Da Nangia Abarayama?

KINA bete aboro gbua gayo mangapai adu na maapai kurii apambori rogo zegino. AYudo, aMasarami, gbiati aKristano nairisa Abarayama, i ringbisipa Abarayamaa “rogo Ziazia Kekeapai ninyanyakipa boro pambori” na “nigu boro nga wene kpiapai furani nga ga idapase.” Ziazia Kekeapai nayambako nga ‘ba fu aguyo dunduko idipase.’—ARomo 4:11.

Tipagine aboro airisa Abarayama ti ni gbe? Bambata nduhe nga, kina Abarayama sa nga gu boro i nafura tipa ní bara biata rogo Ziazia Kekeapai nibadiangba Mbori.—2 Pekapai 20:7, Yesaya 41:8; Yakoba 2:23.

Ono wa si avura duwo, Abarayama angia kina boro wa ani a. Ko agbiatiko na kina gu bangisa akpakarapai ani agbiatirani nani, ono ko aima du na diabese. Ya mo oni naida ka ino wai ko amangihe? Ani makianga gupai Ziazia Kekeapai ayugoho tipa gi kumba re.

Gu Ba I Avunguko Rogoho

I avunguko rogo gu garã nangia 2018 M.B.K., ko asono rogo gu gbata nangia Ura. (Bambata Pai 11:27-31) Ura angia kikii gbata na ki du nikumukokumukoho. Na si ahi be irisokpiahe. Si nawira wa ba Abarayama nangia Tera adu dagba agu aboro nanaairiso akpiahe. (Yosua 24:2) Ono wa si avura duwo, Abarayama asia ka iriso kina Yekovab sa kuba gupai nga ka iriso agu akpiahe sunge aadunga ti ni re ya.

Ginipai nasa Abarayama ko diberã ka iriso Mbori? I avungu Abarayama agarã 150 mbata fu kpi Seme. Ka si adu nga Abarayama anaadia regbo na gu sosono bakumba re, wai gu si arengbe kadu na maapai kurii gako raka? Si rengbe kadu nga Abarayama aima wirika gupai be Seme nasayo i bati ti rago Ime Akangbii. Ko aima wirika pa wai nyakipa iriso Yekova nga gu Mbori nabatasi Seme na gako aborokporo ti regbo Ime Akangbii.

Singia Seme nayugupai fu Abarayama tipa Mbori watadu ko awirikipai tipa ko ngba kura gene kia, ko aima mangapai kuti gupai ko awirikihe tipa ndikidi Mbori. Ho Yekova nga ‘bawisigi kpotose yo’ awisigi Abarayama ni, ko abi wenepai rogokoyo, na ko ki undoko ko sonosi gu wenepai re.—Asanza 17:3; 2 Pekapai 16:9.

Gako Raka

Abarayama araki gu raka nahi be ngbarago, wa akpakarapai avura kaa mangako vurũ, gako raka adu na rogoyo ti ni. Ani wisigingo bete agu apai ko agbiatiko nani rogo gako raka yo.

▪ Mbori aya fu Abarayama ko guari rogo gu ringara i avunguko rogoho nangia Ura ki ndu kurogo gu ringara ko ka yugoho fuko. Wa si avura du nga, Abarayama na Sara ainongo gu futufutuapai naadu tipa gu ba i aandu kurogoho watadu ndu gupai Mbori akediyo ti ni te, i agisangbaa ko agia. Abarayama na Sara andu kaa raka Kanana yo tii abamburokoo wa tata aboro.—Amokedi 7:2, 3; AEbere 11:8, 9, 13.

▪ Ho Abarayama na Sara aadunga ni na gude beyo ya, Yekova akido ko nga ko asa ngbatungako nibakere rikaaboro. Yekova agbia kurapai kutini berewe nga ko afu maku fu ngbatunga aboro zegino dunduko vurube Abarayama. (Bambata Pai 11:30; 12:1-3) Yekova anyakasipa gu kidohe re kusa ka digisoho. Ko aya fu Abarayama wee, ko nika ngeesa ngbatungako wa kina akerekuru ngbangbaturũ yo.—Bambata Pai 15:5, 6.

▪ Ho garã Abarayama adani nga 99, garã Sara kini mbedi kuti 90, Yekova akido yó nga i nika vunga kumbagude. Kuti ga aboro bipai tigayo, gipai re adu nigupai kaa manganga ya, ono aAbarayama na Sara aini gupai nga ‘ka pai gasi nga Yekova’ te. (Bambata Pai 18:14) Kusa, tifuo susa garã sa, ho garã Abarayama adani 100, ko avungu kumbagude ki yambu rimoko nga Yisaka. (Bambata Pai 17:21; 21:1-5) Mbori akidohe nga ko afu maku fu ngbatunga aboro dunduko vurube Yisaka.

▪ Fuo dungu agarã kusa,Yekova aya fu Abarayama ko mangi gupai boro aamanganga ha mbata ya. Ko aya fu Abarayama ko tumo na bangisa wiriko nangia Yisaka, wa si avura du vurũ nga ko angia gu paranga naadianga dee ki vungu agude ya. Wa si avura du nga pakpio wiriko aima rengba ka ye na bakere gberãrago fuko, ko ambakadi tiko ka giasangba na ki fu wiriko nga Yisaka nimotumo. Abarayama adu naa kido kuti Mbori nga ko rengbe arengba ka zingisa Yisaka bekpio, tipa Gako akidohe da nirengo. (AEbere 11:19) Ti gu regbo Abarayama aida ka fu Yisaka nimotumo, Mbori aza ko ti mangaha wo na ki batasi ga Yisaka raka. Ko atambua Abarayama tipa gu bangua sino nga ga giasangbaa. Yekova agumbapa gako akidohe berewe fu Abarayama.—Bambata Pai 22:1-18.

▪ Ho garã Abarayama adani nga 175, ko ati nirame rogo kpioyo. Ziazia Kekeapai nayaa: “Ko aima gbe” na si nagumba gupai berewe a nga, “kuru gbinza kumba nangia ko, garãko ange ange ki susi.” (Bambata Pai 25:7, 8) Gu kura ga Mbori kidohe nadigisi tihe tipa ko nga, ko aya ko araka nigbangaha mbata fu ko kpi rogo pazereda.—Bambata Pai 15:15.

Gupai Aboro Atingida Pako ti Ni

Anga aboro natingidapa Abarayama areme gbua nigu ninyanyaki boro pambori naraki kusayo te, ono gako akpiapai na nyanyakipaha furani. Areme, agu apai du tipa gako raka nga bawene kpiapai furani tipa ka pekafuoho. (AEbere 11:8-10, 17-19) Ani makianga wene asino biama nga gu Abarayama ayuguhe. Ani nika tonaha na gu bawene sinoko du gbaiga nga idapase.

[Footnotes]

[Box on page 4]

Nyanyakipa Boro Rogo gu Pangbanga Nga ga Ziazia Kekeapai

Rogo gu bambata akapita bawe du rogo gu kitabu nga Bambata Pai, i fura tipa gu raka nga ga agu akumba naadu na idapase tiyo, kodihe na Ebere, Enoka, gbiati Noa. Ono tie, rogo agu akapita bawe na bisue ngbe tifuo gure, i fura gbe tipa gu raka nga ga bangisa boro sa gbua. Gu boro re nga Abarayama.

Kurigure, dungu gu nyanyakipa apai du rogo Ziazia Kekeapai i nafura tipaha nibambataha kina rogo agu apangbanga du tipa Abarayama. Nikpiapai, rogo gu pangbanga du tipa ga Abarayama raka, i fura nibambataha tipa . . .

▪ Mbori ki ya ko nga vurakube, watadu bandahe fu gako amoyambu.—Bambata Pai 15:1; oni bi Pa Fu Rugute ni Ue he 33:29; Atambuahe 115:9; Asanza 30:5.

▪ du na idapase kuti Mbori.—Bambata Pai 15:6.

▪ du boro ninebi.—Bambata Pai 20:7.

▪ gu nyemuse nga ga vungugude.—Bambata Pai 22:2.