Wai ka Mangasunge Wenengai na Marã

Aboro dunduko naida marã aida ka ngerafuo tiyo na gayo aborokporo na ni. (Asanza 30:8) Ziazia Kekeapai nape gupai nga “marã nabanda boro” abanda. (Batungusipai 7:12) Si rengbe arengba kadu ni kpakarapai fu arogotise i fura riipa mangasunge na marã, ono ka oni sanga marã si ye na kpakarapai ku rogo gaoni ramukporo ya. (AEfeso 4:32) Si naida arogotise du na kido dagbayo na kini diberã sa tipa mangasunge na marã.

1 ONI MBAKADIPAI TIPA MARÃ NI TATAMANA

GUPAI ZIAZIA KEKEAPAI AGUMBAHA: “Da dagba roni yo, ka ni kpi nyemu ka dua gbanga bambu, ni ka he sunga mbata, ka geda paha, ka ngia marã be ni rengbe ka nyasa ha?” (Ruka 14:28) Si ni nyanyakipa pai oni sungu sa ka pekapa agu apai oni aida ka mangaha na marã. (Amosa 3:3) Oni pekepa agu ahe du oni na zingoho na gu marã rengbe oni ka fuhe tipaha. (Asanza 31:16) Si aidanga boro ngbe he gbua na gu nduhe nga marã kina beni ka ngbehe te. Oni asadi ka he dia bape. Oni mangisunge na kina gu marã du beroni.​—Asanza 21:5; 22:7.

GUPAI RENGBE MO KA MANGAHA:

• Ka digida diwi da marã ki du kindi bero nga gu mo nika gbia gu kuriihe, oni sakipa mangasunge na ni sa

• Ka si du nga oni mangisunge na gu marã du beroni si ki nyasi oni ki di kuraha kuriihe, oni asadi ka si mangingo wo berewe ya

2 ONI GUMBA RENGO NA KI INIPA OMERONI

GUPAI ZIAZIA KEKEAPAI AGUMBAHA: “Wa du oni dunduko oni gúmba rengo fu akuaroni.” (AEfeso 4:25) Mo nigumba kina rengo fu diaro watadu kumbamo nibipa gu marã mo agbiaha na wai mo amangasunge na marã.

Si naida mo naasana gamo badiarogatise ti aregbo dũ ho mo amanga bakere diaberã ni nibipa marã. (Asanza 13:10) Fugo wenengai riipa marã rengbe ka undo roni oni banda zereda rogo gaoni ramukporo. Gu marã mo agbiaha ka mo naabingo ho nga gamo du ya, ono gaoni du.​—1 Timoteo 5:8.

GUPAI RENGBE MO KA MANGAHA:

• Oni gitironi riipa gu marã rengbe guni ka mangasunge na ni zanga ní sana guni asana

• Ka mo sungungo daho pai nika kura ni mbata mo kini ka fura tipa marã ya