Mbori Aˈasadi ga Abarayama Idapase

MO BINGO gupai Abarayama amangaha ane. Ko na sape beko, na si nawira wa ko naida ka imo wiriko. Tipagine ko aida ka mangapai wa gure ti ni? Ni bambatapai, ani iningo wai aAbarayama na Sara abi wiriyo.

Mo tingidi gupai nga, Mbori akido yo nga i nika vunga kumbagude. Ono gupai re aawiranga rengo bangiriyo te, bambiko i aima gbinza. Ono tie, Abarayama aima ida kuti gupai nga Mbori ima rengba ka manga gupai aboro abihe nga si arengbanga ka manga te. Ginipai namangi?

Fuo Mbori mangi gako kidohe, garã aima susa sa. Sidu, ho garã Abarayama adu ni nga 100 na garã Sara kidu nga 90, i avungu kumbagude ki yambu rimoko nga Yisaka. Mbori aima kakuti gako kidohe!

Ono ho Yisaka asono ni, Mbori aˈasadi ga Abarayama idapase. Ko ayambuhe ki ya: ‘Abarayama!’ Na Abarayama ki karagapai ki ya: ‘Mi du re!’ Mbori ki ya fuko: ‘Mo di wiro, nga bangisa wiro nga Yisaka ki ndu ku rii gu bagangara mi ka yugoho foro. Yo mo ka imo ko ni ki fuko fere ni motumo.’

Nairiwo wai gupai re agberẽ ti Abarayama, bambiko ko aima kpinyemu wiriko gbe. Na mo tingidi gupai nga Mbori aima kidohe nga awiri Abarayama nika raka Kanana yo. Ono wai ka gupai re aru ka manga ka Yisaka akpi? Abarayama aagianga rogo gupai re yo te, ono ko amangi kina gupai Mbori aya fuko ko mangihe.

Ho Abarayama adani rii bagangara yo, ko avo Yisaka ki moiko rii gu bamotumo ko aduaha. Ko ki kusi sape tipa ka imo wiriko. Ono ti kina gu regbo re, ga Mbori maraika ki yambuhe ki ya: ‘Abarayama, Abarayama!’ Ko ki karagapai ki ya: ‘Mi du re!’

Mbori ki ya: ‘Ka mo tumbanga bero kuti wiro ya. Ka mo mangingo ko na pai a ya. Awere mi ima inoho nga mo na idapase kuti re, bambiko mo akanga na wiro bere te, nga kina bangisa wiro.’

Nairiwo gu bakere idapase Abarayama adu na ni kuti Mbori re! Ko adu na kido nga pai ho ka gasi Yekova te, na Yekova ima rengba ka zingisa Yisaka be kpio. Ono anga Mbori aaida aida nzunzu Abarayama imi Yisaka te. Sidu, Mbori asa kandoro u du ni voovo ru rogo gu nvuo naadu mbembedi ho, ko ki ya fu Abarayama ko fu ru ni motumo kuba wiriko.