Sanduki Sanahe

◼ Mbata fu i idihe fu gu batungusipai ataziongo bapatiza ya ní zi bapatiza, waigu si aida ní naandu tipa adunguratise na kini tungusipai?

Zio bapatiza nga gu yangara nyanyakipa diaberã boro amangaha rogo gani raka. Sidu, mbata fu boro zi bapatiza, si naida ní gi tiní agia wenengai na gupai Mbori akpinyemuhe beni. Kurigure, si naida ní du nigu boro nayugoho ayugo rogo gani raka yo nga ní naida ka raka ringbisihe kuti agu apai Mbori akpinyemuhe.

I naruga aKristano nga ka i henga dunguratiyo na akurayo wa sa ya, sidu, gu boro naida ka zio bapatiza, si naida ní du nigu boro nandu tipa agu adunguratise nga ga dungurati naabaha. (Eb. 10:24, 25) Si naida aida a ní du nigu boro nafu karagapai afu ba dunguratise yo. Na si angba gbe ka si du nga ní ima rimo Gu Sukuru Nga ga Siokrasia, wa avuranga duhe vurũ nga ní duwa ka ní rimi gu sukuru re mbata ní kini ru ka zio bapatiza ya.

Kurigure, wa duhe nga i afu gu sunge fu aKristano nga ga tungusa wene pangbanga na kini sa aboro ni abawiriki, gu boro naida ka zio bapatiza, si naida ní du nigu boro natungusapai atungusa dedede mbata fu ní zi bapatiza. (Mt. 24:14; 28:19, 20) Bange adiwi wai si aida ní dihe kuti tungusapai mbata fu ní zi bapatiza? Kuti ndikidipai nzunzu, si naida ní di regbo rengbe arengba tipa ka yugoho nzunzu nga ní nikaa tungusapai atungusa zaaza na adiwi dunduko. (Tam. 78:37) Ono tie, si aidanga si di gbanga regbo adia tona ti gu regbo ní nada ni gu batungusipai ataziongo bapatiza ya ní kini ru ka zio bapatiza te, si naida si di ní gbua na bete adiwi. Bange asaa nga ga tungusapai wai si aida ní naagasaha? Ndiko ho nga ní duwa ka ní agasa bange asaa were te. Si naida abaakumba ini gupai nga abatungusipai dunduko du na apai tipa yó nibakiakia.​—Rk. 21:1-4.

Agu abaakumba (watadu amoundo abaakumba ho duhe ni nga ngenga abaakumba te) nga aguyo nasasana gu boro re na agu asanahe nga ga bapatiza, si naida i tingidi gupai nga aboro nibakiakia, na si naida i mangisunge na rugatinapai ka inoho singia ní rẽ tipa ka zio bapatiza. Si naida i bi nyemu gupai abi nzunzu kurogo ní yo nga ní naida kada ni Dezire Yekova na si naida ní yuguhe ayugo nga ní na bakere tambuahe kadu rogo ga Yekova riigbu na kaa tungusapai. Abaakumba ima ino gupai nga ní ata nyakanga wenengai rogo toro yo te na ní ata gbianga inohe wa agu aboro naima digo nitungusipai te. Ka abaakumba bi gupai nga ní ata rẽnga tipa bapatiza te, si naida i gumba ndu gupai funi i aberãha ti ni nga ní ata rẽnga te ringbisihe kuti Ziazia Kekeapai na ki undo ní ní mangi sonakumbatayo.