Gu Wene Ambaro Nafu Wasa
“Watadu ri he . . . na mbira he, na gu pai oni ka manga ha dunduko, oni mángi he dunduko sa taasa rimo Mbori.”—1 AKORINDO 10:31.
1, 2. Tipagine rengbe ani kaa bi gu mangapai ti ni nafu ngbarago ‘niga Mbori gamahe,’ wa vura duhe wo, gini zahe duho Ziazia Kekeapai afuhe ziazia tipaha?
SI NIDU nisino aboro i rimisi tiyo kurogo agu apai rengbe ka ye na ngbarago fuyo. Si wo, mbiko gaani Mbori nga Yekova, nga gu Mbori duna ngbarago, ko naida ani duna ngbarago rogo raka yo a. Si du mangi ko dungu ambakadaapai ti ni tipa ani rengbe ka gbia ngbarago rogo raka. (1 Timoteo 1:11; 6:17) Gu tatamanatatamana Bakindo nangia Soromo akepai ki yaa: ‘Mi ini ya he ho ngba susi ngi mbaro te, ga Mbori gamahe fu aboro nibasasa nga ririahe kini mbirihe, kidu na ngbarago tiyo rogo gayo asunge dunduko.’—Batungusipai 3:12, 13.
2 Ngbatunga gi ngbarago re rengbe kadu niwenehe ka boro ru ka berãkuriipa gu wene asunge mangi ni he, gbe, kani kodi gani aborokporo watadu abakureani kurogoho, si nzunzu rengbe ka fu wasa a funi. Ngbatunga gi ngbarago re rengbe arengbe nirengo kadu ‘niga Mbori gamahe.’ Rengo ngaha nga, wa Bakusiahe navura fu ahe fu rani kpaima, si aidanga ani rimisi tirani kurogo agi apai re kaa mangaha yososo te. Mbiko Ziazia Kekeapai nasoga kpibuda, angbu, na wasiro, kini zahe ya agu aboro namanga tunga agipai re ‘i adianga kumbo ga Mbori ngbi te.’—1 AKorindo 6:9, 10; Asanza 23:20, 21; 1 Petero 4:1-4.
3. Gine nika aundo rani tipa ani naangera angera kindi rogo toroyo na kini sungudi ga Yekova bakere uru kumbatayo?
3 Rogo gi yangara arame du apai rogoho nikpakarakpakaraha susi gu nadumbata re, aKristano nagbiatiyo nakpakaraapai tipa ka raka na rubangirise rogo gi zegino hi be irairaapai re, ki zanga merafuo gu mangapai du rogoho. (Yoane 17:15, 16) A wa i aima fura tipaha kumbatayo, gi ngbatunga arikaaboro du areme re ‘nakpí kina nyemu sangba boroyo susi nyemu Mbori,’ ki dakuti gupai nga “i aina nga ha ya” gopai gu duho nga ga “bakere gberãngbi” napido yo mbatayo te. (2 Timoteo 3:4, 5; Matayo 24:21, 37-39) Yesu afu zahe fu apefuoko ki yaa: “Ono oni bánda tironi, oni ka hisa kpotoroni yo na bakere riahe, na kpibuda, na berã pa gi unga re, gu rago ki da re ni ba sa wa kina gbina naza.” (Ruka 21:34, 35) Wa du ani niga Mbori amoyambu, si naida ani diberã ka iriso gi ga Yesu arugute re. Zanga duwa agu azangasinombori du pati rani, ani namanga nyanyaki asadatise kaa ngera angera kindi rogo toroyo na kini moi paye ga Yekova bakere uru ku berã rani yo.—Zefania 3:8; Ruka 21:36.
4. (a) Tipagine duhe ti ni nikpakarapai tipa ka gbia agu ambaro du niwenehe? (b) Gini arugute du rogo AEfeso 5:15, 16, si aida ani mangihe?
4 Pa ne ani gu iraira mangaapai du rogo gi zegino re nitaataha te, mbiko Bakitingbanga namangaha niwenehe gbe na si kpaima. Si nikpakarapai gbe ho ani agbata ambaro ni watadu agu ahe rengbe ka zambuasi rani. Mbiko dungu agu ahe zegino afuhe, i ambakadihe tipa si ngba ti gaani “nyemuahe nga ga borose.” (1 Petero 2:11) Gbegbere ambaro rengbe rogo agu aba dũ dungu aboro adunguratiyo kurogoho, anga kina yo sa te, si rengbe arengba a ka rimo kurogo gaani akporo rogo gu gene nga ga awaraga pangbangaa, rogo terevizioni, rogo Internet, na rogo avidio. Sidu tie, nitatamana, Fugo Mbori nafu arugute fu aKristano kini yaa: “Si du ka oni angéra angera wenengaĩ ti ni wa oni nata, wa zanga tatamana te, wa kina iratatamana. Oni ki banda gaoni saa tipa manga apai, bambiko rago gbegberẽ.” (AEfeso 5:15, 16) Kina gu ka ani pekefuo agi arugute re wenengai, si ka ani rengbe ti ni ka rugatirani na gupai nga, gbegbere ambaro azomianga rani te, si adianga gaani aregbo dunduko te, watadu ka gbarasapa gaani ngbanyaa dagbarani na Yekova, digidaha kingia kpio rani te!—Yakoba 1:14, 15.
5. Gine ani agbia gaani bakere wasa behe?
5 Wa duhe nga aKristano na dungu asunge beyo i amangaha, si daada fuyo i duna nyemu ka ngi ambaro ti kura aregbo. Nirengo, Batungusipai 3:4 nayawee ‘rago kinaho tipa mongo’ na ‘rago tipa dogbere.’ Sidu tie, Ziazia Kekeapai afuranga tipa ngimbaro nigbarasa regbo te. Ono si naida ngimbaro du niguhe nafu wasa fu rani angianga ka maa rani ngbapai rogo toroyo watadu ka gbarasapa gaani mangaapai nga ga toro ya. Agu aKristano ima nyaka rogo toroyo, i inihe ti agu apangbangaa namangi kina boro yo ya, boro nagbia bakere ngbarago gbe ho ni agamahe ni fu kura aboro. I namaa gupai Yekova akpinyemuhe nibambatapai rogo gayo raka yo na ‘i kini gbia ndikidi ngbarago tipa mbisimoyo’ nidia yo ga Kristo aʹakpura gonga.—Matayo 11:29, 30; Amokedi 20:35.
Sia agu Ambaro Du Niwenehe
6, 7. Gine rengbe ka undo rani tipa ani diberã tipa agu ambaro du niwenehe na gu du nigbegberehe?
6 Wai rengbe ani ka ino gupai nga, gu ngbatunga mbaro ani afura tipaha re, si niwenehe tipa aKristano naangihe? Avunguagude si aida i yugupai fu awiriyo tipaha, na si naida abaakumba nga ga dungurati yo naafu undo ho si aidaha ni. Nirengo, si aidanga gupai nga kina kura aboro naya fu rani wee, ngbatunga gu kitabu re, gu sinima re, gu mbaro re, gu gbere re, watadu gu bia re ngbanga ha fu aKristano te te. Pauro ayawee “sosono aboro . . . naraba gayo aome nga ga makiapai nimanga yo sunge nani tipa ka kpara rurupai kusayo ti irairapai.” (AEbere 5:14, NW; 1 AKorindo 14:20) Ziazia Kekeapai na bangua arugute rogoho si aida ani ndu kuti ni. Gu sangbakpotoraniyo Fugo Mbori narabaha, si rengbe arengba ka undo rani, ka ani adegaturani kuti gupai si arunga rani nani.—1 Timoteo 1:19.
7 Yesu ayawee “i aina ngua ti zuzuhe.” (Matayo 12:33) Kangia ngimbaro nakusa gbegbere zuzuhe wa zuũ, wasiwasi kodaba watadu sangbaatoro, si naida ani mbuhe. Na si arengbanga kadu niwenehe te ka si amaa gaani unga ngbapai watadu ka si rengbe ka ye na kaza kuti rani, ka singia si rengbe ka gbarasapa ahe berani watadu ka ba gberarago ti kura aboro, berewe kangia si rengbe naasa kura boro ni koto. Gu mokedi nangia Pauro aza rani ki yawee ka ani imisi gu sangbakpotoyo nga ga wirinarani, gure nga ani namanga ingapai. Ko akepai berewe ki yaa: “Were, oni ki ta inga kuti awirina, ki nigbarasi sangba kpotoyo yo ho si adu ni ni rurungbura ha, niingi kuti Kristo. Wa du he were tie, ka riahe kotosi wirinami, mi ari nga pasio fuo gere wa sa te, mi ka kotosa wirinami.”—1 AKorindo 8:12, 13.
8. Gini kerepai duho ti mangasunge na agu ambaro nga ga avidio?
8 Bambu bagaahe ima hi be agu ambaro nga ga vidio. Betehe rengbe kadu wa agu ambaro adunga nigbegberehe ya na kidu tipa fu wasa, ono dedede gbe, dungu agi ambaro nga ga vidio re nayugo kpia agu apai Ziazia Kekeapai asogaha. Nirengo, anga si gbua nga kina kungba gbia ngbarago ho mbaro aida gupai ni nga angihe gbarãsi aboro na ki imi yo watadu ka mangapai ngba gbegbere wasiwasi gene te! Yekova nasoga “airazuu.” (Atambuahe 11:5; Asanza 3:31; AKorosaio 3:5, 6) Ka singia ngimbaro nasonosa gu sino rogo roni yo duwa gbangbati watadu bakere imisiringbaduse, na ka si afuda roni ngbaduroniyo watadu ka si agbarasapa gu kikiipa regbo du beroni, fuo duhe wo, si naida oni rugutironi naapa gu gbegberepai rengbehe ka mangaha fu roni rogo toroyo, na oni ki mangi ariapai niipo.—Matayo 18:8, 9.
Wai Rengbe Ani ka Digisa Gaani Nyemu Ngi Ambaro Ngba Wene Gene
9, 10. Gine rengbe agu aboro duna rugatise ka mangaha tipa digiso gayo nyemu ngimbaro?
9 Ti kura aregbo, aKristano rengbe arengba ka sanahe ki yaa: “Gini ambaro du niwenehe? Dungu agu ahe nakura rogo zegino na ngbanyaa kuti agu andiko nga ga Ziazia Kekeapai te.” Gupai si aida oni rugutironi nani nga, oni rengbe arengba ka bi agu ambaro rengbe ka fu ngbarago fu roni, ono si naida bakere asadatise. Si nakpinyemu gupai nga, oni mbakaditironi na rubangirise tipaha, avunguagude gbe si aida i diberã tipa gipai re. Dungu aboro nabihe niwenepai ka dia wene aregbo na gayo aborokporo watadu na awirina rogo dungurati. Baraho sungu ani ni kaa ri riahe zezeredii na kini fura rii agu apai mangi fu rani rogo gu uru re watadu ka sakapai riipa gu riiapai nga ga Ziazia Kekeapai, si niwenepai na si nangarasa boro angarasa. Ani rengbe arengba ka manga mbakadapai tipa ka ndu ka táã ndurani, na ka ngi agu ambaro du niwenehe. Ngbatunga agu ambaro re rengbe kadu niwenepai na kini fu wasa.
10 Bakumba sa nga ga dungurati ko na diako nasonosi agude biata atingidipai ki yaa: “Mbu awirani kindi rukutu, ani anaafu mamu fuyo i sia wari ani ka ndu kuhoni ti regbo ongoda. Ti kura aregbo, ani anaambugene fu agude nibasasa i yambu wene abakureayo. Si nanaasa gu ongoda re si du niwenehe gbe. Ti kura aregbo, ani anaakpariapa gu kura nyanyakipa apai akparia rogo gu raka nangia ga awirani. Nikpiapai, ti kura aregbo ani anaayamba aborokporo na abakure nga ga dungurati yo ku kpuraniyo. Ani anaamanga riahe zagi rogo gu ba naanidu tutuurũ ti kporo na ani kini ngimbaro rogoho fuo ri ani riahe. Ti kura aregbo, ani anaaora na tarambiri kupati abaagangara yo na kini ta nindurani riihe yo, ani anaabi agu aregbo re nimamu tipa ka wirika apai tipa ga Yekova kusikusiahe.”
11, 12. (a) Ginipai rengbe oni ka mangaha tipa ka koda kura aboro kurogo gaoni mbakadatise tipa ngimbaro ti kura aregbo? (b) Gini kura adunguratise bangiri dungu aboro agonga ti ni ya?
11 Ya mo oni rengbe ka koda kura aboro nisaroni watadu wadu oni ni aborokporo kurogo gaoni ambakadapai, ho oni asogima nduge ni ka ngi ambaro ti kura aregbo? Bete kura aboro wa adekurugbo, agu aboro ata manganga rogatise ya watadu gu vunguagude adunga na badiarogatise ya, rengbe ka ida ani nyakasi yo a. (Ruka 14:12-14) Oni rengbe arengba ka rimiso bete agu aboro kurogoho tona kodatiyo na oni barambeda kurogo dungurati, ono kidu na rubangirise, oni ka maa kura aboro ngbapai. (2 Timoteo 2:20, 21) Ka si du nikpakarapai fu gbarigbari aboro tipa i ye, oni rengbe arengba ka manga mbakadapai tipa ka ndu ka ri riahe naayo kpuyo yo.—AEbere 13:1, 2.
12 Agu adunguratise agino ari tooni riahe ti regboho, kini fura riipa agu apai naasa kura aboro rogo gu badona re i dani aKristano, na kini saki agu apai naundo yo tipa i nye niruru yo fu Mbori, aima yugotihe niguhe kaa gonga bangiri dungu aboro ya. Ani rengbe ka kusa riiapai vuru Ziazia Kekeapai yo tipa sakaha na agu aboro dunduko duho kodihe na agude a. Ngbatunga gi sakaapai re rengbe arengba ka ngarasa aboro, zanga ba gberango ti kura aboro watadu kura aboro nibitiyo ya i arẽnga te.
13. Wai Yesu gbiati Pauro ayugu wene kpiapai rogo dia aboro kugume na kini idipa yamba yo ko a tipa riahe ku kura aboro yo?
13 Yesu ayugu wene kpiapai rogo dia aboro kugume na kini idipa yamba yo ko a tipa riahe ku kura aboro yo. Dedede, ko anaabi agi aregbo re nimamu tipa ka yugo agu maku nga ga toro fu aboro. (Ruka 5:27-39; 10:42; 19:1-10; 24:28-32) Gu gako abawiriki nadu rogo bambata sa kama agarã adi kina gi gako kpiapai re. (Amokedi 2:46, 47) Gu mokedi nangia Pauro akepai ki yaa: “Bambiko nyemu bi roni namanga re, mi fu ga Ziazia Toro ũgume fu roni, sa du oni nyanyaki; nga, ani mongo wasa na oni dagba roni yo, ani ni ba sa sa be ga akuarani idapase, gaoni na gimi a.” (ARomo 1:11, 12) Teketeke wa kina gure a, si naida gaani dunguratise du tipa ngarasatise dagbase.—ARomo 12:13; 15:1, 2.
Agu Apai Si Aida Ani Moihe
ku Berã Rani yo na Kidu
na Rubangirise Tipaha
14. Tipagine si aidanga ani mangi bakere adunguratise nga ga abakure ti ni ya?
14 Pa manga ani bakere adunguratise nga ga abakure arengbanga kadu niwenehe te, bambiko pa ngerakurii ngbatunga gu dunguratise duwa gure nidu dedede nikpakarapai. Na si aidanga si tagbagatihe na gaani regbo mangaapai nga ga toro te, bete aborokporo rengbe ka diaberã ka ndu ka táã nduyo wa sa watadu ka ngi agu ambaro nga gu adunga wa abaangira ya. Ka ani yambu bete abaakumba nga ga dungurati yo na amoyambu undo watadu agu awirina ima nyaka rogo toroyo kupati gaani dunguratise nga ga abakure, i rengbe ka saha si du nibawenehe kisusi na gu regbo re kidu niguhe nafu wasa.
15. Tipagine si aida gupai ti ni nga, gu boro nambakada tini ka manga dunguratise nga ga abakure, ni kodipa wene ngerakuriipai kurogo gani mbakadatise?
15 Ti regbo agu adunguratise nga ga wasa, si aidanga ha agu aboro namanga gi mbakadapai re bipa ngerakuriihe taata gbua te. Wa vura duhe nga ani nagbia ngbarago ti dia aboro kugume, ya mo oni arengbanga ka bira tironi ka oni ini gupai nga, mbiko basa oni pai, kura gino sa akoto rogo toroyo mbiko gupai namangi kpuroni yo re tee? Oni makianga gu bangua arugute i asakihe rogo Pa Fu Rugute ni Ue he 22:8. Gu Yisaraere nanidua vovo bambu, si anaaida ni vo ndugu kirikiri rii gani bambu yo, nga gu ba nanidu dedede tipa agino ningimbaro rogoho. Tipagine si aidaha ti ni wo? Mbiko “ka ngbanga kure du nga ku ri gaoni bambu mbiko boro zutuka yo ka ti ya.” Teketeke wa kina gure a, si naida oni mangihe kinawo, ono ka oni amaanga andiko amaa kisusi kurii agu aboro ka oni yambu yo re ya. Si naida agu arugute re du tipa banda gaoni agino ti kpotoyo ti regbo gu dunguratise nga ga abakure na ka banda yo a rogo toroyo.
16. Gine si aida rubangirise ti ni ka singia i nika fu buda fu agino ti regbo gu dunguratise nga ga abakure?
16 Ka singia i nika fu eerẽ buda ti regbo gu dunguratise nga ga abakure, si naida i mangihe na bakere rubangirise. Dungu agu aKristano nayamba aboro ku kpuyo yo nadiaberã ka fu buda fu aboro kinaho ka si duni nga kina ni nika ngera kuriipa mbira gu buda i nika fuhe fu agino watadu i nikaa mbiraha re. Si aidanga oni mbugene fu guhe rengbe naasa kura aboro i koto watadu ka sa yo i mbiri buda nibakerehe te. (AEfeso 5:18, 19) Tipa kura nduapai, bete kura agino rengbe ka dia berã tipa ka ne mbira eerẽ buda. Dungu aringara na ringbisiringbisi garã-boro kina ti ni tipa boro tona mbira buda, na si naida aKristano irisi gu ndiko nga ga Kaisara ka si vura duwa gu ndiko re nibanyanyakihe vurũ.—ARomo 13:5.
17. (a) Ka singia i naye na manzigo ti regbo gu dunguratise nga ga abakure, tipagine si aida gu boro nayamba aboro ku kpuni yo du ti ni na siapai? (b) Ka singia i nika dogbere ti regbo gu dunguratise re, wai si aida ani yugu ruru berã?
17 Gu boro nayamba aboro ku kpuni yo rengbe ka rugatini na gupai nga, agu amanzigo na gbere watadu kura aũmbaro nikadu yo, si nika duna ngbanyaa kuti gu bangua arugute nga ga aKristano. Ngbanyaa amanzigo ni bakiakia, na dungu ngbatunga amanzigo duho ti ni. Ono tie, dungu agu amanzigo du areme naurugo gu toro nga ga samungu, wasiro, na zuũ. Si du si aida ani du ti ni na siapai. Anga iriiri amanzigo sa nga kina gu du niwenehe watadu duna zezeredi woroho te, ono si aidanga a si du niguhe nika ye na kura berã kuri aboro yo ho woroho nikaa paa ni te, watadu duna wasiwasi afugo rogoho te, na si aidanga i gbisi woroho si nipuma kina boro kuari te. Si naida oni duna rubangirise oni ka mbu gu boro ataruganga tini naapa gbiso bakio woro fugo manzigo kuti gu bakioho daada ya fu aKristano. Gu gbere nakoda iraira sino mangaapai, wa dogbere rogo gu gene nga kaa kita dimoseyo na kini sikpa mamuse, si ni gupai adunga niwenehe fu aKristano ya.—1 Timoteo 2:8-10.
18. Wai rengbe avunguagude ka banda awiriyo ningera yo kurii gayo dunguratise nga ga abakure?
18 Agu aKristano nga avunguagude si aida i ndu ka ino guhe mbakadi yo ho tipa gu dunguratise nga ga abakure i ayamba awiriyo tipa i ndu kadu pati ni, na si rengbe kadu nipatatamana ka i gasi yo koyo. Si nafu kina gberarago ka ino gupai nga, bete avunguagude nambu awiriyo i naandu kupati agu agbere nga gu adunga boro ho nangerakuriihe ya, nga gu ba i azomia dungu aboro rogoho kurogo wasiwasi mangaapai watadu gbegbere sino mangaapai. (AEfeso 6:1-4) Ka si vura du nga agude mangi tiyo nga i ima sona na i rengbe arengba aboro kido kutiyo, ndupai kinaho kindi tipa ani undoyo tipa i “óro be ga paranga gbegbere nyemuahe.”—2 Timoteo 2:22.
19. Gini rengo apai duho rengbe ka undo rani ani moiberã rani kuti guhe rengbe ani ka ‘gbataha mbata’?
19 Agu ambaro i angihe ti kura aregbo na agu ambaro du niwenehe nafu wasa, si rengbe arengba ka sa raka niwenehe. Yekova abengetanga rani ti ngbatunga gi ngbarago re te, ono ka pe rengo, ngbatunga gi mangaapai re nitihe aundonga rani tipa ani dungura gaani ũkumuko nga ga toro ku ngbangbaturũ yo te. (Matayo 6:19-21) Yesu aundo gako abawiriki tipa i girogo gupai nga ga “gbáta gako ngbi [ga Mbori kindo] mbata, na gako rurupai,” si nga nyanyakipa pai rogo raka, angianga ka bakabangirise tipa guhe ani ka rihe watadu ani ka mbiraha watadu ani ka voho ya, nga ‘agu ahe aGendiria agbataha.’—Matayo 6:31-34.
20. Ga Yekova ruru amoyambu rengbe kadu na maabangirise tipa gini wene ahe be Bakere Bafuahe?
20 Ii, singia ‘riahe tie, na mbirahe, na gupai ani kaa mangaha dunduko,’ si naida ani ‘mángi apai dunduko sa taasarimo Mbori,’ kini fu tambuahe fu Bakere Bafuahe nga guko nafuku gi wene ahe dunduko ani agbia ngbarago behe re. (1 AKorindo 10:31) Rogo gu gako paradiso kpotosende du mbembedi kumbatayo, aregbo nikadu yo zanga digidoho ani kaa gbia ngbarago wenengai be agu ahe Yekova nika mbakadaha, kodihe na gu wene kodatise nikadu dagba agu aboro nandu kuti gako ruru arugute.—Atambuahe 145:16; Yesaya 25:6; 2 AKorindo 7:1.
Oni Natingidaha?
• Tipagine duhe ti ni nikpakarapai fu aKristano ti gi regbo re i bi agu ambaro du niwenehe?
• Gini ngbatunga ambaro duho nayugutihe niwenehe fu agu aborokporo nga aKristano?
• Ho ani angi agu ambaro ni nafu wasa, giniapai si aida ani moihe ku berã rani yo na kidu na rubangirise tipaha?
[Gu kpiahe du ti kpewaraga 24]
Oni sia agu ambaro nakusa wene zuzuhe
[Gu kpiahe du ti kpewaraga 25]
Gini ngbatunga ambaro duho aKristano asogaha?