BAWE SANAHE
Wai Rengbe Baibiri ka Undo Re?
GINIPAI KA MO MANGIHE?
Mo berẽnga kurii gi kpiapai re: Davide nandu rogo gbaria rogo bakere bitimo yuru. Wa du rago na bakere bitimo, ko gusi gene ki ingi.
Ka mo ngia Davide, ginipai ka mo mangihe?
MO RUNGA KA BERÃ!
Mo na dungu asiapai bero:
Ka sanahe tipa undo.
Ka ziga bataria ka wisigo rago na ni.
Ka ruga riro kaa nduandu kindi kumbatayo kini berẽ gupai nga mo adaada rogo gu ba mo andu ku rogoho.
Gu rengo du nga gu biata berãpai re angbanga kisusi agu akuraha du ue re te.
Gu ue berãpai ngba kisusi gu bambataha. Bataria nga guhe aboro naata na ni beyo yuru si nifu imarago fuyo.
Baibiri ima rengba ka undoro wakina gure a!
Gi buku du be badungu aboro re ima rengba
ka banda ro be gu kpakaraapai nga ga raka
ka undoro tipa mo wisigi tiro na kidu ni wene boro
ka yugo wai foro rengbe mo ka gbia wene raka
AKARAGAPAI KUTI KIKINDIGI ASANAHE NGA GA RAKA
Ti kina gu regbo boro atona fugo mbu ní ni wiri tooni gude, ní natona sasanahe.
Da nambakadi ngbangbaturũ?
I ambakadi akerekuru rogo ginihe?
Kusa, boro natona ka sanahe tipa agu apai ní abihe namanga rogo zegino.
Tipagine gbegberẽ apai amanga ti ni?
Akaragapai tipaha aima duho rogo Baibiri.
Ono dungu aboro naya kungbo apaturẽ du gbua du rogo Baibiri, aguyo naya regboho aima susa, watadu si ni kpakarakpakaraha ka giarogoyo. Ya mo rengo du nga agu apai re, watadu si gbua nga agu apai aboro aberãha kini gumbaha kumbatayo ni ziree?
Ni kpiapai, aboro naberã gupai nga Baibiri naya Mbori du nazoga gi zegino re. Ono wai rengbe gupai re kadu wo? Ome gbegberẽ apai ima kio rogo zegino! Zegino ima hi be igirã na rungosi, akaza na kpio, rungo gbiati agberãngbi. Wai ka gu Mbori du na nyemuse sa gbegberẽ apai wa gure si nimangi aboro?
Mo nakpi nyemu ka ino akaragapai? Gupai Baibiri agumbaha tipa gu boro nazoga gi zegino re rengbe arengba ka iriwo tiro!
Agu arugute du rogo gi waraga re mburuhe rii Baibiri. ADezire Yekova ima ida kuti gupai nga Baibiri du na gu wene arugute rogoho si aida ani nindu kuti ni. I idi kutini wo bambiko “si aye be ga Mbori Toro si ki rengbe tipa yugopai, tipa zapai, tipa ruga aboro.” (2 Timoteo 3:16, 17) Mo di gi buku re kugume ka wisigoho ka si vura du vurũ nga i akehe bakuru kusayo. Si ima rengba ka undoro awere!