“Oni Mángi He Dunduko Sa Taasa Rimo Mbori”

WANGIA ani ga Yekova kparakpara amoyambu, si naida ani yugu ga Mbori taarimo rogo agu apai dũ ani amangaha na kini gumbaha. Gu mokedi nangia Pauro apepa bangua rengo rengbe ka undo nga: “Watadu ri he tie, na mbira he, na gu pai oni ka manga ha dunduko, oni mángi he dunduko sa taasa rimo Mbori.” (1 Kor. 10:31) Gipai re nakoda ka ani kuti ga Yekova arugute du tipa ruru mangapai, nga gu nayugopa rengberengbe asinoko. (Koro. 3:10) Si naida ani du ni awiriki Mbori wa du ani ni gako ziazia aboro.​—Ef. 5:1, 2.

² Gu mokedi nangia Petero atingidi aKristano na gupai nga: “Oni dú wa agude giasangba, ka oni mbákadi nga tironi sa gu kuru nyemuahe nadu ti roni mbata ya, ho oni aruga nga tironi ni na pai ya. Ono wa du gu ko nayambu roni du ni ziazia ko oni dú a wo ni ziazia roni rogo gaoni apai dũ, mbiko Ziazia Kekeapai naya, ‘Oni dú ziazia bambiko mi du ziazia.’” (1 Pet. 1:14-16) A wa si adu rogo gu Yisaraere naadu mbata, agu aKristano dunduko du rogo dungurati, si naida i bandapa du yo ni ziazia yo. Gere nayugo gupai nga si naida i du zanga biriko, ni gigiri yo ti gu birikobiriko mangapai nga ga ingapai du rogo gi zegino re. Manga yo wa gure nika kparayo tipa ga Mbori ziazia sunge.​—Gate 20:5.

³ Ka boro mangipai kuti ga Yekova andiko gbiati bangua arengo, si nika sa ni ni du ni ziazia ni wa Ziazia Kekeapai agumbaha. (2 Tim. 3:16) Vurube wisigo Baibiri, ani nawirikapai yo tipa Yekova na gako agene, na si nambedisa rani na ko. Gupai ani awisigihe angarasi rani nga ani gbata ga Mbori Kindo mbata na kini peresi pa manga gupai Yekova akpinyemuhe ni nyanyakipa pai rogo gaani raka yo. (Mt. 6:33; Rom. 12:2) Gere aaida na gupai nga ani vo vovo borose.​—Ef. 4:22-24.

DU GIGIRI ROGO TORO YO NA ROGO BOROSE YO

⁴ Si taata tipa ka kakuti ga Yekova arugute du tipa ruru mangapai ti aregbo dunduko te. Vurarani nga Satana Bakitingbanga nagbata gene ka aria rani kusayo ti rengo. Gu maapai kurii nga ga gi gbegberẽ zegino re na gu nyemu manga ingapai du tirani nasaha ni mbumbuhe furani ti kura aregbo. Si naida ani mangi ome amanga tipa ka raka ringbisihe na gaani kparatise. Ziazia Kekeapai nape gupai nga si aidanga ngbarani zere ka bi gupai nga asogote watadu asada nagbia rani te. Si nika ida ani rungo arungo tipa manga rurupai. (2 Tim. 3:12) Ani rengbe kadu na ngbarago ho ani asusa ni rogo aˈasada yo, kini bihe nga ngbatunga agu aˈasada re nayugo gupai nga ani namanga gupai Mbori akpinyemuhe.​—1 Pet. 3:14-16; 4:12, 14-16.

⁵ Wa Yesu avura du ni rengberengbe ko, ko awiriki giasangba ti arungosi. Ko aambunga tiko kandara tooni fu ga Satana aasada watadu tipa agu ahe ko aakpinyemuhe te. (Mt. 4:1-11; Yo. 6:15) Regbo aadunga ho kandara sa Yesu aberãpa kua ga Mbori andiko ti ni te. Wa vura duhe nga zegino asogoko tipa gako ruru mangapai, ko akakuti ga Yekova arugute du tipa ruru mangaapai. Ngbutuko mbata fu Yesu kpi, ko aza gako abawiriki nga zegino nika sogoyo asoga. Naatona ti gu regbo re ka ndu kumbatayo, apefuo Yesu aima gbiatiyo na agberãngbi, ono i na wingbaduse mbiko i ini gupai nga Wiri Mbori aima diabe zegino.​—Yo. 15:19; 16:33; 17:16.

⁶ Tipa ka zanga du ni papara gi zegino re, si naida ani songodipa ga Yekova arugute du tipa ruru mangapai kina wai Bairarani amangihe. Kupati zanga rimiso ani tirani ku rogo agu atagbagapai nga ga poritiki na gu ome aboro amangaha tipa ka ariapai, si naida ani sovura kuti wasiwasi mangaapai. Si naida ani mangisunge na gu rugute du rogo Yakoba 1:21: “Oni mói agu ahe dunduko ku sa yo nabirikosi boro, na gu nga gbegberẽ he a. Oni ki di gu pai ku gume zezeredi nga gu Mbori narũ ngbaduroni yo, rengbe na batasa mbisimoroni.” Vurube wisigopai na adunguratise, agu afugo nga ga rengo “narũ” tihe ku ngbaduraniyo na ku rirani yo na ka ani kpingo nyemu agu ahe gi zegino re afuhe ya. Gu bawiriki nangia Yakoba aya: ‘Oni aruga nga tironi na ni ya ngbanya na zegino si nga sogote fu Mbori, te? Si du gu ni ka kpi nyemu du ni badia zegino ni sa tini ni vura Mbori.’ (Yak. 4:4) Mbiko gipai re, Baibiri na gu nyanyaki arugute rogoho nga, ani kakuti gu ga Yekova arugute du tipa ruru mangaapai na ki kpara tirani kusayo ti gi zegino re.

⁷ Fugo Mbori naza rani ti manga agu apai nafu pazee gbiati wasiwasi mangaapai. Si naya furani wẽ: “Ono bari, na pa meteka dũ, na kpihe, ka oni yámbu nga rimoho dagba roni wa sa ya, ni sino ga Mbori aboro.” (Ef. 5:3) Sidu, si naida ani banda berãrani ti agu apai du ni bibirikoho, na si aidanga ani mbu ngbatunga agu apai re si rimi ku rogo afugorani te. Mangaha wo nayugo gupai nga ani ima dakuti gupai nga ani naida ka kakuti ga Yekova arugute du tipa ruru mangaapai.

DU GIGIRI TI KPOTOSE

⁸ Kupati du gigiri rogo toro yo na rogo mangaapai yo, aKristano ima inoho nga si naida i du ni gigiri yo a ti boroyo. Rogo gu ringara aYisaraere nadumbata, ziazia Mbori aaida gayo bataya du ni gigirihe. Ani a si naida ani du ni gigiri rani tipa gupai nga ka Yekova “bi nga birikobiriko pai dagba” rani ya.​—Pa Rug. 23:14.

⁹ Padu ziazia na du gigiri ti borose nandu kina sa rogo Baibiri yo. Ni kpiapai, Pauro aya: “Amangure, ani gírisi tirani be gu meteka dunduko nga ga borose na toro, nimbakadi ziaziapai nzunzu rogo gunde ti Mbori.” (2 Kor. 7:1) Sidu tie, agu aKristano nga akumba na adee, si naida i mangi ome tipa kpotoyo du ni gigirihe ni mbida yo ime dedede na kini zundu gayo aroko. Wa vura duhe nga apai rogo aringara ni bakiakia, ani ima rengba ka gbia sabuni gbiati ime kpaima tipa ka giriso kpotorani na kini zundu awirani a i du gigiri.

¹⁰ Mbiko gu sunge dezirepai ani amangaha, dungu aboro niima inopai tipa rani rogo gaani adagbarago. Ka ani mbu akpurani ni gigirihe dimoyo na zegiyo, si nisaha ni kangia dezirepai fu gaani amurakporo. Gere nga gupai si aida aborokporo dunduko mangihe. Si naida awirina nga akumba du ni agu aboro naida pati kpuyo du ni gigirihe, ni ino yo gupai nga ho du kporo ni ni gigirihe kura aboro nafura wenengai baraha. Si naida i ngbembatayo rogo gipai re kina wai i angbembatayo rogo agu apai nga ga toro, na gere nika yugo gupai nga i nangera wenengai fuo gayo aborokporo. (1 Tim. 3:4, 12) Awirina nga adee a na kina tindiro beyo tipa ka ngerafuo ahe, gbe vuru bambu yo. (Tito 2:4, 5) Agu agude i naraba yo wenengai na bandatiyo ka du gigiri kodihe na dimo kpuyo yo a. Rogo gi gene re, aborokporo namanga apai kina sa tipa gu girisorago nika rẽ rogo vovo zegino tiibe ga Mbori Kindo.

¹¹ Dungu ga Yekova aboro areme namangasunge na aũnduge si ni tindi yo tipa adunguratise. Rogo gu kura arago, tarambiri na nyanyakipaha tipa tungusapai. Si naida tarambiri du ni gigirihe na ni wene mbakadimbakadihe. Si naida akpurani na gaani aũnduge yuguhe nga ani nga ga Yekova ziazia aboro. Kina gu bangisapai re si aida si du tipa gaani amangu na Baibiri.

¹² Si naida gaani mbakadatise na vo roko ndu sa na gu bangua arengo nga ga Mbori. Ani arengbanga ka ndu ku barabangiri kikiipa boro ka si du nga ani vo tirani sekpesekpe te. Si naida ani bipa Yekova susi gure ho du ani ni gene tungusapai yo watadu rii tambara yo! Gu gene ani ambakadatirani ngbaha na kini vo tirani ima rengba ka sa kura aboro i du na ruru bipai tipa iriso Yekova. Si adu nga ni wenehe ka ani vo roko gbua bau zanga berãpa kura aboro te. (Mika 6:8; 1 Kor. 10:31-33; 1 Tim. 2:9, 10) Sidu, ho ani ambakadatirani ni tipa ka ndu ka tungusapai watadu tipa adunguratise, bakere dunguratise nga ga uru sa gbiati ga aˈuru biata, si naida ani moi gupai ku berãraniyo Ziazia Kekeapai apehe tipa du gigiri ti borose na bibi rani kidu ni iriˈirihe. Ani nidu ti aregbo dũ na nyemu ka fu irisa fu Yekova na ka taasarimoko.

¹³ Kina gu bangisapai re si aida ani mangihe ho ani andu ni ka bi rii-basunge nga ga aDezire Yekova watadu be-basunge. Mo tingidi gupai nga, gu rimo nga Betere, rogoyo nga “ga Mbori Bambu.” Sidu tie, si naida ani vo tirani na kini mangiapai kina wai ani naamanga ha ho ani andu ni tipa adunguratise ku Bambu Kindo yo.

¹⁴ Zavura ho sungu ani ni ka gbia ngbarago watadu ka ngi ambaro, si naida ani moiberãrani sa gaani mbakadatise na votise. Si naida ani sana tirani nga, ‘Ya mo zee azio re tipa ka tungusapai angianga kuti asino mangaha ya mbiko wai vo mi tire?’

AGU AMBARO NA AŨNGBARAGO AGBERÃNGA YA

¹⁵ Ongoda gbiati ngimbaro ni wenehe tipa kpoto boro du wenengai. Ti kura regbo sa, Yesu ayambu gako abawiriki i ndu ku rogo gu ba naadunga na aboro ya tipa “ka ongoda toni.” (Mk. 6:31) Ongoda watadu wene aũngbarago gbiati mbaro ima rengba ka fu ngbarago furani. Si nazambuasi kpotorani na ki sarani ani ndu kumbatayo na gaani sunge.

¹⁶ Wa duhe nga dungu aũngbarago na ambaro du ho areme, si naida aKristano siaha asia ni manga yo sunge na gu tatamana nga ga Mbori rogo agu apai i amangaha. Wa vura duhe nga ani naida aida na zambuasitise, anga si nga nyanyakipa pai rogo raka yo te. Baibiri naza rani nga “rogo kusa rago,” aboro nika ngia “akpí nyemu sangba borose susi nyemu Mbori.” (2 Tim. 3:1, 4) Dungu agu aũzambuasitise duho areme ti ni si arẽnga fu agu aboro nakpinyemu ka kakuti gu ga Yekova arugute du tipa ruru mangaapai te.

¹⁷ Agu aKristano naadu mbata aima ka gu mangaapai nangia ga agu aboro naadu ti regbo yo nga aguyo naakpi kina nyemu ngbarago kisusi. Ti gu regbo ga aRomo abangimbaro anaangimbaro, aboro anaaye ka gbia ngbarago ti gu igirã nga ga kura aboro. Zuu, kusuko kure, na wasiwasi kodaba nangia gu iˈiriwoapai aboro anaaye ka bihe, ono agu aKristano nadumbata aima ne agi apai re. Areme, badungu agu aũngbarago du rogo zegino namanga kina gu bangisapai re, na si nazingisa gbegberẽ nyemuapai kpoto aboro yo. Si naida ani ‘ningére angera’ nibi wai ani ata, kini bandatirani ti gbegberẽ aũngbarago. (Ef. 5:15, 16; Tam. 11:5) Ka si vura du vurũ nga gu zambuasitise re agberãnga te, ono wai apai amanga rogo gu ba re ima rengba kadu ni gbegberẽhe.​—1 Pet. 4:1-4.

¹⁸ Aũngbarago na zambuasitise kinaho rengbe Kristano ka gbia ngbarago behe. Dungu aboro niima gbia undo ti pekafuo gu rugute nga ga Ziazia Kekeapai gbiati gu wene arugute du rogo gaani awaraga yo.

¹⁹ Ti kura aregbo, kura aborokporo nga aKristano nandu ku rogo gu kura kporo tipa gu kodatise nga ga aKristano. Watadu i rengbe ka yamba awirina i ye tipa rogatise watadu gu kura mbakadapai du wakina ha. (Yo. 2:2) Agu aboro yambu aboro ku kpuyo si naida i inihe nga agu apai dunduko nika manga yo i du si abiyo. Si ziazia tie nga, ho dungu aboro adunguratiyo ni, si naida na rubangirise. Wai apai naamanga rogo ngbatunga aba wa gure ima rengba ka sa gu kura awirina i mangi agu apai angbanga fu aKristano ya, ka ririahe susi ome watadu ka mbirahe ni kerehe na zavura gu kura kere gbegberẽ mangaapai. Gu Kristano du na rugatinapai nabi gu tatamana du tipa yamba aboro ni wiri beteyo na tipa bete regbo. Kangia wiri mbira buda nika du kina yo, si naida i fuhe fu aboro rengbe arengba. (Frp. 4:5) Ka aboro mangi ome tipa gupai nga gu sungo nga ga aKristano du ni guhe nafu ngbarago na kini zambuasi aboro rogo toro yo, riahe na mbirahe du nga ni nyanyakipa pai te.

²⁰ Ngbaha angba boro ni di aboro kugume. (1 Pet. 4:9) Ho ani ayamba awirina ni nga aKristano tipa riahe, zambuasitise, ngimbaro, na kodatise ku kpuraniyo, si naida ani berẽpa aguyo a nga airarungo. (Rk. 14:12-14) Kangia ani nga gino rogo ngbatunga ba wa gure, si naida gaani mangapai du ringbisihe na gu rugute du rogo Marako 12:31. Dedede, si ni wenepai ka yugo tambuahe tipa gu weneringise kura aboro nayuguhe foro.

²¹ AKristano nangi mbiko gu dungu agamahe nga ga Mbori na i ima inoho nga i rengba ka “ri riahe ki mbiri he, ki du na ngbarago ti ni rogo [gayo] sunge dunduko.” (Batu. 3:12, 13) Ka ani amangi “[apai] dunduko sa taasa rimo Mbori,” airakporo na agu aboro ni ye ku kpuro rengbe ka ngera kusayo ki du na ngbarago nga si ningia wene zambuasitise rogo toro yo.

AGU APAI NINAAMANGA SUKURU YO

²² Awiri aDezire Yekova naagbia undo agbia ti wirikapai rengbearengba. Ho i andu ni ku sukuru yo, gayo nyemupai nga ka ino wai ka gedapai na kini kepai wenengai. Gu kura apai i ayugoho sukuru yo ima rengba ka du na nyanyakipaha fu paranga aboro wa i aberãpa da ti gayo asásá nga ga toro. Vuru agu agarã nga ga wirikapai, si nika ida i mangi ome nyanyaki tipa ka ‘tingidapa Bamangiyo’ ni peresa yo agu apai nga ga toro mbatayo.​—Batu. 12:1.

²³ Kangia paranga Kristano nga mo du sukuru yo, mo du na rubangirise ki zanga koda tiro bau na gu paranga aboro nga ga ngbii yo. (2 Tim. 3:1, 2) Bambiko Yekova ima fu gu wene bandahe mo aidaha, dungu apai kinaho rengbe mo ka mangaha tipa ka zanga mbu gi zegino re si du na maapai kuriro. (Tam. 23:4; 91:1, 2) Sidu, tipa ka banda tiro, mo di agu agamahe nga ga Yekova kugume.​—Tam. 23:5.

²⁴ Tipa gu aparanga aboro nga aDezire Yekova kparatiyo ti zegino baraho du yo ni sukuru yo, i afunga tiyo tipa kaa ngi agu ambaro namanga tingbafuo wirikapai te. Gipai re ima rengba kadu ni mbumbuhe fu abayugupai na akurayo sukuru yo i rugutiyo na ni. Ono tie, fu ngbarago fu Mbori nga gupai nyakipaha. Gure nga oni nika mangasunge na gu sangbakpotoroniyo Baibiri narabaha tipa ka zanga rimiso tironi ku rogo agu abaangirã nga ga zegino watadu agu apai nataasarimo ringara. (Gara. 5:19, 26) Ka paranga aboro adegatuyo kuti agu arugute nga ga Baibiri avunguyo afuhe na kini di regbo tipa kaa kodatiyo na awirina rogo dungurati, i rengbe arengba ka kakuti ga Yekova arugute du tipa ruru mangaapai.

SUNGE GBIATI AKURASE

²⁵ Baibiri nape gupai nga abariikporo na gu tindiro beyo nga ga ngerafuo gayo aborokporo. (1 Tim. 5:8) Wa vura duhe wo, nidu yo ni ga Mbori abamangisunge, i ima rugatiyo na gupai nga manga agu apai nga ga Kindo nyakipaha kisusi pa sunge. (Mt. 6:33; Rom. 11:13) Pa ka yo kuti sinombori na kini rengbe kina be agu ahe du beyo nika sa gupai nga i ne gu bakabangirise gbiati gu gbina berãpa aũzegino aye na ni rogo raka yo.​—1 Tim. 6:6-10.

²⁶ Agu aKristano dũ kpara gayo raka fu Mbori nga aguyo namangasunge, si aidanga bangiriyo go ti gu bangua arengo nga ga Baibiri te. Pa gbia agu ahe ani azingo tipaha nayugo gupai nga ka zanga rimisotise ku rogo gu mangaapai nakuo ga Mbori andiko watadu ga ringara. (Rom. 13:1, 2; 1 Kor. 6:9, 10) Si naida ani ne gu kerepai du ti gbegberẽ kpamiatise. Wangia ani ga Kristo abanzengere, si naida ani ne gu sunge marã nakuo ga Mbori arugute, gu narimiso rani ku rogo agu atagbagapai nga ga zegino, watadu nagbarasapa rani rogo toro yo. (Yes. 2:4; 2 Tim. 2:4) Na wiri kodatise ho du dagbarani na gu vura Mbori nga “Babera [nga] gu bakere bakporo” te.​—Yugo. 18:2, 4; 2 Kor. 6:14-17.

²⁷ Pa manga ani pai kuti ga Mbori ruru arugute nika banda rani ti zanga bi gaani akodatise nga ga aKristano ni gu ba ani apeka pa bagaahe watadu gu kuraapai nangba tirani rogoho. Ndu koda ani tirani na akuarani ba adunguratise yo, ba bakere dunguratise nga ga uru sa na aˈuru biata nga ka irisa Yekova. Ani narihe rii gu mbisa nga ga toro na kini gbia ngbarago ti ‘wasa dagbarani’ yo. (Rom. 1:11, 12; Eb. 10:24, 25) Si naida gu ngbatunga kodatise re du tipa kina agu apai nga ga toro sa.

BANDA GU KODATISE NGA GA AKRISTANO

²⁸ Mangapai kuti ga Yekova ruru arugute naida na gupai a nga ani “ka kuti gu du sa nga ga Toro zikazika, ni gu ũkpamiatise nga zereda.” (Ef. 4:1-3) Kuba gupai nga boro na boro berẽ kina gupai ngba tiní, si naida ni berẽpa gupai ngba ti kurani. (1 Tesa. 5:15) Kango ti ni te nga gi ngbatunga toro re du du rogo gamo dungurati. Ka ani vurangia pisi-boro watadu bi-boro, irakumuko watadu irarungo, gu boro wirikipai watadu zanga wirikapai, ani dunduko namangapai kuti agu arugute du ni ruruhe. Zavura agu aboro du zegiyo, i ima bi gu wene sino du ti ga Yekova aboro re.​—1 Pet. 2:12.

²⁹ Gu mokedi nangia Pauro anyakasipa du na kodatise nga: “Borose sa, Toro a sa, a wa du oni sa i ayambu roni a kuti kina gu maabangirise sa nga ga yamba roni. Gbia sa, idapase sa, bapatiza sa, Mbori sa nga Ba aboro dunduko, ko du ri yo dunduko, nimangi pai rogo yo yo dunduko, ki du rogo yo yo dunduko.” (Ef. 4:4-6) Gipai re naida na kodatise tipa ka rugatise na gu bangua ayugopai nga ga Baibiri kodihe na dudunguro ayugopai tipa pa ga Yekova bakere pagbia. Nirengo, Yekova ima fu ziazia fugo fu gako aboro nga ga rengo, nga gu naundo yo i mangisunge kina kubani sa.​—Zef. 3:9.

³⁰ Kodatise gbiati zereda du rogo gu dungurati nga ga aKristano nafu ngbarago fu agu aboro dunduko nairiso Yekova. Ani nabi ga Yekova akidohe abi si nidigisitihe nga: “Mi amáa yo kina sa wa akandoro rogo ndugu ra.” (Mika 2:12) Si naida ani banda gu zereda re ni ka ani kuti ga Yekova arugute du tipa ruru mangaapai.

³¹ Ngbarago du fu agu aboro i nadi yo ku rogo ga Yekova gigiri dungurati! Du na rimo Yekova rirani paha nanyaki kisusi agu apai dunduko ani ambupaha. Wa ani kaa banda gaani pagume na Yekova, si naida ani mangi ome nyanyaki tipa ka raka kuti gako arugute du tipa ruru mangaapai na kini undo kura aboro i mangi kinawo a.​—2 Kor. 3:18.