Mangasunge na Apapara Kure Gbiati Gba Boro

Apapara kure. I nakusa apapara kure kina ti gu bangua angbatunga kure biama nga zamba kure, pusi kure, gu nawiiso aro, gbiati gu ime kura apapara kure asungo rogoho. Ni kpiapai, zamba kure na gu proteni rogoho nga gu nakodatihe na okisigini ka ta na kure rogo apapara kpoto boro. Agu angua i ambakadaha rogo gu proteni re, i nafuhe fu agu aboro nawoka be zingo kure watadu gu boro pai namangi ni kure ki ga tii kpotoni yo dunduko.

Gu kura ngbatungaha gu ime kura apapara kure asungo rogoho, du ime rogoho nga ribua rii kama naundo ka ta na nyanyakipa ahe tii kpoto boro yo, wa gu nga tikpo, sukara, gbiati kura rukutu nyanyakipa aũ kpoto boro. Si a na agu ahe rogoho nasa kure si kputa, agu ahe nasovura kuti akaza, na gu kura aproteni. Ka kura ngbatunga kaza zi boro, amunganga ima rengba ka gumba gupai nga i rũ ni na gu ngua i ambakadihe rogo papara gu kure re yo. Gu kura ahe kinaho a i ambakadaha ti vuro pusi kure nga gu rengbe yo ka mangasunge na ni ka husa kaza agbiro watadu kanisa.

Ya mo si naida aKristano idi gu gene husa akaza nakoda mangasunge na apapara kure? Ziazia Kekeapai afuranga tipa gipai re na agu afutufutuhe dunduko te, sidu, boro na boro si aida ni mangi gu diaberã nika mbu ni na gigiri sangbakpotoni yo bangiri Mbori. Gu kura aboro kinaho naká apapara kure dunduko, kini gumba gupai nga ga Mbori ndiko fu aYisaraere adu nga i kusi kure tiikpoto nya yo dunduko ki ‘ukaha kusande.’ (Pa Fu Rugute ni Ue he 12:​22-​24) Agu akurayo kinaho naká kina gu bangua akure du biama, ono naima rengba ka ida agu apaparaha re. I rengbe ka bihe nga fuo dia yo gu papara kure re ti ndikidi kure, si nandu andu ki da nga si arunga berewe kuba unga gu boro watadu nya i adi gu kure re tiru te.

Ho boro amanga diaberã ni nibipa apapara kure, si naida ni sana tini na agi asanahe duku re: Ho mi aya ni mi aidanga na apapara kure te, ya mo mi ini gupai nga gure nga mi naká agu angua dunduko i akusihe ti vuroho kodihe na agu angua rengbe ka sovura kuti akaza gbiati agu rengbe ka sa kure ti kputa ka kure boro aga? Ya mo mi rengbe ka sakapai fu munganga tipa ndu gupai mi aká kure ti ni watadu mi aida papara kure ti ni?

Agene gba kaza. Kura gene gba kaza kinaho i akusa kure tii kpoto boro yo ku rogo kura ba, ki moi gu kurahe koyo tipa si naamangasunge kubaha, kusa i kini karagaha kubaha yo. Kura gene kinaho berewe a i adia gu kure nakura bangiri aro yo ti gu regbo i agba boro ki girisihe na ki karagaha berewe kutii kpotoboro yo. Wa duhe nga amunganga namanga agi apai re ngba gayo agene ni bakiakia, si naida boro ini gu aino gani munganga amangaha.

Ka mo aida ka manga diaberã tipa agi apai re, mo sana tiro na agi asanahe re: ‘Ka si du nga i nika kusa kurere tii kpoto re yo, ka si adunga tii kpotore yo ya tipa bete regbo, ya mo sangbakpoto re yo aidaha fere tipa mi bi gu kure re kindi ni papara kpoto re, zanga bihe nga si ni guhe si aida mi ‘ukaha kusande’? (Pa Fu Rugute ni Ue he 12:23, 24) Ya mo sangbakpoto re yo afuda re ka si du nga i kusi kure re ku zegi, ki girisi he, na ki karagaha kutii kpotore yo? Ya mo mi inihe nga ka mi ká agu apai dunduko nakoda mangasunge na kure, gure a nga mi ima ká gupai nga i di kure re ka wisigoho singia kaza tii kpotore yo, gbiati gu masini nawirã abiriko kusayo rogo kure na kini girisihe mbata fu si karagatihe ku tiikpoto boroyo berewe gbiati gu kura amasini?’

Kina Kristano si aida ni mangi diaberã tipa agu apai i nika mangaha na kure ni ti regbo gba kaza. Kina gu bangisapai re du tipa dia kure tipa ka wisigoho tipa kaza gbiati agu agene husa akaza du awere nakoda kusa kure boro kusayo tii kpotoni yo ki girisihe na ki karagaha berewe kutii kpotoni yo.