Gu Ndugu Nga ga Yerusarema

Ani furanga awere tipa bete agarã kusayo. Nemaya nangia gu moyambu nga ga Bakindo Arutasasata angia Yisaraere naaraka rogo gu ga aParaso gbata nangia Susana. Agume Nemaya aye Yuda yo na gbegberẽ pangbanga nga: ‘Agu aboro naaga ku Yerusarema yo ba yo angbanga te. Gu ndugu na ngbadimo dungu aBabero agbarasihe boro ho mbakadihe ku baha te.’ Nemaya adu na gberãrago. Ko aaida ka ndu ku Yerusarema yo tipa ka undo, ko ki kpari fu Mbori tipa bakindo mbugene fuko ko ndu.

Kusa, Bakindo abi gupai nga Nemaya na ngera na gberãrago. Ko ki ya: ‘Mi aabingo ro mbata wa gere te. Ginipai namanga ro?’ Nemaya ki ya: ‘Mi aru wai ka ngera na ngbarago baraho du gi gbata nga Yerusarema ni kuodikuodihe?’ Bakindo ki sana ko nga: ‘Ginipai mo aida mi mangihe foro?’ Nibasa, Nemaya ki mangi kparakpee ni ipo kukiri. Fuani, ko ki ya: ‘Ako, mo idihe fere mi ndu ku Yerusarema yo ka dua gaha ndugu kubaha.’ Bakindo Arutasasata ki ya fu Nemaya ko ima rengba ka ndu, na bakindo ki mangi mbakadapai tipa ko du ni bandabanda ko wa ko nika ndu gu gbanga nunguro re. Ko asia Nemaya a ni gavana nga ga Yuda na ki fu angua fuko tipa dua ngbadimo ndugu gbata na ni.

Ho Nemaya ada ni Yerusarema yo, ko awisigi ndugu gbata. Fuani ko adungura aboromotumo na abazogo na ki ya fuyo: ‘Gi ndugu re ima gberã. Si naida ani mbakadihe.’ Aboro aidihe na i ki tona ka dua ndugu kubaha berewe.

Ono gu kura asogo aYisaraere anaasawia yo kini ya: ‘Derenvugo rengbe ka sĩ guhe re kusande.’ Abamangisunge aamaanga berãyo sa gupai re te, i aamanga kina gayo sunge. Gu ndugu re asono na ki nyaki.

Avurayo adiberã ka ye ngba gu kura gene kia tipa ka zubo Yerusarema. Ho aYudo agi pa gi zubo he re ni, gunde aziyo. Ono Nemaya aya: ‘Ka oni gunde nga ya. Yekova na kina rani.’ Ko amoi ababandarago i ni banda abamangisunge, ka avurayo arengbanga ka zubo yo ya.

Tipa arame 52, i anyasi dua ndugu na ngbadimo ho. Nemaya ki ye na aRevi dunduko ku Yerusarema yo tipa i ye ka manga pumbo kparaha. Ko ambakadi yo ku rogo abadona ue nga ga abayango. I abiti kurii ndugu yo ti tanga pati Ngbadimo Gugaabi na i ki tona ka ndu kirikiri pati gu gbata re. I kini vudi ambanya na kini ta akundi tipa ka bibia fu Yekova. Ezara andu na badona sa, na Nemaya ki ndu na gu kuraha, daho i agbiatiyo ni yekaru yo. Aboro dunduko​—akumba, adee, na agude​—afu motumo fu Yekova na ki mangi pumbo. I ata ngbayo na ngbarago aboro kini gihe kina boro tuturũ.