitoro wee i nga amokedi tipa ga Mbori Kindo, nga gu kindo du yo ni ‘awirihe.’ (Matayo 13:38; AFiripoio 3:20; Yugoti 5:9, 10) Kurii gure, Yekova ima dungura “bakere rimbasa aboro” nga “kura avusende” dagba rikaaboro i ki dani agu aKristano duna gu maabangirise nga ga raka auru kpotosende, na ye ko na yo tipa i songodi mbedimbedi aKristano rogo gayo asunge nga ga amokedi. (Yugoti 7:9; Yoane 10:16, NW ) I rengbe ka yamba gi “kura avusende” re ni “amoundo amokedi” nga ga ga Mbori Kindo.
9 Gu boro nga mokedi kurogo kura ringara gbiati gani abamangisunge arimisanga tiyo kurogo agu apai nga ga gu ringara i amangasunge rogoho re te. Teketeke a, aKristano nakpara tiyo kusayo ti agu apai nga ga birĩ zogarago nga ga agu aringara nga ga zegino. I angbenga na rikaaboro, tunga aboro watadu agu aboro duna mosoro beyo te, watadu ka soga yo a te. (Amokedi 10:34, 35) Kuba gure, i ‘namanga gupai ngba angba fu aboro dunduko.’ (AGaratio 6:10) Pa kpara aDezire Yekova tiyo kusayo ti agu apai nga ga birĩ zogarago nasa gupai nga, ka boro kanga gayo pangbanga na gu nduhe nga i nangbe na kina kura tunga aboro, rikaaboro watadu gu kura badona aboro ya.
I Naino Yo ti Nyemuse
10. Wai nyakipa nyemuse bangiri Kristano?
10 Ku pati agu apai gumba yo ho kuari re, gu pagume du dagba aKristano na akurayo aKristano ambunga yo i rimisi tiyo kurogo agu apai nga ga birĩ zogarago nga ga gi zegino re te. Yesu aya fu apefuo ko wee: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yoane 13:35) Gu banguapai nasa boro ni dani Kristano nga nyemuse. (1 Yoane 3:14) Gu pagume du dagba Kristano na akurani aKristano nidawedawehe gbe, na si wa kina gu pagume du dagba ni na Yekova gbiati Yesu. Anga Kristano nadingiso gani nyemuse kina koyo du agu awirinani ni du rogo gani dungurati sa te. Si nakoda ‘awirina dunduko rogo zegino’ a.—1 Petero 5:9.
11. Waigu du gu mangaapai nga ga aDezire Yekova nikparakparaha mbiko gu nyemuse du yo nani tipa akurayo?
11 Areme aDezire Yekova nayugo nyemu awirinayo nimanga yo sangba Yesaya 2:4 nga gu nayaa: “I atá gayo abasape ni marã sopabino, na gayo abaso ni marã kuya ngua; rikaaboro amófa nga basape kuti gu rikaaboro te, i awírika nga pa sovura berewe a te.” Mbiko wirika yo pai be Yekova, ndikidi aKristano naraka rogo pazereda na Mbori gbiati akurayo aboro. (Yesaya 54:13) Mbiko wa i akpinyemu Mbori na kini kpinyemu awirinayo, pa rogoda yo aũvura kuti akurayo aKristano watadu kuti kura aboro rogo kura aringara ni gupai ka i aberãnga kina kandara berẽberẽhe ya. Gu pazereda na gu kodatise du yo nani nga nyanyakipa papara gayo irisombori, nga guhe nayugo gupai nzunzu nga i na ga Mbori toro tiyo. (Atambuahe 133:1; Mika 2:12; Matayo 22:37-39; AKorosaio 3:14) I “[na]gbáta zereda, ki dusia ha,” mbiko i ini gupai nga, “bangiri Yekova du ti ruru aboro.”—Atambuahe 34:14, 15.
Gu Gene AKristano Abi Zegino Rogoho
12. Gini berã du Yekova nani koyo du agu aboro ni du rogo zegino nga gu berã aDezire Yekova awirika ko rogoho, na waigu i amangaha?
12 Yekova ima sarangbanga kuti gi zegino re, ono ko ata saranga ngbanga kuti agu aboro du rogoho wa du yo nibasasa te. Ko nika mangaha wo rogo Yesu yo ti Gako ringbisiringbisi regbo. (Atambuahe 67:3, 4; Matayo 25:31-46; 2 Petero 3:10) Wa du rago tie re, ko nayugo bakere nyemuse tipa ngbatunga aboro. Ko afu bangisa Wiriko a tipa wa ka aboro dunduko duna mamu ka gbia nyenye unga. (Yoane 3:16) Wa du ani ni aKristano, ani nawirika Mbori rogo gako nyemuse nifura ani fu kura aboro tipa ga Mbori ambakadapai ka batasa aboro, ka aboro avura kaa bisirapa rani dedede na gu pangbanga ani andu nani fuyo vurũ.
13. Wai si aida ani bi agu abazogo du rogo zegino?
13 Wai si aida ani bi agu abazogo du rogo zegino? Pauro akaragapai sa gu sanahe re ho ko akepai ni ki ya: “Aboro rá ara dũ fu abaira tandu, bambiko tandu gbua te kina be Mbori; agu abaira tandu du ho kina Mbori namoi yo [“rogo gayo ringbisiringbisi aba ti akuraha,” NW ].” (ARomo 13:1, 2) Aboro nasungo “rogo gayo ringbisiringbisi aba” nga ga pagbia ti akuraha, (singia si kusende watadu si kuari, ono si nidu kindi ti aregbo dunduko kina kusende ti gu pagbia nga ga Yekova) mbiko ko, nga gu boro Duna Tanduapai Dũ idihe fuyo i susungu rogo agu aba re. AKristano nara fu gu pagbia nga ga abazogo mbiko si nga gu kura gene ka irisa sangba Yekova ngbaha. Ono tie, ginipai ka mangi, ka si du nga agu apai irangbii aidaha natagbagatihe na gupai Mbori aidaha?
Ga Mbori Ndiko Gbiati ga Kaisara
14, 15. (a) Rogo gini gene Daniere arengbe ka ne gu tagbagapai nadu tipa giasangbaa? (b) Ginipai agu aEbere nadu biata adiberã ka mangaha ho tagbagapai akuru ni tipa giasangbaa nga gu banehe adunga ti ni ya?
14 Pa aDaniere gbiati abadiangbako biata nafu wene kpiapai tipa wai rengbe boro ka ra fu gu zogarago nga ga aboro na wai ka ra fu Mbori. Ho agu aparanga biama nangia aEbere abi tiyo ni nizizi aboro Babera yo, i airisi agu andiko nangia ga gu ringara re na nikina ipo, i asia yo tipa kparakpara yugopai. Fuo ino Daniere gupai nga, gu yugopai i aringbisipaha tipa yo nawira si ni gupai nika ndu niipo ka sovura na ga Yekova aNdiko, ko asaki gupai re na gu bamangisunge i amoi ko ko ngere kuriyo. Nisangbana gipai re, gu bangere-kurii-sunge re amangi kparakpara mbakadapai ni irisa tipa gu sangbakpotoyo nangia ga agu aEbere nadu biama. (Daniere 1:8-17) ADezire Yekova napefuo gu kpiapai nga ga Daniere ho i asakapa agu apai ni nibirĩ du tipa tiyo fu agu aboro namangasunge biroo yo tipa ka ne gu kpakarakpakaraapai si aida aida i nehe.
15 Wa si avura du wo, ti kura regbo gizo, gene adunga tipa boro ne gu tagbagapai nadu tipa rafu bakindo te. Bakindo Babera adua bakere meme kpiahe rogo gu kpasakpasarago rimoho angia Dura na ki zinahe fu gako kikiipa abamangisunge kodihe na agu abazogo naazoga papara gako ringara i dunguratiyo ka iriso gu uru i akpara gu kpiahe re tipa kaa irisoho. Ti gi regbo re, i aima maa agu abakurea Daniere nadu biata ni abazogo kurii apapara ringara Babera yo, sidu si aida i du yo a pati gu kpiahe re. Si adu nga, ti kura kparakpara regbo wa woro rago nika kiso be irisokpiahe, aboro dunduko si ka ida i tumusa ku barabangiri gu kpiahe re. Ono tie, agu aEbere re aima ino gupai nga, pa manga yo gipai re nika kuo ga Mbori ndiko. (Pa Fu Rugute ni Ue he 5:8-10) Sidu, ho aboro dunduko atumusa ni, i arundu arunda tigayo kuari. Nibasa yo sangba bakindo, i amoi gayo raka ngba kere kpio, ono gayo raka abati be kina iiriwo mangimangipai; ono i asia gupai nga ka maa gayo raka ngba kpio kuba basasangba Yekova.—Daniere 2:49–3:29.
16, 17. Ginipai amokedi amangihe ho i aza yo ni ya ka i tungusinga pai ya, na tipagine i amangi wo ti ni?
16 Rogo bambata sa kama agarã, i ayambu ga Yesu Kristo amokedi i kuru ku barabangiri ga aYuda abarumbatayo Yerusarema yo na i ki rugu yo i he tungusapai nirimo Yesu. Waigu si aida i mangipai sani? Yesu aima asia yo i sa aboro ni abawiriki rogo aringara dunduko, nga gu nakodi ringara Yuda a. Na ko aima ya fuyo a ko naida i duni gako adezire Yerusarema yo na rogo yangara zegino dunduko. (Matayo 28:19, 20; Amokedi 1:8) Amokedi aima ino gupai nga, gupai Yesu agumbaha re angia gupai Mbori akpinyemuhe beyo. (Yoane 5:30; 8:28) Si du i aya ti ni: ‘Si naida ani gisangba Mbori ni bazogo kuba giasangba aboro.’—Amokedi 4:19, 20; 5:29.
17 Anga agu amokedi re angia abasamungu te. (Asanza 24:21) Wa si avura du wo, ho agu abazogo nangia aboro aza yo ni ti manga yo gupai Mbori akpinyemuhe, gupai i arengbe ka gumbaha gbua nga, ‘Si naida ani gisangba Mbori, angianga sangba aboro ya.’ Yesu aya si naida ani fu “agu ahe nga ga Kaisara . . . fu Kaisara, agu ahe nga ga Mbori . . . fu Mbori.” (Marako 12:17) Ka ani basa ga Mbori arugute mbiko boro gumbaha fu rani ani mangihe wo, gure nga ani nafu guhe nga ga Mbori fu boro. Kuba gupai re, ani nafu agu ahe dunduko nga ga Kaisara fuko, ono ani nairisa sangba Yekova nga gu boro duna bakere pagbia beko kisusi. Ko nga Bakindo Zegino dunduko, nga Bakusiahe, nga ndikidi Mburu agu apagbia dunduko du ti ni.—Yugoti 4:11.
Ani Nika Ru Ngutete
18, 19. Gini wene sino dungu awirinarani nakakuti ni, na wai rengbe ani ka manga gayo kpiapai?
18 Wa du rago re, dungu agu azogarago nga ga aboro ima ino pai tipa gu kparatise ti agu apai nga ga birĩ zogarago du aDezire Yekova nani, sidu ani na tambuahe tipa gupai nga, i ima inoho. Ono tie, rogo kura aringara, aDezire agbia tiyo ti kere asogote. Vuru gu 20 kama agarã dunduko nasusi na daa kuti gi regbo re, bete awirinarani aima digo nisovura nyanyakii rogo gu gene nga ga toro ni “gu wene vura nga ga idapase.”—1 Timoteo 6:12.
19 Wai rengbe ani ka ru ngutete wa kina yo? Bambatapai nga, si naida ani moibangirani tipa gupai nga aboro asoga rani asoga. Si aidanga rago gbere tirani watadu si iriwo tirani ka ani gbia tirani nani te. Pauro aza Timoteo ki ya: “I arúngosi agu [aboro arungosi] dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Timoteo 3:12; 1 Petero 4:12) Tipagine tigu ka ani agbianga tirani ti ni na sogote rogo gu zegino ome Satana azogarago rogoho ya? (Yugoti 12:17) A wa ani ka nye kindi niruru rani, aboro kinaho ‘si ka iriwo tiyo i kini gbere ngbayo yo fu rani.’—1 Petero 4:4.
20. Gini arengo nanyakasa rani tingidi yo rani na paha?
20 Uepai nga, ani ima ida kuti gupai zanga kapa nga, Yekova gbiati gako amaraika nika undo rani aundo. Ani nagumba kina gupai Erisa agumbaha naraki bakuru kusayo, ko ayaa, “agu yo du na ani i ngee ti agu yo du na yo.” (2 Abakindo 6:16; Atambuahe 34:7) Si rengbe ka du nga, Yekova nambu asogo rani i nirungosi rani kindi tipa bete regbo na gu wene nduhe du bangiriko ani ainongoho tigaani ya. Wa vura duhe wo, ko nikaa fu gu ome fu rani kindi ani aidaha tipa ka hipai. (Yesaya 41:9, 10) I aima imo kura aboro, ono gure agundesinga rani te, mbiko Yesu ayaa: “Ka oni gúnde nga be agu yo naimo kpotoboro ya, ka i rengbe nga ka imo mbisimo te. Ono oni gúnde ti gu ko rengbe ka gbarasa mbisimo na kpotoboro a ku Geyena yo.” (Matayo 10:16-23, 28) Ani gbua nga “nungunungu aboro” kurogo gi zegino re. Ani namangasunge na gaani regbo herẽ tipa ka gbia “gu unga nga ndikidi unga,” nga nyenye unga rogo ga Mbori vovo zegino. (1 Petero 2:11; 1 Timoteo 6:19) Anga boro ho rengbe ka bengeta rani na gu mosoro re ka ani nye kindi niruru rani fu Mbori te.
21. Ginipai si aida ani bandaha dedede berã rani yo?
21 Sidu tie, ani tingidinga pa gu pagume duni mamu du dagbarani na Yekova Mbori. Ani dunga dedede na tambuahe tipa gu maku nga ga du ani ni apefuo Kristo na ni avuru ga Mbori Kindo. Ani kpinga nyemu awirinarani na ngbaduraniyo dunduko, na ani gbianga ngbarago dedede be gu nyemuse i ayugoho fu rani. Kurii apai dunduko, ani irisinga agu afugo nga ga bake Atambuahe nga guko nayaa: “Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!” (Atambuahe 27:14; Yesaya 54:17) Fuo gure, wa kina gu zagino aKristano nadu mbata fu rani, ani aru ngutete ki zanga kapa rogo gaani maabangirise, mbiko ani nigu ruru aKristano arimisanga tiyo kurogo agu apai nga ga birĩ zogarago nga ga gi zegino re ya.
Oni Rengbe ka Sakarogoyo
• Wai gaani pagume dagbarani na Yekova asa rani ani kpara tirani kusayo ti gi zegino re?
• Nidu ani ni avuru ga Mbori Kindo, wai ani akpara tirani kusayo ti agu apai nga ga birĩ zogarago rogo gi zegino re?
• Rogo gini agene nyemu awirinarani abanda rani nikparakpara rani kusayo ti agu apai nga ga birĩ zogarago nga ga gi zegino re?
[Gu kpiahe du ti kpewaraga 25]
Wai du pa ra ani fu ga Mbori Kindo na sangbanaha kurii gaani pagume na zegino?
[Gu kpiahe du ti kpewaraga 26]
Gu kumba du tunga ko nga Hutu gbiati gu ko du tunga ko nga Tutsi namangasunge rogo ba sa na ngbarago
[Gu kpiahe du ti kpewaraga 27]
Yuda gbiati Arabi ni agu awirina nga aKristano
[Gu kpiahe du ti kpewaraga 27]
Gu Kristano nga boro Serbia, boro Bosnia, na boro Croatia, nagbia ngbarago be gayo sungo
[Gu kpiahe du ti kpewaraga 28]
Gine nga gu rurupai si aida ani mangihe ho abazogo azinahe ni fu rani ani kuo ga Mbori ndiko?