‘Agu Ahe Ngba Angba’ Nahiiso Ga Yekova Bambu
‘Mi [Yekova] nika zigizo arikaaboro dunduko, si du agu ahe ngba angba bangiri arikaaboro dunduko aye kono, mi ki hisi gi bambu re na taarimo.’—AGAI 2:7.
1. Ti regbo tunguotunguopai, tipagine ani naberã tini ni bambatapai tipa agu aboro ani nakpinyemuyo?
GINI wene ahe hiisi gaoni bambu? Oni na nyanyaki geno aũkporo, bavovo kompiuta nga gu kuru bambeda, watadu vovo tarambiri rogo gaoni bambakada atarambiri? Ka si vura du nga oni na agi ahe re dunduko beroni, anga oni rengbe ka ida gupai nga gu nyanyakipa ahe kisusi du kpuroni nga aboro tee—nga gaoni aborokporoo? Oni berẽnga gupai nga rogo kura yuru sa fuõ ngime we zingisi roni rameyo. Gaoni bambu nagbi, na kina bete aminiti nye koyo fu roni tipa oni oro! Ginihe oni abakabangironi tipaha nibambatapai? Gaoni aũkporoo? Gaoni kompiuta? Gaoni tarambiri? Anga kuba gure, oni rengbe tie ka berãpa aguyo oni akpinyemuyo tee? Nirengo, oni rengbe ka mangaha wo, mbiko aboro nyakipayo kisusi ahe.
2. Bakio ga Yekova kusikusiahe wai, na gini paparaha rago angba ti Yesu behe gbe?
2 Awere oni berẽnga pa Yekova Mbori na Wiriko, nga Yesu Kristo. Yekova nga gu Boro “namangi ngbangbaturũ na sende na baime na ahe dunduko rogo yo.” (Amokedi 4:24) Wiriko nga “bangbasia boro sunge,” angia gu boro Yekova amangi gu kura ahe dunduko rogo ko yo. (Asanza 8:30, 31; Yoane 1:3; AKorosaio 1:15-17) Nirengo, i ue dunduko nga Yekova na Yesu nabi agu ahe dunduko i akusihe na nyanyakipaha. (Oni ringbisingaha na Bambata Pai 1:31.) Ono gini papara kusikusiahe oni aberãha ya si na nyanyakipaha kisusi fuyo—ahe watadu aboro? Rogo gu sunge nga ga gu tatamana i asaha ni boro, Yesu nayaa: “Rago angba ti re mbiko awiri aboro,” watadu wa gu sasapai nga ga William F. Beck agumbaha, Yesu “aduna ngbarago be aboro.”
3. Gini sangbanebi Yekova agumbaha rogo Agai?
3 Zanga kapa, Yekova nabi aboro na nyanyakipayo gbe. Ani nabi pai sa nayugo gere rogo agu afugo nga ga sangbanebi nga gu ko agumbaha rogo gu garã nangia 520 Mbata fu Gaani Regbo rogo gu gako nebi nangia Agai. Yekova ayaa: ‘Mi nika zigizo arikaaboro dunduko, si du agu ahe ngba angba bangiri arikaaboro dunduko aye kono, mi ki hisi gi bambu re na baweneahe taarimo. Gu taarimo nikadu fu gi bambu re giza, si adú ni babakere he ti gu naadu mbata.’—Agai 2:7, 9.
4, 5. (a) Tipagine si arengbanga tini ka duni weneberã ka digisoho kuti gupai nga gu gumbapai nga agu ‘ahe ngba angba’ nafura tipa agu aũtaarimo nga kumuko ya? (b) Waigu rengbe oni ka ringbisapa agu ‘ahe ngba angba,’ na tipagine?
4 Gini ‘ahe ngba angba’ nga gu ka hiisi ga Yekova bambu na ki ye na gu taarimo kurogo nga gu naadunga mbata ya? Agu ahe i agbarasa marã tipaha gbiati ũfonga ahe? Dahabu, feda, na agu ambia duna nyanyaki genoho? Gere awiranga si rengbe ka du niruruhe te. Ani tingidi gupai nga, gu yekaru nga gu nadu mbata, nga gu i azakihe wa akama agarã bisue mbata kusayo, aduni gu memehe nadi dungu abirioni rogo marã aMerikani!a Nirengo, ka Yekova aberẽnga pa gu yekaru gi wiri bete aYuda aduaha nga aguyo nayego ku ringara kpuyo yo re si susi gu yekaru nangia ga Soromo rogo gu ngbanya nga ga ahe te!
5 Gini ahe tie, nga gu ‘ngba angba’ nga gu ka hiisi ga Yekova bambu? Ziazia tie, aboro du. Rengo ngaha, anga gupai nasa ngbadu Yekova si ngi, si nga feda na dahabu te, ono si nga aboro nga aguyo nandusunge ko mbiko nyemuse. (Asanza 27:11; 1 AKorindo 10:26) Ii, Yekova nabi agu akumba, adee, na agude dunduko nairiso ko wa ko aidaha na nyanyakipayo. (Yoane 4:23, 24) Agiyo re nga agu ‘ahe ngba angba,’ na i na nyanyakipayo bangiri Yekova kisusi gu bawene afongo dunduko nga gu i akendege ga Soromo yekaru nani.
6. Gini ringbisapai gu ga Mbori yekaru nadu mbata amangihe?
6 Gu sogote naandu kina kumbatayo ki vura du, i anyasi yekaru rogo 515 Mbata fu Gaani Regbo. Da kuti regbo ga Yesu motumo, gu yekaru nadu Yerusarema yo anye kindi ni gbata nga ga ziazia iriso tipa dungu agu ‘ahe ngba angba,’ nga gu nakodi ndikidi aYuda na agu aGendiria i asa yo kurogo gu pambori nga ga aYuda. Ono gu yekaru re arukuba kurapai nga gu nadu ni bakerehe kisusi, a wa ani ka bihe.
Pa Digoho Rogo Bambata Kama Agarã
7. (a) Ginipai gu ga Mbori kuru yekaru nadu Yerusarema yo aayugokpiaha? (b) Oni ringbisinga pa agu asunge nangia ga gbia motumo rogo Uru Dada Ingapai.
7 Gu yekaru nadu Yerusarema yo aayugokpia bakere mbakadapai tipa irisombori kumbatayo. Si nga ga Mbori yekaru nga ga toro, nga gu Yekova asigiraha rogo 29 ti Gaani Regbo na ki moi Yesu ni Gbia Motumo. (AEbere 5:4-10; 9:11, 12) Ani makianga pa gu wiratise nadu dagba agu asunge gu gbia motumo nga ga Yisaraere anamangaha na agu asunge nga ga Yesu. Na agarã nibasasa rogo Uru Dada Ingapai, gbia motumo aniye ku pati bamotumo nga gu nadu rogo gu vurukporo nga ga yekaru na ki fu motumo na babagara ka manga dada ingapai tipa agu aingapai nga ga aboromotumo. Kusa, ko anirimi ku yekaru yo na kure babagara, ki susi rogo agu angbadimo nga gu nanakparaka vurukporo ti gu Ziazia Ba na fuo gure, ko ki susi ku gii gu darĩdarĩ kperokoo nga gu nanakparaka Ziazia Ba ti Ziazia Ba Kisusi. Fuo rimo ko kindi kurogo gu Ziazia Ba Kisusi, gu gbia motumo re anamigido kure barabangiri gu bamotumo nga ga sanduki mokido. Fuo gure, nimanga ko kina gu bangisapai re, ko anitumo na meme tipa agu angbatunga 12 nga ga aYisaraere nga gu naangianga ga aboromotumo ya. (Pa Amotumo 16:5-15) Waigu gi mangapai re aduna pai dagbaha na ga Mbori yekaru nga ga toro?
8. (a) Rogo gini gene i atumo na Yesu tona rogo 29 ti Gaani Regbo? (b) Gini kparakpara ngbanya Yesu agbia ngbarago behe dagba ko na Yekova ti regbo gako sunge nabaha auru kpotosende?
8 Ruhe aru nga, i atumo Yesu rii gu bamotumo nga ga gupai Mbori akpinyemuhe ho i abapatizi ko ni na ki mbedi ko ni ga Mbori ziazia toro rogo gu garã nga 29 ti Gaani Regbo. (Ruka 3:21, 22) Nirengo, gipai re angia tonatona raka nga ga motumo tipa gu gene raka nga ga Yesu nga gu naima tipa agarã biata na beberehe. (AEbere 10:5-10) Ti gu regbo nangiaha re, Yesu agbia ngbarago dagba ko na Mbori be gu pagume nga ga gu wiri vunguyo ni be toro. Kura aboro ho narengbe ka giarogo gi kparakpara ngbanya nga gu nadu dagba Yesu na gu Bako nga ga ngbangbaturũ ko re nzunzu te. Si adu wa ka i ya darĩdarĩ kperokoo aduho nadadi agu abangiriyo nga ga rugatinapai, a wa kina gu darĩdarĩ kperokoo nanakpara Ziazia Ba ti bangiri agu aboro nadu rogo gu vurukporo nga ga banye.—Gate 40:28.
9. Tipagine Yesu arengbanga tini ka rimo ku ngbangbaturũ yo ni boro ya, na waigu i anyasi na gipai re?
9 Zavura gupai nga ko aduni gu Wiri Mbori i ambedi ko ni toro, gu kumba nga Yesu arengbanga ka da rogo gu raka nga ga ngbangbaturũ te. Tipagine ka si adunga tini wo ya? Bambiko pasio na kure arengbanga ka diakumbo ga Mbori Kindo nga ga ngbangbaturũ te. (1 AKorindo 15:44, 50) Wa duhe nga gu pasio Yesu nga ga boro naaka na gene, kpiaha aduni yuguyuguhe wenengai ni gu darĩdarĩ kperokoo nga gu nanakpara Ziazia Ba ti Ziazia Ba kisusi rogo gu ga Mbori yekaru nga gu nadu mbata. (AEbere 10:20) Ono auru biata fuo kpioko, Mbori azingisi Yesu ni toro. (1 Petero 3:18) Fuo gure, ko ki rengbe ka rimo kurogo Ziazia Ba Kisusi nga ga Mbori yekaru nga ga toro—nga kina boro ngbangbaturũ nitihe. Sidu gere nzunzu nga gupai namangi. Pauro nakepai ya: “Kristo arima nga ku rogo gu ziazia ba [wa gopai ayuguho, ko afura tipa Ziazia Ba Kisusi] i amangi he ni be te, nga gu nawira ndikidi he; ono ko arimi kina boro ku ngbangbaturũ yo, ka du ku bangiri Mbori awere tipa rani.”—AEbere 9:24.
10. Ginipai Yesu amangihe ho ko aga ni ku ngbangbaturũ yo?
10 Ngbangbaturũ yo, Yesu ‘auka kureko’ nga ga motumo nifu ko geno tumorii nga ga unga kureko fu Yekova. Si ki vura du wo, Yesu amangipai kisusi gure. Ngbutuko mbata fu kpioko, ko agumba gupai fu apefuoko nga: “Mi nandu ka mbakada ba fu roni. Ka mi ndu ka mbakada ba fu roni, mi ayé berewe, ki rogo roni fuo re; ho du mi ni, oni du a ho.” (Yoane 14:2, 3) Sidu ni rimo ko kurogo gu Ziazia Ba Kisusi, watadu ku ngbangbaturũ yo, Yesu azakigene tipa gu kura aboro pefuoko. (AEbere 6:19, 20) Agi aboro nga aguyo ka bangeyo adu nga 144,000 re, ka ndusunge ni adufuo gbia motumo rogo ga Mbori mbakadapai nga ga gu yekaru nga ga toro. (Yugoti 7:4; 14:1; 20:6) A wa kina gu gbia motumo nga ga Yisaraere ko anadia kure babagara mbata kurogo Ziazia Ba Kisusi tipa ka tumo nani tipa ga aboromotumo ingapai, i amangisunge na geno gu ga Yesu kure nauka nibambataha tipa agu adufuo gbia motumo du bangeyo 144,000.b
Agu ‘Ahe Ngba Angba’ Nga gu Du ti Gaani Regbo
11. Gbia motumo nga ga Yisaraere anamanga motumo na meme tipa ada, na ginipai gere aayugokpiaha?
11 Si nawira gupai nga rogo gu garã nangia 1935, pa dungura gu mbedimbediyo anyasi.c Ono Yekova aanyasanga taasapa gako bambu te. Oó, si adu nga agu ‘ahe ngba angba’ re aye kindi kutiihe yo. Ani tingidi gupai nga gu gbia motumo nadu Yisaraere yo anatumo na anyaa ue—babagara tipa gu ingapai nga ga aboromotumo, na meme tipa gu ingapai nga ga agu angbatunga naangianga ga aboromotumo ya. Wa duhe nga aboromotumo aayugokpia gu mbedimbediyo nika duna Yesu rogo gu Kindo nga ga ngbangbaturũ, ada agu angbatunga naangianga ga aboromotumo ya arukubayo? Ani nabi karagapai rogo afugo Yesu nga gu duni kekehe rogo Yoane 10:16: “Gu kura [avusende] du be re, adu nga rogo gi ndugu re ya; mi ayé aye na ami a, ami agía fugore agia; rimbasara adú adu sa; babanda [avusende] ki du sa.” Sidu, gu kure Yesu nga gu nauka nafu undo fu badona aboro ue—nibambataha, fu agu aKristano duna maabangirise ka zogarago na Yesu ngbangbaturũ yo na ni uehe, fu agu aboro nangera kumbatayo tipa nyenye unga auru paradiso nga ga kpotosende. Ziazia tie, gi ue badona re du du kpiaha niyuguyuguhe ni agu ‘ahe ngba angba’ nga gu du rogo gu sangbanebi nga ga Agai.—Mika 4:1, 2; 1 Yoane 2:1, 2.
12. Waigu i adungura badungu agu ‘ahe ngba angba’ kurogo ga Mbori bambu areme?
12 Agi ‘ahe ngba angba’ re nahiiso ga Yekova bambu kindi. Rogo agu agarã susi bambeda kusayo, i aima dia zahe kusayo rii gaani sunge Putu yo ku Uroyo, rogo apapara Afrika, na rogo kura aringara, si kini mbugene tipa wene pangbanga nga ga ga Mbori Kindo nga gu duni sigirasigiraha moipai da kurogo agu arago i atungusanga pai rogo ya da kuti gi regbo re. Wa aguyo ngba angba re aye kurogo ga Mbori mbakadapai nga ga yekaru, i na’asada tiyo a tigayo ka sa aboro ni abawiriki, ni irisa ga Yesu rugute. (Matayo 28:19, 20) Wa i amangaha wo, i nagbia tiyo na dungu aboro, gu paranga yo na gu sosono yo, nga aguyo rengbe arengba ka da ni agu ‘ahe ngba angba’ nga aguyo nika taasarimo ga Yekova bambu. Ani makianga pa bete kpiaapai tipa wai gere amanga.
13. Waigu wiri degude Bolivia yo ayugu gari ngara tipa gbandaka pangbanga nga ga Kindo?
13 Bolivia yo, wiri degude du garãri bisue avunguri nga aDezire asonosa ri, asana gari nayugupai ri idihe furi tipa ri kpa ti sukuru rogo gu poso gu babiapai ninata ata aye ka bi yo. Tipagine? Ri aida ka du ti sunge tungusapai rogo gi kparakpara poso nga ga sunge re. Gere airiwo ti avunguri, ono i aduna ngbarago mbiko pa du ri na wene berã wa ngbatunga gure. Gu wiri degude re namanga wisigopai rogo Baibiri na aboro bisue rogo gayo akporo, bete gari abawisigipai nandu dedede ku pati agu adunguratise nga ga aKristano. Ri aye a na gari nayugupai nga ga sukuru ku Bambu Kindo yo. Isoke kusa, bete gari abawisigi Baibiri adani agu ‘ahe ngba angba’ nga gu nika ye na taarimo kurogo ga Yekova bambu.
14. Korea yo, waigu i afu maku kurii ga dawirani ka kutipai nga gu ri adu nani tipa gu boro nawiri gupai nga ni na nyemupai te?
14 Baraho ri asungudo gatara [gu zungudizungudi tarambiri naora rii gene mara] ni rogo gu ba i naasungodoho rogo, dee ni Kristano Korea yo ambedi koyo du bawirikipai ni nga guko naagia monzigo rogo ũkusa fugo ku tue yo rogo gako wiri umba radio. “Mo rogo pambori”? wogu ri asanako. Gu bawirikipai re akaragapai ki ya: “Pambori ho du mi na nyemuhe te.” Gipai re azeresanga kpoto dawirani yo te. Ri asusi kumbatayo na fugo ki ya: “Wa regbo kaa susa, . . . boro rengbe ka ida gupai nga ka sia pambori sa. Ono ka ni adunga na inohe tipa pambori ya, ni rengbe ka sia gu irairaha.” Fugo gu bawirikipai re a’ariatihe, na ko ki tona ka dega tuko kuti fugo dawirani na nyemuhe. Ri afu gu buku fuko nga Bakusiahe ho Naberã Tipa Roni? (rogo pa-Ngirisi) na ri ki gumba gupai fuko nga gi buku re aundo ko ni bakerehe ho regbo ka da ni tipa ko sia pambori. Ko adi gu buku re zanga kapa. Rogo gu poso naye fuo gure, ko atona ka wisigo Baibiri na aDezire Yekova, sidu ko nandu awere ku pati adunguratise dunduko nga ga dungurati.
15. Waigu wiri degude sa Japan yo naatona wisigopai rogo Baibiri na aboro, na waigu i afu mosoro kurii gari asadatise?
15 Japan yo, Megumi nga guri du garãri 12 nabi gari sukuru ni zugozugo ati tipa tungusapai na yugopai. Ri arengbe ka tona wisigopai rogo Baibiri na dungu aboro. Waigu Megumi amanga gipai re? Wa duhe nga ri nageda Baibiri watadu ri nambakada tiri tipa adunguratise ti regbo gu ongoda nga ga bebere uru, agu akurari du ri na yo rogo bangisa riko nasana ri dedede tipa gupai ri amangaha. Bete aguyo nasana Megumi tipa ndu gupai ri naarimisonga tiri tini kurogo gu mangaapai nga ga sukuru ya. Megumi na karagapai sa gayo asanahe na ki gumba gupai fuyo nga Mbori na rimoko kina tini. Gere nazingisa nyemupai dedede ti agu aboro nadega tuyo kuti gari pai. Ri ki sana yo fuo gure tipa wisigopai nayo rogo Baibiri. Megumi nanungusa awisigopai na aboro awere 20—aguyo 18 dagba agu akurari du ri nayo rogo gari riko.
16. Waigu Wirina Cameroon yo arengbe ka tona wisigo Baibiri na bete aboro dagba airawia?
16 Cameroon yo, badona akumba muambe naamangasunge rogo basunge ayambu wirina nga guko naakparaka agu awaraga nasakarogo Baibiri yo fu agu aboro naasusa ti gene. Ni ida yo ka sawia gu wirina re, i asana ko tipa ndu gupai ko aidanga kuti Tirinita, we iferno, watadu pa zangakpio nga ga mbisimo tini ya. Nimanga ko sunge na Baibiri, wirinarani akaragapai sa gayo asanahe. Ni sangbanaha, aboro biata dagba agi akumba re aidipa wisigo Baibiri. Gu ko sa dagbayo yo, nga Daniel, atona kaa ndu ku pati adunguratise yo na ki gbarasipa agu ahe nadu beko dunduko nga gu nadu na pai dagba na sangbaatoro. (Yugoti 21:8) Kusende ti garã sa, i abapatizi ko.
17. Waigu awirina rogo gu ringara nga El Salvador amangisunge na birĩ tipa ka tungusapai fu gu kumba naidanga ka gia pangbanga nga ga Kindo ti tonatonaha ya?
17 El Salvador yo, kumba sa anavo gako kere ango pangbadimo ti agu aregbo dunduko ko anibi aDezire Yekova mbembedii rogo gu rago re. Gu kumba re anisungudi aDezire tipa i susi, ko kini karaga gu ango re fuo gure ku kporoyo. Awirina aarengbanga ka fura fu gu kumba re te. Sidu rogo kura uru sa, i adiberã ka asada kura birĩ. Ni ino yo gupai nga ka gu kumba re arengbe arengba ka gia gupai i aagumbaha, i adiberã ka tungusapai fu gu ango re. I aye kurogo gu kporo re, ki fu sene fu gu ango re, na ki gumbapa wai i aduna ngbarago tipa gu mamu nga ga fura furu. I afura tipa gu regbo paradiso nika du auru kpotosende, gu regbo boro nika dunga ho na zinga ya—ii, nga gu regbo zavura anyaa ka du rogo pazereda. Fuo gure, i ki poikuti gu ango re rogo irisa na ki tona gayo nduge. Gu ngbayo azere behe gbe nga, gu kumba re akuru kpuko yo ki hõmbupai beyo tipa gupai nga ko azanga fu mamu fu agu aDezire re i fura na ko. Ko adi amagazini, na i ki tona wisigo Baibiri na ko kporo. Gi kumba re awere nga wirinarani—ni guni sa dagba agu ‘ahe ngba angba.’
“Ka Oni Gúnde nga Ya”
18. Gini kpakarakpakaraapai dungu aKristano agbia tiyo nani, ono waigu Yekova abi airisiko?
18 Oni namanga gu nyanyakipa sunge nga ga tungusapa Kindo gbiati sa aboro ni abawirikii? Kangia si wo, oni nirengo na mamu beroni. Nzunzu tie, mbiko gi sunge re du Yekova adungura agu ‘ahe ngba angba’ kurogo gako bambu. (Yoane 6:44) Rengo du, oni rengbe arengba ka duna mbugo watadu na zera kpotose yo ti kura aregbo. Ti kura aregbo, beteyo—zavura dagba gu ruru amoyambu nga ga Yekova yo—nasovura kuti gu berãpai nga nyakinga payo bangirise te. Ono ka kpotoroni yo zerenga ya! Yekova nabi aguyo nibasasa nairiso ko ni agu aboro ngba angba, na ko na bakere nyemu gaoni bata.—2 Petero 3:9.
19. Gini ngarasahe Yekova afuhe rogo Agai, na waigu rengbe agi afugo re ka duni mburu ome fu rani?
19 Ho ani abi gupai ni nga kpotorani yo zere, singia mbiko sogote watadu gbegbere apai, afugo Yekova fu agu aYuda nayego ku ringara kpuyo yo rengbe ka duni mburu ome fu rani. Rogo Agai 2:4-6, ani nageda gupai nga: “Ako Zerubabera, ono mo dú nyanyaki awere, wo poi Yekova; Ako Yosua wiri Yosadaka nga gbiamotumo mo dú nyanyaki; oni aboro ringara dunduko, oni dú nyanyaki, wo poi Yekova; oni mángi sunge, bambiko mi du na oni, wo poi Yekova nga ga arimbasa ko, ku sangba gi kidohe nga gu mi akido fu roni ho oni aye ni ringara Ezipeta yo. Gi Toro nanye dagba roni, ka oni gúnde nga ya. Bambiko ya Yekova nga ga arimbasa ko wẽ: Mi azígizo angbangbaturũ na kpotosende na baime, na ugu sende bara sa berewe ti rago ngbutuko.” Ani kparia gupai nga anga Yekova nangarasa rani gbua ani du nyanyaki te, ono ko nafu gu gene fu rani a rengbe ani ka du rogo nyanyakii. Wai? Ani kparianga agu afugo nafu kido nga: “Mi du na oni.” Nga gupai nanyakasa idapase ka ino gupai nga ka ani vura gbia tirani na apai nga gu naka na ani ti nduge kumbatayo, Yekova na kina rani!—ARomo 8:31.
20. Rogo gini gene gu taarimo naamanganga mbata ya ahiiso ga Yekova bambu awere?
20 Yekova aima yugo gupai nirengo nga ko na gako aboro. Nzunzu tie, si teketeke wa kina gu ko agumbaha kungba gu nebi nangia Agai: “Gu taarimo nikadu fu gi bambu re giza, si adú ni babakere he ti gu naadu mbata, . . . mi ki fu zereda ku rogo gi ba re.” (Agai 2:9) Nirengo, ani nabi babakere taarimo kisusi areme rogo ga Yekova yekaru nga ga toro. Oni ngere, akama akutu nga ga aboro natiria sa ndikidi iriso na agarã nibasasa. I nariga agiyo re wenengai rogo toroyo, na zavura rogo gi zegino hi be zuu re, i nagbia ngbarago be gu zereda nga gu kina gu zereda nika du rogo ga Mbori vovo zegino nika susa ha.—Yesaya 9:6, 7; Ruka 12:42.
21. Si naida gaani diaberã ngia gine?
21 Pa zigizo Yekova rikaaboro rogo Aramegido kindi kumbatayo. (Yugoti 16:14, 16) Ani manginga sunge tie na gu yangara regbo nye tipa ka batasa unga nga ga dungu aboro. Ani dunga adu tie nyanyakii na ki duna kido nabaha kuti Yekova. Ani diberã kaa ndu kumbatayo na irisombori rogo gako bakere yekaru nga ga toro, ki nihiisihe na gu kura ‘ahe ngba angba’ ni bakerehe daho Yekova nika ya ni gaani sunge nyasi.
[Gu rukutu kekeapai du bandu kpewaraga yo]
a Bakio gu marã nga gu i agamuhe tipa pa dua ga Soromo yekaru rengbe ka du mbembedii wa abirioni 40 rogo marã aMerikani kuti gu genoho du awere. I amoi agu ahe dunduko nga gu i aamanganga sunge nani ya kurogo gu baigo ahe nga ga yekaru.—1 Abakindo 7:51.
b Na kparapai ti gu gbia motumo nangia ga Yisaraere, Yesu adunga na ingapai tiko nga gu si aida i dadi he te. Ono tie, gu gako aboromotumo koditiyo kuti ko aduna ingapai mbiko i angbeyo dagba gu ngbatunga aboro duna ingapai.—Yugoti 5:9, 10.
c Oni bi gu Ngbaõbambu Sinziri nga ga Wegebe ti rameru 15, rogo 1998, akpewaraga 17-22 (rogo pa-Ngirisi).
Oni Natingidaha?
• Ginihe nyakipaha gbe bangiri Yekova susi aũkumuko?
• Kure Yesu nga gu nauka nafu undo fu gini badona aboro ue?
• Ada nangia agu ‘ahe ngba angba’ nga aguyo si adu nga i ahiiso ga Yekova bambu na taarimo?
• Gini gopai du berani nayugo gupai nga ga Agai sangbanebi nadigo areme?
[Gu kpiahe du ti kpewaraga 9]
Gbia motumo anatumo na babagara tipa gu ingaapai nga ga aRevi kini tumo na meme tipa gu ingaapai nga ga gu ngbatunga aYisaraere nangianga aboromotumo ya
[Keke kpiahe ti kpewaraga 10]
(For fully formatted text, see publication)
Oni ini rogo gupai ga Yekova kuru yekaru arukubaha?
Darĩdarĩ kperokoo
Ziazia Ba
Ba Motumo
Ziazia Ba Kisusi
Mbaraza
Vurukporo
[Gu kpiahe du ti kpewaraga 12]
Sunge tungusapai rogo zegino dunduko naye na badungu aboro kisusi kurogo gu bambu nga ga Yekova