“Mi Du Na Oni”

“Gu bamokedi nga ga Yekova ko, ki gumba pai fu aboro ni sangba Yekova [ki yaa], ‘Mi du na oni, wo poi Yekova.’”—AGAI 1:13.

1. Gini apai namangi mbata Yesu afura tipaha kumbatayo nawiratihe na agu apai namanga ti gi gaani regbo re?

ANI naraka ti gu regbo du paha ninyanyakihe rogo gu pangbangaa nga ga aboro. A wa gu digisidigisi sangbaanebi nga ga Ziazia Kekeapai ayugoho, ani aima digo niraki ti “rago Gbia” naatona rogo gu garã nangia 1914 kada ku awere. (Yugoti 1:10) Si rengbe kadu nga oni ima duna inohe wenengai tipa gu sangbanebi du tipa “rago gbia,” na oni ki ima ino gupai nga, Yesu aringbisi gu “rago Wiri boro” nikadu ho ti ni na ome Kindo beko kuti gu rago nangia ga Noa na kuti “rago Roto.” (Ruka 17:26, 28) Ngba gi gene re, Ziazia Kekeapai nayugo gupai nga, agu apai namangi ti “rago Noa” na ti “rago Roto” adu nikpiapai tipa gi gaani regbo re. Ono tie, kurapai kinaho nawiratihe na agu apai namanga ti gi gaani regbo re nga gu si aida ani wisigihe kakaka.

2. Gini sunge Yekova afuhe fu Agai na Zekaraya?

² Ani wisiginga gu sino raka nadu bakuru kusayo ti regbo agu anebi ni aEbere nangia Agai na Zekaraya. Gini pangbangaa gi ruru anebi du ue re agumbaha nga gu daada tipa ga Yekova aboro mangisunge nani ti gi gaani regbo re? Agai na Zekaraya angia ‘amokedi nga ga Yekova yo’ fu aYuda tingbafuo karagayo tiyo Babera yo, nga gu ringara i azi yo kurogoho. I afu sunge fuyo nga ga rugusa gupai bangiri awiri aYisaraere nga, Yekova nikaa songoda yo asongoda kutingba sunge dua yekaru berewe kubaha. (Agai 1:13; Zekaraya 4:8, 9) Wa vura duhe nga agu abuku Agai na Zekaraya akehe si gbua nikina guruhe, si nga kina papara gu ‘Ziazia Kekeapai dunduko naye be ga Mbori toro, si ki rengbe tipa yugopai, tipa zapai, tipa ruga boro, na tipa raba aboro rogo rurupai.’—2 Timoteo 3:16.

Si Naida Ani Moiberã Rani Kuti gu Sangbaanebi Nga ga Agai na Zekaraya

3, 4. Tipagine si aida ani moiberã rani ti ni kuti gu sangbaanebi nga ga Agai na ga Zekaraya?

³ Nirengo, gu pangbangaa nangia ga Agai na Zekaraya afu undo fu agu aYuda naaraka ti gu regbo re, na gu gayo sangbaanebi re adigi kina ti gu bangisa regbo re a. Wa vura duhe wo, tipagine rengbe ani kadu naa kido ti ni nga zavura ti gi gaani regbo re, si daada furani ani moiberã rani kuti agi abuku du ue re? AEbere 12:26-29 naundo rani ani gi rogo gipai yo re wenengai. Rogo gu veresi re, gu mokedi nangia Pauro adipai rogo gu buku nga ga Agai 2:6, nga gu nafura tipa Mbori ya ko “azígizo angbangbaturũ na kpotosende.” Niyangarapai tie, gi zigizo rago re nika ‘sisika ambataabakindo nga ga angbii, na ki gbarasi ome angbii nga ga arikaaboro.’—Agai 2:22.

⁴ Fuo Pauro dipai rogo gu buku nga Agai, ko afura tipa gupai nika manga gu ‘ngbii nga ga arikaaboro,’ na ki fura a berewe tipa gu kindo kiipaha kisusi nga gu ka i agberesanga ha ya, nga gu i nika fuhe fu mbedimbedi aKristano. (AEbere 12:28) Gupai Pauro akehe rogo AEbere, nga gu buku i akehe rogo bambata sa kama agarã fuo Batikayo Kristo, si naundo rani ani girogo gu sangbaanebi nangia ga Agai na ga Zekaraya wenengai ya si afura tipa gupai nika manga kumbatayo. Yangara mbedimbedi aKristano kinaho kindi auru kpotosende, nga aguyo nga adikumbo gu Kindo nga ga Masiya na Yesu. Gu sangbaanebi nga ga Agai na ga Zekaraya na nyanyaki rogoyo ti gi gaani regbo re.

5, 6. Gini apai naandu sa gu sangbaanebi nangia nga Agai na Zekaraya?

⁵ Gu buku nga ga Ezara natingida agu apai namangi mbata fu gu sangbaanebi nangia ga Agai na ga Zekaraya. Fuo aYuda karagatiyo Babera yo rogo gu garã nangia 537 M.B.K., nga gu ringara i aziyo kurogoho, gu Bazogo nangia Zerubabera na gu gbiamotumo nangia Yosua, (watadu Yesua) aangera kuriisunge maamburu vovo yekaru rogo gu garã nangia 536 M.B.K. (Ezara 3:8-13; 5:1) Wa si avura du nga pa maa mburu yekaru adu nipa ngbarago fu aYuda, fuoho aturanga te i ki mbu gunde si dibeyo. Ezara 4:4 nayawee avura aYuda nangia ‘aboro gu ringara re arungburasi kpotoyo yo, kini gundesi yo tipa dua yekaru.’ Agu avurayo re adu gbe nga aboro Somorona nga aguyo nanaagumba azire-kitangbaangase kutiyo. Agi asogo aYuda re asosodi gu bakindo nangia ga aparaso ko, ko rugusi sunge dua yekaru berewe kubaha.—Ezara 4:10-21.

⁶ Wa aYuda aduadu zaaza mbata na sunge dua yekaru, i aima zera fuo tona aboro kaa serekpo yo. I atona ka maa berãyo fuo kina agu apai i aakpinyemuhe. Wa si avura duwo, fuo susa agarã 16 fuo maa yo mburu yekaru, rogo gu garã nangia 520 M.B.K., Yekova akedi Agai na Zekaraya tipa i ndu ka nyakasa aYuda tipa i tona sunge dua yekaru berewe kubaha. (Agai 1:1; Zekaraya 1:1) Gupai agu aboro Yekova akedi yo agumbaha anyakasi aYuda berewe na si ki sa yo i bi apai ziazia nga Yekova nikaa songoda yo asongoda kutingba gu sunge i nikaa mangaha re, sidu i ki tona sunge dua yekaru berewe ki mangihe daho sunge duaha anyasi ni rogo gu garã nangia 515 M.B.K.—Ezara 6:14, 15.

7. Gini apai naamanga ti regbo agu anebi nangia Agai na Zekaraya duna wiratise dagbaha na agu apai namanga ti gi gaani regbo re?

⁷ Ya mo oni ininga rogo gupai agi apai re ayugoho furani areme? Ani na sunge berani si aida ani mangihe nga gu du nikodikodihe kuti sunge tungusapa gu “wene pangbanga nga ga ngbi [kindo].” (Matayo 24:14) I anyakasipa gi sunge re gbe tingbafuo Bambata Vura Nga ga Zegino. Wa kinagu i akusi agu aYuda nadu rogo gu ndikidi Babera nadumbata, nga gu ba i aziyo kurogoho, kinawo a i akusi gu ga Yekova aboro nga aguyo du ti gi gaani regbo re rogo Babera Duna Bakere Ome ti ni, nga bariwara ngbii zire pambori. Gu mbedimbedi aKristano nga ga Mbori yo aima futiyo zanga nyomoro tipa sunge tungusapai, yugopai, na sunge yamba aboro kurogo ndikidi irisombori. Gi sunge re nandu kindi kumbatayo ti gi gaani regbo re nibakerehe gbe, na si rengbe arengba kadu nga oni kina dagba agu aboro yo namanga gi sunge re a. Regbo du re tipa ani mangi gi sunge re, bambiko gi gbegbere sino raka ani araka rogoho re ima mbeda ka digo! Si naida ani ndu na gi sunge Mbori afuhe furani re kindi kina kumbatayo, da kinaho Yekova nika rimiso tiko ni kurogo agu apai nga ga aboro ti regbo “bakere gberãngbi.” (Matayo 24:21) Gipai re nika dia gbegbereapai dunduko kusayo na si ki mbugene tipa ndikidi irisombori rengbe ka ndu kumbatayo rogo arago dunduko auru kpotosende.

8. Tipagine si aida ani du naa kido ti ni ya Yekova nikaa songoda rani asongoda kindi kutingba gaani sunge nga ga tungusapai?

⁸ A wa gu sangbaanebi nga ga Agai na ga Zekaraya ayugoho, ani rengbe arengba ka kido kuti Yekova zanga kapa ya ko nikaa songoda rani asongoda na kini fu maku kuri rani baraho ani amangasunge ni fuko na ngbaduraniyo dunduko. Wa vura duhe nga dungu aboro naida ka kandasi ga Mbori amoyambu watadu ka rugusa gayo sunge nga gu ko afuhe fuyo, anga zogarago ho sa naarengbe ka rugusa sunge tungusapai tipa ka si sononga kumbatayo ya te. Oni berẽnga pa wai Yekova nafu maku kurii sunge tungusapai nga ga kindo na bakere sona kumbatayo vuru gu dungu abawe agarã susi kusayo re, natona tingbafuo Bambata Vura Nga ga Zegino ki dakuti gi gaani regbo re. Wa vura duhe wo, bakere sunge kinaho kindi si aida ani mangihe.

9. Ginipai namangi bakuru kusayo si aida ani gbeberã rani kuti ni, na tipagine?

⁹ Waigu rengbe agu apai ani awirikaha rogo gu sangbaanebi nga ga Agai na ga Zekaraya ka nyakasa rani tipa ani mangi agu arugute Mbori nafuhe furani tipa tungusapai na yugopai fu aboro? Sidu, ani wisiginga agu apai rengbe ani ka wirikaha rogo agu abuku du ue nga ga Ziazia Kekeapai re. Nikpiapai, oni makianga gu bete futufutuapai nga gu namangi nibipa sunge dua Yekaru nga gu si aida agu aYuda nakaragatiyo ba zioyo yo mangihe. A wa i nigumbaha mbata, agu aYuda nakaragatiyo Babera yo akanga kuti gu gayo sunge nangia ga dua yekaru te. Fuo maa yo mburu yekaru kindi, i andunga na sungehe kumbatayo berewe niipo te. Gini iraira bipai natona dagbayo? Na ginipai rengbe ani ka wirikaha ti gupai namangi yo re?

Si Naida Ani Duna Ruru Bipai Tipa Aũzegino

10. Gini iraira bipai aYuda asonosihe, na gine nangia sangbanaha?

¹⁰ Agu aYuda nakaragatiyo ku Yerusarema yo aayawee: ‘Rago atadanga tipa i dua ga Yekova bambu berewe kubaha te.’ (Agai 1:2) Ti gu regbo i atona sunge dua yekaru, na ki moimburuhe rogo gu garã nangia 536 M.B.K., i apenga gupai nga “rago ata da nga tipa dua ga Yekova bambu berewe te” te. Ono fuo regbo ngbutuko, i ambu gu sogote nangia ga gu rikaaboro i asungu dagbayo gbiati gu serekpohe nangia ga abazogo, si du na ome kuriyo. AYuda atona kaa nyakasa kina pa akpuyo naapa agu ahe narengbe ka fu wasa fuyo. Nibi gu kparakparapai nadu dagba akpuyo nga gu i aaduaha na agu angua nadu niwene kendegekendegehe na gu yekaru i aima mbu sungehe bebere gene, Yekova asana yo ki yaa: ‘Ya mo gere nga gu regbo oni nitironi ka raka rogo gaoni abambu du nikendegekendegehe ningua, ho du gi bambu ni re nigbarasigbarasihe?’—Agai 1:4.

11. Tipagine Yekova afu rugute ti ni fu agu aYuda nadu ti regbo Agai?

¹¹ Ii, nirengo, aYuda aima aria gayo bipai ti gupai i abihe mbata na nyanyakipaha. Kuba gupai nga ga Mbori aboro moi ga Yekova ringbisapai tipa bungia yekaru nibambatapai bangiriyo, i atona ka maaberã yo tipa kina agu apai naabi kina yo naapa akpuyo. I aima mbu dua ga Mbori bambu berewe kubaha nga gu bambu nadu tipa irisoko. Gu fugo Yekova du nikekehe rogo Agai 1:5 anyakasi aYuda i ‘nibérẽ tipa gayo apai.’ Yekova aya fuyo wee i ru ka berãkurii agu apai i aamangaha, na kini makiapa agu apai naamanga yo wa i ambu sunge dua yekaru.

12, 13. Wai Agai 1:6 aringbisipa agu apai naamanga aYuda, na gine nga rogo gu veresi yo re?

¹² A wa rengbe oni ka bihe, pa peresa aYuda pa agu apai mbatayo naabi kina yo aye na gbegbere sangbanaha fu kina yo nitiyo. Oni berẽnga kurii gupai Mbori abihe naamanga yo rogo Agai 1:6, nga gu nayaa: “Oni arũ he bakere, ki ke he toni gbua; oni ri he, ono oni adu nga na riahe be roni rengbe wa sa te; oni mbiri he, ono oni ambi nga be he te; oni ukadi tironi [na rokoo], ono kpotoroni afaa nga wa sa te; gu ni nabi marã gani sunge ni nabi he ka iga ha kina rogo sipisipi mangu yo.”

¹³ AYuda adu rogo gu ringara kina boro Mbori nitiko afuhe fuyo, ono wa si avura duwo, agu ahe i aruhe, si aidanga kuho i aida si idi kuhoni te. Tipagine si adu ti ni wo? Si aduwo bambiko Yekova afunga maku berewe kurii agu asunge i aamangaha te, a wa ko aima za yo mbata. (Pa Fu Rugute ni Ue he 28:38-48) Nizanga yo ga Yekova maku, i anaaruahe ka si aidanga ya, i kini ke kina bete riahe gbua, nga gu i aarengbanga ka mbi behe ya. Nizanga yo gako maku, i aukadinga tiyo na gu remu narengbe ka faasa kpotoyo te. Si aduwa agu amarã i aagbiaha, si aandu kina ku korokoro mangu yo mbiko si arengbanga ka undoyo na gayo ambugo te. Gine nga rogo gu fugoyo nga, “oni mbiri he, ono oni ambi nga be he te [“oni akpinga ha te,” NW]”? Tiiworo gu fugoyo re ayugonga gupai nga kpi buda arengbe kadu nimaku be Mbori kurii aYuda te, bambiko ko aidanga na kpibuda te. (1 Samuere 25:36; Asanza 23:29- 35) Kuba gure, gu fugo re ayugupa zanga fu Mbori maku kuriyo. Si adu nga agu abuda dunduko i nikaa mangaha, si nikadu nikina betehe, ka i arengbanga behe ya. Agai 1:6 nayaa: “Oni mbiri he, ono oni ambi nga be he te.”

14, 15. Ginipai ani awirikaha ti gu pangbangaa du rogo Agai 1:6?

¹⁴ Anga gupai ani awirikaha tipa wai aYuda anaadua akpuyo, si nga ani berẽpa wai si aida ani mbakadi akpurani na kini kendegehe te. Gu nebi nangia Amosa afu zahe fu agu aYisaraere nangia airakumuko bakuru kusayo mbata fu i ga na aYuda ku Babera yo nizizi yo tipa ‘agu abambu i duaha rogo rindi ambarã’ na kaa ‘pika auru agu abarame i ambakadihe rogo rindi ambarã.’ (Amosa 3:15; 6:4) Gu wene abambu i aduaha na gu kendegekendege aũkporo nadu beyo dunduko, si anyenga anye kindi te. Agu avurayo naye ka zioyo aima saa agu ahe re beyo dunduko na ki gbarasipa agu akuraha. Ono wa si avura duwo, fuo susa agarã kusa fuo karaga aYuda tiyo Babera yo, nangia gu ringara i adu rogoho nizizi yo tipa agarã 70, dungu ga Mbori aboro awirikanga pai ti gupai namangi mbata fu i ga naayo nizizi aboro re te. Ya mo ani rengbe ka wirikapai ti gupai namangi yo re? Si rengbe ka daada ani sana tirani wa du ani nibasasa na agu asanahe nga: ‘Ka pe rengo, mi naanyakasa kina pa mbakada kpure sa naapa kendegaha? Na ginipai tigaha tipa mbakadatise tipa bakere wirikapai nga ga sukuru tipa ka gbia wene sunge, si ki vura du nga pa manga mi he wo rengbe ka dia regbo bere nigbangaha watadu badungu agarã vurũ, si kini kandasi gu nyanyakipa apai ka mi naamangaha rogo gimi irisombori?’—Ruka 12:20, 21; 1 Timoteo 6:17-19.

¹⁵ Agu apangbangaa ani agedaha rogo Agai 1:6 naundo rani ani ini gupai nga, kina Mbori sa rengbe ka fu maku kuri rani, gaani raka kini mo kadu niwenehe. Agu aYuda nadu bakuru kusayo adunga na ga Mbori maku riyo te, fuo i zanga ga gako maku kindi, sangbanaha akuru nga kina bakere arungo naaye kuriyo. Singia ani na aũkumuko berani kpaima watadu si berani te, ka ga Yekova maku adunga ri rani ya, gu pagume du dagbarani naako dunga niwenehe te. (Matayo 25:34-40; 2 Akorindo 9:8-12) Wa vura duhe wo, waigu rengbe ani ka gbia gu ga Yekova maku re?

Yekova Nafu Undo Furani Rogo gu Gene Nga ga Gako Toro

16-18. Gine nangia bambata rogo gu fugoyo du nikekehe rogo Zekaraya 4:6?

¹⁶ Ga Mbori toro asa gu kura nebi nadu ti kina gu bangisa regbo nangia ga Agai re rimoko angia Zekaraya, tipa ko nyakasipa gu gene Yekova afõngbadu agu aboro yo ngbaha nafu tiyo fuko na gu gene ko afu maku fuyo ngbaha. Gipai re nayugopa wai a ko nika fu maku kurironi. Ani nagedaha wa gere: “Be ngarã te, be tandu a te, ono be gi Toro, wo poi Yekova nga ga arimbasa ko.” (Zekaraya 4:6) Si rengbe kadu nga oni aima digo nigi gi veresi re bara dunguhe i nigedihe, ono rogoyo angia gine fu agu aYuda nadu ti gu regbo nangia ga Agai na ga Zekaraya, na rogoyo nga gine tipa roni areme?

¹⁷ Oni tingidi gupai nga, agu afugo Agai na Zekaraya ga Mbori toro adu kugiiyo i gumbaha re, si adu na wene sangbanaha ti gu regbo nangiaha re. Gupai agu anebi nadu ue re agumbaha afu ome berewe fu ruru aYuda. Agai atona gumba gako sangbaanebi rogo sita diwi rogo gu garã nangia 520 M.B.K. Zekaraya atona gumba gako sangbaanebi tigako rogo muambe diwi kina vuru gu bangisa garã yo re a. (Zekaraya1:1) A wa duhe nikekehe rogo Agai 2:18, aYuda atona mangasunge berewe kakaka rogo ribua diwi ti gu mburu yekaru i amoihe. Gu pangbangaa re afõngbadu aYuda yo i mangipai, na i airisi sangba Yekova nikido yo kutiko ya ko nikaa songoda yo asongoda. Agu afugo du nikekehe rogo Zekaraya 4:6, si nayugo gupai nga, Yekova du naasongoda yo.

¹⁸ Ho aYuda akaragatiyo ni kurogo gayo ringara rogo gu garã nangia 537 M.B.K., i adunga na gu ome nga ga aborovura beyo te. Ono wa si avura du wo, Yekova abanda yo na ki ngbe kumbatayo fuyo ho i ayego ni Babera yo. Kurii gure, ga Yekova toro angbe fu aYuda kumbatayo kini mbakadi apai fuyo ngbutuko fuo i karagatiyo kurogo gayo ringara na ki tona sunge dua yekaru. Ho i atona ka mangasunge ni berewe fu Yekova na ngbaduyo yo dunduko, Yekova aasongoda yo asongoda na gako ziazia toro.

19. Gini kere kpakarapai ga Mbori toro adibehe?

¹⁹ Gu yuguyuguapai Zekaraya abihe gu timburukuraha bara muambe, si aundo ko tipa ko ini gupai nirengo nga Yekova nika duadu na gako aboro, nga aguyo si adu nga i nikadu niruru yo na kini mangisunge yekaru daho sungehe nika nyasa ni. Gu biama yuguyugupai du nikekehe rogo kapita 3 nga ga Zekaraya, si nayugu gupai nga, Satana asovura kakaka kuti gu bakere asadatise aYuda aamangaha tipa ka nyasa sunge dua yekaru. (Zekaraya 3:1) Zanga kapa, Satana adunga na ngbarago ka bi gu Gbiamotumo nangia Yosua ko ningerekurii sunge dua yekaru berewe nivovoho te. Wa Bakitingbanga avura kaa sovura kuti aYuda nyanyakii tipa ka rugusa yo ti dua yekaru, ga Yekova toro aamangasunge amanga nyanyakii tipa ka dia gu kpakaraapai narengbe ka kiso gene beyo na kini fu ome berewe fuyo tipa i naandu kumbatayo kindi na sunge dua yekaru daho sungehe anyasi ni naabaha dunduko.

20. Wai ga Mbori ziazia toro aundo aYuda tipa i mangi gu zinahe Mbori agumbaha fuyo tipa dua yekaru?

²⁰ Si awiri gupai nga, asogote aye kuriyo wakina bagangara nga gu i arengbanga ka diabehe ya, nga gu naye be agu abazogo nga aguyo narengbe ka rugusa gu sunge re. Ono wa si avura du wo, Yekova akidohe ya agu apai nadu bangiriyo wakina bakere “bagangara” re, i nika diaha adia kusayo ki sa baha nikina “kpasakpasa rago.” (Zekaraya 4:7) Kina boro gupai re nzunzu namangi! Bakindo Darayawesa gu Bambata Ko amangi wisigopai, fuoho ko ki kuru bara waraga nangia gu Kurese akehe kini idihe aYuda ndu tipa ka dua Yekaru berewe kubaha. Fuo duhe were, Darayawesa adi gu zahe kusayo nadu tipa gayo sunge na ki asia aYuda i tona gayo sunge berewe, na ki fu asiahe i kusi marã fuyo rogo gu baigo marã nangia ga ringara tipa si undo aYuda na gu sunge i amangaha. Nairiwo gu ariapai namangi re! Ya mo ga Mbori toro amanganga nyanyaki sunge rogo gupai namangi re tee? Zanga tikö, ga Mbori toro nirengo aima manga nyanyaki sunge rogo gipai re. Sunge dua yekaru anyasi rogo gu garã nangia 515 M.B.K., nangia sita garã zogarago nangia ga Darayawesa gu Bambata Ko.—Ezara 6:1, 15.

21. (a) Bakuru kusayo, wai Mbori “azigizo arikaaboro dunduko” na wai du “agu ahe ngba bangiri arikaaboro” aye koyo du ko ni? (b) Wai gi sangbaanebi re nidigisidigisihe ti gi gaani regbo re?

²¹ Rogo Agai 2:5, gu nebi re aundo aYuda tipa i tingidipa gu mokido Yekova asigiraha dagbako naayo pavuru Bagangara Sinai yo ti gu regbo ‘bagangara aawo zigizigi.’ (Gate 19:18) Ti gu regbo nangia ga Agai na ga Zekaraya, Yekova aya ko nika zigizo rago azigizo berewe, a wa ringbisi yo paha rogo agu afugo narukuba kuraapai du rogo veresi 6 na 7 kina rogo gu bangisa kitabu nga ga Agai kapita 2 re. Si adu nga agu apai nikaa manga rogo gu bariwara ngbii nangia ga aParaso, si nikadu nikina unzuguro unzuguroho, ono wa si avura duwo, si adu nga sunge dua yekaru nikaa ndu andu kindi kina kumbatayo daho si ka nyasa ni. Fuo gure agu aboro nangianga aYuda ya, nangia “agu ahe ngba bangiri arikaaboro dunduko,” i aye ka kodabeyo na aYuda ka taasarimo Mbori rogo gu ba irisoko re. Nibi gu bakere digisidigisi gu sangbanebi re nga gu du ti gi gaani regbo re, Mbori ima “zigizo arikaaboro dunduko” rogo gu tungusapai nga ga aKristano, na sangbanaha kidu nga “agu ahe ngba bangiri arikaaboro dunduko [nga aboro]” ima ye sa iriso ndikidi Mbori na kini koditiyo na yangara mbedimbedi aKristano. Nirengo, mbedimbedi aKristano na kura akandoro nahiiso ga Yekova bambu na taarimo. Gi ngbatunga ndikidi airisimbori re nasungudo gu regbo na idapase Yekova nika ‘zigizo ngbangbaturũ na kpotosende’ ngba kura gene berewe. Gupai re nika manga wo tipa ka gburuwa agu aome nga ga kindo nga ga arikaaboro na ki gbarasihe dunduko.—Agai 2:22.

22. Wai i ‘azigizo’ rikaaboro ti gi gaani regbo re, na sangbanaha nga gine, na gini kurapai berewe du kumbatayo kindi nika manga?

²² I natingida rani naapa gu zigizo rago nga gu ima manga rogo dungu agene, a wa yuguyo paha kuti “angbangbaturũ na kpotosende na baime, na ugu sende.” Bambata papara gi kere zigizo rago re angia pa ba Satana Bakitingbanga na gako adaimona kusayo ngbangbaturũ yo ku auru kpotosende no. (Yugoti 12:7-12) Kurii gure, gu sunge tungusapai ga Mbori mbedimbedi aKristano angera kuriihe ima zigizo gu papara raka nga ga agu ariko nga ga aboro naraka auru kpotosende rogo gi sino raka yo du awere re. (Yugoti 11:18) Wa vura du apai wa gure, “bakere rimbasa aboro” ni agu aboro du dagba gu wene ahe yo nga ga rikaaboro nakodatiyo na agu aYisaraere nga ga toro yo kurogo iriso Yekova. (Yugoti 7:9, 10) Bakere rimbasa aboro koditiyo kina sa na mbedimbedi aKristano kaa tungusapa gu wene pangbangaa nayawee mbembedii kumbatayo, Mbori nika zigizo rikaaboro ti regbo Aramegido. Gupai nika manga re nika mbugene tipa ndikidi irisombori rengbe na arago dunduko auru kpotosende.

Oni Natingidaha?

• Gini regbo Agai na Zekaraya amangisunge ti ni na rogo gini kpakaraapai?

• Waigu rengbe oni ka manga agu apangbangaa Agai na Zekaraya agumbaha?

• Tipagine oni abi gupai ti ni du rogo Zekaraya 4:6 nigu papara Ziazia Kekeapai nangarasa boro?

[Gu kpiahe du ti kpewaraga 8]

Agu apai Agai na Zekaraya akehe naundo rani ani ini gupai nga, Yekova nasongoda gako aboro asongoda

[Gu kpiahe du ti kpewaraga 10]

‘Ya mo regbo du re tipa oni nitironi naaraka rogo gaoni abambu yo du nikendegekendegehe, baraho du gi bambu ni re nigbarasigbarasihe?’

[Gu kpiahe du ti kpewaraga 12]

Ga Yekova aboro nakodatiyo kurogo sunge gbata ‘agu ahe ngba angba dagba rikaaboro yo’