I Abatika Kumbagude!

Abarayama na Sara arogotiyo tipa dungu agarã. I ambu gu wene kpuyo naadu Ura yo kini raki rogo bamburoko. Ono Sara aakpakananga he te, mbiko ri akido kuti Yekova.

Sara aima du na bakere nyemu gude sidu, ri ki ya fu Abarayama: ‘Ka gi moyambu nga Agara batika gude, u du wakina wire.’ Fuo bete regbo kusa, Agara abatika gude. Rimoko angia Yisamaere.

Dungu agarã kusa, ho garã Abarayama adu ni nga 99 na garã Sara ki du nga 89, agino aye ka biyo. Abarayama ayambu yo i ye ka sungo tii nzereme ngua na ko ki fu riahe fuyo. Mo ini ada nangia agu agino re? Amaraika du naadu! I aya fu Abarayama: ‘Rogo gu garã naye fuo gere ti regbo wa gere, mo na diaro nika batika gude.’ Sara aagia gupai re agia wa ri asungu tii bamburoko yo. Ri ki mamu na ki ya fu tiri: ‘Boro mi rengbe ka du na gude wa gu mi nagbinza re?’

Rogo gu garã nangbefuo gure, Sara abatika kumbagude, kina wai ga Yekova amaraika akidohe. Abarayama ayambu rimoko nga Yisaka, du rogoyo nga “Mongo.”

Ho garã Yisaka adu ni wa bisue, Sara abi Yisamaere ko ni sawia ko. Ri aaida ka banda wiiri, sidu, ri ki ndu fuo Abarayama na ki sanako nga ko do Agara na Yisamaere kusayo. Ho ri apehe ni mbata, Abarayama aaidanga ka mangaha te. Ono Yekova aya fu Abarayama: ‘Mo degeturo fu Sara. Mi nika ngera angerafuo Yisamaere. Ono gimi akidohe nika ringbisatihe vurube Yisaka.’